♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
وائل: ايه ده (ضحكة خوف) قولها يا حسن تعقل
حبيبة:سامع ولاطرشت!مش هاخد فيك يوم ادبحك وارميك هناوانت اد الجاموسه كده ..ها قولت ايه ؟
وائل: انتى بتهددينى! طب والله لوريكم
والله لوريكم
حبيبة: هتورى مين وامتى لما انا هموتك دلوقتى
وائل: (بصوت عالى) يا دكتورة فاااايزة! يا دكتورة
صوته العالى سمع بنات النضافه جريت واحدة منهم ع مكتب الدكتورة فايزة وجبتها وجت ع طول
الدكتورة فايزة مستغربة المنظر الى شايفاه
الدكتورة فايزة: ايه ده ؟ ايه التهريج الى بيحصل هنا
فيه ايه يا حسن
حسن: يا دكتورة فايزة حضرتك انا كنت فجلسة عادى انا وحبيبة ووائل دخل
وائل: عادى برضو..عادى ايه يابو عادى
حبيبة: يعنى برضو مصمم..طب اتشاهد ع روحك
الدكتورة فايزة: ايه ده (بخضه) قولها ترمى الازاز يا حسن دلوقتى حالا
حسن: حبيبة سيبيه..(ماسك ايديها بهدوء) سيبيه
حبيبة: هموته واصلا انا كده كده مجنونة ومافيش ضررعليا
الدكتورة فايزة: مجنونة ايه بقى وانتى فاهمة كل حاجة اهو، ارجوك يا حسن تنهى المهزلة دى فورآ
حسن: حبيبة سيبيه، ارجوكى انتى كده بتزوديها
حبيبة: مش قبل م اخد وعد انك متمشيش من هنا
وائل: شوفتى يا دكتورة ، جالك كلامى
خايفة لا حبيب القلب يمشى من هنا
حسن: يااخى اسكت بقى يعنى اسيبها تموتك عشان ترتاح
حبيبة: ها قولتى ايه يا دكتورة
الدكتورة فايزة: وانا همشى حسن ليه يا حبيبة
حبيبة: عشان هتسمعى كلام الدوغف ده ! وهتصدقيه
حسن: (بهدوء ع ودن وائل) شوفت هى كمان بتقولك يا دوغف يعنى مش انا بس
وائل: اه ومالو حقك ،ماهى هتموتنى عشان خاطرك
فايزة: سيبيه يا حبيبة واوعدك مهما سمعت هحكم عقلى فقرارى
حبيبة: حسن مايمشيش(طريقه تهديد)
فايزة: طيب خلاص سيبيه دلوقت
حبيبة بصت لحسن وسابته بهدوء واول م فلت من ايدها وقف جمب الدكتورة وهو خايف
وائل: يا دكتورة فايزة، انا شوفتهم فوضع سئ لسمعه المستشفى وسمعه حضرتك
ومش طريقة جلسه خالص
الدكتورة فايزة: وضع سئ ازاى يعنى
حسن: والله كنا بنتكلم، بس انا استفزيت حبيبة عشان تتكلم معايا لانها نشفت ريقى
وهى من تهورها زقتنى عالارض
وائل: زقتك بس
الدكتورة فايزة: خلاص! خلاص..حسن اعتقد ان انت هنا فمكان شغل
واى حاجة هتعملها هتعود عليا قبلك لانها المستشفى بتاعتى
حسن: يافندم حضرتك انا فاهم كل الكلام ده ..حبيبة اهيه اسأليها
وائل: غراب ضمن حدايه!
فايزة: وائل! انا مش هسأل حد بس انا هعتبره انذار ، ومن هنا ورايح فيه كاميرات مراقبة هتتحط فأوضه حبيبة وهشرف عليها بنفسى
ده اذا كنت عاوز انت الى تكمل معاها؟
حسن: اوك وانا معنديش مانع
مشيت فايزة من غير م يتحقق هدف وائل ان حسن يسيب المستشفى لانه اشطر منه، بس كان فيه استغراب من حسن ع الى عملته حبيبة عشانه
برغم موقفها الى مش فصالحه...
