شيزوفرينيا روايتى رقم 7 (بدون عد الاجزاء) بالعامية المصرية ...
إهداء//
الى من امتلكت كل نبضة تحيينى،الى من احبها بعدد انفاسى
الى غاليتى
ابنتى ...ساجدة ♥
الحب كله حبيته فيها ....
...............................................................
ح(1)
ƒc ƒcƒc ƒcƒc ƒcƒc ƒcƒc ƒcƒc ƒc
عربية رمادى احدث موديل السنة ...وقفت تركن طالع منها صوت عالى من الاغانى
طلع منها شاب ف اواخر التلاتينات
دقنه منبته، ومحددها
لبسه مهندم والوانه هادية
بس ططالع بيغنى منها بصوت عالى كأنه فكوكب لوحده
قفل ال mb3
وقفل العربية كلها..وطالع
قابله البواب بيفطر هو ومراته
عم رضوان البواب:صباح الخير يا دكتور حسن
حسن: صباح النور ياعم رضوان
البواب: الف مبروووك ربنا يتمم ع خير يارب
حسن: الله يبارك فيك بس ع ايه ؟؟
البواب بص لمراته ورجع بصله تانى : ع ايه ده ايه يا دكتور
حسن سابه وهو بيضحك وطالع لشقته وهو بيدندن برضو
لقى ف صوت اغانى عاليه طالعه من شقته ..بيفتح الباب
فوشه بنوتة معدية بتزغرد
لولولولولولولولولولولولى
وقف استغرب وبص فساعته وكلم نفسه
حسن: زغاريد الساعه 11 الا تلت الصبح
(وقف البنت) انتى مين
سابته ومشيت وهى بتضحك
حسن: (طلع خطوتين يقرا رقم الشقه بتاعتهم ورجع تانى ) هى شقه 11
شقتنا
مين دول؟؟!
وفجأة جت بنوتة كيوت اوووى ، وشها بيبى فيس
وشعرها ناعم وطويل جاية..وجاى شعرها يجرى وراها
وحضنت حسن وباسته
سلمى: حسن!! حبيبى انت جيت
حسن: (بيبوسها) اه يا لولى جيت...فيه ايه ايه كمية البنات دى
وايه الزغاريد دى
هو انتى اجرتى الشقه من ورايا؟
سلمى: ههههه اخص عليك وربنا ازعل منك..يعنى مش عارف ولا عامل نفسك مش عارف
حسن: مش عارف وعامل نفسك ومش عارف وكمية الى مش عارفين فالجملة ده
م تقولى فيه ايه
سلمى: حسن متبقاش غلس!! انهاردة فرحى يا حسن
حسن: فرحك !! من ورايا
سلمى: (ضربته ضربه خفيفه فصدره ) هههه اعمل ايه اذا كان اخويا فملكوت تانى لوحده ، بقالك يومين مش بتيجى البيت
حضرتك طبعا
ومش حضرت حنتى امبارح
ولا اى حاجة ليا
حسن: (باسها من دماغها) حبيبتى الف مبروووك يا لولى
بس انتى عارفة
اخوكى
(بيتكلم وداخل اوضته وسلمى وراه)
مشاغله كتير وكده
سلمى: مشاغلك كتير مش ع اختك حبيبتك ..ده انا الوحيدة
حسن: ياستى مش الحج محمد معاكى هو ومراته
سلمى: ايوة محمد مش سايبنى خالص ومراته معايا فكل حاجة
بس برضو انا عايزاكم فكل حاجة
انتو اخواتى الى طلعت بيهم من الدنيا
مش كفاية فيوم زى ده مش معايا لا بابا ولا ماما ولا حتى اخت بنت !(قالتهم بحزن)
حسن: (حضنها وبص لعنيها) حبيبتى احنا كلنا جمبك متزعليش بقى
وهما بيتكلمو طلعت بنت من اوضته وبتزغرد
حسن بص عليها
حسن: مين دى
سلمى: اصحابى يا حسن..
