♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
الدكتور: يعنى حضرتك مخلفتش من سن 32 سنة ..معندكش غيرها مش كده
مى: هو فيه فالتحاليل حضرتك
الدكتور: انا قدامى حالة بتحصل كل كام سنة بنسبه 1 فالمليون
وسام: (بدأ يتوتر) الى هى
الدكتور: الى هى حضرتك مش هتقدر تخلف تانى..حصل عندك عقم!
مى اتصدمت وخبت بوقها بايدها ، لكن وسام كان هااادى خالص
مى: طب ازاى بعد م خلف يحصله عقم يا دكتور ؟انا مش فاهمة حاجه
الدكتور: حالة الاستاذ وسام بتحصل بس نادرة شوية
بتيجى من حجات كتير
اولها الوراثة
مى: بس اكيد فيه حل يعنى ، عملية
منظار
اى حل يا دكتور
وسام: مى خلاص (بصلها تسكت) شكرا ليك يا دكتور
تعبنا حضرتك
قايمين ماشيين
الدكتور: انت ممكن تبقى ع تواصل معايا ولو وصلنا لحل اكيد مش هتردد
وسام: الله المستعان ..اشكرك مرة تانية
لما رجعو البيت كأن مى ميتلها ميت ..منطقتش بأى كلمة
ع عكس وسام كان متقبل الامر عادى جدآ
بعد رجوعهم بكام ساعة .. وسام كان راح فالنوم
بيتقلب مش لقاها جمبه!
بص لقاها قاعده فالفراندا لوحدها .. طلع طرحه من طرحها وجه من وراها وغطا شعرها وقعد جمبها
وسام: فيه ايه ؟
مى: (مشت ايدها ع كتفه بحب) مافيش يا حبيبى
انت صحيت من النوم ليه
وسام: طبيعى لما اتقلب ومش الاقيكى جمبى ، اقلق ومعرفش انام تانى
مى: لا ياشيخ ..وبتعمل ايه بقى فدبى من غيرى ؟
بتقضيها صاحى طول الوقت
وسام: (مسك كف ايدها وضربها زى الاطفال) لا يا ام لسان طولك
مش بنام بانتظام..بس متغيريش الموضوع
مالك
من ساعة م جينا من عند الدكتور وانتى كده
مى: حاسة انى اتخبطت فدماغى بطوبة ..ازاى مش هنخلف تانى
ده انا كنت بحلم بعاصم وعائشة وبس يا واد
وذاكرى يابت
والبيت ده مليان دوشة ..وكلهم شبهى وشبهك
ازاى ؟؟
وسام: لالالا كده حرام، مينفعش نقول ع حاجة ربنا كاتبها علينا ازاى وليه
كده اسمه قنوط من رحمة ربنا
وبعدين احنا عندنا بنوتة زى القمر كل الناس بتحسدنا عليها
مش احسن مش كنا خلفنا نهائى يا مى
وفيه ناس كتير كده
مى: بس انا مستغربة رد فعلك..انت مش زعلان
وسام: انا ابقى ايه لما ازعل من قدر ربنا كاتبهولى من قبل م اتولد
وبعدين مش جديد عليا اعرف ده
ع فكرة انا شكلى ورثت بابا الله يرحمه
مى: مش فاهمة
وسام: الدكتور قبل م يقول وراثة ..انا افتكرت مرة كنت قاعد مع بابا وماما الله يرحمهم
كنت خلصت الدراسة فالجامعه وبدور ع شغل وكده
والكلام جاب بعضه..كانو بيحكو انى لما انزل الشغل البيت هيفضى عليهم
فانا هزرت وقولت مش كنتو جبتولى كام اخ وكام اخت كده بدل الوحدة دى
رد عليا بابا وقالى انه بعد م جيت انا الدنيا
ماما استنت سنتين واستعجلت الخلفه بعدى
وطبعا اتفاجئو بموضوع ان بابا حصل عنده مشاكل وانسداد هيؤدى انه ميخلفش بعدى
وبس..
