ح١٢
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
عنان
ومحمد
وسلمى ومعاهم تقى ..
كلهم متجمعين فشقه العيلة عند حسن ،بس فين حسن ؟
سلمى:ماليش دعوة، تجيبو حد يدور عليه
تنادو عليه بمنادى
تحضروا جن المهم نعرف حسن فين
عنان:يا سلمى هنعمل ايه اكتر من الى عملناه ،محمد مخلاش اى مكان الا ودور فيه
اصحابه ومعارفه
فأقسام بوليس ومستشفيات
تقى:والمصيبة ان عربيته اهيه مركونه تحت،يعنى حتى معرفناش نوصله عن طريق ارقامها
محمد:انا معرفش هو بيعمل كده ليه ،لو طقت فدماغه يسافر كان عالاقل بلغ سمر عشان العيادة
لكن ده حتى هى متعرفش هو فين
تقى:ولغت كل الجلسات..هتعمل ايه
سلمى:انتو مالكم بتتكلمو ببرود كده ، ده بقاله ٢٣ يوم غايب ومنعرفش عنه حاجه
اناخايفه يكون حصله حاجه
عنان:يا سلمى اهدى مش كده
سلمى:اهدى ايه ؟اكيد حصله حاجه
ده اكيد
انتو فاكرين الراجل الى ضربه بمطوة
اكيد حد عمله حاجة وراح فيها (بتعيط)ياحبيبى ياخويا
احمد:ياسلمى بشرى خير يا حبيبتى مش كده
تقى:(افتكرت حاجه)هو انتو دورتو فالنايت الى بيقعد فيه او سألتو حد عنه
محمد:نعم!!نايت
سلمى: (بتمسح دموعها)ايوة عندك حق ياتقى، لازم تروح تسأل فالنايت ده يامحمد
انا عارفه مكانه
هو خدنى فيه قبل كده
محمد:نايت ايه وبلاوى زرقه ايه ؟وصلت كمان للاماكن الى عليها غضب ربنا دى وادخلها برجليا
سلمى:(بعصبيه)وانا احنا قولنا اسهر فيها ،دور ع اخوك يا اخى
احمد:عيب ياسلمى متكلميش اخوكى كده
عنان:معلش يامحمد لازم تروح ..إسأل وبس
مش هنخسر حاجة يمكن يعرفو حاجة عنه بدل القلق ده
احمد:انا هاجى معاك يامحمد
تقى:لازم منسبش مكان الا وندور فيه ، دول ٢٣يوم وحسن اعداءه كتير
محمد:امرى لله، جه اليوم الى ادخل لاماكن مشبوهه وكل من تحت راس سى حسن
قولى العنوان ياست سلمى
♦♦♦♦♦♦♦♦♦♦♦♦♦♦♦♦♦♦♦♦♦♦
عروسة الهونى مون هى وعريسها طالعين من السينما
وهيمانين فالفيلم الرومانسى الى شافوه
وفالسعادة الى بيعيشوها سوا
جيلان:تعرف يا وحيد، دايما كنت بصدق كلمة الامان مش راجل
وبؤمن بيها جدا
بس دلوقتى صدقت ان مش اى راجل ..لازم يكون راجل امين يقدر يسعد حبيبته
زيك يا وحيد
وحيد: انا اهم حاجة عندى انك مبسوطة يا جولى
جيلان: قولى بقى اخبار ورق الهجرة ايه
وحيد: خلاص هانت قدمت اوراقنا سوا ،وقريب هتيجى خلاص مش فاضل كتير
ونعيش سوا احلى سنين عمرنا فبلد غير دى ياشيخه
جيلان:مش عارفه يا وحيد حاسه انه صعب اسيب مصر واهلى واصحابي والكنيسة الى اتربيت فيها
واروح مرة واحدة كده لبلد معرفهاش ومعرفش تقاليدها وهعرف اعيش واتكيف فيها ولا لأ
وحيد: يا جيلان حرام عليكى ، مصر وبتنجان ايه
شوفنا ايه فيهل غير قرف ...دى بلد بومة ياشيخه
فالحين بس نمجد فالحضارات واجدادنا الفراعنه واحفادهم بيشدو كولا تحت الكبارى وبيضربو ماكس
جيلان:ههههههههههههههه
