رواية ▫▫▫ ♠صكوك الغفران الحلقه 1

رواية ▫▫▫
♠صكوك الغفران ♠
بقلمى #نوراسماعيل
ღღ
🔶🔶🔷🔷🔶🔶🔷🔷🔶🔶🔷🔷
🔶🔶🔷🔷🔶🔶🔷🔷🔶🔶🔷🔷
اهداء الى /
نفساً برغم كل ما تحمله ما اهتزت يوماً ..!
وان كانت تبدو امام الجميع ستار قوى لا يحركه ساكن برغم قوة العواصف
الا ان بداخلها طفلة صغيرة تحتمى بدميتها لتخبئ وجهها بعيدا عن كل ماحولها
فهى مثلما قص يوسف ادريس بقصة نظرة ..
كان غريبا أن تسأل طفلة صغيرة مثلها إنسانا كبيرا مثلي لا تعرفه، في بساطة وبراءة أن يعدل من وضع ما تحمله، وكان ما تحمله معقدًا حقاً
وراقبتها في عجب وهي تنشب قدميها العاريتين كمخالب الكتكوت في الأرض، وتهتز وهي
تتحرك ثم تنظر هنا وهناك بالفتحات الصغيرة الداكنة السوداء في وجهها وتخطو خطوات ثابتة
قليلة وقد تتمايل بعض الشيء ولكنها سرعان ما تستأنف المضي . راقبتها طويلا حتى
امتصتني كل دقيقة من حركاتها فقد كنت أتوقع في كل ثانية أن تحدث الكارثة ولكن لم تحدث !!
الى "نفسي" المتعبة كثيراً والمُرهقه كثيراً ،،اسأل الله ان يسامحنى على ما اقترفته بحقك
بيوم ما ...
/ نور إسماعيل
ღღღღღღღღღღღღღღღღღღღღ
شكر خاص جدا جدا ▫▫▫
لكل شخص ( شاب او بنوتة ) كان له جزء من حكايته الواقعيه جوة الروايه
وحبوا يشاركوا الناس بتجاربهم
من خلالى وخلال خيالى
وسمحوا لقلمى انه يطير من بين سطورهم ويزود الى يزوده وينقص الى ينقصه
شكر ليك وليها ،وهكتفى ب اول حروفكم بس فالشكر
لالتزامى بخصوصيتكم ع اكمل وجه ..
)ر..)(ش..م) (د..أ)(أ..أ) (ر..ع)(ش..م)(ع...)
ღღღღღღღღღღღღღღღღღღღღღღღღღღღღღ
}المقدمة }
▫▫▫
الظروف والمواقف اللي أنت مريت بيها، اللي كان ليها دور كبير جداً في تكوين شخصيتك؛ هي السبب دلوقتي في إنك بمنتهى الضعف لسه واقف ومتمسك بحاجة اصلاً
مش بتاعتك..!
صكوك_الغفران (روايتى رقم ٢١)
الفصل ١)
ღღღღღღღღღღღღღღღღღღღღღღღღღღღღ
"جنح اليمام" 2012_القاهرة
ايهاب
واحد واقف ماسك لوحه فيها ٣ ببيونات ، وبيظهرهم قدام شاب قاعد ع كرسي
و"الكوافير الرجالى " بيظبط شعره بعنايه
ايهاب: دقيقه بس ( بيبص عليهم ) دى كويسه
صاحبه : بيس يامعلم
صاحبه ٢: العروسة يا هوبا بتقول ان دول احلى ٢ شيميز ابيض اسبانى
اختار منهم يلا
ايهاب: ممم الاتنين حلوين فعلا وانا مش عارف اختار ،وبعدين هى مش عارفه تختار ليه
اومال باخد رأيها ليه انا
الكوافير الرجالى : ممكن اتدخل يا كابتن باختيارى
ايهاب: طبعا قول انت بتاع الذوق كله هههه
الكوافير الرجالى : ده
صاحبه٣:هو فيه حد فالدنيا ليوم فرحه منقاش بدلة فرحه ولا ببيونه
ولا شيميز ولابرفيوم
ايهاب: هو انا مقطوع زيكم ،كنت مسافر عندى رحله وهما حددوا الفرح وانا برة اساسا
صاحبه ٢:طب يلا انت خلصت شعرك يلا عشان تلبس
