♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
المدير : بص ياشريف ..انا حذرتك مرة و2 من انك تستخدم الشغل وعملاء الشغل فحياتك الشخصية حصل
شريف: يا فندم ده موضوع وحصل من سنين وعلقت واحدة !
المدير: افندم!
شريف: قصدى عرفت واحدة يعنى وخلاص خدت جيزه ومكررتهاش
المدير: مممم كنت عارف انك هتنكر
الورق الى قدامى ده ميخلنيش اعمل حاجه ف امرك غير حاجة واحدة
شريف: ايه هى يا فندم!
المدير: انى ارفدك..انت مرفود يا شريف!
شريف: احم..حضرتك بتقول الف مبروك يا شريف!!
المدير: بقولك انت
مرفود يا شريف
اتفضل اطلع برة الشركة وسلم كل حاجه ومش عايز اشوف خلقتك هنا تانى !
مفهوم
فالوقت ده كانت نهال عند مى فالاتيليه ..كانت بتأجر فستان خطوبتها الجديد..
مى: هتتخطبى ؟ امتى وازاى
وشريف فين؟
امنية كانت موجودة وقامت لما شافتها عشان تحكى براحتها وراحت تظبط الفساتين فالعرض مع البنت العاملة..
نهال: شريف خلاص ..بح
خد كارته الى كنت بلعب بيه
مى: هو انتو سبتو بعض؟
نهال: انا الى سبته يامى .. شريف لعب بيا وبمشاعرى
ووجعنى وظلم نادر
ده كله عشان حضرته يضحك ويفرح وبعد م ياخد يومينه معايا يسيبنى زى اى بنت عرفها
ويرجع لامنية
امنية سمعت وبتبص من بعيد باستغراب
نهال: لكن انا بقى علمته..انا مش كل البنات واحد وان خلاص مبقاش فيه بنات طيبة اليومين دول تصدق لعب العبيط الى هو بيعمله ويخيل عليها
مى: فهمينى عملتى ايه (بخضة)
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
" يعنى ورقة جواز عرفى ..وورقة تثبت بوجود جنين وتم اجهاضه
شريف: عرفى !! اجهاض
يا استاذ فرحات انا مش فاهم حاجة
البنت الى قاعدة: (بتمثل العياط) طبعآ مش فاهم م انت تعمل عملتك وتنكر وتضيع مستقبلى كله
شريف: ايه يا ست انتى انا اعرفك منين
الاستاذ فرحات: ورقة جواز عرفى ودى امضا حضرتك مش كده
شريف: (باصص ومبرئ وساااكت) ايوة هى
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
نهال: فيوم قولتله تعالى اكتبلى كلمتين حلوين ياشريف احتفظ بيهم وامضيلى هنا
وفعلا مضالى
مى: واستخدمتى الامضى ؟
نهال: exactly
مى: يخربيتك
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
الاستاذ فرحات: يعنى بتنكر انك اتجوزت البنت دى ، وبتنكر انك كنت هتخلف منها وعرضتها لعملية كانت هتموتها
وبتنكر كمان انك اصلا عرفتها من الشركة هنا لانها احد عملائها اعمل فيك اييه
البنت: طبعآ ينكر بعد م قضى ع حياتى ومستقبلى كله
شريف: يا خالتى ام شوقى انا شوفتك قبل كده ..جواز واجهاض ايه
ده فيلم ابيض واسود وما اشوفهوش كمان
الاستاذ فرحات: (قام من ع مكتبه وزقه فكتفه) طب يلا مستغنين عن خدماتك
اتفضل برة
وسلم كل الحجات الى فعهدتك
شريف: يا استاذ فرحات اسمعنى قسمآ بالله ده مقلب من بنت الصرمة خطيبتى الى فاتت
الاستاذ فرحات: كمان بتشتم..يلا برة (بيزقه وزمايله بيبصو لما على الصوت)
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
" عندى صديقة دكتورة ، هى الى خدمتنى فطلوع الشهادة دى
وصاحبتى دى لما عرفت بالى عمله معايا كانت عايزة تقوم معايا بالواجب بأى شكل..وفعلا هى الى راحت وكتبنا اسمها فالورقة العرفى
وفتقرير انها عملت عملية خطيرة
ده غير انها فعلا عميله قديمة فالشركة واتصلت مرة وحاولت تستميل شريف وانا جنبها وهو عاكسها اثناء المكالمة وهى اثبتت ده
ودلوقتى شريف ان شاء الله خسر شغله ..عشان يبقى يعرف ان فيه ناس عضتها مرة اوووى
امنية جريت عليها لما سمعت الحوار كله ..
