ح(٢)
~~~```~~~~`````~~~~~``````~~~
" عايزة احس انى متطمنه ، ف امان بحبه ليا وبحبي ليه
ليه مش عارفه احس بحاجه حلوة معاك ياهشام
حتى احساس الحب بخيل فيه ، بكابر وبعاند فاللى حواليا ف اختيارى
عشان نفسي اتخطب لحد مكانته عالية وهو هيبقى دكتور فكلية الاعلام
لكن يعمل ايه كل ده ومفيش مشاعر حية كلها مشاعر باردة
انهاردة هحسم موقفى منك ...وهقطع عرق واسيح دمه "
قفلت النوت بوك وحطيتها فمكانها ، ولبست هدومها ونازلة عالجامعة فالوقت الى كانت هتحصل فيه خناقة جامدة جدآ مع ناس تانيين
بعيدين كل البعد فالمكان والحياه والمعيشة عنها !
كان بيتمشي ف جنينة السرايا ،ماسك فونه وواضح انه مبسوط
من مكالمته الجارية حاليآ
سيف: عن جد! متعرفيش اد ايه اشتقتلك
اه طبعا هموت واشوفك
(وشه قفل) اظن دى حاجه متهمش اى حد وزى ماهو حر انا حر
يعنى امتى طيارتك هتوصل ؟!
هكون فانتظارك من قبل المعاد ...اوك
ناطرك
قفل الفون وهو مبسوط ودخل السرايا كأنه مش شايف اى حد قدامه ، ولاحتى باباه الى كان
بياخد جرعة الدوا بتاع السكر .
سيف: فيروز ....قوليلهم يحضرولى الحمام والفطار حالا عشان نازل بسرعة
فيروز(مديرة المنزل): تحت امرك سيف بيه
رفعت : رايح فين ياسيف ، مفيش صباح الخير ؟!
سيف:(عض شفايفه ببرود) صباح الخير
رفعت: سبق وسألتك رايح فين ؟!
سيف: هروح اى حته فاى مكان فالدنيا ومش من حق اى حد يسألنى السؤال ده
رفعت:(اتعصب) متتجاوزش حدود الحوار بينى وبينك ونبهتك مليون مرة ع اسلوبك ده
لكن واضح انى غلطان انى بتعامل معاك بود زيادة عن اللزوم
سيف: ود ! انت مش مجبر انك تعاملنى من اساسه ولا انا
ودلوقت عن اذنك لأنى لازم اجهز وانزل حالا
رفعت: اسمها انت برضو ! وايه المشوار المهم الى نازله فيوم اجازتك ده
لولا انى عارف انك شخص غير لطيف مع الكائنات الرقيقة والجنس الناعم كنت قولت عندك
راندفو
سيف:احسبها زى م تحسبها ياباشا ، ودلوقت عن اذنك
طلع فوق وضرب بكلام باباه عرض الحائط، لكن تساؤلات باباه جوه عقله عن سبب انبساط سيف المفاجئ
ومشواره المجهول مطولش
وده لأن الاخباريات الى بتشتغل عنده مش بتوقف لحظة فى اخبار رفعت نصار باشا كل شئ اول بأول
~~~```~~~~`````~~~~~``````~~~
"هشام! يانهارك اسود ايه الى بتعمله ده "
هشام: ايه يا سارة بتزعقى كده ليه ؟
سارة: بزعق ليه ، ايه الى بتعمله ده
متخلنيش بجد اتخنق واصدق انك ....انك بخيل !
هشام: انا مش بخيل يا سارة، انا حريص فيها فرق
عشان اعرف احوش قرش والم نفسي ، ثم ان المجاستير والدكتوراه مش عايزين مصاريف وبلاوى ابويا هيكفى منين ولا منين
سارة: تقوم توصل بيك انك تشترى هدوم بواقى تصدير من عالرصيف ...اتجننت !
