♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
حبيبة: عارف التورتة والاحتفال دول ليه ؟
حسن: لأ بصراحه..كنت لسه هسألك
حبيبة: انهاردة عيد ميلادى ...(عيونها فثانيه بقت بحر دموع رافضة النزول) انا زى انهاردة قتلت بنتى!
(ابتسمت مع نزول الدمعه ع خدها)
حسن بيسمعها وهو ساكت ومعلقش ع كلامها
حبيبة: مرددتش ورايا زى عادتك يعنى ؟
وقولتلى بنتك!
حسن: انا مستنى تكملى ..افضل تحكى كل حاجة براحتك من غير م اقاطعك
حبيبة: قولى يا حسن؟ هو انا وحشة
حسن: شكلا ولا اخلاقآ يعنى
حبيبة: الاتنين
حسن: انا اخلاقآ متعاملتش معاكى المعاملة الى اعرف بيها اخلاقك، شكلك بقى
فأقدر اجاوبك انك جميلة جدآ
حبيبة: عارف..لو كانت عاشت
كانت هتبقى احلى منى.. (سرحت وقامت من عالسرير) شيلتها جوايا هنا
(شاورت ع بطنها)
فرحت بمجيها اوى
وفرحت اكتر لما عرفت انها بنت ..بس ع اد م فرحت بمجيتها
اختارتلها الموت عشان احسنلها بكتير
ع انها تيجى دنيا كل حاجة فيها كدب وخداع
تتوه زى مانا توهت وتكره كل حاجة حبيتها فيوم من الايام
حسن: كنتى متجوزة؟
حبيبة: اومال يعنى بنتى من حرام! ايوة كنت متجوزة
ايه مستغرب؟
حسن: اصل سنك صغير متخيلتش انك متزوجه يعنى
حبيبة: انا الى اختارت ،اتجوز
وانا الى قررت اتجوز جوزى ده
زى م قررت اموت بنتى يوم عيد ميلادى الى فات
معرفش ان كنت كل حاجة بقررها صح ..ولا كل شئ بحس انه صح بيطلع فالنهاية غلط..
حسن: وبعدين
حبيبة: عارف..احيانآ بنضحك ع حجات بتثبت مع الوقت هبلنا ولا طيبتنا
مش عارفه
المهم انك بتعرف فالنهاية انك كنت حمار كبييييييير اوى
حسن: حبيبة انتى قولتى قبل كده ليا انك جيتى برجلك هنا
ولما حطتيلى السم قولتى انك عايزانا نتجوز..ازاى وانتى متجوزة
وازاى جيتى هنا..وجوزك فين كل المدة دى
حبيبة: انت كل حاجة عايز تعرفها فيوم عيد ميلادى ..مش تسيبنى اطفى الشمع ومفتكرش غير انى فرقت بينى وبين بنتى فيوم زى انهاردة
وكفاية عليا الشعور ده دلوقتى
حسن: طيب انا هسيبك براحتك..بس ياريت مدام بعد كل العناء الى عانيته معاكى ده
تتكلمى معايا فكل مرة اجيلك فيها
اوك
حبيبة: لا مانا هحكى..اصلى حبيتك (ابتسمت وعيونها حمرا من الدموع)
حسن: اتمنى انك مش تحبينى يا حبيبة، ع أد انك تأمنى لى وتعرفى انى هقدر اطلعك من الى فيه ده
حبيبة: انا مش عايزة اطلع يا حسن..
حسن: يعنى مبسوطة بوجودك هنا كده؟
حبيبة: بص...انا الى اختارت الاوضة الضلمة اقعد فيها بقية حياتى..عشان نور الشمس هيعمينى لو طلعتله وشوفته
حسن فتح الباب يخرج وآخر كلمات حبيبة قودانه مع آخر نظرة بيبص عليها فيها
ماسكة عروسة وبتقولها اطفى الشمع مع مامى ..!
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
"فرايز رقم 38"
ويتر معدر بأوردر لتربيزة جمب تربيزة قاعدة فيها ضحى واصحابها ..