ايهاب بيلبس فغرفته فالاوتيل ، والناحية التانية العروسة بتعمل اخر لمسات للميكاب بتاعها
صاحبة العروسة ١: واااااو يا وصال قمر بجد
صاحبة ٢: طبعا يابنتى ياسمينا احسن ميكاب ارتست فمصر
الميكاب ارتست : ميرسي يابنات عقبالكم
وصال : ممم بس خففى شوية حاسة انه تقيل
ام العروسة : بالعكس يا وصال جميل اوى ومظبوط
صاحبه ٣: والنبي يا طنط تقوليلها ،لحسن وصال عاوزة ميكونش فيه ميكاب اصلا
وصال : لا بليز عاوزاه يتخفف ، انا حره مش حابه شكلى كده
اوفر اوى
الميكب ارتست : اوك زى م تحبي بس ممتوتريش عشان الميكاب مش يبوظ
قريبة العروسة ( مسكت ايد وصال بحنيه ) مالك يابنتى اهدى
وصال : عادى انا تمام بس متوترة شوية
صاحبة ٢: طبعا تلاقيها مش قادرة تصبر ،عاوزة كل حاجه تخلص وتشطب بدرى
عشان تبقى فحضن الكابتن ( غمزت لصاحبتهم التانية وضحكت)
وصال: اكيد انا مش بفكر بفراغ كده زيكم ،انا بس عشان حاسة ان العين عليا لانى عروسة
وجو الاضواء بيخضنى
قريبتها ٢: ده حتى كابتن ايهاب فرفوش ياشيخه ،انتى اولم تشوفيه
هتهيصى لوحدك وتنسي توترك
صاحبتها : تقريبا وصال اكتر بنت محظوظة فمصر ، هتتجوز جوازة تشرف
عريس زى القمر
ابن ناس
كابتن طيار
وفرح فى ارقى اوتيل ، حاجه مستوى يابنتى لازم تتوتر
قريبة ٤: ووصال برضو مش قليله دى اشطر دكتورة نسا وولادة هاهاها على مين ده احنا جامدين
صاحبة٤:تلاقيها خايفه من الحسد. هههههههه
ام العروسة : بس بقا يابنات كفاية رغى وحد يهيص ويزغرط ده انهاردة فرحة عمرى
بتبص لوصال فالمراية وهى مبتسمه بعيون فرحانه ووصال بتبصلها ...
العرسان خلصوا تجهيزاتهم وتوترهم ولخبطتهم وايديهم المتلجة من رهبة الموقف
طبعا واحلى موقف فالدنيا
وطلع ايهاب وزمايله معاه من اوضته والكاميرا مان متابعه ،ونزل للمكان
الى هيعمل فيه السيشن
ووقف يستنى عروسته ، خبطت علي كتفه واحدة من صحباتها
ولف
غموله عيونه اصحابه بشريط خفيف ومشوه لحد عندها وفتحوه عيونه
لاقاها قدامه بفستانها وتسريحه شعرها فى اجمل صورها من يوم خطبتهم
ابتسم واخد كف ايدها وباسها بخفه وانكشها ، وصلوا مكان السيشن
اتصوروا سوا
كلها مناظر حلوة ،، وجديدة
واخدوا مع اصحابهم صور برضو.،،، وجه وقت يروحو القاعه سوا عشان يبدء الفرح
راح ايهاب ووقف ع باب القاعة
وسلم على اهله تحت واصحابه
وبعدها جت فرقة سورى زفت العروسة وهى فدراع باباها داخلين
كان التوتر باين عليها
بس كانت بتهدا لما مامتها او اى حد يبصلها عشان تبتسم
اخد ايدها من باباها ودخلوا القاعه بزفه مشاعل تانيه
وراقصات
واول م وصلوا البيست ، رقصوا على اغانى تهيص العريسان واصحابهم وقرايبهم
سوا
وابتدوا يفكوا اكتر ، وبعدها شوية دخل المطرب " حمادة هلال " الى هيحيي فرحهم