افرض حد شافك يقول ايه
هشام: متزعليش اوى انا يدوب جبت كام حاجه لزمانى ، المهم عايزانى فيه ايه
موضوع مهم موضوع مهم ..خير
سارة : طب تعالى ندخل الجامعه ونتكلم
~~~```~~~~`````~~~~~``````~~~
بكامل اناقته وده العادى بتاعه ، نازل وع وشه اشراقه مش عادية
قطعها صوت باباه العالى المتعصب
رفعت: تفتكر لما تحجزلها تذكرة عودة ل لبنان الاسبوع الجاى وتخلى السكرتارية هى الى تقوم بالمهمة دى
اكيد ده شئ مش هيستخبي عليا
وانا كلفتهم ب الغاء التذكرة ياسيف
سيف:(وشه كشر) ايوة حجزتلها ، ونازل اقابلها لانها وحشتنى
ولان محدش يقدر يمنعنى ويمنعها عنى
وان كنت لغيت الحجز ف انا هحجز من اى مكان تانى
رفعت:(قام من ع كرسيه بعصبيه) بتتحدانى ياسيف ، طيب
انا مش موافق تشوفها
سيف: (بسخرية) رفعت باشا احب انبه حضرتك بأنى عديت ال ٢٨ سنة مسؤل عن نفسي وتصرفاتى
مش حابب حد يتدخل
ومفيش حد هيمنعنى عن اى حاجة عايز انا اعملها بإرادتى حتى لو كان الشخص ده ...يبقى حضرتك !
رفعت: سيف...سيف الست دى اذتنى
وانت عارف
سيف: انا معرفش حاجه وماليش علاقه باى حاجه حصلت بينكم زمان
اى ان كان ايه هو
انت اذتها
هى اذتك
فهى هتفضل امى ...حبها جوايا ٢٨ سنة
انحرمت منها سنين ...وانا محتاجها اوى دلوقت
ارجوك خلى الخيوط الضعيفة الى لسه واصله بينى وبينك زى ماهى عشان خلاص هى ع حافة الانهيار
رفعت: حتى نظرة عنيك نظرتها، امشى من قدامى مش حابب اشوفك(قعد عالكرسي بانكسار)
سيف: ان كنت شبهها شكل ،فانا شبهك طبع
والاتنين مش بإيدى... عن اذنك
~~~```~~~~`````~~~~~``````~~~
هشام: جواز !!! انتى بتفهمى ازاى
اه صحيح نسيت انك من الصعيد
سارة: لو سمحت يا هشام بلاش غلط ، وبعدين ايه المفجاة ف كده
هشام: انا لسه عندى سنين ماجستير وسنين دكتوراه وحللينى بقى ايشى مصاريف
كتب واقلام ودفاتر وورق وروح وتعالى وتاكسيات
سارة : اومال احنا مرتبطين ببعض ليه ؟ عشان اقعد استناك ده كله
هشام: انا مرتبطش بيكى يا سارة ، انتى الى لازقه فيا وانا رضيت قولت اروش واعمل زى كل الشباب وابقى مصاحب بقى وبتاع
سارة: لازقه فيك !(قامت من عالكرسي وضربت ايدها عالتربيزة ) انا لا زقه فيك يا جلدة يا نتن ع راى جهاد مش بيتمر فيك
ده انا راضية بيك ع غلب ايه مش عارفه روح ياشيخ جاتك ستين نيلة
هشام: م تحترمى نفسك احنا فالجامعه وكلهم بيبصوا علينا واعرفى انك بتكلمى دكتور وانتى حتة طالبة
سارة: دكتور زبالة الله يكون فعون الى هيكونو تحت ايدك ويتعلموا
هشام: خلى بالك بقى انك وحشة جدا وانا ساكت ، وسمرا وانا مبحبش السمر وصبرت برضو
قولت بكرة تبيض ومامتك ممرضة عادى يعنى منفوخه ع ايه
سارة: متخلف اصلا ومش هرد عليك ،اتاريك كنت مرتبط بيا عشان اغديك واعشيك والبسك
جاتك نيلة
غور من وشي
سابته ومشيت وهى بتضحك ع هبلها وعبطها وانها فيوم من الايام كانت مرتبطة بواحد زى ده !
لكن طبعا والمتوقع من شخصية رومانسية زى سارة ،كل حياتها مبنية ع الافلام القديمة والروايات
انها بليل لما تفتكر
هتعيط شوية ...وتسح دموع وتخليها ليلة سودا ع جهاد ...
