♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
تقى: (ابتسمت ابتسامة صفرا مخبية حاجة) ماهو محدش بيحط تون لفون الا لو كان حاسسها وبيحبها
(قامت وطالعه) تصبح ع خير يا حسن
حسن: ياخوفى عليكى من السر الى انتى مخبياه، لا تكونى مش قده !
تقى: (ببصه حزن) ومين قال ان عندى سر
حسن: تربيتى فيكى..هى الى قالت
تقى: اه صحيح..كنت عايزة حجاتى الى عندك فالدولاب
حسن: تؤتؤتؤ
تقى: يا سلاام! ليه بقى
حسن: دول بتوع بننوتى ان شاء الله ..الى هخلفها
انتى خلاص راحت عليكى وقريب هجوزك
تقى: وهتجوزنى كمان ! طيب ماشى
حسن: وع فكرة ، لسه عندى اول كشكول جبتهولك اعلمك تكتبى ازاى
كان خطك وحشششش
تقى: ( نزلت درجتين سلم وخبطته فدراعه) يا وحش يا حسن..وغلس كمان
حسن: هخليه ذلة عندى للامور الى هيتجوزك
واقوله بص ع عبط مراتك
تقى: (نزلت جرى وراه وهو جرى منها) طب اوعى من وشى عشان متضربش
حسن: تضربى راجل اد ابوكى..والله وحقيتى التربية يابنتى مكنش العشم
تقى: هههههههه تصبح ع خير يا بابا حلو كده
انا اسفه
حسن: ايوة كده اتعدلى ...سلام يااحلى تكتوكة
تقى: يلام يا سونة (بعتتله بوسه فالهوا وطلعت ورجعت تانى بسرعه قبل م يقفل الباب)
بقولك
حسن: نعم
تقى: بكرة لو خرجت مع موزتك تحكيلى عملت ايه بالتفصيييييييل
حسن: اوام خلتيها موزتى ..ههه حاضر ياستى
تقى: هى اسمها ايه صحيح
حسن: ضحى
تقى: اوووووكـ يا برنس ..اسيبك بقى تعيش الانتعاش
باااااااااى
حسن: بااااى يا بنوتة
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
وتانى يوم..
ضحى وحسن ...كانو فمكان اول مرة تدخله ضحى فحياتها
ديسكو !!
كان عايز يخرج كل الى جواها ويخليها تفرح ..وهما سوا
ضحى: انا اسعد بنت فالدنيا
حسن: ليه عشان المكان حلو والاغانى مش كده ..ده من احلى الاماكن الى بروحها
ضحى: لا..عشان معاك طبعآ
حسن قاعد مش ع بعضه بيرقص فمكانه
حسن: تعرفى ترقصى عالاغنية دى
ضحى: انا بتكسف اوى
حسن: لا متتكسفيش يلا
شدها من ايدها ودخل البيست ورقصو سوا رقصة كأنهم متدربين عليها، حتى الكابلات الى كانت بترقص جنبهم
ركزت معاهم ووسعت وعملو دايرة حواليهم
فستان ضحى كان بيطير حواليها وهى بتضحك بصوت عالى وهى فايد حسن زى العروسة ..وهو كان مبسوط جدآ
كأنه بيعيش احساس حب جديد
وهما بيرقصو كلمته بصوت عالى
ضحى: اول مرة احس انى شايفه واحد تانى غير الانسان الى بموت فيه من زمان
حسن: بصى اسمعى الحتة الجاية دى بتقول ايه فالاغنية
ضحى: انا مش سامعه ولا شايفه غيرك
حسن: لا ركزى كده هتجاوب ع كلامك
"خلينا واضحين .فرق دايمآ بين حاجتين
وبين وانا عادى وهادى وبين
وانا ملهووووووووووووف"
ضحى ضحكت بصوت عالى وفكت عن الاول ورقصت باحتراف عن الاول كأنها مش شايفه حد..
ضحى : انااااااا...بحببببببك اوووووووووووى
حسن: (ضمها ليه فالرقصة وميل ع ودانها) انتى قمررررررر
ضحى: انا مش عايزة ابطل رقص ولا اصحى من الى انا فيه ده
انت مفتاح سعادتى يا حسن
اسمع انت بقى الحتة الى فالاغنية دى منى ليك
"مكتوبلى القاك..مكتوبلى اكمل وياك
من غير م تقولى خلاص بان ايه جوااااااااك "
حسن: (شالها ولف بيها ) اهى الاغنية قالت كل حاجة اهو
ضحى: وانا مش مستعجلة انك تقول اى حاجة..هو انا كنت احلم بالفرحة الى انا فيها دى
بحبك يا حسن..بحبك يا حسن بحبببببك يا حســـــــــــــــــــــن!!!