حسن:ليه عملتى كده عشانى ؟
حبيبة:متسألنيش
حسن:ليه
حبيبة :عشان معنديش اجابة
حسن:ليه كل حاجه مش عايزة تريحينى فيها ،انا مش عايز غيرك انى اساعدك
حبيبة:ريح روحك، وكفاية عليك الى عرفته انهاردة
حسن:اوك يا حبيبة هسيبك براحتك،بس هقولك كلمتين بعد الى قولتيه انهاردة
وبعد م اتحدانى وائل انى افضل هنا عشان اعالجك
انا مش هستسلم..والمرة الجاية استعدى لجلسة مش مستعد انى اطلع منها مهزوم
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
"تحبي تسمعى ايه ؟"
ضحى: اسمعك انت
حسن: مممم اوك هغنيلك حتة من اغنية جسار الجديدة
سمعتيها
ضحى: احب اسمعها اول مرة من صوتك
حسن: طيب ..احم احم احم
ضحى: ايه كل ده
حسن: بستعد
ضحى: هههههههههه
حسن: الحب فقلبنا درجات ،تفرق من واحد للتانى
الحب يقربنا ساعات
وحب بيتقال فاغانى..فى حب يفرق الاخوات
كلنا بنحب وبنعانى ..
وهو ماشى بعربيته لمح حاجه وقفته مرة واحدة
ضحى: وقفت ليه
حسن: (باصص من الشباك ومركز) ثوانى وجاى
حسن نزل راح لحد بنت شحاته قاعده..لابسه عباية سودا
شعرها كيرلى بس لوحده من غير تصفيف،عيونها جميلة جدآ..بس عاميه!
حسن:(ادالها مبلغ فأيدها) ممكن اقولك حاجة
البنت: قول
حسن: اسمك ايه؟
البنت: (ضحكت ضحكة بسيطة) انت الى جيت من كام يوم وحطيت فلوس فأيدى واستنيت شوية وبعدها مشيت
حسن: وعرفتى منين؟ وانتى...انا آسف مش بتشوفى
البنت: ريحتك..مميزة مشمتهاش قبل كده
حسن: مش هتقولى اسمك ايه
البنت: جميلة
حسن: وانتى فعلا جميلة..اسف فسؤالى
حاجة جوايا قالتلى اعمل كده
جميلة: ميهمكش..انت سألت ع اسمى
هو انت خدت حتة منى يعنى
حسن: انتى هنا ع طول؟
جميلة: اه
حسن: مش محتاجه اى حاجه
جميلة: لا كتر خيرك
حسن: ماشى
حسن قام ومشى وكل ده وضحى متبعاه لحد م جه وركب عربيته من تانى
وقبل م تتكلم
حسن: متستغربيش من الى حصل..انا نفسى معرفش عملت كده ليه
ضحى:وانا مكنتش هسألك
حسن:اوك (متوتر) تحبى نروح مكان ع ذوقك ولا ذوقى
ضحى: لازى م انت تحب
وهو ماشى فالطريق كان ماشى ساكت خالص من برة
ومن جوه
دوششششه!
"مالى فيا ايه؟وليه عملت كده..بلاش دى يا حسن
بلاش تدخل دايرتك ومتاهتك انت متعرفهاش بس حاجة شدتك ليها متنكرش.تفتكر كل مرة تشوفها بتبقى صدفه!
دماغى بنت اللذين دى مدام اتحطت فيها حاجة لايمكن ترجع عنها،وبعدييييين
.بلاش تبقى اذى لكل الى حواليك ياحسن"
ومرة واحدة اتخض من صوت ضحى !!!!!
ضحى: حاسب يا حسن!
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
"يعنى لازم نعزمك زى الاغراب عشان تيجى ياحسن
حسن: طيب تخيلى انى كنت هعمل حادثة وانا جاى من كتر مانا جاى ع نار،وحشتونى اعمل ايه
محمد: من قلبك الكلام ده ؟
حسن: هو انت مش هتغير موقفك ابدآ من ناحيتى يا محمد..ع طول واقفلى كده
عنان: يوووه هو جاى يتعشا معانا ولا تضايقه بالكلام يا محمد
حسن: قوليلو والنبي
محمد: وايه اخر اخبارك، مش ناوى تتلم وتتجوز ويبقالك بيت
حسن: لا
عنان: ههههههههه
محمد: تعرف احسن برضو تظلم بنت الناس معاك
حسن: مين دى
محمد: الى هتتجوزها
حسن: اه ده لو اتجوزت
عنان: بس بجد ياحسن ..انا سمعت ان في حاجة حلوة قريب
حسن: حاجة حلوة ايه ؟ قصدك ام على الى انتى عاملاها دى!