جهاد : يا ليلة طين ومش باين لها معالم ، كل دى دموع عالمقطوع هشام
وانا الى قولت هنبات معاكى واترحم من رارا وزمارة تقعدى تبكيلى زى الى كلت جوزها فالحرب
سارة: (بتمسح عيونها) مين رارا وزمارة دول
جهاد: اتحطيش فبالك ، المهم دلوك هنقضى الليلة كلها كده تبكى ع اللى واكل ناسه ده
سارة: انا يا جهاد ...انا يقولى انتى وحشة اصلا وسمرا
جهاد: وايه الى جابه جديد م خلقتك ومعفنه وحافظينها خلاص ، قال يعنى انتى طول السنين دى
مقتنعه انك فشر حنان ترك وهو صدمك بحقيقة انك تشبهى توفيق الدقن !
سارة : بطلى تريقة يا جهاد بقى هو انا ناقصاكى انتى كمان
جهاد: يعنى يارب اخلص من القاطعه ريهام وسيرتها وسنترالها تيجيلى سارة وفقر
سارة: تقصدى ريهام بتاعت اعلام ؟! اصلا انا مش زيها هى عاملة نفسها راجل
ومش مهم عندها الحب وبتعرف الشباب كصداقة ومصالح
لكن انا بحب من قلبي ياناس محدش فاهمنى
جهاد: وجع فبطنك وقلبك يابعيدة ، عالاقل هى اختارت مرتين جوز رجالة الواحد منهم بقرش
بس دلوك ع تشتغل وفنفس الوقت مشيالى مع عيل معفن قناوى اكرهه سم
لكن جدع وراجل تحسيه يشيل مسؤليه مش المنتن هشام ابو جزمة بنفسجى
وبعدين نفسي افهم اخرة قرفك ده ايه تعرفيش تعيشى حياتك من غير حب وقطران
يعنى مانا اهو
جايين احنا نتعلم ولا نمشى ع حل شعورنا
ده ابوكى راجل غلبان الله يرحمه لو يعرف انك لما تيجى الدنيا هتخربيها كده كان سقى امك سم وهى حامل فيكى وخلص البشرية منك
سارة: ههههههههههه طيب ماهى ماما هتموت معايا
جهاد: تبقى ريحت وارتاحت يابوى
سارة: ههههههههههههههه يارب تموتى يا جهاد
~~~```~~~~`````~~~~~``````~~~
خطوات سريعه جدآ ماهى اتعودت ع السرعه فكل حاجه لأن ده اساس مهنتها
خبطت ع باب واستئذنت الدخول
مديحة (والدة سارة) : ايوة يا دكتور ،حضرتك طلبتنى
دكتور على الشاذلى : مديحة تسيبى كل الى فإيدك وتيجى معايا فورآ
مديحة: (بقلق) فيه حاجة حضرتك ولا ايه
دكتور على: مريض انا متابعه من زمان فحالة خطيرة ،جاتلة ازمة قلبيه
ومش بيحب المستشفيات
هتيجى معايا وتساعدينى
مديحة: انا تحت امرك يا دكتور
~~~```~~~~`````~~~~~``````~~~
الوقت الى بيعدى ع شخص بيتشبث ب آخر فرصه فالحياة بتكون بطييييئه جدآ
هو ده وصف الدقايق الى كان بيعدها رفعت لوصول طبيبه الخاص عشان ينقذه من الازمة القلبية الى جاتله .
وبعد الكشف والفحوصات :..
الدكتور على: لاااااا مفيش حاجه ابدا يا رفعت ، انت تمام كل الحكاية ان ضربات قلبك زادت نتيجة التوتر
وانا هكتبلك ع ادوية هتخليك احسن وبطل العصبية الى فيك دى
رفعت: يا على انا حاسس بجد انى تعبان ،ده يمكن مقدرش اعيش للصبح
الدكتور على: ههههه متهولش الامور انت زى الفل ، انا هخلى مدام مديحة رئيسة قسم التمريض عندى فالمستشفى تتابعك انهاردة ولو حصل جديد هتتصل بيا
مديحة : ان شاء الله يا دكتور متقلقش حضرتك
الدكتور قام ومشي واصبح دلوقتى ده دور مديحة انها تتولى رعاية رفعت بيه لحد بكرة وانه يكون ع ما يرام .