حسن: طيب خدى شلة العوانس دول واقفلى الباب وراكى وهدى صوت الاغانى شوية
عايز اناااااام
سلمى: تنام!!!
حسن: اه انام ..فيها ايه
سلمى: حسن انت عارف الساعه كام ، وانا امتى هطلع عالكوافير
وامتى فرحى هيبدأ ووو
حسن: (مسك بوقها) شششش ، ساعتين بس وهقوم اجيلك
بس احاول اظبط الطاسة
بقالى يومين مش بنام والله
سلمى: (زقته) خلاص روح نام يا حسن..روح
حسن: طب يلا (زقها برة الاوضة وقفل الباب ورمى نفسه ع سريره)
برة بقى
سلمى ماشية تكلم نفسها ...
سلمى: كده يا حسن ماشى ...ماشى
وقفتها صاحبتها
مايا: بت يا سلمى ، ايه الى مرجع اخوكى الصبح كده من شغله
عايزة تقوليلى فيه مجانين بيقعدو يكشفو للصبح
سلمى: اصلا دى عيشة حسن، العيادة يطلع منها ع نايت
مايا: نايت!!
سلمى: ايوة متستغربيش..بيروح يسمع بنت صوتها حلو كده بتغنى هناك
خدنى مرة معاه وسمعهالى
مايا: وهو ازاى يوديكى اماكن زى دى
سلمى: م انتى عارفه حسن ..مجنون!
مايا: وبعد النايت
سلمى: بعد النايت بيكون الفجر قرب يدن يروح المسجد يتوضى ويصلى وو
مايا: مسجد!! مسجد مين ؟
ازاى
سلمى: اه والله هههههه بصى انا حفهمك الى ميعرفش حسن كويس
يقول عليه مجنون رسمى فهمى نظمى
بس الى يقرب منه يعرف ع طول انه
مايا: لاسع!!
سلمى: بالظبط هههههه هو بيروح النايت ده مش بيشرب حاجة هناك عشان يحافظ ع وضوءه يدوب حاجة ساقعه ويقعد يسمع البنت دى
ويصلى ويطلع يفطر مع اصحابة من ع عربية فول
ويتمشى شوية
ويروح كافيه بتاع واحدة صاحبنه..يطلب ال لاتيه بتاعه المخصوص يعدل دماغه
وييجى ينام
ويقوم يصلى الفروض الى عليه
ويعيد يومه
مايا: ممممممم احنا لو قعدنا نحكى ع اخوكى المجنون ده مش هنخلص..وانتى فرحك انهاردة
يلا ياختى نشوف ورانا ايه
سلمى: يلا !!
ƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒc
اضواء هادية ...
وعالبيست ،سلمى وعريسها
والبنات والشباب بيرقصو حواليهم
فعنيكى عارفه انا شوفت ايه ..شوفت حلم انا نفسى فيه
كنت عايش طول حياتى مش لاقية
من يومها حبيتك اوام
فاكر انا كل الكلام
حتى لون لبسك يوميها مش ناسيه...
وحسن واقف من بعيد بيبصلهم ويضحك ،وماسك ف ايده كاس بيشرب منه
وقرب ناحيته وحط ايده ع كتفه
محمد:حسن! واقف بتعمل ايه ؟
حسن: بتشمس
محمد: هههه بتتشمس..و بتشرب ايه ياحسن
حسن: هو انا واقف فالمديرية ولا ايه ايه واقف ليه
بتشرب ايه
جاى ليه
طلع رخصتك
محمد: (بيشم بوقه) حسن! انت بتشرب ففرح اختك
حسن: اه
محمد: ففرح اختك؟!