وحيد:طب بذمتك لو خيرتك وقولتلك الجنسية المصرية ولا ايفون 6 ،هتختارى لون الجراب ايه ؟
جيلان:ههههههههههههههه هههههه انت فضيحه مش ممكن
وحيد: ياست فكك بلا مصر بلا الكونغو ،ده احنا هننطلق بس نهاجر بس
جيلان:عملتلى غسيل مخ انت وخلاص ماشيه وراك ومعمية
وحيد: وصدقينى هتكسبي، قوليلى صحيح
جيلان:نعم
وحيد:ابن جوزك الاولانى كده مع اهله خلاص واسقطى الوصية عنك وفلوسه طبعا
جيلان:اه ،مانا قولتلك
وحيد: مممم ياعينى عليكى يا جولى، الفلوس الى طلعتى بيها من الجوازة دى خدوهااهلك وسددو ديونهم
والباقى ابن جوزك
وطلعتى انتى ابيض
جيلان:لا ازاى، لأ طبعآ معايا مبلغ بتاعى لوحدى فالبنك بإسمى
وحيد:مبلغ كبير يعنى
جيلان:بتسأل ليه
وحيد: كنت عايز اجيب ٢ فول وحمص نأزأز فالشارع ،والسينما والغدوة خدوا كل الفكه
فبفكر نروح البنك تصرفى شيك ب ١٥جنيه نجيب الحجات دى ونيجى
جيلان:ههههههههههههههه وليه جاى ع نفسك كده
خد ٢٠جنيه بحالهم وهات وبلاش البنك
وحيد: ع رأيك ده التاكس الى هناخده من هنا لهناك هياخد خمسناية مقفوله
ع ايه
بناقص
خلى مشوار البنك لما نعوز نشترى آيس كريم ولا حاجة
جيلان: ههههه طب امشى يلا قدامى يامبذر
وحيد: ده انا فنجرى واعجبك
جيلان: باين ياخويا باين قدامى
♦♦♦♦♦♦♦♦♦♦♦♦♦♦♦♦♦♦♦♦♦♦
"الو.... لا يافندم مافيش جلسات الاسبوع ده كمان
الدكتور حسن لسه مرجعش من السفر"
سمر قفلت السكه وبالها مشغول ع حسن،ماهى عشرة عمر
واختفاؤه فجأة كده حاجة تقلق جدآ
ده غير ان المفروض انه كان ينقل العيادة لمقرها الجديد ،وكل ده اتعطل بغيابه المفاجئ ده
ومن باب الاطمئنان
بتتصل بسلمى اخته الى مسابتش شقته فترة غيابه كلها هى وجوزها ..
سلمى:لأ يا سمر لسه معرفناش عنه حاجه ، اكيد هبلغك لو عرفنا حاجه
ربنا يخليكى
سلام
تقى:كفاية عياط ياسلمى ،ربنا العالم حاسة ان يتيمة من غيره
بس ماسكه نفسي عشانك
سلمى:حسن لو كان جراتله حاجه انا ممكن اموت فيها، اصل انتى متعرفيش هو ايه بالنسبة ليا
ع اد ماهو طايش وهوائى
ومجنون
بس هو كل الحجات الحلوة الى تتقال عالاخ، الجدعنه والطيبة
كفاية شيلته ليا طول السنين دى زىم اكون بنته بعد موت بابا وماما
اه يتهيأ للناس انه بعيد عننا ..وفعالم لوحده
بس هو معانا برضو
انتى عارفه...من يوم جوازى ،وكل يوم الصبح يخبط عالباب بتاع الورد جايبلى بوكيه توليب
ويقولى من حسن
عشان انا بحبه وهوعارف ده
وعالكارت كلمتين حلوين وان لو هو بعيد بيحاول ع اد م يقدر يبقى جنبنا
اكلة السمك والجمبرى وفواكة البحر الى بموت فيها ، لازم كل اسبوع تيجى دليفرى لحد بيتى
لان هو عارف انى بحبها
وممكن انسى نفسي ومش أكلها بالكام شهر
لكن هو مينساش
حتى شقتى...كل حته فيها هو الى جايبها ودافع فلوسها
محمد جايبلى حجات بسيطة،بس الله يعينه ماهو برضو موظف وعنده بيت
مقدرش متأثرش بغيابه ياتقى..مقدرش
وسلمى بتعيط فحضن تقى الباب اتفتح !