سارة:(بتتكلم فالفون وزعلانة) ممممم طيب ياماما هحاول اقضى الليلة لوحدى دى كمان
الام : طيب اتصلى بجهاد تجيلك وتبات معاكى
سارة : لا زمان السكن بتاعهم قفل ، خلاص يا ماما انا هصرف نفسي هو يعنى انا هخاف
الام: يا حبيبتى عشان ابقى متطمنه عليكى
سارة: متخافيش عليا ، انا اتعودت ع كده
ربنا معااااكى ياماما انا هقفل بقى
اركان الاوضة وحيطانها خدوا لقطة كاملة من عيون سارة فلحظة وهى بتبصلهم بآسي ان هتبات كمان انهاردة لوحدها
وقدام فيلم سيدة القصر كانت سهرانه وهى بتشوف نفسها ففاتن حمامه ورايحة خالص بخيالها معاهم
وبعدين غلبها النوم طفت الانوار ونامت ...وبعد ساعة !!
~~~```~~~~`````~~~~~``````~~~
"انتى مين ؟!"
مديحة : انا الممرضة الى الدكتور على خلانى فرعاية رفعت بيه الليلة
سيف:(ببصة امتعاض) طيب ممكن ادخل اشوفه
مديحة: اتفضل حضرتك، بس بلاش ارهاق فالكلام
دخل سيف يبص ع باباه وهو مريح ع سريره ، لكنه صاحى
رفعت :( باصص بعيد عن سيف) جاى بعد ايه يا سيف
سيف: وانا معرفش حصل منى ايه اصلا لكل الى انت عامله ده
رفعت:(قام من مكانه بس بتعب) مش عارف ! بذمتك انت مش عارف
قابلت الست والدتك وسهرتو وكلتو وشربتوا وكمان بيتت وياها من غير م اعرف وكأنى مش موجود
سيف: واعرفك ليه انا مش صغير وانا حر زى م انت اى حد يكلمك فشئ تقوله انك حر
رفعت: حتى كلمة اسف مش عايز تقولها وانا الى تعبان بسببك
مديحة: من فضلك كفاية واتفضل حضرتك كده هو هيتعب
سيف: انت عايز انا الى اقولك آسف !!(بسخرية)
المفروض انك كل م تشوفنى تقولى آسف ..الصبح آسف وبليل آسف
لما تشوفنى م تتكلمش
م تحكى ولا شى
بس تضل تحكينى آسف
آسف آسف آسف (بعصبية خرجته عن شعوره)
رفعت اتعصب وقلبه وجعه وجاتله ازمة فساعتها تانية افقدته الوعى من كلام سيف ابنه والى اخد ف وشه ونزل برة السرايا بعربيته
بيضرب الارض يمين وشمال ومش عارف هيروح فين .
~~~```~~~~`````~~~~~``````~~~
فالفون وبصوت هاامس جدآ وخوف ...
سارة : اعمل ايه انا خايفه .مكانش جه ده وانتى هنا
جهاد: وقت مواعيد مع الحرامية دلوك، اطلعى واتسحبي واضربيه ع دماغ ابوه بأى حاجه
سارة:(حابسة دموعها ) انا خايفه
جهاد :اخلصى يابت اضربيه بأى حاجه قبل م يقشط البيت وييجى الدور عليكى ويغتصبك
سارة اتشجعت وجهاد معاها عالفون وقامت تشوف اى حاجة حادة تضرب الحرامى بيها من غير مايشوفها
وهوب لاقت شوزتها بكعب عالى مدبب وع نفوخه !!
~~~```~~~~`````~~~~~``````~~~
سارة : ههههههههههههههه اصلا بتدور حواليا لاقيت قبقاب جدتى الخشب كنت هضربه بيه
بس خوفت يموت فإيدى
جهاد: وامك محتفظة بقبقاب حماتها ليه ؟ من الحب يعنى ناس عجيبة
سارة : بس لولا شجعتينى معايا يابت يا جوجو كان زمانى فخبر كان
جهاد: بس جدعة جرستيه ههههههههه بت ابوكى والله
سارة: انا ضربته من هنا واغمى عليه واشتغلت اصوت اتلمت الجيران خد حته علقة ، وعمو جارنا خده عالقسم
جهاد: بعد كديتى لما امك تكون بايته فالشغل تيجى تباتى معايا (فونها رن وكنسلت)
سارة: مين بيرنلك وكنسلتى
جهاد: ده واحد مهفوف فمخه بعدين ابقى اقولك عليه قارفنى بقالى كام سنة
سارة: طيب م تغيرى الرقم
جهاد: لا م انا سايباه عامل طراوة
سارة: هههههه شكلنا وصلنا العنوان الى قالتلى عليه ماما ، وااااااو دى سرايا زى بتوع المسلسلات
جهاد : طيب اخلصى نطلع لامك شنطتها ونمشي خلينا نخلص من المشواير الفقرية دى
عالبوابة ...