والكل اتجمع حواليه
وغنى والبنات والشباب بتهيص وترقص
وكان حمادة بيغنى اغنية " عيشلك يومين " وهيص عليها العريس اكتر
وكان بيرقص مع اصحابه بطريقه صعيدى
عند العروسة الى عالكوشة وصحباتها حواليها
صاحبتها: ايه ده بصى الكابتن بيرقص ازاى
صاحبة ٢: زى الصعايدة بتوع المسلسلات واصحابه بيشاوروه عليه
ع كلمة الصعيد دايما ريس
هو صعيدى ولا ايه
وصال: اه ايهاب اصلا من سوهاج ،بس عايش هنا فكايرو
صاحبة ٣:ايه ده متوقعتش
قريبة العريس: ليه الصعايدة وحشين ؟
وصال بصت لصاحبتها وصاحبتها اتكسفت فحبت تخفف الموقف
صاحبتها: لا بالعكس دول احسن ناس
صاحبتها٢: يلا بقايا وصال نقوم كلنا نرقص
وصال: لا مش حابة انا كده تمام مبحبش التنطيط ده
قريبتها: نقوم احنا نطنطط
Let,s goo
فالفرح محدش كان قاعد من الشباب والبنات ، ومحدش مكانش مرسومة على وشه
الفرحه
مش مطلوب منهم غير يفرحوا،ومش معنى انهم متجوزين جوازه
بقا عُرفها بين الناس " صالونات"
يعنى لاسابق حب ولامعرفه
مجرد ترشيح عروسة بنت ناس طيبين لشاب حابب يكمل نص دينه
يبقوا مش مبسوطين ولافرحانين
دى ليلة العمر
خلصت ليلة العمر زى م بيقول الكتاب ،وكل حد عاد الى قواعده سالمه
وبدأت اول ايام بعش الزوجية
للكابتن ايهاب والدكتورة وصال ..
#بقلمى_نورإسماعيل
ღღღღღღღღღღღღღღღღღღღღღღღღღღღღ
"صائد البالون "2012_ العاشر من رمضان
مارسلينو
نايم نص نومه ،يعنى بيفوق لسه
لكن الى فوقه اكتر الفون الى كان معاه
مارسلينو : يا حبيبتى صباح الخناق والهباب عالصبح ، يعنى مصحيانى
على ٥٣ رنة ورا بعض
شغاله تن تن تن تن
عشان تقوليلى انت مبتسالش عنى ليه
البنوتة: انا مرنتش ٥٣ رنة يا سينو دول ٠٢ بس
وايوة بكلمك عشان اقولك بطلت تسال عنى
مارسلينو : مبسالش عنك فين بس ،مش بعتلك عالفيس صباح الفل
من قيمة اسبوع
البنوتة: ( بزعيق) اسبوع ! اسبوع يا ظالم يامفترى
ومسالتش طول الاسبوع حصلى ايه جرالى ايه
مارسلينو : هيحصلك ايه فاسبوع يا ريتا هاه ! الى هيحصلك فاسبوع
قاعدة فبيتكم لاشغله ولا مشغله
يابتنمى مع اصحابك على اصحابك برضو فالفون
يافاتحه نت ليل ونهار
يابتتفرجى يوتيوب على مسلسل العشق المفقوع ،هيحصلك ايه فاسبوع فهمينى
البنوتة: قصدك انى ممله !
مارسلينو: لا العفو. انا الى ممل
البنوتة : يبقى تقصد انى تافهه بقى ؟!
مارسلينو: هو اى حوار عالصبح ياريتا ، انا اتخنقت بجد
البنوتة: اتخنقت اكمنى بفكرك بواجباتك
يا استاذ احنامرتبطين
يعنى مطلوب منك كل يوم تسال عنى ، متفوتش يومين من غير م تسال عليها
وتطمن عن احوالها
مش تفوت يومين وتلاته من غير م تسال ولا حتى تطمن
مارسلينو: مش فاهم ايه المشكلة ياناس انى ابقى مرتبط ببنت ومسالش
عليها يومين ورا بعض
هو انا ابوها !!