♦♦♦♦♦♦♦♦♦♦♦♦♦♦♦♦♦♦♦♦♦♦
حقنه ٢سم بتتضرب فوريد حبيبة فالمستشفى
حبيبة:وهو لسه مجاش برضو حسن ؟
الممرضة:لا لسه، والدكتورة فايزة سألت فكل حته وبرضو مافيش أثر
حبيبة: يعنى ايه ،مات ده ولا ايه
الممرضة: بعد الشر يا مدام حبيبة ،ده الدكتور حسن ده سكره
ان شاء الله هييجى بالسلامة قريب
تلاقيه مسافر حته ومقالش هو بيعمل كده ع طول
حبيبة:اصل هقولك ع حاجة بس متلكيش وترغى فيها مع حد
الممرصة:اتفضلى
حبيبة: مش عارفه ليه مش مرتاحه لغيبته دى ،حاسه انه مش راجع
ولو مرجعش وجابولى وائل تانى
هفتح دماغه ان شاء الله المرة الجاية
الممرضة:لا ان شاء الله راجع ،ربنا يجيب العواقب سليمة يارب
♦♦♦♦♦♦♦♦♦♦♦♦♦♦♦♦♦♦♦♦♦♦
"حسن!!"
بتجرى سلمى وتقى فنفس واحد عليه وكل واحدة بتحضنه من ناحية ،لكن هو مكانش فيه اى حيل يحضن حد
راجع شعره ودقنه من طولهم مخبيين وشه
وجسمه مهدود وهدومه مش نضيفه وشكله مرعب!
تقى:ايه ده انت حصلك ايه
سلمى:اقعد ياحبيبى خد نفسك ، سلامتك
حسن:(بيشاور لتقى) مايه ياتقى ربنا يخليكى
تقى:حاضر
سلمى:مالك بس ايه الى مبهدلك كده، وكنت فين ده كله
حرام عليك انا كنت هموت
حسن:هقولكم كل حاجة بس اخد نفسي الاول
شرب المية ، وخد نفسه وابتدى يحكى ......
♦♦♦♦♦♦♦♦♦♦♦♦♦♦♦♦♦♦♦♦♦♦
"بعد موت ضحى قدام عنيا وع ايدى، معرفش عملت كده ازاى
سيبتها مكانها عالارض وهربت بعربيتى اضرب البلد من الشرق للغرب لا أنا عارف اروح فين ولا عند مين
ولا اعمل ايه
ومعرفش هل فيه حد شال ضحى واهلها عرفو ولا لأ، كل الى عارفو انى جيبت العربية تحت البيت
وفضلت ماشى وانا معرفش انا فين
ورجلى فضلت واخدانى والدموع مغرقه وشى ، مفوقتش غير ع ادان بصوت عالى
مكنتش عارف ده ادان ايه
ولا الساعة كام دلوقتى
ولا انافين
دخلت الجامع ...اتوضيت وصليت ومسكت المصحف بكيت
شايفها قدام عنيا
شايفها وهى بتروح من بين ايديا
شايف قسوتى عليها ومكنتش عارف انهم اخر ايام عمرها
مبقتش بعمل حاجة غير انى اصلى واقرا قرآن لروحها كل يوم وكل دقيقة
عالأقل ابعتلها حاجة تسعدها زى م ورتنى السعادة فالدنيا ومردتش ليها اى حاجة
بقيت عالحال دى من غير اكل ولا شرب ، ومش عارف الايام من بعضها
ولا شوفت الشمس بعينى
اعرف الوقت بالصلاة،الصبح
الضهر
وكده
لحد م فيوم فاتح المصحف وبقرأ ... جت قوة شكلهم غريب مرة واحدة ووقفو ع باب الجامع بعتو عساكرهم خدت بعض الناس الى كانت فالجامع
وكنت انا منهم
اشتبهو فيا اكون ضمن خليه او جماعه، عشان دقنى كانت طويلة
وكنت موجود فالجامع بقالى فترة متواصله
وواضح انهم كانو بيراقبونا
اتضربت واتهانت واتذليت ،واتعذبت بالكهربا
بس انا مكنتش حاسس بأى حاجة من دى غير انى طول الوقت شايف صورة ضحى قدامى
ضحكتها
ونظرة عيونها
لما كنت باخدها فحضنى واحس بفرحه نبض قلبها
كنت يائس من كل حاجة ،سألونى كتير ومكنتش بنطق
كانو بيزودو التعذيب
لحد اول امبارح ،خدونى لظابط كده وقالى بإستهزاء
لما انت صاحب كوباية وعشيرتك رقاصات وبنات واطية مقولتش ليه من الاول
بدل دور المشيخه الى انت عامله علينا ده
برضو مردتش، رمولى حاجتى ورمونى برة المكان الى كنت فيه، فضلت ماشى لحد م حد بعربية ملاكى معرفوش وقفلى فالطريق شكلى صعبت عليه
وصلنى للبيت
واول م وصلت لاقيت سلمى اختى وتقى ، وهما الى اقنعونى ارجع لحياتى وشغلى من تانى
وابتدوايرجعونى لحياتى من تانى عشان اقدر اكمل بإقناعى ان الحى ابقى من الميت
وسمعت كلامهم
واول مكان روحته بعد م رجعت هو هنا ...