حسن: مش فاهم ايه الاستغراب ده ..مالو فرح اختى جامع فرح اختى مينفعش اشرب فيه
محمد: انت بتستهبل ! ده بدل م توقف جمبها صاحى ومفوق كده
حسن: وانت شايفنى سكران يعنى.محمد الله يخليك مش طالباك ففرح اختك
خالص نهائى
محمد: اصلا ولا عمرك هتبقى راجل
حسن: كفاية انك انت راجل ياعم
محمد: ايه الاستهتار الى انت فيه ده
حسن: يووووه (ساب المكان الى هو فيه ووقف فحته تانية)
فجأة راح ناحية الدى جى
حسن: بقولك ايه ..الفرح ميبقاش فرح بالناس الى انت مشغلها دى
الدى جى مان: اؤمر حضرتك
حسن: الامر لله حبيب قلبى ..بص انت جو جنيفر وانريكى وحماقى وعمرو دول مياكلش
الفرح ميبقاش فرح الا بالمهرجانات
دى جى مان: يعنى عايزنى اشغل مهرجان
حسن: اوكا واورتيجا والليثى وعيييييييش
دى جى مان شغل اغنية لخبطلى خالى لمحمود الليثى ..حسن انبسط وعمل بايده اوووكـ
ومسك الجاكيت بتاعه وقلعه وحطه ع جنب ومسك ايد سلمى يرقص معاها
وقام الفرح ولع مرة واحدة
وكل البنات قامت حواليهم ...وكان كل شوية يمسك بنت بنت يرقص معاها
والى تضحك والى تتماشى معاها
وعمل جو للفرح فعلا,,
ومن وسط كل البنات جت واحدة مسكت ايده ورقصت معاه
كانت لابسه فستان اسود قصير
وشعرها مصبوغ احمر
وعيونها واسعه وجميلة
حسن عجبته اكتر بنوتةفيهم برغم انهم ميعرفوش بعض..بس توقع انها من صحاب سلمى اخته
وعادى يعنى
من بعيد واقف محمد ومراته ...
عنان: دى حركات اخوك يعملها ...حد يقول ياناس ان ده دكتور
محمد: شكله اتهبل زى المرضى بتوعه وبقى زيهم
عنان: ههههه لا معلش يا محمد انا من يوم خطوبتنا وشايفه ان حسن لاسع
محمد: انا مش عارف هو ليه الوحيد الىفينا الى دماغه عاملة كده
عنان: بس تعرف (كاتمه الضحكة) الى زيه ميكبرش ابدآ
يعنى هو اكبركم
بس تبان انت الكبير ..
محمد: عايزة ايه من واحد ضارب الدنيا طناش وعمره م حب يتحمل مسئوليه
يكبر ازاى
عنان:(بتسمع محمد جوزها ومركزه مع حسن والبنت الى بترقص معاه)
محمد: انتى مركزة مع ايه ؟
عنان: ابدآ البنت الى بترقص مع حسن تحس انها تعرفه
مش غريبة عنه اقصد
محمد: تلاقى واحدة يا من ملاحيسه يا من اللستة بتاعته
عنان: لا ياشيخ دى شكلها بنت ناس ..
محمد: هههههههههههههه
الاغنية خلصت وحسن وقف ع جنب البيست ياخد نفسه ... ولسه الشباب مولعين الفرح بعد م هو ابتداه
وجت البنوتة ناحيته
البنت: بترقص حلو اوى يا ابيه ..ا
حسن: انا نفسى اتقطع ..(خد باله) ابيه!!