امنية: حرام عليكى يا شيخه هو كان عمللك ايه لكل ده ..تأذيه فشغله بعد العمر ده كله
هو هيتصرف ازاى
انتى مش بتخافى ربنا
نهال: وهو مخافش ربنا فكل بنت عشمها بالجواز وهرب ..ومخافش ربنا وهو بيحطم قلبين عشان بس حضرته متروحش منه صيده زيي حطها فدماغه
ومخافش ربنا لما ظلمك وفضل عليكى واحدة من اياهم وانتو كنتو هتتجوزو
امنية سمعتها واتسمرت مكانها معرفتش ترد!
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
شريف بيلم فحاجته ومخنوق..كان هاين عليه يعيط
يصوت
اول مرة يتحط فمقلب كده ..بس شغله ده اهم حاجه
هيعمل ايه دلوقتى
بيلم حاجته وزمايله كلهم حواليه ..
اكرم:طب احكى حصل ايه طيب يا شريف
صلاح: لا ياعم انت مش هتمشى احنا هندخل للمدير ونصلح سوء التفاهم ده
شريف: (بيلم وهو متعصب) بنت الجزمة الى كنت خاطبها لفقتلى تهمة وفرحات بيه م صدق وطردنى
لكن والله ماااشى
فضيتلها وهطلعهم ع جتتها الوان
اكرم: طيب اهدى ومتمشيش واحنا هندخل نكلمه
شريف: خلاص يا اكرم هى خربت خلاص
صلاح: طب حد يكلم وسام عاصم هو برضو ليه كلمه مسموعه هنا وده شريف يعنى
ممكن يعملوله خاطر
شريف لبس شنطة اللاب وماسك الحجات فايده وطالع
شريف: ولا وسام ولا حسام.هى خلصت خلاص
اشوفكم بخير
مشى وطالع وهما بيوصلو ..كانت بشرى واقفه عند الباب بتاع الكوريدور وبتعيط جاااااامد ..من غير م حد يحس
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
مى: الفساتين كلها تحت امرك يا نهال ..نقى الى تحبيه (بزعل)
نهال: انتى اتغيرتى ليه كده لما حكتلك؟
مى: انا عجبنى كل حاجه عملتيها فيه وقولت اهى تربية بتربيهاله عشان ميعملش حاجة فبنات الناس تانى
بس كونه ممكن يترفد بسببك
حرام قطع العيش يا نهال
نهال: والله هو الى عمل كده فنفسه ..يشرب بقى
انا لغاية كده وراضيه اوى
شريف فالوقت ده كان راح لها النادى يسأل عليها لاقاهم قالوله انها فالاستديو
ومن الاستديو هما الى عرفوه انها بتأجر فستان خطوبتها هى ونادر من اتيليه " فرح"
بتاع مى وامنية !
وفلحظة وهما بيتكلمو كان داخل زى العربية الى من غير فرامل ..
شريف: يابنت الكلااااااااااااااااااااب
امنية: يالهوى !! شريف شريف استنى
مى: شريف ده محل شغل يا شريف مينفعش كده
نهال واقفه بعيد وكلها برود..كالمعتاد!