اه تحففه
عنان: شوف الى بياخد الكلام الجد هزار..بقصد البنت الى شاغلاك اليويمن دول
حسن: بنت شغلانى! مين قال كده
محمد: وانتى تصدقى سلمى..اكيد واحدة جديدة فشلته هو ده يعرف الارتباط ده
حسن: سلمى!! وايه الى دخل سلمى فالحوار
عنان: هى الى قالتلى..اصلا تقى جارتك هى الى قالتلها
حسن: اه قولتيلى ..تقى مااااشى
عنان: قول بقى وفرحنا..هتخطب قريب
حسن: وهى اى حاجة تقى تقولها لسلمى تيجى تقولهالك تصدقيها!
محمد:سيبك منه، ده اصلا مالوش ماسكه
ومش هتعرفى تاخدى منه معلومة واحدة
حسن:انا مش عارف انتى شاغله بالك بيا ليه ياعنان
عنان: عايزة افرح بيك ياحسن
حسن: تفرحى بيا..ياستى هاتى ولى العهد بالسلامة وابقى افرحى بيه براحتك
عنان:ههههه كده ياحسن
جاله فون
حسن: طب عن اذنكم .. الو
مامت تقى: الو ..انا مامت تقى ياحسن
انا خدت رقمك من سلمى
حسن: اه اهلا ياطنط ازى حضرتك
مامت تقى: كويسة الحمدلله، اسفه لو ازعجتك بإتصالى
حسن: لا ابدآمافيش ازعاج ولا حاجه
مامت تقى: من غير لف ولا دوران ياحسن انا هدخل فالموضوع ع طول.،تقى ياحسن
رافضة اى تعامل بينا او اى تواصل
ومش معتبرة انى امها
انا عارفه انها بتعزكم..م انتو اخواتها الكبار
انا كلمت سلمى وكلمتك..ياريت تشوفلى حل معاها
وقولها مدام نويتى تعيشى هنا ع طول..يبقى من الواجب متقاطعيش مامتك
حسن: حاضر يا طنط حاضر..انا هكلمها متقلقيش
مامت تقى: اوك ياحسن شكرآ ،وآسفه تانى مرة
مع السلامة
حسن وقف وفكر لثوانى وبيدور عالطريقة الى يدخل لتقى بيها لانه عارف ان دماغها ناشفه
نسخه منه ..ماهى تربيته
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
"ههههه يخرب عقلك ياحسن بقعد معاك بتفصلنى ضحك"
حسن: اه طبعا تضحكى..تسيحيلى عند سلمى وسلمى تقول للحجة عنان،وعنان عاملالى فيها الخاطبة نونا
وقال ايه عايزة تطمن عليا
كأنى اختها العانس الى فاتها القطر ومصدقوا جالها عريس
تقى: هههههه والله م سيحت هى الى سألت وكانت بتقررنى
حسن: وانتى مع اول قلم تعترفى ع طول كده
تقى: ههههه يابنى كلام بنات رغى عادى ،فكك بكرة ينسوا
حسن: يابنى! المهم بقى ممكن تقوليلى فيه بينك وبين مامتك
تقى: مالها ماما
حسن: مش عايزة تروحيلها..مش بتردى ع تليفوناتها،فيه ايه
دى مامتك ياتقى
تقى: مامتى امتى يعنى ؟لما اول م اتولدت لحد م مشيت وانا عندكم
وطنط الله يرحمها كان متوليه امورى
هى امتى كانت ماما
واتجوزت وسابتنى ..وسابتنى مع بابا اسافر بلد غريبة معرفهاش
من غير قلبها مايوجعها ع بنتها الوحيدة
واختارت البيه الى معاها والمهم نفسها..يبقى ماما امتى
حسن: احنا متخلقناش نحاسبهم ياتقى
تقى: لا نحاسبهم،لما اقع فمصايب وهما ولا داريين كل واحد وماشى فحاله
يبقى ميجوش دلوقتى يعملو عليا اب وام
حسن: دماغك حجر يابت انتى (زقها فدماغها)
تقى: انا تربيتك..وزيك
تقدر انت تسامح حد جه عليك وخلى حياتك جحيم لمجرد صلة دم!