البنوتة : ياسلام ! الحب اهتمام واحتواء يا استاذ
مارسلينو: اه ده كلام هبة قطب فبرنامج خمسة لصحتك ده
البنوتة: سينو ! متستهترش بكلامى
مارسلينو: ريتا انهاردة اجازتى من الشغل،وكنت عاوز انام وانتى مصحيانى ع
الحب احتواء واهتمام واحتراق واختزال وهنقلبها حصة كيميا
ودماغى وجعانى بصراحه
فلو سمحتى انام واصحى اشرب نسكافيهى
واتظبط كده
وننكد على الى خلفونا للصبح
ايه رأيك كده ؟
البنوتة : براحتك ياسينو ( قفلت السكة )
مارسلينو بيبص لفونه لاقاها قفلت ،ركنه جمبه وحط المخدة فوق دماغه
وهو بيبرطم
مارسلينو : مصحيانى ٩ وربع تقولى الحب احتقان ولوز يوم اجازتى
يقطع الارتباط على الى بدعه ...
#بقلمى_نوراسماعيل
ღღღღღღღღღღღღღღღღღღღღღღღღღღღღ
" العهد"2012_المنصورة
يامن
بيسبح ربنا على صوابعه ويحمد ويكبر
بيختم صلاة المغرب عالسجادة وقايم ،كانت خبطت مامته وداخله بكوباية
شاى بالنعناع
الام : مش عاوز تاكل برضو
يامن : لا يا حبيبتى ربنا يبارك فيكى ، هقعد اذاكر
ولو جوعت هقولك
الام: ربنا ينورلك بصيرتك يارب
يامن ( بيشرب من الشاى وهو بيفتح مادة دينتال ماتريال سنة اولى طب اسنان)
تسلم ايدك ي امى
بسم الله
بيبدأ يذاكر وتاخده المذاكره خالص ويروح لعالمه
بتدخل عليه فجأة ،،اخته يمنى
بنت ال ٢١ سنه
يمنى : بتذاكر ؟
يامن : ( باصص للكتاب) شايفه ايه
يمنى : طييب عالعموم كنت عاوزة اقولك على حاجه
يامن : يمنى متضيعيش وقتى
يمنى : خلاص ياعم خارجه ،بس روفيدا اصل يعنى ( بتقفل الباب)
يامن انتبه لما سمع اسمها
روفيدا !!
يامن : يمنى تعالى هنا
يمنى : انت مش قولت عاوز تذاكر ،عاوز ايه
يامن : ثوانى بس روفيدا مالها
يمنى جاياله بعيون مبتسمه لاخوها
يمنى: جت ع فكرة شوفتها الصبح
يامن عيونه ابتسمت اوى وخدوده احمرت من الخجل مع انه شاب!
يامن : طيب بصى بقولك ايه
يمنى : قول
يامن : ينفع تروحى تناديها لاى حاجه
يمنى : ايه العبط ده ؟ طب اقولها ايه
يامن: عبط !! طب ياست الى بتفهمى كل حاجه وانا عبيط
روحى اندهى عليها لاى حاجه فالدنيا
اتلككى
هى مش صاحبتك
يمنى: صاحبتى منين ،لما انا فتانيه اعدادى وهى فتانية ثانوى
وهى مش ساكنة هنا اصلا
يامن : خلاص روحى يايمنى قفلتيها
وهما بيتكلموا حد من صحابها البنات نده علي روفيدا
لان بيت عمتها جيرانهم
وخرجت ترد من البلكونة ،ساعتها قام يامن بسرعة
وقلبه مخطوف من الخضة والدق
وفتح شيش شباكه نص فتحه وبص عليها وهى بترد على صاحبتها
وساند بكف ايده قلبه لا تتسمع دقاته
مقدرش يستحمل يفضل يشوفها كده كتير من ورا الشباك ، لبس شبشبه الجلد
عالترننج
وعمل نفسه نازل لاى تلكيكه وهى لسه فالبلكونة بتكلم صاحبتها
وهو ناول من البيت اخته قاعدة جمب مامته ضحكت اوى ومامتهم مش فاهمة
حاجه
نزل بسرعة عالسلم واول م بقا فالشارع بطء حركته. وعدا ،،لكن روفيدا
لمحته وهى فالبلكونة
روفيدا: يامن !! ي يامن
عمل نفسه بيدور ع الى بينادى
روفيدا: انا يابنى بص فوق
يامن ( رفع وشه لفوق وابتسم)
روفيدا : ثوانى هنزلك
وقف يامن هيموت من فرحته ،فرحة لقاها
روفيدا تبقى عايشة فالدقهلية نفسها ،وبتيجى لعمتها زيارات
من صغرها هى واسرتها
فالاجازات ، وعمتها جيران يامن ..