شريف: انا تخليهم يرفدونى وكمان بفضيحه، ده انا هخلى الدكاترة تحتار تبدء فيكى منين
نهال: ههههههه طب بس خد نفسك
هتضرب واحدة ست ! مش بعيده عليك بصراحه
وبعدين انا معملتش ليك اى حاجه ..ايه هى بلاوى وخلاص
شريف: اه ع اساس انى كنت ضارب شريطين برشام صراصير قمت اتجوزت فعلا البت دى وكمان خلفت
صح
امنية: (ماسكاه وبترجعه لورا) طب عشان خاطرى يا شريف انا مش قادرة عليك
نهال: اسمع ! فون صغير منى اجيبلك البوليس لحد هنا
يعنى مش هتبقى رفد وبس..هيبقى حبس كمان بتهمة التعدى عليا
شريف: ياعم سيبونى اجيبها من شعرها امسح بيها السقف بنت الحافى دى
مى: يوووووووووه خلاص ..نهال ممكن تيجى وقت تانى تشوفى الفستان الى انتى عايزاه
نهال: ع رائيك يامى..سورى مش هقدر اختار من عندك فستانى
انا ماشية
مشيت وهو باصص عايز يقوم ياكلها وامنية بتهديه ..
شريف: انا ..انا حتة بت متسواش 3 مليم تعمل فيا كده
ده انا علمت ع نص بنات مصر
تيجى دى تعمل فيا كل ده
مى: طب عالله تكون خلاص اتربيت من الى حصلك ده يا شريف لانك بصراحه زودتهم وكان لازملك درس
شريف: فيه ايه يا ست مى انتى كمان!!
امنية: خلاص خلاص يا جماعة ..شريف روح دلوقتى خد دوش واستريح
ونبقى نفكر بليل هتعمل ايه
هبقى اكلمك
شريف بص لامنية وخد حاجته ومشى ..
امنية: بصراحه بقى نهال دى زودتهم، حرام الى عملته فيه ده
مى: والله انتى الى هبلة جاتك نيلة فهبلك!
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
بليل ..
كان معاد وسام يتكلم مع بتول ومى زى كل يوم اسكايب !
هما كانو فالبيت .. وهو كان فالشغل
مى: بس يا حبيبى انت كده مش بتلحق تروح تنام شوية
وسام: يا مشمش لازم اتعب فالاول عشان بعدين ارتاح
بتول: باااااااااابى ..انت وحثتنى اوى خالث
وسام: يا حبيبة بابى ..ده بابى انتى وحشتيه جامد اوى خالص جدآ
بتول: لا انا اكتر منك
وسام: لا يا شيخه انا اكتر منك
بتول: لا يا سيخ انا اكتر هههه (بتضحك وبتستخبى فمامتها)
وسام: لا وحياة مامتك انا اكتر بقى
مى: بس مكتبك شيك اوى يا ويسو ..يارب تكون مرتاح فيه
وسام: اه يا حبيبتى مرتاح اوى، ربنا يعدى الايام ع خير ونتجمع بقى
مى: ياااااه عدى شهر يا ويسو ..شهر وانت مش هنا
مش جمبى
مش عندى
عدى ازاى ده!
وسام: عدى بطلوع الروح بالنسبة لى يا روحى ..عارفة كل يوم بطلع البيجامة الى اخدتها منك وقولتلك مش تغسليها فحضنى عشان اعرف انام
مى: وانا كمان زيك بالظبط..مغسلتش اخر تريننج كنت لابسه وبحضنه كل ليلة
وسام: هانت يا حبيبتى ..متقلقيش
مى: صحيح انا مش كنت عايزة اعكننك ..بس عندى خبر مش حلو كده
وسام: قولى
مى: شريف اترفد من الشغل !
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
كانت مى بتحكى لوسام الى حصل، فالوقت ده غادة كانت مش عارفة تنام من الهيصة الى برة فالصاله
صوت مزيكا وطبل وزمر
وقالبين البيت كبارية..ممدوح ونتالى !
ممدوح : (بيطبل ع تربيزة السفرا) اشطا عليك ياباشا ايوة اديلو
غادة لبست الروب وطلعت لهم وهى قايده ناااااااار
غادة: لو سمحت ممكن توطو الزفت ده ..مش عارفة انام انا والولد
ممدوح : (مدهاش اهتمام) يانتالى يا عسسسسسسل
غادة جريت وطفت الاغانى !
نتالى: اوووووف! ممدوح(بدلع)
ممدوح: بتطفى الاغانى ليه انتى ؟
غادة: بقولك مش عارفة اتخمد..عندى شغل بكرة والولد م صدقت ينام
ممدوح: والله بيتى انا ونتالى حبيبتى اشغل اغانى
اقلبه سيرك
اتشقلب
نولع فيه احنا حرين
نتالى: اى ..شو بيكى انتى حبيبتى..بيكفى وجودك ببيتنا وانتى غير مرغوب فيكى
غادة: انا غير مرغوب فيا يا عصاية مقشة!