صديقة ضحى: حسن!! حسن دكتور المجانين
حسن شزوفرينيا
ضحى: ايوة مالو حسن
صاحبتها: مالو ده ايه ؟ ده دكتور اولا معتوه ثانيآ نسونجى درجه اولى
وليه قصص بنت لذين مع البنات..ومن الاخر راجل مقرف وقليل الادب
وسكير وصاحب كوباية ووو
ضحى: عارفة!! وحياة ربنا عارفة
صاحبتها: وبترمى نفسك فالنار ليه يا ضحى ؟ مفيش غيره فالدنيا
ضحى: انا لمست جوه حسن حاجة حلوة..حاجة نضيفه لسه متلوثتش
عايزة بس حد يبقى معاه
صاحبتها: انتى متخلفه يابنتى! حتة نضيفة ايه
بقولك شخصية زبالة من الاخر
تعرفى قصة البنت الى اتجوزها عرفى وحملت ولما اتعرف الموضوع اهلها الصعايدة خدوها ودبحوها
ضحى: حسن عمل كده!!
صاحبتها: ايوة ياختى سى حسن بتاعك.. ده مفيش شئ مقرف الاوعمله
بتعملى فنفسك كده ليه انا مش فاهمة
ضحى: انا بحبه
صاحبها: طلعى قلبك ياماما وافرميه فالكبه زى البصل وانسيه نهائى
الراجل ده اخرته وحشه
ضحى: مش بأيدى.. انا احلى ايام حياتى هى الى بقضيها معاه حاليآ
خروجاتنا وكلامنا
كل حاجة
صاحبتها: اظن هتقوليلى بيحبك هو كمان..يا ماما ده مش بيحب حد
ضحى: لا ياستى مش بيحبنى ..لكن بيسعدنى
واكتر حاجة مكبراه فعينى انه مش بيخدعنى
صاحبتها: واخرة العلاقة الفاشلة دى ايه
ضحى: معرفش.. انا معرفش غير انى بحبه وبس
وعايزة افضل معاه كده لاخر يوم فعمرى
صاحبتها: اه تقضيها معاه سنكحه يعنى ،وتفنى الى جاى فعمرك عشان الهلفوت الصايع ده
ولما يزهق منك ترجعى لاكتئابك وانعزالك عن العالم
ومش بعيد تنتحرى
ضحى: لا مش هنعزل ولا هكتئب ، انا قولتهاله وهقولهالك
يكفينى دقيقتين غنالى فيهم قدام الناس
بعمرى كله اقعد عليهم ومش عايزة حاجة منه
وهما بيتكلمو جه حسن بعربيته تحت وبيرنلها وبيديها كلكسااات..
ضحى: (بتبص جنبها من الازاز شافته وشاورتله) طيب انا هنزله بقى
حسن: انتى قايلاله انك هنا!! يعنى مش هنقضى اليوم سوا
ضحى: طيب بذمتك اقضيه معاكى ولا مع حبيبى
صاحبتها: لا ازاى اقضيه مع حبيبك الى هيديكى ع دماغك ان شاءالله
ضحى شاورتلها ونزلت جرى لحسن بلهفه جامدة واول م نزلت
ضحى: حبيبى
حسن: متأخرتش يدوب خلصت كام حاجة ورايا وجيتلك
ضحى: ولو اتأخرت كنت برضو هستناك
حسن: هتستنى اد ايه
ضحى: العمر كله لو حبيبت
حسن ابتسم ونزل نضارة الشمس ع عينه
حسن: طب يلا كفايه كلام فالشارع ..اركبى
فالطريق...
حسن: هتروحى فين؟
ضحى: اطلع عالمرسم بتاعى
حسن: فين ده
ضحى: هقولك..