يامن الى من وهما صغيرين اتولد حبها فقلبه لكن ساكت
وكبروا وكبر الغرام
اما عنها هى ،فهى بتحب صداقتها بيه من صغرهم وبتعتبره
اخوها الكبير وبتستشيره فكل حاجه
ولما بتيجى زيارات بتروح بيته تسال عنه وعن مامته واخواته اول واحد !!
روفيدا: ايه ماشى ع طول رايح فين
يامن: لا كنت رايح اشترى حاجه بس ،انتى جيتى امتى؟
روفيدا : جيت الصبح ، اجازة نص السنة بقا
يامن: كل اجازة وانتى طيبة ،لا انا عندى امتحانات لسه
روفيدا( مبتسمه) شد حيلك يا دكتور
يامن: ان شاء الله ( بيبص عليها لاحظ ان الطرحة بتقع من ع راسها)
الطرحه يا روفيدا
اتلخبطت هى وظبطتها كويس تانى
روفيدا: معلش حطتها بسرعة قولت الحقك
يامن سمعها وابتسم وبص للارض
روفيدا: هطلع بقا عشان ميزعقوش ،هشوفك تانى مش كده
يامن: اه ان شاء الله
روفيدا: طيب مش هعطلك ،باى باى
طلعت بسرعة وهو واقف زى م هو باصص عليها ورايح خالص
قاطعه صوت اخته من فوق واقفه فالشباك
يمنى: طب مدام نزلت بالمرة ،ماما بتقولك هات جبنة وعيش وانت
طالع ياروميو ( طلعت له لسانها)
بص لها واستحلف لها باشاره بايده ع دقنه وهو بيضحك ...
#بقلمى_نوراسماعيل
ღღღღღღღღღღღღღღღღღღღღღღღღღღღღ
"صاحب الابتسامة" 2012_الاقصر
طه
"ياصباح الفل ياطه ، منور الهايبر والله"
قام طه من مكانه وسلم على مدير الهايبر وهو مبتسم ابتسامته
الى مش بتسيبه
طه: بنورك يا استاذ سامح والله
المدير: عبد الرؤوف شكرلى فيك اوى وانا متفائل بيك بصراحه
طه : يارب نكون عند حسن ظنك
مشى المدير ،جه زميل طه من ع مكنة الكاشير الى قاعد عليها
زميله : ايوة ياعم المدير متوصى بيك
طه : لا والله هو توفيق من عند ربنا ،انا اول مرة اشوفه فالانترفيو
زميله : انت قبل م تستلم كاشير هنا ،كنت شغال فين
طه: ياااه ،انا اشتغلت الف شغلانه
بص كنت ماسك محل بازار لواحد معرفه
واشتغلت فالرخام
واشتغلت فالسيراميك
واشتغلت فمصنع شيبسي
زميله : بس بس ده انت خلصت على كل شوغلانات مصر
سيبت ايه مشتغلتوش
طه مبتسم ع رد فعل زميله
زميله: بس شكلك ابن حلال
طه : الله يخليك ،ربنا يثبت اقدامنا هنا بس
زميله : يارب ،اصل كان قبلك عيل كشر وبتاع مشاكل
لكن سبحان الله عليك بشاشه وش ياخى تريح القلوب
طه: الابتسامة صدقه ،هى الناس ناقصه لما انا اكشر فوشهم
زميله : طب يلا ع مكنتك ،الناس ابتدت تيجى
طه: يافتاح ياعليم يارزاق ياكريم ...