سارة: لو سمحت انا عايزة ادخل لماما ، هى هنا
البواب: انتى بنت الست مديحة الممرضة
سارة : ايوة وجايبالها شنطة حجاتها الى هتحتاجها
البواب: عندى اوامر انتى بس تدخلى ، خلى زميلتك تستناكى
سارة : معلش يا جوجو هدخلها الشنطة بسرعة واجيلك
جهاد : قوليلى يابت ، امك صح بتمرض ناس هنا ولا جايين تعملو فيلم مع خالد يوسف
سارة: هههه يابت اوعى خلينا نخلص وبالمرة اقولها ع الى حصل امبارح واخد اذنها انى هبات معاكى وكمان اخد فلوس مش معايا خالص
دخلت سارة الى استقبلتها فيروز مديرة المنزل من ع الباب لفوق فنزول سيف عالسلم وبرضو متعصب
ومش فاكك التكشيرة ...
وشرارة ضربت فعنيها جمال عيونه واناقته وصرامته الى باينه عليه ووقفت اتسمرت مكانها ..
فيروز: وقفتى ليه ، اتفضلى معايا مفيش وقت الباشا تعبان اوى
سارة :(فسرها) يانهاااااار اسود ومنيل دى الواحدة بتشوف جزم عالارض ، ايه القمر ده
ده ممثل سورى ده ولا ايه
فيروز: يلا ...انتى سرحانة ف ايه يا آنسه
سارة:(بتوهان) هو مين ده ؟!
فيروز :(بصت ع سيف وهو نازل ) ممممم ده ابن الباشا وياريت بلاش اسئلة وانجزى مهمتك
الى جاية عشانها
وفطريقة للخروج من السرايا كانت الدادة ام هدى بتلاحق سيف عايزة تقول ع حاجه مهمة
ام هدى : ياسيف بيه يا سيف بيه ، الباشا ازيه دلوقت
سيف: كويس يا دادة (خارج )
ام هدى: معلش ياسيف بيه ، الباشا مش بيقوم ويبقى زى الفل الا لما ياكل الجبنة القريش واللبن الحليب ،انا بجيبهم من ست بتسترزق جارتى وهى بعتاهم مع بنتى
والنبي تقول للبوابة يفتحوا لبنتى جايبة الحاجه معاها ومش راضيين يدخلوها
سيف:طيب خلاص خلاص
خارج بعربيته وجه عند البوابة بص لجهاد برة البوابة ...
سيف: افتحولها ، مش انتى بنت ام هدى الى جايبة اللبن والجبنة للباشا
جهاد:لبن وجبنة !! انت بتكلمنى انا يا حضرت
سيف: (بقرف) ايوا اتفضلى روحى اديهم لمامتك وامشى
جهاد : اديهم لامى ؟! ياك امى جات هنا ؟!
تكونش غلطان يابوعربية ٦متر انت
سيف:خلصينى انتى هتتسايرى معايا (خرج من عربيته)
جهاد: اتساير معاك بتاع ايه يا حلو الملامح انت ، اعرفك منين
سيف: انت يابت ايه قلة الادب دى واضح انك بنى ادمه غبيه
جهاد : غبية !!! اد الكلمة دى ياعود قصب مرضان انت
وهما بيتكلموا بنت الدادة جت
بنت الدادة : لو سمحت عايزة ادخل اودى الحجات دى لامى عشان الباشا
سيف: انتى بنت الدادة ام هدى
البنت: اه
سيف: اومال انتى مين؟!
جهاد :( بتريقه ) برضو ده سؤال ؟!
انا ام هدى ذات نفسها ..مش شايفنى جاية وراكبة الجاموسة احلبها هنا للباشا.....
~~~```~~~~`````~~~~~``````~~~~~~```~~~~`````~~~~~``````~~~
ونكمل الحلقة الجاية
#نوستالجيا
#نورإسماعيل
ليست هناك تعليقات:
إرسال تعليق