حسن: مش عارف اقولك ايه ..وجبتى الكلام ده منين بس
بقى دى تقى الى كانت تاكل وتوقع ع نفسها الاكل
تقى: ههههه يوووه بقى
حسن: لا بجد عايزك تفكرى فموضوعها تانى..مش جايز عايزة تكفر عن ذنبها القديم
تقى: ممم تكفر
حسن: وبعدين فعلا،مدام هتعيشى هنا خلاص
ايه حياة البؤس الى انتى فيها يومك بيتعاد زى ماهو
تقى: عايزنى اعمل ايه يعنى
حسن: ممممم اشتغلى ..انتى درستى ايه؟
تقى: الترجمة
حسن: خلاص قدمى السى فى بتاعك فأى شركة سياحه واشتغلى تور جايد
شغل جميل ومناسب وفيه تغيير جو
ايه رأيك
تقى: هبقى افكر
حسن: كل حاجة هبقى افكر..هشوف
مش بتدينى عقاد نافع ابدآ
تقى: طب هقولك ايه مش بفكر الاول
حسن: متتعصبيش يابت لانفخك
تقى: ههههه طيب
حسن: جربى تغيرى المود..اخرجى
وقابلى وحبى واعرفى ناس كتير وجديدة
تقى: اخرج ماشى..لكن احب لا
حسن: ده ليه ان شاء الله
تقى: مش عايزة احب ..ببساطة بخاف اوسخ قلبي بتفاهات
حسن: اوسخ قلبي! ايه الكلام ده ياتقى؟؟ ياماما الحب مش زى م انتى فاكرة
تقى: م تقول لنفسك
حسن: (ارتبك) اقول ايه
تقى: ماانت مش عايز تحب ولا تتجوز
حسن: انا غيرك..انتى مينفعش تقعدى كده .حتترهبنى يعنى؟
تقى: ليه مينفعش اقعد كده..عمر م الارتباط ولا الجواز هيحلولى مشكله
ده بالعكس هزود همومى براجل اهبل كل الى همه يجعر ويزعق ويثبت انه راجل وخلاص
حسن: (رفع حاجب استغراب) يجعر! ماشاء الله كل يوم بتفرحينى بيكى الحقيقة
تقى: ثم اتجوز ليه اساسآ، انا مش ناقصنى حاجة عشان ييجى راجل يكملهالى
حسن: وهى الفرخة بتحتاج الديك ليه
تقى: ليه؟
حسن: عشان تبيض..وتبقى ام
تقى: وانا بقى مش مستعدة اكون فرخه لمجرد انى ابيض واعمل عشه فاشله
حسن: ياساتر يارب..بكلم قاسم السماوى
ايه كمية الحجات والمفاهيم الزبالة دى
تقى: ياعم انت تاعب نفسك بيا ليه
حسن: عم..من شوية يابنى ودلوقتى ياعم
يلا يابت روحى نامى
تقى: اه صحيح..هو ايه حكاية البت اياها؟!
حسن:جميلة!
تقى: جميلة مين ؟ هو لسه فيها جميلة
حسن: هو انا محكتش عنها ليكى
تقى: لأ
حسن: اوك ابقى اقولك، مين بقى البنت اياها
تقى:لالالالا وحياتك م هسيبك ، مين جميلة دى وبسرعه وبعدين نشوف حكاية البنت
حسن:اه انتى فضيالى يافوزية
تقى:ايوة فاضية ومش هتمشى غير لما تقول مبحبش حد يعلقنى والا هعملك نشرة عند عنان وسلمى واخليهم المرة دى يحسبوك اتجوزت عرفى
حسن:يعنى علقة وشبطتى فالكلمة، طب اقولها ايه دى
مانا الى فتحت ع نفسى الفاتحه
هى مش حكاية ولا حاجة يا رغاية
تقى:حتى لو مش حاجة اصلا،عايزة اعرف عايزة اعرف عايزة اعررررررف
حسن:طب بس يخربيت زنننك ، بصى دى بنت شحاته
تقى:(قاطعته وقالت بقرف) شحاته !!!