اه انا اخو سلمى الكبير..بس مش لدرجه ابيه يعنى
قوليلى ياحسن
البنت: وانا ايه ذنبى اذا كنت متعودة سنين اقولك يا ابيه
حسن: ابيه منين هو انا اعرفك
البنت: هههههههههه
حسن: وبتضحكى كمان
البنت: يعنى مش بتشبه عليا طيب
حسن: لا بصراحه معروف ان الميكاب بيخفى 80% من العيوب يعنى جايز دلوقتى انا شايفك
ولا الاميرة ديانا
وفجأة حقيقتك عائشة الكيلانى
البنت: هههههههه انت جرئ اوى
لا ع فكرة انا مش متقله ميكاب عشان الناس تتعرف عليا بسهوله
حسن: هههههههههه اسف بس مش بحب اجامل
البنت: ولا يهمك ..مانا عارفاك
حسن: عارفانى منين بقى متخليش دماغى تلف
صاحبة سلمى من زمان
البنت: ههه ممممم صاحبة سلمى وانت وابيه محمد
حاجة زى كده
(وهى بتتكلم رفعت خصله شعر من ع وشها فبان جزء زى الندب او خياطة بسيطة كده فجبهة وشها)
حسن: ممممم تمام
حسن مكانش ليه اهتمام يتعرف عالبنت دى..مبيحبش يتعب نفسه ف الغاز
قفل حوارهم بكلمة تمام
وسابها وقعد ع تربيزة بعيدة شوية
طلع حجات من جيبه وطلب طبق صغير
جه عليه جرى محمد اخوه
محمد : هتلف ففرح اختك ؟
حسن: محمد هو انت الكويستشان مارك بتاع الليلة دى! شغال هتشرب ففرح اختك
هتلف ففرح اختك
محمد: يا اخى مرة تبقى كده عادى وتصرفاتك كويسة ..مرة لله
مش عارف تقعد كام ساعة ع بعض مظبوط
حسن: والمصحف زهقتنى من الفرح ويومه (وهو بيشاور بص ع ساعته) ايه ده !
يانهار ابيض
محمد: فيه ايه ؟
حسن: ممم لا مافيش ..اوعى
جرى ع سلمى وهى قاعدة فالكوشة جمب جوزها
وميل ع ودانها
"معلش لولى لازم امشى"
سلمى: (بصوت عالى ) تمشى!!
تمشى تروح فين
حسن: ايه السياح ده يا سلمى! عندى فرح لازم احضره بتاع واحد صاحبى
سلمى: فرح صاحبك!! تسيب فرح اختك وتروح لصاحبك
حسن: وفيها ايه يعنى
عنان مرات اخوه : يا دكتور حسن ازاى تسيب اختك فيوم زى ده
حسن: اختى ياستى ساعة زمن وهتروح مع جوزها وهتنسى ابويا مش انا شخصيآ
ورقص وهيصة وهيصنا
ووصلناها لجوزها بنفسنا
وتورتة وقطعوها
نستنى لما يخلفو كمان!
عنان: لا بصراحة مش فهماك
حسن: اختى خلاص قمت بالواجب معاها، صاحبى ليه واجب عندى ولازم ارده
معلش بقى
(باسها فدماغها وهى متنرفزة)
حد قالك اعملى فرحك فنفس اليوم بتاع صاحبى
سلام يااحلى عروسة (بيبص لعريسها) خد بالك منها ها!
نزل ومش ومحمد بيبص عليه باستياء..
ƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒc
ع آخر لحظة العربية بتفرمل!! وبتعمل صوت
بينزل بسرعه وبيدخل الكنسية
المكان مليان ناس ومعازيم...بنات وشباب زى القمر
دخل حسن بيبص حواليه شاورله من بعيد
باسم !
حسن: معلش اتأخرت
باسم: ياعم برنلك من بدرى
حسن: كنت ففرح اختى (بيبص ع مراسم الزواج )
باسم: فرح اختك! وسيبت فرح اختك وجيت لا خويا؟
حسن: هى ليه كل الناس بتستغرب انى سبت فرح سلمى وجيت ، هو انا لازم الزق فيه لحد الفجر يعنى
باسم: ياعم ده فرح اختك، انت لو كنت قولتلى كنت قدرت ده ومش استعجلتك
مانا اهو فرح اخويا مش هسيبه واروح مكان تانى
حسن: اعملهم ايه اذا كانو مدونيش خلفيه قبل الفرح
باسم: خلفيه!! ده انت فالضياع
خلصت المراسم والعريس باس عروسته وابتدت الناس تهنيهم
حسن فضل يقعد ورا مع صاحبه باسم مش بيحب الزحمة
وزى م يكون عينه اتشدت مرة واحدة ناحية
طيف لونه موف!
فستان رقيق
صاحبته واقفه قدامه ع طول وبتضحك ...حسن عنيه ركزت عليها
وباسم بيكلمه
باسم: بس ياسيدى ... حسن!