مى: يعنى انت ورثت عمو (سرحت)
وسام: بصى بقى ..انا مش فاضل غير يوم واحد ف اجازتى
عملكو بكرة يوم وهم
من قبل م اجى وانا بحضرلكم فيه ..شيلى بقى التكشيرة الوحشة دى
ويلا نشوف هنستعد لليوم ده ازاى
وافتكرى دايمآ ان ربنا قال
" قل لن يصيبنا الا ما كتب الله لنا"
مى: نفسى ابقى بالهدوء الفظيع فتقبل الامور زيك كده
وسام: لازم تبقى بالهدوء لانك زعلتى عيطتى تقبلتى
ربنا قال كن فكانت
يبقى تقبلى بنفس راضيه احسن
وصدقينى لو ربنا رايد لينا باطفال بعد بتول .. هنخلف لو مليون انا تعبان
صح؟
مى: (ابتسمت ) صح..قولى بقى بكرة ده هنعمل فيه ايه
وسام: لا انتى متسأليش خااااالص..تمشى ورايا من سكات
مى: ياخوفى يبقى يوم عجيب زى زمان ..هههه فاكر اليوم الوسامى كنت هتخنق منك
مافيش حاجه حلوة فيه اليوم نهائى
وسام: تصدقى انك زى القطط (قرصها من خدها)
انتى مش عجبتك الرقصة يابت
مى: الرقصة بس..غير كده ودتنى معرض الكتاب ومحل تحف
وشوفت ناس عليها تراب يا راجل
وسام: مش احسن من الى جريت فالطريق المعاكس قدام العربيات ..وكانت هتموت بجنانها
ولا رقصت مع 2 عرسان متعرفهمش
فالشارع
مى: هههههه طب فاكر حادثة الموتوسيكل بتاعه الدليفرى ..لما نزلت زرع بصل انا عالارض
وسام: انتى معجونة بمية عفاريت ..لا الى مش قادر انساه لما بوستى ايدى عند باب شقتك وقولتلى بحبك
دخلت البيت وقولت البت دى مجنونة ولا لاسعه ولا ضاربه ولا حكايتها ايه
مى: (اتهزت بثقه) بس متنكرش انك وقعت فيا ساعتها ..انت كنت هتموت عليا يابنى
وسام: بصراحه اه ..ومنكرش
بس كنت عايز اعرف اخرك ..وخصوصآ الكدش الى كنتى بتعمليه ده
كنتى بتنامى منه ازاى
مى: فكرتنى ... هبقى اروح الكوافير واعمله فترة كيرلى
وسام: والله لو عملتيه يا مى هبيتك عالحيط مكان الزعافة عشان بتبقى شبهها
فالتسريحه دى
مى: كده طب مخصماك (قامت ودخلت جوه)
وسام: (باسها وهى ماشيه ) متقدريش
مى: ههههههه لا اقدر..اوعى كده
وسام: (شالها ع دراعاته) تؤ تؤ مش هوعى
مى: انت رخم وانا مخصماك
وسام: متقدرييييش تخاصمينى (مسك ايديها الاتنين بايد واحدة ) ها تطلبى ايه قبل م ننفذ فيكى حكم الاعدام
مى: عايزة أطة
وسام: احم ... انا قولت كده برضو ..تعرفى يا مشمش فدبى بيسمو ال أطة ايه ؟
مى: ايه
وسام: هقولك .....
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
"انتى بقى خلاص ..مش هتنزلى صهيب تانى مصر "
كاميليا: لا يافادى ..مش هينفع يبعد عنى تانى
فادى: انتى من فترة كبيرة بتروحى وتيجى بيه ..هو حصل حاجه معاكى وانتى مش عايزة تقولى
كاميليا: لا مافيش (بتشتغل)
فادى: اوك .. هروح انا ع مكتبى
هو وسام جاى بكرة مش كده؟
كاميليا: تقريبآ(مركزة فالشغل)
فادى خرج من اوضه كاميليا ..وما صدقت كاميليا يخرج عشان تحط دماغها ع المكتب وتغرق فالتفكير
هتعمل ايه وسط كل التهديدات الى بتقابلها يوميآ
والخوف ع ابنها
ومن حالة خوف ، لحالة فرحة فعيون مى وبتول
فخروجه عملهالهم وسام..