ممدوح: بقولك ايه مش ناقصة منك صداع ..ادخلى اوضتك ولا امشى من هنا مش ناقصة وجع دماغ
غادة: وجع دماغ يا ممدوح يالى شبه ساعى البريد! حااااااااضر
راحت جابت عصايه مقشه وكسرت الكاسيت حتت.
ممدوح: ايه ده يا مفتريه عليه اقساااط (بيحاول ياخد منها العصاية)
نتالى: شو! هاد مو معقول كأنك كنت متزوج شى وحش ممدوح
غادة: انا وحش!! طييييييب يا مسلوعة آدى الوحش
جريت جابتها من شعرها ونيمتها عالارض وبركت فوقها وعضتها ونتالى بتصرح وبتخبط دماغها فالارض
وكل ما ممدوح يخلصها منها تديله بالبوكس ترجعه ورا مترين!
غادة: والله لاطلعكم عالمشرحة يا جوز معيز انتو
نتالى: اااااااااااااه الحقنى يا ممدوح ..بدها تقضى على
ممدوح: (واقع ورا) الحقينى انتى ، الله يكون فعونك اتوبيس ابو رجيله فوقك يا حبيبتى اجمدى
نتالى: والله بكسر دماغك كسر ..(بتعافر تقوم ومش قادرة)
غادة: رايحه فين يا ماما..انتى هتعرفى تقومى ازاى
عشان تبقى ترقصيله فالليلة الكبيرة بقى
واشوف انا ولا انتم فيها الشقه!
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
عدو كام يوم..
شريف قاعد بيعد ففلوسه الى معاه ، ويندب حظه. وقاعد فأوضته لوحده
بيكلم نفسه
شريف: 158 جنيه! هاه
كل الى حيلتى 158 جنيه
اعمل بيهم ايه دول ؟
(قام من ع سريره ونكش شعره زى المجانين)
اااااااه عرفت ..انا افتح بيهم مكتب سفريات
ده مبلغ مش بطال بردو
لاء لاء لاء
انا اعمل مزرعة فراخ وعجول ..اسمنهم
وأكلهم
وأكل معاهم ..ونكبر كلنا سوا ماهو يستحيل هعلفهم بكل م املك وماكلش معاهم
ولا احسن
احطهم فمقدم عربية ..واقلبها بالنفر واقول عتبه عتبه عتبه !
دخلت مامته عليه ..
الام: جرى ايه يا شريف ؟ مالك يابنى بتكلم نفسك؟
شريف: ابدآ ياامى ..بشوف هعمل ايه بالتركة الى حوشتها دى
هعمل مشروع نوعه ايه
ممممممم مش عارف ابدآ بأيه؟
الام: اتجننت يا واد! (خدت منه الفلوس وبصت لهم باستهزاء)
دول الى هتعمل بيهم مشروع
مشروع ايه ان شاء الله
ماهو لو مكنتش بتستلف ع حساب مرتبك طول الشهر ..وشغال عزومات وشرا هدوم ولبس
كان زمان فضل معاك حاجه دلوقت
لكن طول عمرك خايب وموكوس
شريف: خلاص بقى ياما يعنى اروح اكهربلك نفسى فعمود نور واخلص!
الام: خلاص..خلاص يا حبيبى
متحملش هم
انا هبيع حتتين الصيغه الى معايا
وانت كلم وسام صاحبك ..يشوفلك شغل معاه
هو يعنى الى خلق الشغل هنا مخلقش غيره
شريف: وسام صاحبى !فكرك وسام صاحبى بيشتغل ففرن ابوه هناك فيجيب اى حد عادى
ده مودياه واحدة اسمها كراويا
انا معنديش كراويا تتوسطلى
انا عندى كراويا تدينى ع دماغ امى
الام: ولا يهمك ..هتتعدل برضو
قوم ..قوم اغسل وشك وخد دوش وانزل
وفك عن نفسك..ده ربنا الى بيرزق مش حد غيره
ومامته بتتكلم فونه رن نمبر خارجى ..