ياحسن
حسن: نعم
باسم: فينك
حسن: قولى يا باسم هما كل الى هنا تعرفهم
باسم: تقريبآ
حسن: البنت الى لابسه فستان موف فوشى دى تعرفها
باسم: انهى واحدة
حسن: انت بتبص فين (وجه راسه عليها) دى
باسم: اااااااااااه جيلان
دى جارتنا
حسن: جيلان!! حلو جيلان
ودى تبعكم ولا تبع الناس التانيين
باسم: الى هو ازاى ؟
حسن: يعنى مسيحية برضو ولا قبطية
باسم: لا نصرانية هههههه
حسن: طب قوم عرفنى عليها (قومه )
باسم: تتعرف ع مين استنى بس
حسن: طب احسن خليك مكانك (زقه يقعد تانى)
راح ناحيتها بهدوء وهى بتتكلم مع شلة واقفه معاها
حسن: الفستان ده تحففه ...ممكن اعرف جايباه منين
جيلان: ههههههه المفروض ان ده سؤال عادى من راجل
حسن: اه
جيلان: هههههههههههه
حسن: بتضحكى ليه والله عاجبنى
جيلان: ده جايباه من اتيليه فساتين صاحبته سورية
حسن: طب ممكن تعرفينى ع صاحبته
جيلان: ههههههه
حسن: (مد ايده) المفروض انى كنت هكدب واقولك عماد ولا بطرس ولا جرجس
عشان اتعرف عليكى
بس بصراحة الكدب خيبة
انا حسن
صاحب باسم (شاور عليه)
مكنش ينفع اروح انهاردة من غير م اتعرف عليكى وتوعدينى اشوفك تانى
جيلان: لا مش معقول ههههههههههه فيه ناس كده
باسم جه من بعيد وسند ع كتف حسن: دكتور مجانين ياستى
حسن: اسمها دكتور صحة نفسية وعصبية يا حيوان ، يعنى انا الى بيجينى مش بيطلع الا لو عامل دماااااغ
جيلان: هههههه مش عارفة ليه مش قادرة ابطل ضحك
حسن: ده بس عشان شوفتينى ..انا كده
دعوة للضحك واللعب والحب..مافيش جد
جيلان: مممم طيب اوعدك انى اجيلك عشان اعمل دماغ
باسم: هتروحيله العيادة ؟؟!
جيلان: اها
باسم: مكنتش اعرف انك عيانة يا جيلان ...طلعتى مجنونة
حسن: هستناكى
مشيت من جنبه وميلت ناحية ودنه بهدوء من غير م حد ياخد باله
"ع فكرة..انا كمان عايزة اتعرف عليك"
الكلمة دى عجبت حسن اوووى
خد سهرته المعتادة ..ولفته
بس المرة دى روح بدرى عن كل يوم..يعنى قبل م الصبح يشقشق
فضل فعربيته شوية
الاغانى بصوتها العالى ..وهو بصوته الجميل
بيغنى معاها
"انا بحبه وكل حاجة فيا ليه بتشتااااااق..سمونى كل الناس فحبه اميير العشاق"
هيمان خالص معاها لقى حد منظرة مش ولابد بيخبط ع شباك العربية
...ممكن تنزل؟
حسن: انا
...اه
حسن: مينفعش مشغل التكيف
...بقولك لو سمحت انزل يابو صوت كروان انت
حسن نزل من العربية
حسن: (ابتسامة ساخرة) عجبك صوتى!
...:ياسلااااام هو فيه احلى من كده
حسن: عارف اغنية ايه دى
....: لا
حسن: امير العشاق لسامو زين
....حلوة اوى..بس انا هسمعك الجزء التانى ، امير الانتقام
ضربة بمطوة فبطنة وجرى
حسن: ااااااااااااااااااه، انت مين ياعم انت
الحقونى يانااااااااااس
وقع جمب العربية
ƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒcƒc ƒc
#شيزوفرينيا
#لــنوراسماعيل
ليست هناك تعليقات:
إرسال تعليق