حسن: طب اكمل
تقى:خلاص خرتك الشحاتين ياحسن
حسن:يابت استنى
تقى:خلاص اللسعان وصل معاك للشحاتين والمتسولين
حسن:يعنى اقتلها دى ولا اعمل ايه ،اكمل يا جزمة
تقى:تكمل ايه ماهى بانت،ياحسن متخليش اهوائك وشهواتك تقودك لاشياء سافلة
حسن:تقودنى لاشياء سافله!! قومى يابت من هنا الله يحرق شكلك
تقى:اه طبعا عايز تقومنى لما كشفت حقيقتك، بتغرر ببنات الشوارع
حسن:بنات شوارع ايه يا حيوانة من الحيوانات ،هو انا لسه كملت
تقى:هتقول ايه يعنى
حسن:لا مش هقول يلا قومى امشى
تقى:لاخلاص والله هسكت بس قول
حسن:لامش قايل وفصلتينى يلا روحى نامى
تقى:خلص يا سونسون حبيبى
حسن:سونسون حبيبك ،حبك برص
تقى:خلاص بقى قول (باسته فخده) باين فعيونك عايز تحكى اهو اهو
حسن:جاتك القرف،هتكلم ومتقاطعنيش لاخنفك
تقى:لاخلاص مش هتكلم
حسن:بنت شحاته..عامية بس زى القمر
شوفتها مرتين تلاته ،وفكل مرة بشوفها بتحصللى حاجه كنت متمنيها من ربنا
اول مرة شوفتها ادتها الى فيه النصيب،وبعدها بليل كنت متفق ع مكان جديد هنقل العيادة فيه اكبر وفمكان ارقى
والحمدلله اتوفقت ويوم م شوفته صاحب المكان وافق
تانى مرة بقى الى مش هنساها وعلقت معايا اوى، شوفتها وادتها برضو الصدقه
وكل مرة بديلها بتبسملى ابتسامة حلوة اوى تحسسك انها شايفانى
دى بقى المرة الى منسهاش..كنت سهران ف..
تقى:فيه ايه كمل
حسن:لامش مهم مكان وخلاص
تقى:مش النايت كلوب!سلمى قالتلى
حسن:اه خالتى اللتاتة اتلمت ع عمتى الرغاية وقطعو ففروتى،المهم ياستى كنت هناك وحصلت حاجة بقالى سنين اتمنيت من ربنا تحصل
تقى:ايه الحاجة ايه ايه
حسن:خد حق بقالى سنييييين عايز اخده ع طبق من دهب وسبحان الله من غير ترتيب ولا سابق مواعيد
يااااااه يومها فرحت فرح غير عادى مع انى مبحبش الشماته
تقى:طب ايه الموضوع قوله ربنا يخليك
حسن:(عمل نفسه مش سامع) وبس ياستى وانهاردة شوفتها اه كنت هعمل حادثة بس عرفت ان عنان حامل وهبقى عمووو فبقيت اتفائل بوشها جدآ
وحاسس انها بننوتة الحظ بتاعتى
تقى:طب ايه الكلفته الى كلفتهالى دى وبرضو مقولتش ايه الموضوع الى خدت حقك فيه
حسن:وبس ياستى ،ايه بقى البنت اياها الى بتقولى عليها دى
تقى:ياحسن بلاش الطناش زى مااكون نكرة قدامك ايه ده
حسن:متتنرفزيش يابت..اصلى مش هقول ريحى نفسك
قولى بقى ايه حكاية البت دى
تقى:ماشى ياحسن ..انت الى عارف قول انت مين البنت اياها دى الى ليك معاها حكاية تشيب
حسن:حكاية تشيب!مين دى
تقى: البنت (بتغمزله)
حسن: فهمت انا ايه من الغمزة دى
تقى: بص، انا بقول لسلمى انك فقصة حب يعنى قالتلى استحاله حسن يحب بعد قصة البنت اياها
بقولها ايه هى القصة قالتلى هو يقولك
حسن: مممم سلمى..سلمى دى شغاله تحدف فكلام شمال ويمين وانا بتكعبل فيه
قوليلها بطلى كلام يالى مش وراكى غير الحكاوى
تقى: سيبك من سلمى وقول بقى
حسن: معنديش قصص يا بنتى ولا اياها ولا بتاع
تقى: اومال مش عايز تحب ليه بقى؟انت عندك سر ياحسن وهتخبيه ع تكتوكة حبيبتك