حبيبة:وايه المفجأة الى كنت عاملها لضحى
حسن:كنت هخليها تعمللى ديكور عيادتى الجديدة ، كنت رايح اخدها لعيادتى اول واحدة تتفرج عليها
وبكدة نكون دايما سوا
واصحاب
ومبعدتش عنها
بس هى كانت فاكرة انى هعرض عليها الجواز قالتها قبل م تموت
وده الى عذبنى اكتر
بس انا كان لازم افهم..جميلة مكانتش هناك اليوم ده
يعنى حظى مش انهاردة
حبيبة: جميلة مين ؟
حسن:دى بنت شحاته بتفائل بيها
حبيبة:بتتفائل وبس،مش حاجه كده ولا كده
حسن:،لو اى حاجة كنت قولت ، انا ياما عرفت بنات فكل مرةبيتعلقو بيا
بس انا مبقدرش اكمل
انا مينفعش اتجوز
مينفعش
حبيبة:يعنى انتى فكل مرة تعرف واحدة وتحببها فيك وتقولها بحبك وبعدين تزهق تقومو تسيبو بعض
حسن:بس انا مبقولش بحبك لحد
حبيبة: اومال تسمى الى بيحصل ده ايه فكل مرة، لو متعرفوش احب انا اعرفهولك
ده اسمة كسره قلب
دى قلوب مش اطباق نيش امك هى
حسن كان متأثر كلمة حبيبة فوقته شوية خلته يبتسم
حسن:نيش امى !انتى بتجيبى القباحة دى منين
وبعدين ازاى تضحكى عليا وبدل م انتى الى تحكى انا الى بحكى
هو مين فينا دكتور التانى
حبيبة: انت هتكابر كمان انك تعبان وعايز تخفف عن نفسك وتفضفض
وبعدين. انت هتعرف سرى وانا كمان لازم اعرف اسرارك
المعاملة هات وخد
حسن: (ابتسم ابتسامة صفرا ورجع سرح)
حبيبة:اقرالها الفاتحه اطلب لها الرحمه ، وبعد كده متقربش حد منك انت عارف ان نهايته مش معاك
حسن:حاولت والله
حبيبة: خلاص الى حصل حصل وده قدرها
حسن:(عيونه مدمعه)بس مكنتش عارف انها هتموت ،لو بإيدى اعيد كل الى فات واتجوزها فالفترة الى فاضله فحياتها دى
بس محدش يعرف الى جاى ايه غير ربنا
لو كنت اعرف مكنتش ضيعتها من ايدى ،اصل مينفعش اضيع حد حبنى الحب ده كله وبغبائى فرطت فيه
والله م كنت اعرف ..(خبى وشه زى الاطفال وهو بيبكى)
حبيبة قامت بحنان لا إرادى وضمته لصدرها وهى بتبكى معاه..وكل حد منهم بيبكى ع حاجة راحت منه من غير قصد
♦♦♦♦♦♦♦♦♦♦♦♦♦♦♦♦♦♦♦♦♦♦
#شيزوفرينيا
#نورإسماعيل
ليست هناك تعليقات:
إرسال تعليق