حسن: لا كده الجنان عدى حده هههههههه
ضحى: وحبيبى اول من يعالجنى ..انت سبب جنانى
فآخر الاغنيه ضمته اوى وقالت بهدوء وهى فحضنه مش كان غير فيه صوت تسقيف الى حواليهم بس والاغنية بتهدى
ضحى : " قولتلك يا وجع روحى فعشق روحك...دلوقتى بقولك يادوا روح وفرحة قلب
يادنيا جميلة ربنا كتبهالى اسمها حسن ♥
رجعو مكانهم بعد م خلصت الاغنية ورقصتهم المجنونة..
ضحى: لو حد جه وحلفلى من شهر انى هقعد معاك القاعده دى وهرقص وياك
وكمان هتغنيلى
مكنتش هصدق
حسن:وانتى ايه الى مخليكى للدرجه دى متعلقه بيا ياضحى ؟
ضحى: معرفش..من اول مرة شوفتك وانت بتغنى وعينك جت بالصدفه فعنيا، انت بصتك بصة حد ع اى حد من جمهوره
لكن بالنسبة لى كانت كأنك بتفتح قلبى بمفتاح نظرتك دى
وبتقولى انا هدخل من غير سابق انذار
حسن: كلامك حلو يا ضحى ..يعنى فنانة وبترسمى
ضحى: وبكتب خواطر كمان..كنت متبعاك خطوة خطوة
لحظة بلحظة
لو سيبت بالى فالصحيان..تيجى ف احلامى
حسن: وجيتى فعلا عشان تتعالجى من حبك ليا ؟
ضحى: انا كنت م صدقت اوصللك وجازفت وقولت يعاملنى مجنونة مش مهم
بس بدل من بعيد لبعيد يبقى قدامى..اكلمه ويكلمنى
اشوفه وقت م احب
اسمع صوته
حسن: يااااااااه ..مش يمكن مكونش الانسان الى استاهل حبك ده ياضحى
ضحى: انت!! ازاى
واذا مكنتش انت الى تستاهل حبى مين هيستاهله
حسن: بس انا مش الشخص الكويس اوى الى بنتيله صورة فخيالك
ضحى: مهما كان..هتفضل فعينى احسن حد فالدنيا
حسن:احسن حد!! (اتنهد)
طيب وراكى ايه انهاردة
ضحى: انهاردة انا معاك وبكرة وبعده ...لحد م تزهق منى
وارجع اشوفك من بعيد لبعيد تانى
ويكفينى يومين اقضيهم فسعادة مكنتش احلم بيها
حسن: وليه حاسة انى ممكن ازهق منك؟
ضحى: عشان انا الى بحبك يا حسن مش انت
فيها فرق
حسن: طيب مانا معاكى اهو ..وبعدين ليه خلاص حسمتى انى ممكن محبكيش
ضحى: وحتى لو محبتنيش..يكفينى اى حاجة منك
حتى لو الدقيقتين الى رقصنا فيهم انهاردة دول
هيبقو بال 27 سنة عمرى كله
حسن ركز ف ضحى اووى وابتسم ..
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
خطوات مرتبكة..بتقدم خطوة
وتأخر 2
ووقوف من بعيد فى ارتباك...كانت جيلان!
واقفه قدام مخيم كبييييير عبارة عن كافيه ومطعم وسهرات وكل حاجة
كان قالها عليه حسن
وهى بتبص من بعيد بتكلم نفسها ..
" حسن قالى اخرجى عن مألوفك..عن يومك العادى
اتعرفى ع ناس جديدة..ايوة
انا لازم اخد الخطوة دى"
دخلت جيلان ..محتارة تقعد فين، شباب وبنات قاعدين سوا
الى بيشرب شيشة
والى بيرقصو
والى بيقول شعر وناس حواليه معجبين باللى بيقوله
اختارت مكان بعيد عن كل ده وقعدت فيه ..وجه الويتر
ويتر: افندم حضرتك
جيلان: ممكن لمون ؟
ويتر: اوك يافندم
جيلان بعنيها لفت المكان كله بتتفرج عليه وقطع سكوتها صوت رجالى جنبها ع طول!
وحيد: ايه رأيك تهاجرى معايا ؟؟
جيلان: افندم!!