حسن: زى سرك بالظبط..ووقت م تقولى سرك
هقولك سرى
تقى اتوترت وسكتت
تقى: كده يعنى ..طب انا هقوم انام
حسن: اوك..بقولك ايه صحيح فكرى فموضوع الشغل
وموضوع مامتك
تقى: ماشى
حسن: وغيرى لون شعرك ده ..شبه المتحولون بالظبط
تقى: يا سخيف ههههههههه
باى يا واد
حسن: من ابيه لواد..ضاعت الهيبة والكرامة
اطلعى فوق وغورى نامى
تقى: ماشى سلام ههههههه
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
جيلان فشغلها ..وجه الساعى ليها بطلب
الساعى: استاذة جيلان المدير عايزك
جيلان: اوك
جيلان قامت راحت للمدير ..وهى راجعه
زميلها: انتى ليه يا جيلان مبطلتيش شغل
جيلان: وهبطل شغل ليه
زميلها: عادى..احنا عرفنا انك ورثتى مبلغ وقدره من جوزك،يعنى مش محتاجه لشغلك خالص
جيلان: ياسلام! لا طبعآ مش مبدأ يعنى ورثت اضيعه بقى وخلاص
ثم الورث ده لمستقبلى انما الشغل عشان اشغل نفسى
زميلتها:طيب وحكاية ابن جوزك دى يا جيلان خلاص هتتفرغى لتربيته ومش هتتجوزى
جيلان:لا هوديه لاهله ،لكن جواز مبفكرش
زميلتها:ليه
جيلان:يعنى مافيش لسه شخص مناسب
زميلها:بس وشك المنور والابتسامة الى مش بتفارقك دى سببها اكيد حب جديد
جيلان:لاجديد ولاقديم،شيلونى من دماغكم بقى
وهما بيتكلمو سمعوا حد بيتكلم فمايكرفون برة مبنى الشغل وبيقول
" استاذة جيلان! ياجيلان
جيلان عبدالنور
زميليتها: فيه حد بينادى عليكى يا جيلان
جيلان قامت من مكانها تبص من الشباك مع زمايلها ..والناحية التانية من المبنى برضو
لاقت وحيد ماسك مايكرفون وبصوت عالى تحت المبنى
" جيلان عبدالنور..فرحك الخميس الجاى فقاعة زمردة
عليا انا وحيد زمانى
اوعى تتأخرى ماشى "
جيلان واقفه مستغربة وزمايلها بيضحكو
وحيد" انا نسيت اقولك ..الفستان والحجات هتجيلك بليل ع عنوان بيتك..اوعى تتأخرى انا بقولك اهو
لحسن ادور ع عروسة تانيه،متتخضيش
لازم نتجنن عشان نحس طعم اى حاجة حتى الفرحة
ها فاضية يوم الخميس؟
جيلان واقفه والابتسامة والاستغراب وكل التعابير دى ع وشها سوا وزمايلها بيهنوها
زميلتها: مبروك يا جيلان هتتجوزى، اه ياسوسه كنتى هتخبي
زميلهاالتانى:لا وقال ايه لسه مافيش حد مناسب..مكنتيش عايزة تعزمينا ولا ايه
زميلتها:اهو عريسك جه وكشفك ههههههوطلع اجدع منك
الف مبروك ياجيجي
زميلها: ايوة كده بقالك كتير فحداد عالمرحوم
الساعى: والله مفجأة حلوة يا استاذة جيلان
وجيلان فسرها:مجنون!! الله يخرب عقلك يا وحيد كده ع طول قدام الناس من غير ولا انذار
فضحتنى
بس عندك حق، لازم نتعلم الجنان عشان نحس بطعم الحاجه
زميلتها:ردى عليه الراجل واقف فالشمس
جيلان بإبتسامة عريضة...
فاضية يا وحيد زمانك
لفت وهى بتتلقى تهنئه زمايلها ودماغها فيها كلام
"مش معرفه حسن، يلا جنان بجنان خدناايه من العقل غير وجع القلب!"
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
استنونا الاسبوع الجاى
شــيــزوفــريـنـيـا#
لــــ #نورإسماعيل
ردحذفthank you
اخبار السيارات
هههههه
ردحذف