وسام: طارق زميلى فالشغل هناك ، دى قرية سياحية بتاعت حد قريبه
معرفش عمل ده امتى
كلمه..عزمونا يوم كامل فالقرية فور فرى
مى: وااااااااااااو دى تحففففففه
بتول: يلا يابابى انا عايسة انزل البيسين يلا يا بابى يلا (بتشده من ايده)
فعلا لبست بتول المايوه ونزلت البيسين ونزل معاها وسام وكانت مى قاعده بتصورهم وبتتفرج عليهم
وهو شايلها ع ضهره فالميه ..وهما بيغطسوا سوا
وبعدين يرشو مى بالمية
وبعدين عملو سباق سوا ..وعمل نفسه وسام مغلوب وبتول الى فازت
وجه وقت الغدا ..
طلعو واتغدوا وكانو مبسوطين جدآ..غيرو هدومهم
وطلعو ع العاب الاطفال..بتول مسابتش ولا لعبة الا ولعبتها
وكل شوية تجرى وهما يجروا وراها وهى بتضحك
بتول: بابى عايزين نركب قطر الرعب
مى: قطر الرعب يا بيتى ! معقولة
انا بخاف منه
وسام: البت طالعه شجاعه لابوها..هذا الشبل من ذاك الاسد
بتول: ايوة يا مامى وحاثبى نعضك (عملت نفسها بتعض مى )
مى: كده يابيتى ! يعنى مصممين تركبوه
وسام: يلا يلا جمدى قلبك يابتاعت المقالب
ولا انتى جامدة فالمقالب بس
مى: كان زمان يا وسام ياخويا ..الزمن هدنا بقى
بتول: يلاااااااا دى حوووة خالث
وفعلا استجابو لرغبة بتول ولعبوها .. وبعد الالعاب والمجهود الى عملوه
قررت مى يدخلو فيلم اجنبى رومانس
وكان وسام عايز يعمل اى حاجة تبسطهم اليوم ده تعويض عن بعده وسفره
ودخلو الفيلم
اما امنية ..
كانت بتتكلم فالفون مع عمران بخصوص معاد الزفاف.
عمران: انا مش عارف انتى عايزة تأخرى ليه معاد الفرح ، انا جاهز وانتى جاهزة
والفيلا جهزت ياامنية
امنية: معلش ياعمران سيبنى براحتى..حاسة انى مش مستعدة دلوقتى لاى حاجه
عمران: طيب فيه حاجه من ناحيتى انا قصرت فيها ؟
امنية: لا بالعكس..انت مش مقصر ولا حاجه
انا بس محتاجه شوية وقت مش اكتر
عمران: اوك يا امنية .. ع راحتك
امنية: اوك.هقفل ناو
باى
قفلت وجه مدثر ابنها نام فحضنها كأنه عايز يقولها حاجه ..
مدثر: مامى انا كنت عايز اقولك حاجه
امنية: ايه يا حبيبى
مدثر: هو انتى لازم تتجوزى اونكل عمران
امنية: اه يا حبيبى ..وبعدين هو انا مش قولتلك زمان وانت وافقت
مدثر: ايوة بس...
امنية: بس ايه ..فيه حاجة حصلت منه معاك دايقتك؟
مدثر: لا مافيش
امنية: اومال؟ قول ع طول يا مودى
مدثر: انا مش عايزك تتجوزى خالص يا مامى..غير اونكل شريف
انا بحبه اوى
لكن مش بحب اونكل عمران
مدثر قال الكلمتين وجرى ..وساب امنية فحيريتها بعد كلامه ده
امنية : (فنفسها) اونكل شريف ايه بس.. ياريتك اكبر من كده كنت فهمت يا مدثر
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
مى طالعه من السينما مأنكشه وسام وبتول ماشية قدامهم
مى: كان فيلم رووووووعه ..
وسام: انبسطتو يا حبيبتى
بتول: اوى اوى ياباى..انت احلى بابى فالدنيا
وسام: انا ربنا جابنى الدنيا دى عشانكم يا حبيبة بابى
مى: تعرف جايالى فكرة فوكيرة ناو.. انما انت عارف الجنان لما يطق
وسام: ممممم خير ..