وحيد: هعيد السؤال تانى ..تهاجرى معايا
جيلان: ههههههههههه (خبت بايدها بوقها وقالت فنفسها) هو انا موعودة بالمجانين ياربى
وحيد: هاه! مقررتيش
انجزى
جيلان: انت مين اصلا ؟
وحيد: انا واحد قرفان من البلد والى فيها ..ولاقيتك قاعدة لوحدك حسيت انتى كمان زيي
رغم انى اول مرة اشوفك هنا
بس قولت اهو القرفانين يتلمو ع بعض..ونهج ونسيبهالهم مخضرة!
جيلان: كده مرة واحدة هههههههههه
وحيد: اومال ع مرتين .. انا وحيد
خريج سياحة وفنادق
وبقالى 6 سنين بشتغل شغله مش عجبانى فحتة مش عجبانى
مع ناس مش بطيقهم
وانتى ؟
جيلان: ههههه انا جيلان خريجة كلية عمرى م اشتغلت بيها
وبشتغل حاجة مش تخصصى
ومع ناس برضو مش شبهى
وادينى عايشة
وحيد: طيب تمام..احنا شبه بعض اهو
جيلان: هههههههههه
الويتر جه وحط اللمون عالتربيزة..
الويتر: تؤمرى بحاجة تانية يافندم؟
وحيد:(مد ايده وشرب اللمون) اه..هاتلها واحد تانى عشان ده انا هشربه
جيلان بصاله بإستغراب اووووى
وحيد: بقولك ايه انا شكلى صليت فساعه كانت العدرا سمعانى
احنا شكلنا هنتقابل كتير اوى
الفترة الى جاية لانى بصراحه وش
مش سايبك بعد انهاردة..
جيلان: تعرف مين جابنى انهاردة ؟!
وحيد: لأ
جيلان: واحد مجنون وبيعالج مجانين اسمه حسن
وحيد: حسن شيزوفرينيا!! ده حبيبى
طب خلاص احنا طلعنا معرفة اهو ..هاه
قررتى ولا لسه ؟
جيلان: قررت ايه بس (ماسكة نفسها من الضحك)
وحيد: نهاجر سوا من البلد دى
جيلان: هههههههههههه
وحيد: خلاص مش هما بيقولو السكوت علامة الرضا
انا بالنسبة لى الضحك علامة الموافقه
جيلان: بقولك ايه م تقوم تمشى من هنا وتسيبنى ف الى انا فيه
وحيد: لأ مانا قاعد
جيلان: انت ايه يابنى ؟!
وحيد: انا وحيد
جيلان: لأ مش بسألك اسمك ايه انا بقولك تطلع ايه بس وجيتلى منين
وحيد: اطلع ايه! اطلع فين انا مش طالع دلوقت
وبعدين جيتلك منين ده ايه
جيتلك من عاليمين من هنا
جيلان: ههههههههه الله يخرب عقلك يا حسن
وحيد: وحيييييييد مش حسن ركزى
رقمك كام بقى
زيرو كام
جيلان: (بصاله وبتضحك)
وحيد: ايه زيرو ضحكة يعنى ؟ مفيش شركة اتصالات بالكود ده
يلا انجزى وخلصينى
جيلان: انت تهمة ..
وحيد: عارف..يلا بس
زيرو كام
جيلان: ليه؟
وحيد: عشان نشهيص بعض عالواتس ونتفق عالخلعون سوا
جيلان: مصمم!
وحيد: ايون
جيلان: ربنا يبليك يا حسن زى م بليتنى ..اتفضل ياسيدى
(مسكت فونه وكتبت الرقم)
وحيد: كده تمااااااااام اوى..بقولك ايه المرة الجاية متجيش حلوة اوى كده
هبتدى اغير عليكى
جيلان: طب امشى بقى من هنا صدعتنى
وحيد: حاضر .. ع مسجات بقى
جيلان: هههههههههههه
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
"ومعرفش لاقتنى بديله الرقم كده من غير م افكر.."
حسن: متخافيش وحيد كويس..ولو عمللك حاجة اعلقهولك
جيلان: بس فصلنى ضحك يخربيته ..بس عارف غيرت جو شوية هناك
وشكلى كده هروح كتير
حسن: اعملى اى حاجة عايزاها وتريحك..من غير م تأذيكى
فاهمة؟
اى حاجة من غير م تأذيكى
جيلان: خلاص مبقتش تفرق ياحسن..اكتر من الى اتأذيته هشوف ايه
حسن: اه صحيح اخبار ماجى معاكى
جيلان: قرفانى..وبدأت المح انى عرفت انها هى الى وصت فالمستشفى ان الممرضة تديله حقنه هوا فالوريد وهى الى موتته
ومن ساعتها عايزة تغلوش عالموضوع
اما بالنسبة للعريس فهى عاملته اسوأ معاملة خلته يمشى بلا رجعه
حسن: وابن جوزك؟
جيلان: لسه معايا..بس انا خلاص هسيبه لاهله واتنازل عن وصايته
هى صحيح وصية جوزى
لكن انا لازم اعيش حياتى الى اتدفنت من بدرى دى
مش انت الى بتقول كده
حسن: ايوة انا الى بقول..وفرحان اوى عشان بسمع كده منك
(جاله فون )
ثوانى يا جيجي
الو..