طلعو ع هناك واول م دخل .. بخطوات هادية وعيون بتلف المكان وبتبص ع كل ركن فيه
بانبهار شديد
حسن: المكان ده تحففه! بتاعك
ضحى: ايوة ..الاول كنت مأجراه وبعدين اشتريته
ايه رأيك ؟
حسن: بقولك تحففه.. (خد لوحه عالارض) تسمحيلى اتفرج عليهم
ضحى: المكان تحت امرك
حسن ابتدى يتفرج بأعجاب شديد ووقف عند لوحة منهم لمدة دقيقتين ..وبعدين اتكلم
حسن: اللوحة الاصلية من الرسمة دى عندى فالعيادة
ضحى: مانا شوفتها..حاطتها بعرض الحيطه برة فالاستقبال
حسن: بس انتى راسماها طبق الاصل..شكلك كنتى طالبة شاطرة فكلية الفنون
ضحى: انا رسمتها بعد م انت اشتريتها
حسن لف ضهره ببطئ متفاجئ من ردها
حسن: وعرفتى انا متى اشتريتها ازى؟
ضحى: انا قولتلك انى كنت متبعاك لحظة لحظة.. اليوم الى انت كنت فيه فالمزاد بيع اللوحات والحجات الانتيكة الفخمة
انا كنت هناك
وكنت متابعه انت هتشترى ايه بالظبط عشان يكون عندى زيه
والحمدلله
اختارت حاجة فمجالى .. تانى يوم جبت اللوحة والالوان وصممت ارسمها
حسن: ليه كل ده ياضحى ؟
ضحى: عشان بحبك
حسن: خايف اكون الانسان الى ميستاهلش حبك..وميعرفش يقدره
او انا بالفعل كده
ضحى: مش مهم..انا
حسن: (قاطعها وحط ايده من بعيد ع بُقها) انتىقولتى متبعانى لحظة لحظة..يعنى اكيد عارفة انا حياتى ماشية ازاى ومع مين
ضحى: ايوة
حسن: ومع ذلك بتحبينى؟! انتى غريبة اوى
ضحى: عشان تفرق يا حسن
حسن: تفرق ف ايه ؟
ضحى: انت ممكن تكون حياتك غلط وطريقتك فيها كمان..بس مش معناها انك انسان غلط
وبعدين م كلنا بنغلط
ماحنا مش ملايكة عالارض
الملايكة فوق فالسما
حسن: ومش خايفة منى
ضحى: انا سلمتلتك قلبى وانا متطمنالك
حسن ضمها لقلبه اووى فالكلمة دى..وبعدها بص فوشها عن قرب
حسن: خايف تندمى
ضحى: انا الى اختارتك .. ومش زعلانة من النهاية اى ان كانت
لو فصالحى هبقى اسعد واحدة فالدنيا
ولو ضدى
يبقى انا مش طماعه..يكفى كام يوم قضيتهم فمنتهى السعادة
حسن: نفسى اقولك بحبك ..تكون اد الحب الى فقلبك
بس انا واحد لايصلح للحب او لاى حاجة ياضحى..انتى جايز عرفتى حجات كتير عنى
بس مش كل حاجة
ضحى: يكفينى انك رحبت بحبى ليك ومكسرتش خاطرى..حتى لو بتعمل ده من واجبك فعلاجى ك دكتور
ف دى احلى فترة علاج مريت بيها فحياتى
وياريت كل الامراض الى فالدنيا تكون انت
ويارتنى متشفيش من عيا انت سببه ياحسن
حسن: طيب انا عايزة اقولك انى بجد عمرى فحياتى م سمعت كلام احلى من كلامك
مش عشان حلو وبس
ولكن عشان بجد صادق وحسيت بيه
ضحى: ممكن اطلب منك طلب ومش ترفض
حسن: انتى تؤمرى
ضحى: ممكن ارسمك بسرعه هنا ..متخافش انا ايدى سريعه
حسن: والايد السريعه دى هتاخد اد ايه ..خلصينى ورايا مشاغل
مفيش غير ضحى ولا ايه !
ضحى: ههههههههه متخافش 3 او 4 سعات بس
حسن: والله!! لا كده يا مسهل
اقعد فين؟
ضحى: هنا
حسن: طيب بسرعة ماشى ..حتى هتشلفطينى
ضحى: اشلفطك ازاى وانت قمر اصلا
حسن: عارفة لو بوظتى خلقتى..هشلفطك انا
ضحى: هههههه متخافش انا بعتلك قبل كده
وشوفت عمايل ايدى
حسن: عمايل ايدك ايه ياضحى ..هو انا قاعد ف
cbc
سفرة ولا ايه
ضحى: هههههههه
حسن: يلا بقى هنقضيها ضحك
ضحى: طيب خلاص خلاص
حسن: بس ايه رأيك ..شوفتينى فالشر
ضحى: قمر فكل حاجة يا حسن..يلا اثبت بقى
وهنبتدى
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
جيلان فأوضتها ..منسجمة الى حد ما فالكلام فالفون
مع وحيد..