مى: بقولك ايه انا نفسى فحاجة كده من زمان ، وعايزة انت دلوقتى تحققهالى
وسام: لو فمقدرتى يا روحى هعملها
مى: كل سنة وانت طيب احنا فموسم المولد النبوى
وسام: وانتى طيبة يا حبيبى ..ايه عايزة فوليه وحمصية وكده
كنت هجبلكم قبل ممشى والله
بتول: وعروثة وحثان يابابى
مى: لالالا مش عايزة حلاوة المولد انا ..انا كنت عايزة
كنت عايزة ...
وسام: ايه عايزة ايه ؟
مى: عايزة نروح المولد وندخله ونلعب !!
وسام: (مركز فوشها وباصصلها) المولد! عايزة تدخلى المولد
ممممممم طب تعرفى تمشى قدامى
مى: والنبى والنبى يا ويسو يارب يخليك
وسام: كلمة واحدة يا مى ! امشى يلا
مولد قال
دا انتى فاصلة خالص
مى: كده !! طيب ماشى يلا يا بيتى
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
فالوقت ده ..
كان لسه ممدوح ونتالى مراته داخلين من برة وكالمعتاد ..نازلين ضحك بصوت عالى عشان يدايقو غادة
لكن اول م دخلو من باب البيت
لقو غادة معيطة ولابسة عباية عادية وبتلف طرحتها
نتالى بصتلها من فوق لتحت ودخلت الاوضة..لكن ممدوح وقفها
ممدوح: مالك بتعيطى ليه
غادة: ممكن توعى من سكتى (شالت ابنها ع كتفها)
ممدوح: ياغادة انا بسألك فيه ايه
غادة: مافيش ياسيدى ابنك بيرجع وسخن من الصبح وادتله كل الادوية ومجابتش نتيجه
بس طبعآ ده شئ ميهمكش
خليك انت مع الست نتالى بتاعتك
ةملكش دعوة بينا
ممدوح: استنى هنا ده ابنى حتى ف دى فيها عند
انا جاى معاكى
ثوانى بس
دخل ممدوح يجيب فلوس والكريديت
نتالى: لوين رايح ؟
ممدوح: نازل ..الولد عيان وهنوديه دكتور
نتالى: ماتصدق دمعاتها الكدب..عم تمثل عليك
ممدوح: بتمثل عليا مسخنه الواد كدب..حطته عالبوتو جاز يعنى
نامى يا نتالى نامى ..انا شوية وراجع
سابها وخرج وهى رزعت المخدة قدامها من الغيظ
نزلو سوا ..وهو شال الولد ..لفو ع كل الدكاترة الاطفال اكتشوف ان لازم بالحجز
وحالة ابنهم متسمحش يستنو
غادة: انا كده ابنى هيموت .. اتصرف يا ممدوح(بتعيط)
ممدوح: قومى طيب من عالارض انا هتصرف (بيشوف حرارة الولد)
الولد حرارته بتزيد
مش عارف اعمل ايه
غادة: انا معرفش غير ان ابنى يبقى كويس انهاردة وينام فسريره كويس
اتصرف ياممدوح
ممدوح: بلاش لغة الامر دى بطليها..ماهو ابنى زى ماهو ابنك
انا بفكر اهو..تعالى ف مستشفى استثمارى
مافيش حل غير كده
غادة: استثمارى! طب معاك فلوس كفايه؟
ممدوح: معايا وحتى لو مافيش هتصرف
يلا مافيش وقت
تاكس!
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
"نشن يا ويسو يلا ..هاه"
ضربة من بندقية ع هدف بعيد وبيجيبه وسام فعلا!
مى: هيييييييييه كسبنا ..