شريف: الوو
وسام:السلام عليكم ورحمة الله وبركاته
شريف: وسام! وسام سنكرى..رفدونى وشردونى من بعدك
اهئ اهئ
وسام: اهدى كده وفهمنى كل حاجة..تمام
يمكن اعرف اتصرف
شريف: حكاية ايه ؟ الحكاية مش باين ليها معالم
وسام: يا شريف احكى واخلص..انا دماغى مقلوبة من ساعة م مى قالتلى
قولى مقلب ايه الى عملته فيك نهال ده
شريف: نهال دى هربطها ع شريط سكة حديد يعدى عليها بالبطئ قريب بس انت اصبر!
وسام: يابنى اتكلم اخلص
شريف: الست جايبة واحدة الشركة تتبلى عليا ..والاستاذ فرحات ما صدق وطردنى بطول دراعه ..
الحكاية من الاول يا عم وسام...
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
" انتى اتجننتى ! هتوافقى ع مين ؟"
امنية: زى م سمعتى ..وافقت اننا نتخطب وهو جه البيت وطلبنى من بابا
مى: بابا مين الى يطلبك منه ، ده باباكى نفسه اصغر منه
بتستعبطى ولا ايه حكايتك؟
امنية: لا مش بستعبط..انا حد بيوزن كل الامور بعقله
عمران راجل كويس..وعاقل بقدر كافى يحافظ عليا
ومرحب دآ بوجود مدثر معانا فالبيت ..وانا تعبت من الوحدة يا مى
مى: طيب ماهى جت عريسان كتير يابنتى ، اشمعنى الميت ده
امنية: عشان كل الى جم زى شريف كده ؟؟عيال مش بتوع تحمل مسؤلية
ده غير انهم محبوش مدثر ابنى
وانا عمرى م اجى ع مصلحه ابنى
مى: مونى! المرة الجاية مش هتبقى طلاق
هتبقى ارمله وحرم المرحوم
انتى ايه الى بتعمليه فنفسك ده!
امنية: انا عارفة انا بعمل ايه كويس..انا هعزم البنات
وابتدى احضر نفسى للخطوبة
مى: وبعدين فالشوطة الى خدتنا كلنا دى ياربى !
استر من الى جاى
مبقيناش مرتاحين..ولا واحدة فينا مبسوطة .
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
وسام والشباب وكاميليا خارجين من الشغل
بعد م خلص اليوم ..
كاميليا: شباب..طبعآ بكرة اوعو تنسوا معاد فرح بنت رئيس مجلس الادارة
الدعوات معاكم
طارق: فلتت منى ..مش كان حجزهالى
جمال: يعنى عارف شكلها اوى يا خويا ..اسكت ياشيخ
فادى: احتمال محضرش
كاميليا: لا لازم كلنا يعنى لازم كلنا .. (لفت وجت ناحية وسام) وسام انا نازلة مصر بعد بكرة
بعد الفرح
مش ناوى تنزل معايا؟
وسام: لا فكرة نزول دلوقتى مش هتنفع خالص ..انا بحاول اجمع كل مبلغ عشان ابعته مرة واحدة لاشتراك بتول فالنادى
كاميليا: خلاص اوك زى م تحب ..
وتانى يوم كانت ف صدفة فرحين سوا
يحضروهم مى ووسام وبتول
بس مش مع بعض
ومش فنفس المكان..
وسام بيحضر فرح بنت رئيس مجلس الادارة بتاع الشركة.. ومى بتحضر خطوبة امنية صاحبتها
ففرح امنية..