جيلان: وليه اختارتنى انا بالذات يا وحيد الى تسيب البلد معاها
وحيد: مش عارف بس حسيت انك مخنوقه زيي كده
وطالع عينك فالدنيا والبلد
ونفسك تهجى بس مش لاقيه ال يوجهك
جيلان: وانت جيت كده اتكلمت معايا..ومش عارف حاجة عنى ولا تفاصيل حياتى
وحيد: بصى انتى بس توافقى ..وبعد كده امور ساهلة
جيلان: ولما اوافق هيحص ايه
وحيد: انا ماشى فموضوع الهجرة ده من زمان..وفاضللى كام نقطة واكمل الاستمارة
وتيجينى الهجرة
بس لازم املا نقط خانه الحالة الاجتماعيه
ولو مليتها بمتزوج هتجينى الهجرة..لان ضايع منى نقط فحجات تانية
ومش عارف اعوضهم
جيلان: يااااه هو الموضوع صعب اوى كده
وحيد: اه بقى تقولى ايه..البلد بنت الايه دى ماسكة فينا عشان تذلنا بأيديها وسنانها ومش عارف ع ايه
حتى فالهجرة عذاب السنين
جيلان: وعايزنى اسيب اهلى وبلدى واصحابى ونروح مكان منعرفش فيه حد
وناس مش شبههنا ولا عيشتهم زى عيشتنا اصلا
وحيد: وعملولك ايه الناس الى انتى منهم! لما تعبتى كانو جنبك
كانو بيخففو عنك
مش بعيد يكونو اول ناس هو الى اذوكى
جيلان: وعرفت بقى منين انى مسيحية! مش يمكن كنت خبطت فواحدة مسلمة وكان هيبقى شكلك وحش
وحيد: يعنى هو انا اعمى.. انا شوفتك حاطة العدرا فسلسلة رقبتك
وماسكة ميدالية دهب عليها الصليب
جيلان: وخدت بالك منى اوى كده
وحيد: من اول م دخلتى وحياتك.. شكلك وارتباكك قولت دى اول مرة تيجى هنا
ادخل عليها حامى ورا بعض
جيلان: هههههههه انت جيت فوقت كنت جايبة اخرى من كل حاجة
عشان كده طاوعتك وادتلك رقمى عشان اخلص من الوش الى عملتهولى
وحيد: ياستى وانا مش هزعل من كلمتنيك الى زى الدبش دول..ولو كنتى جيبتى اخرك من كل حاجة
مع بعض هنجيب من الاول وع اقل من مهلنا
جيلان: وخلتنا مع بعض حالا كده
وحيد: هنبقى ومتأكد..مش بقولك صليت فيوم العدرا فيه سمعتنى
جيلان: ربنا كريم
وحيد: اوى ع فكرة
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
"عادى بتحصل يعنى بتبقى نتيجة توتر او اى حاجة "
تقى: اصلى اتخضيت يعنى مش متعودة تتأخر كده
سلمى: لا عادى..تلاقى تغيير جو ولا حاجة متحطيش فبالك
المهم
كملى وبعد م شوفتى الصرصار
تقى: ههههه انا اصلا ماشوفتش صرصار ولا حاجة، بس بطنى وجعتنى موت لما شميت ريحة البسطرمة
ومش حبيت اقرفه
وهو كان جعان
سلمى: مممم بس بقيتى كويسة دلوقتى
تقى: لا انا بقيت تمام الحمدلله..خدت دول للمغص وخلاص
سلمى: اه صحيح عايزة اقولك رسالة توصليها له، قوليله
اسأل ع اختك يا ندل
تقى: بصى هو اليومين دول مش فموده نهائى ..
سلمى: ليه بقى
تقى: هقولك ومش تقوليله
سلمى: قولي
تقى: بيحب..او بصى مش بيحب يعنى بيحب
بس هو اليومين دول ف واحدة شاغلة باله
سلمى: مم قولتيلى .. بس اعتقد ان حسن بعد الموضوع اياه ده وهو ..