الراجل صاحب اللعبة : اتفضل يااستاذ مبروك عليك (كسب عروسة لعبه)
وسام: خدى يابتول.. (ماشى هو ومى )
مبسوطة وعملتى الى فمزاجك وروحنا المولد
عالله تنبطى بقى
مى: (باسته) يا واد انا بحبك
وسام: احنا فمكان عام يا مى اتلمى
بتول: بابى تعالى نركب المراجيح
وسام: لالالا توقعى يا توتا ..دى مراجيح مش مريحه يا حبيبتى
بتول: (كشرت ومدت شفايفها لقدام وعقدت ايدها قدام صدرها) ماليس دحوة
مى: ع فكرة عادى م كل الناس راكبة اهييه .. يلا بقى متزعلهاش
يلا نركب
وسام: يلا نركب! هو حضرتك عايزة تركبى برضو ؟
مى: ايه فيها ايه ؟ انا لابسة بنطلون طويل ولبسى واسع ومافيش حاجه
وبعدين انا مع جوزى وبنتى
يلا بقى عشان حاطر مراتك وبنوتتك حبيبتك
وسام: مى كفاية بقى دلع مالوش طعم ..قولتو عايزين تروحو المولد وروحنا
نلعب نيشان والبتاعه دى بتاعت القوة ولعبنا
اتفرجنا ع فرقة وماشى
يلا بقى نروح ولا مراجيح ولا بتاع
مى: حرام عليك يا ويسو ده حتى بتول نفسها ... (بتبص ع بتول)
ايه ده بتول !!
بنتى فين ؟
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
"زى م قولت دور نزله شعبية ومعوية بسبب تغيير الجو "
ممدوح: طيب هيتحجز يا دكتور ولا نروح بيه؟
الدكتور: لا طبعآ هيتحجز لان المحاليل دى هتتغير له كل ساعتين،حضرتك هتعدى عالحسابات
مشى الدكتور وغادة ماسكة كفوف ايد ابنها وبتبوسها وهى بتعيط
ممدوح: متقلقيش هيبقى كويس ان شاء الله كل الاطفال بتعيا يا غادة
انا هروح ادفع واشوف لو جبتلك حاجة تاكليها
غادة: لالا روح انت لمراتك ،انا هفضل مع لؤى هنا
ممدوح: لا انا مش هسيبك وبعدين هى زمانها نامت..زى م قولتلك هروح ادفع واجيب حاجه ناكلها
غادة: ممدوح
ممدوح: نعم
غادة: لؤى هيبقى كويس ؟؟
ممدوح: متخافيش ان شاء الله ربنا هيشفيه
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
صويت وعياااااط والمولد اتقلب..
مى: بنتى ..انا عايزة بنتى يا وسام ماليش دعوة
وسام: اهدى يا مى طيب
راجل: يابيه طب هى كانت لابسه ايه ؟
وسام: فستان اصفر وفيه شريط احمر عالوسط وشعرها اسود وناعم
ولابسة سلسلة دهب عليها اسمها
رجل فالمولد: لا مدام كانت لابسة دهب يبقى اكيد اتخطفت
مى: ايه!! يعنى ايه
(ماسكه فقميص وسام) اعمل حاجه مش هروح من غير بنتى
وسام: مانا بدور يا مى اهدى شوية، مش شورتك السودة دى م كان اليوم ماشى كويس
واحد فالمولد : ياباشا بنتك كانت لابسة توكه حمرا ع شعرها كده
وفستان منفوش
مى: ايوة هى بنتى بتول
الراجل: حضرتك انا لمحتها من هنا ماشية
وسام: من هنا ؟ امتى بالظبط
الراجل: من ييجى ربع ساعة
وسام: طب تعالى نشوف..انتى خليكى هنا متتحركيش
مى: هتابعك بالفون (بتعيط)
جت ست ناحيتها كبيرة: متخافيش يابنتى ، ان شاء الله هتلاقوها
مى: ده انا معنديش غيرها ..ولا هيبقى عندى غيرها
يارب
يارب
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
ممدوح بيمد ايده بسندوتش لغادة ..