الاجواء عالضيق..فبيت العروسة
يدوب معارف العيليتين والاصدقاء وده كان شرط العريس
ومحدش دخل من صحاب امنية او معارف الا لو استغرب
اما بالنسبة للثلاثى
غادة ومنة ومى ... كانو هيطقو من جنابهم
غادة: بردو..بردو امنية وردتنا المفتحه ..تترمى الرمية دى
لبابا نويل ده
منة: المصيبة انها مش مبسوطة يا جماعه ..بصو كده ع وشها حزين اوى
مى: انا عارفة ومتأكده انها لسه بتموت فشريف..بس هو عيل فاشل وخايب
مينفعش توقف حياتها عليه
غادة: والله لا شريف ولا غير شريف، داهية تقطع الرجاله عالجواز
انا اهو وحدى
بشتغل وبصرف عليا و ع ابنى ولا الحوجه لحد
منة: بس مش مرهقه عليكى شغلك فالحضانة دى يا غادة ؟
غادة: لا اهو بس يا واد..هش يابت
واليوم بيعدى
ده غير انهم سامحين ان لؤى يبقى معايا..باخد بالى من ابنى برضو ومش بيفارقنى
مى: بس تقريبآ مرتبها مش اد كده..صح
غادة: ااااااه ده بالعافيه بيكفينى انا والواد
بقيت بربط الحزام اوى يااوختشى
منة: بصراحه خسيتى فالفترة دى يا دودا ههههههههه
غادة: عارفة يا ختى عارفة ..
مى: يلا ع رأى ويسو حبيب قلبى مصائب قوم عند قوم فوائد
(جاتلها مسج عالفون فتحت لاقت وسام عايز يكلمها)
حبيبى !
وسام: ايه القمر ده ..
مى: بس يا واد انت احلى ..بقولك ايه لف الكاميرا كده ورينى كل ستات الفرح
وسام: ع طول كده ! حاضر ياستى
(لف وفرجها)
مى: ايه ده ايه الغربان دى كله عبايات سودا كده
وسام: لا يا شيخه مش غربان دول بالعكس عجبونى جدآ .. من اول م جت الشباب والرجاله وهما لابسين كده
تقريبآ كانو عازلين الشباب عن البنات عشان يبقو حاضرين براحتهم
طريقة عجبتنى اوى
فيها احترام
مى: ممممم فعلا يلا يارب يبقو غربان فعينك ع طول
بقولك ايه هى الست بتاعه دى فين
وسام: (شاورلها بعنيه تسكت عشان هى ع نفس التربيزة )
مى: اااااااااه يا ناااااااارى ..دى تلقيحه
اقفل اقفل يا ويسو
قفلت مى .وسام قفل وهو بيضحك ميل عليه جمال
جمال: ايه رأئيك افراحهم ولا افراحنا
وسام: كل بلد وليها حلاوتها..
جمال: يلا عقبال فرحك يا كبير
وسام: فال الله ولا فالك.. لما تعملها انت قبلى
جمال: متخافش ناويها (بيبص عالبنات)
وسام: ههههه لا والله
نروح لكاميليا الى ميلت ع فادى تكلمه بهدوء ..
كاميليا: لا والله يا فادى انت عارف، الموضوع خلص زمان اوى
بس انا برتاح فالكلام معاك عشان انت دماغك حلوة وبتفهم مش زى جمال وطارق بيكبروا الموضوع من لاشئ
فادى: يعنى من الاخر انتى متعلقه بيه صح
كاميليا: مش عارفة ببقى عايزة احكى معاه كتييييير اوى ومنبطلش كلام
وارجع واقول مش من حقى
فادى: كنت لسه هقولك بيعشق مراته عشق
يعنى مينفعش يا كاميليا..اهو انتو دايمآ تضربو مثل بأى 2 بيحبو بعض اوى ومتمسكين ببعض
تقولو عليهم جوازه نصارى
ع اساس ان احنا معندناش طلاق ونهاية جوازتنا الموت
انا بقى بحس ان وسام ومراته كده
كاميليا: عارفة انه بيحبها ..وانا والله مش عايزه اخده منها ولا حاجة
بس بصراحه مستكتراه عليها
فادى: والله هما بيحبو بعض كده
كاميليا: ربنا يهنيهم ياسيدى
فادى: عارفه انتى لازملك حد يدخل حياتك ويشغلك بسرعه، والا مكنتيش حنيتى فوسام
(هز راسه باستهزاء) حكاية فكسانه من 20 سنة يعنى
فالفرح عند امنية ..