الدكتورة فايزة : ازيك يا دكتور؟
حسن: اهلا يا دكتورة ..اخبار حضرتك
الدكتورة فايزة: بقالك اسبوع مش بتيجى المستشفى يا حسن..انت ناسى ان عندك حالة ولا ايه
ولازم تتابع علاجها
حسن: وده جزء من علاجى ليها يا دكتورة ..وانا عارف انا بعمل ايه
الدكتورة فايزة : اوك يا حسن..بس اتمنى انك تهتم بشغلك فالمستشفى اكتر من كده
حسن:(عوج بوقه يعنى الكلام مش عاجبه) حاضر يا دكتورة ان شاء الله
الدكتورة فايزة: اوك مع السلامة
حسن: يا سااااااااااااااتر
جيلان: ايه فيه حاجة
حسن: دى مديرة المستشفى الى انا بشتغل فيها، لكن مقولكيش برميل رخامه ياساتر
جيلان: هههههههههه
حسن: جيجي انتى اتحسنتى اوى عن الاول..هنوقف الدوا
وع فكرة عايزك تعملى صداقات جديدة.. ومتخافيش من وحيد
ولا من هرتلته
اوك
جيلان: اوك..اشوفك الجلسة الجاية بقى
حسن: تمام ..
مشيت جيلان ودخلت سمر..
سمر: جلسة مدام عاليا
حسن: اوك 5 دقايق ودخليها ..
سمر: ماشى يا دكتور
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
وبعد يوم طويييييل ..كانت بقت القاعدة الاساسية ل حسن وتقى
السلم
يقعدوا ويحكو ويتكلمو سوا..عن يومهم كله بالتفصيل
حسن: بس ياستى ايه رأيك
تقى: اهم حاجة انت مبسوط؟
حسن: انا بحب ابسطها هى
تقى: بس انت كمان شكلك مبسوط
حسن: هى بتفرح بأقل حجات بعملهالها..ومش طالبة منى حاجة
تقى: لكن مش حاسس بأى شقشقه فقلبك كده ولاكده
حسن: شقشقة يا شقيه ..(ابتسم جامد) الحب مش الحاجة الساهلة الى بتيجى بين يوم وليلة يا تقى
تقى: مانا عارفه (سرحت)
حسن: يا واد يالى عارف انت ..بقينا خبرة اهو وعارفين الحب واحواله
قوليلى
مافيش واد موز كده هناك
بعيون زرقه وشعر اصفر شبه ليوناردو ديكابرو
شقشقك فقلبك ياقمر انت (بيلعب فشعرها)
تقى: انا !! لأ..لأ خالص
حسن: وليه لأ خالص هو عيب..دى فطرة جوانا ومش بنتحكم فيها كمان
تقى: بس انا يوم م احب مش هحب واحد اجنبى وامريكى كمان
هحس بأن حبنا بارد بصراحه
حسن: ياواد يا وطنى ..ياللى بتشجع منتجات بلدك
تقى: ههههههه
وهما بيتكلمو جه الديلفرى مان .. واستغرب قعدتهم
الدليفرى: لو سمحتو مش دى شقة 11
حسن: اه انا الى طالبه..ثوانى
خليك ياتكتوك هنا
تقى: ماشى
حسن دخل شقته ودفع الحساب وخد الاكل
حسن: يلا عشان ناكل
تقى: وهناكل عالسلم!! ههههههه
حسن: ياستى عاااااااادى اى حاجة تطلع فدماغك اعمليها من غير تردد
يلا عالبسطة دى
وخلى البساط احمدى
تقى: طب تعالى ناكل فشقتى ، مش منظر يعنى
حسن: لا مينفعش يا تكتوك..انتى مبقتيش تكتوكة بتاعت زمان
بقيتى آنسة محترمة
وممكن تحلوة فعنيا بتى شيرت كات وومن الى انتى لابساه ده
تقى: هههههههه طويب
حسن: يلا انا جبت بيتزا بسطرمة وبيتزا خضار عشان انتى بتحبيها
يلا بسم الله
تقى: مجبتش بيبسى ؟
حسن: لا فيه يا حبيبى ..ثانية واحدة
نزل جاب كانزين من تلاجته وجه
حسن: انت تؤمر ياقمر
تقى ابتدت تاكل ..