ممدوح: ايه شبعتى ؟
غادة: انا اصلا ماليش نفس..كلت بس عشان اقدر اصلب طولى
ممدوح: بس انتى مكلتيش غير سندوتش واحد
غادة: شكرآ يا ممدوح كل انت
ممدوح: (بيبصلها وهى مميله فالارض وحزينه) فيها ايه ياغادة لو تفضلى ع طول كده
زى زمان
صوتك مش بيعلى
وطيبة
وتعاملك كويس
واكلتك خفيفة ههههه
غادة: (بصتله باستياء ورجعت بصت فالارض) معلش بقى الزمان هدنى
ممدوح: انا مش بقولك كده عشان تقولى الزمان هدنى .. انا عايزك ترجعى زى زمان
غادة الى حبيتها
وفهمتها وفهمتنى
غادة: وارجع ليه ؟؟! م احنا اتطلقنا وانت اتجوزت وبقت ليك حياتك
ممدوح: طب انتى كويسة فحياتك كده ؟
غادة: متفتكرش عشان تعب لؤى هتستغل نقطة لصالحك ونرجع تانى لبعض
موضوعنا خلص يا ممدوح..ومن زمان
وان كنا دلوقتى بنتكلم سوا ومع بعض
فعشان لؤى مش اكتر
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
شباب جدعان بيدورو مع وسام ع بتول فالمولد
وكأنهم يعرفوه ..لانهم بيدورو بضمير
شاب: ماشوفتش بنت صغيرة 5 او 6 سنين كده لابسة فستان اصفر منفوش وتوكة حمرا وسلسلة دهب؟
راجل عجوز بيبع حلويات: كان فيه عيال كتير ماشيه ورايحه ناحية شلبى بتاع الصندوق
وسام: مين شلبى ده!
شاب: طب واحد بيقول قصص فصندوق الدنيا، تعالى يا بيه نشوفها جايز تكون مع العيال دى
راحو فعلا ولاقو اطفال كتير ملمومة عالراجل وهو بيحكى وبيدور آلة العرايس
وسام بيبص فيهم وفجأة حد شده من بنطلونه!
" بابى بابى...كنت هاجى اقولك تعالى شوف انت ومامى اللعبة دى"
وسام بيبص لقاها بتول مصدقش نفسه
وسام: يا روووووووووووح بابى (حاضنها جامد) ليه كده بس تبعدى عنى انا ومامى
شاب: هى دى بنتك يابيه ؟ حمدلله ع سلامتها
وسام: كتر الف خيركم (بيمد ايده بفلوس ليهم)
شاب: ياباشا انت بتشتمنا كده احنا ولاد بلد برضو..حمدلله ع سلامة الامورة
وسام شال بتول وشكر الشباب وراح لمى لقاها لسه بتعيط وشافته من بعيد جريت ع بتول وباستها وحضنتها جامد
بتول: انتو بتعملو كتا ليه يابابى
وسام: ده انتى نشفتى دم بابى يا توتا..يلا بينا بقى من هنا
مى: بتول يا حبيبتى (لاحظت مافيش سلسلة فرقبتها) ايه ده!
سلسلتك فين ؟
وسام: ايه مش موجودة ؟
بتول: ايه ده!! ثلثلتى
مى: وسام بنتك حد سرقها لازم نلاقى السلسلة ..
وسام: مى ...خلاص فداها وحمدلله ع سلامتها مش احسن م كانت اتخطفت ومش لاقيينها لحد دلوقت
يلا فداهية السلسلة
مى: بس دى اول هدية تجيبهالها فعيد ميلادها
وسام: ياستى ربنا يخليها ويخلينى ليها واجيب الاحلى منها ..يلا بينا
حمدلله ع سلامتك يا توتا(بيبوسها)
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
غادة نايمة قاعدة جمب ابنها .. وممدوح مش عارف ينام وواقف فالبلكونة
جت النيرس وقاست حرارته
النيرس: الحمدلله الحرارة راحت ..
غادة: يعنى هو بقى كويس؟
النيرس: اه بس نشوف الدكتور هيقول ايه عالترجيع وممكن تروحو بيه دلوقتى
غادة : الحمدلله يا م انت كريم يارب.. الحمدلله
جه الدكتور وطمنهم وفعلا اذن ليهم بالخروج مع الالتزام بمواعيد الادوية..
ممدوح: تعالى انا هوقف تاكس..
وصلو البيت وهما عالباب قبل م يفتح
ممدوح: غادة..بعد الى حصل انهاردة
انا مش هسيبكم تانى..
غادة: يعنى ايه ؟
ممدوح: هرجعك لعصمتى يابنت الحلال..مستحيل اسيبك انتى وابنى تانى
غادة ابتسمت وشيلته الولد
غادة: طب يلا ندخل يابو لؤى ..
ممدوح: (مبتسم) يلا بينا
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
ونكمل بكرة
استنوها يوميآ
#ويسو_وميوش_وتوتا_وخلصت_الحدوتة
ليست هناك تعليقات:
إرسال تعليق