مى قامت تعمل طبق من البوفيه ليها هى وبنتها وكان ف شاب واقف متتبعها بالنظر من اول م جت
جابت الاطباق وهى جاية كانت هتوقع تتشنكل وقف ومسك منها الاطباق
مى: ثانكس اوى (ماشية)
الشاب: انتى كويسة ؟
مى: ايوة تمام..عن اذنك
رجعت لتربيزتها
منة: ده مالو ده؟
مى: سيبك انا عارفة
ضلمو الدنيا وهيرقصو العرسان سلو ..وقام كل كابل سوا
جه الشاب ده وعينه ع مى
الشاب: انا محمود ..العريس يبقى خالى
ممكن اتشرف بمشاركتك الرقصة دى
مى: (بصت باستغراب لصحباتها) وانا مى ودى بنتى والله ومتجوزة
روح شوفلك واحدة ع ادك
محمود: انا مش عايز غير انى ارقص معاكى ..ماليش دعوة بحياتك الشخصية
غادة: ومالو ياخويا ميضرش..روحى يامى روحى
منة: (كاتمة الضحكة) قومى يا ميوش عادى
مى: اقوم ايه ؟؟ معلش يااستاذ محمود انا مش برقص غير مع جوزى
اسفه هرفض دعوتك
محمود: اوك..متأسف
غادة: ليه يابت كده
مى: ارقص ايه ؟ هو انا لسه زى زمان
انا زوجه وام م تصحو
منة: رزقك طول عمرك فرجليكى يا مضروبة زمان دلوقت..مش عاتقه
مى عملت فوشها 5 من الحسد
خلصت الخطوبة ومى خدت عربية وسام ومروحه هى وبتول الى نامت خلاص
وفوسط الطريق العربية وقفت!
مى: يوووووووه ..حصل ايه
خرجت تشوف فيه ايه ؟ لاقت البطارية نامت
والطريق تقريبآ شبه فاضى
كل م تشاور لعربية م توقفش
لحد م جت عربية من بعيد ..وكان محمود!
محمود: ايه فيه حاجة حصلت معاكى ؟
مى: البطارية نامت..ممكن بس وصله كهربا من عندك لحد م اروح
محمود: يا سلام انا تحت امرك
محمود فعلا ساعدها ..بس مى مكانتش واقفة ع بعضها
مسكت دماغها مرة واحدة وبعدين جريت ع جنب ورجعت!!
محمود: (بخضة) فيه حاجة يا مدام مى
مى: معرفش مالى (دايخه وبتتكلم بالعافيه) شكل الاكل كان ف حاجه
(وقعت من طولها)
محمود: يا خبر !!
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
" الفرح كان جميل اوى"
وسام: اه
كاميليا: كنت مبسوط
وسام: اه الحمدلله ..قوليلى نازله بكرة فرحلة كام
كاميليا: 11 الصبح..يدوب اروح اظبط حاجتى
طارق: بكرة اجازة يا ويسو ..عايزين نخربها
نوريك كل حتة ف دبى هنا
هتتوهل يابنى..هتحلف م ترجع تانى
وسام: ان شاء الله ..الله المستعان
فادى: اه عشان تعرف الاماكن ولما تجيب المدام والامورة تفسحهم براحتك..هتبقى قديم بقى
وسام: تخيل كنت لسه بفكر فكده ..ربنا يخليهم لى يارب
كاميليا: يارب(بارتباك) طب انا وصلت
تصبحو ع خير
الشباب: وانتى من اهله..سلميلينا ع مصر
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
الدكتور: انت جوزها ؟
محمود: انا أ أ (مرتبك وبيبص ع مى الى نايمة ع سرير الكشف)
الدكتور: الادوية دى تجيبها حالا عندها ضعف شديد..نتيجة حمل!
مى قامت منفوضة من مكانها بعد م كانت بتموت
مى: ايه حمل!! بتقول حمل يا دكتور
هييييييييييييه وجبتلك عاصم يا ويسو جبتلك عصووووومى
وبعدين انتبهت لرد فعل الدكتور ومحمود وعلامات الاندهاش ع وشهم!
مى: اوووووه سورى..بس الفرحة خدتنى(وضحكت ضحكة كسوف)
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
ونكمل بكرة
استنوها يوميآ
#ويسو_وميوش_وتوتا_وخلصت_الحدوتة
#لنورإسماعيل
ليست هناك تعليقات:
إرسال تعليق