تقى: حاسة ان الاكل طعمه متغير
حسن: لا بالعكس ده جميل جدآ..
تقى: بس معرفش ريحه البسطرمة وجعت بطنى (بطلت تاكل)
حسن: يابنتى م تاكلى ولا لازم أكلك انا فبوقك (قطع حته بأيده وحطها فبوقها)
تقى: (مسكت بطنها) اه!! اوعى يا حسن
طلعت جرى ع شقتها وفتحت الباب وجريت عالجمام وطلع وراها حسن بيجرى
حسن: فيه ايه ؟؟ يا تقى (بيخبط عالباب وهى مش بترد)
دخل مرة واحدة
طب قومى قومى مالك
غسل بأيده وشها ورفعلها شعرها وشالها ع دراعه ودخلها سريره
حسن: مالك يابت! متقلقنيش عليكى
تقى: مش عارفة ..بطنى وجعتنى مرة واحدة
حسن: بس الاكل كويس..انتى شكلك عندك برد فمعدتك
تقى: ممكن..
حسن: بتاخدينى ع اد عقلى ولا ايه يابت..انتى عيانة فيكى حاجة
نطلع ع دكتور دلوقت
تقى: لالالا مش محتاجه دكاترة..اقولك الحق ولا تقرف
حسن: لا قولى
تقى: اصل..اصل شوفت صرصار عالسلم فقرفت
حسن: صرصار!! ههههههه انتى هتعملى زى شيرين فالمتزوجون
الصوريصاااار
تقى: هههههه متتريقش بقى انا قرفت منه
حسن: وقعتى قلبى عليكى يا شيخه (حضنها زى بيبى صغير)
اوعى تخضينى تانى
تقى: حاضر
حسن: وخلاص بقى هنيئآ لاونكل صورصار بالعشوة متهنيناش بيها
هنزل ارميها
تقى: هههههههههه معلش بقى
حسن: اضحكى ..انا نازل..تصبحى ع خير ياتكتك
تقى: تكتك فعينك
حسن: ماشاء الله ع تربيتى زى الزفت
تقى: هههه شكرآ يا ابيه
حسن: برضو ابيه (خبطها بالمخده) طب يلا اتخمدى
اتخمدى
تصبحى ع خير يابتاعت الصوريصار
مشى وخارج من باب شقتها وقالها كلمتين
" خدى بالك من نفسك ياتقى ماشى .."
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
يومين وكان مقرر حسن يروح لحبيبة يشوفها وصلت لفين
لانه بيرتب فدماغه طريقة لعلاجها هو بس الى عارف ازاى..واول م دخل اوضتها
لقاها جايبة تورتة وشموع
وحاطة ميكاب وجميلة جدآ
حسن: ايه ده ؟ جيبتى الحجات دى منين؟
حبيبة: ليا طرقى الخاصة هنا..واى حاجة عايزاها بجيبها
حسن: وانتى عندك عيد ميلاد بقى
حبيبة: اه طبعآ عندى ..بس مرضتش اعزم حد
وبعدين انت جيت ليه؟
انت بقالك كتير مش بتيجى
حسن: قولت اريحك منى شوية..واسيبك تتفننى فقتلى براحتك
حبيبة: لا ازاى ..تعرف انى برتاح لما بشوفك؟
حسن: بجد!
حبيبة: لأ مش اوى
حسن: طيب
حبيبة: اقعد انت مش محتاج عزومة
حسن: يعنى انا معزوم عالعيد ميلاد ده ..طب ياستى شكرآ لكرم اخلاقك
حبيبة: ايه رأيك فيا ؟ شكلى حلو عشان المناسبة دى
حسن: انتى ع طول حلوة
حبيبة: عارف التورتة والاحتفال دول ليه ؟
حسن: لأ بصراحه..كنت لسه هسألك
حبيبة: انهاردة عيد ميلادى ...(عيونها فثانيه بقت بحر دموع رافضة النزول) انا زى انهاردة قتلت بنتى!
(ابتسمت مع نزول الدمعه ع خدها)
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
استنونا يعد بكرة ان شاء الله
شــيــزوفــريـنـيـا#
لــــ #نورإسماعيل
ليست هناك تعليقات:
إرسال تعليق