تقى: كملى..موضوع ايه؟ وهو ايه
ماتتكلمى ع طول يا سلمى
سلمى: يابنتى مفيش موضوع كده زمان كان معاه..المهم حلوة البنت دى
تقى: مش شوفتها بس هو مبسوط معاها
سلمى: هياخد يومين ويقلبها وابقى شوفى
تقى: ياااه..هو ابيه ممكن يعمل كده فعلا
سلمى: حسن هوائى جدآ..وبعدين مبقاش يوقف ع حد من ساعة موضوعه القديم ده
تقى: طيب م تخليكى جدعة وتحكيلى الموضوع ده
سلمى: لا ياختى هو يحكيهولك.. لكن انا لا
وبعدين انا عرفته صدفه
هو مش بيقول حاجة لحد
وكونه بيحكيلك اليومين دول تبوسى ايدك وش وضهر
تقى: انا اصلا بقيت استنى السهرة بتاعتنا اليومية عالسلم
يحكيلى واحكيله
ولما يتأخر ارنله اشوفه فين
سلمى: بس حسن بيرجع الصبح ..بتستنيه للصبح
تقى: انتى عارفه انى بنام الصبح ..وهو سعات بييجى بدرى يعنى
سلمى: مممم تمام بس برضو متنسيش تقوليله انه ندل
تقى: اوك..انا همشى بقى
سلمى: يابنتى استنى هنتعشى سوا
تقى: لا عشان الحق اروح
سلمى: طيب خدى بالك من نفسك اوك..برضو مش هتروحى لمامتك
تقى : لا..باى يا سلمى
سلمى: باى
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
سمر بتخبط الباب ع حسن فالعيادة..
سمر: اخر جلسه انهاردة دكتور حسن ..الاستاذ عبدالقادر
حسن: ده اول جلسة مش كده ؟
سمر: اه ..حجزتله ع انهاردة
حسن: اوك خليه يدخل
سمر: استاذ عبدالقادر اتفضل
دخل عبدالقادر.وماهذا العبدالقادر!!
رجل ضخم البنيه بشرته سمرا ومايله للسواد شويه..عيونه جاحظة
ممكن سنه يتراوح بين 48 و ال 50
لابس بدلة كويسة ومعاه شنطة صغيرة
قام حسن مادد ايده يلسم
حسن: اهلا استاذ عبدالقادر
عبدالقادر: (ممدش ايده وقعد ع طول ورد بقلة ذوق) اهلا يا سيدى !
حسن استغرب..لم ايده وقعد عالمكتب وساكت، لكن هو شغال يبص ع اوضته ويتفحص كل حتة فيها
عبدالقادر: انت بقى دكتور حسن !
حسن: حضرتك جاى لمين..ولا خدت العنوان غلط
عبدالقادر: لا ازاى اخده غلط ودى تيجى... قولى بقى انت بتعمل ايه فالمخروبة دى
حسن: مخروبة!! ابدآ يا ريس بييجو شوية عالم مهافيف نفسيتهم تعبانة شافو اشكال مش ولابد فحياتهم
بيحكولى عشان يستريحو
عبدالقادر: وبتريحهم بقى يا دك!
حسن: مش فاهم قصد حضرتك
عبدالقادر: اقصد بيطلعو من عندك تمام يعنى
حسن: ان شاء الله..اتفضل انا سامعك
عبدالقادر: لا ما حنا هنحكى كتير ..هنحكى كتير اوى (قام وقعد عالشيزلونج)
وده الى بتصطاد عليه الحريم بتوعك صح
حسن: حريم بتوعى !
قام بعصبية وراح ناحيته ومسكه من ياقته ووقفه بعنف !
حسن: واضح انك جاى تستعبط ولا تتريق عليا..ولا جاى تكشف ولا حاجة
ولاحظتك من اول م دخلت ومطول بالى عليك
عبدالقادر: (رمى ايد حسن بعيد) نزل ايدك ..نزل!
حسن: انت جاى ليه ؟ ومين انت اساسآ
عبدالقادر: (طلع مسدس من جيبه وصوبه ع دماغ حسن) انا جاى اخد روحك
نفسك فايه قبل م تموت
حسن: (اتخض لكن مسك نفسه وكان ثابت) جاى تاخد روحى انا ... اتفضل خدها
(فتح دراعاته)
عبدالقادر بيدوس عالزناد
1
2
3
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
استنونا الاسبوع الجاى ان شاء الله
شــيــزوفــريـنـيـا#
لــــ #نورإسماعيل
ليست هناك تعليقات:
إرسال تعليق