اول يوم يعدى ع طه فالشغل ،عدى حلو وهادى
قاعد ع جهاز الكاشير ، بيقرا الباركود الى ع اغلفه المنتجات للناس ويحاسبهم
ويطلع لهم فواتير
وطبعا بابتسامته الحلوة
وعدى تانى وتالت ورابع وخامس واسبوع كمان بنفس الحماس
والروح الحلوة
طه (بيقرا المبلغ الى فالفاتورة عالجهاز بعد م قرا الباركودز) ٤٢٣
حضرتك
الست قدامه واقفه سرحانه وعيونها فيها دموع متجمده
فيه علامه تحت عيونها مزرقه ! تشبه الكدمة
طه: يافندم !
نهلة : ( فاقت من شرودها) ايوة !
طه: ٤٢٣جنيه حضرتك
نهلة : اه حاضر ، ( طلعت الفيزا وهى سرحانه وبتمسح دمعه من عيونها
نازلة بسرعة )
ادت ل طه الفيزا وهو متابعها وحس بالشفقه ناحيتها
هى مالها عامله كده ليه ؟
بس رجع وقال لنفسه وانا مالى
حاسبت واخدت اكياسها ومشيت ، وجه الى وراها يحاسب بس طه
متابعها بالنظر لانها كانت ماشيه كانها بتتهاوى
توازنها مختل ،بتتمايل غصب عنها يمين وشمال
وبعدين سندت ع جنب بتعب كده ع رف من رفوف ،كل ده وطه بيحاسب
بسرعة وعينه عليها
بيبص قدامه لقى حاجه من حجاتها نسي يحطها فالاكياس
قام من مكانه
طه: دقيقه يافندم ، يا رام خليك ع جهازى دقيقه بس
قام وراح ليها واداها الى نسيته
طه : انتى نسيتى ده يافندم
نهلة ( اخدت بلامبالاه ) اشكرك ...مشيت خطوات بسيطة
طه: حضرتك بخير طيب؟
نهلة ( وهى متابعه سيرها من غير م توقف ولا تلتفت)
اه الحمدلله
خرجت برة الهايبر وطه استعجب لها ورجع شغله تانى وقعد
مكانه بس وهو بيفكر فحالها
حال واحدة ميعرفهاش ،،شفقه فقلبه مخلياها
تشغل عقله شوية
ونسى ...ورجع كما كان ليوم شغله العادى ..
#بقلمى_نوراسماعيل
ღღღღღღღღღღღღღღღღღღღღღღღღღღღ
"قصور الهوا " 2012_ المنوفيه
حسين
"مكتوب فيها ايه الورقه دى "
رضوى ( بتقفل باب اوضتها) استنى بس ي ايات اقفل
الباب لحسن ماما تسمعنى
ايات: تعالى بقا يلا نشوف كاتبلك ايه فيها الورقه
رضوى: انا خايفه افتحها
ايات: هيكون فيها قنبله مثلا ، عادى افتحى بقا قلبي وقع فرجليا
رضوى بتفتح الورقه مكتوب فيها
ده رقمى يارضوى
كلمينى ١٠........
حسين ..
رضوى: ده كاتبلى رقمه ! يانهار ازرق لا طبعا اكلمه ده ايه بيستعبط
رباب: بيستعبط ايه يابنتى انتى هتجننينى ، من واحنا فاولى اعدادى
من درس العربي
وهو كان معانا وانتو مقضينها نظرات
واساسا كان ملحوظ صحوبيتكم من واحنا فابتدائى مشتركة
وفضلتوا ٣ اعدادى نظرات وتسبيل
وكل درس تحجزيه عند اى مستر يحجز زيك
وفثانوى برضو ، دخل ادبي عشانك وكلنا كنا عارفين
ان حسين شاطر كيميا ورياضه اكتر
عاوزة ايه تانى
رغم ان مستر الجيلوجيا مش بيخليه يفهم وهو قال كده
قبل م يسيبه ويروح لمستر تانى
الا انه برضو بيستناكى فالدرس بتاعه
واحنا رايحين واحنا جايين
وفعز الشمس ياعينى
عشان بس تبصوا لبعض ،اظن ٦ سنين بصات ونظرات
جالكم حول بقا كفايه
ندخل عالفعل
رضوى : عاوزانى اكلمه من ورا ماما وبابا ،لا طبعا
رباب: ايوة مانا عارفه انها حاجه غلط ،بس انتو
بتحبوا بعض يا رضوى
يعنى هيحافظ عليكى
رضوى: ومنين جالك انه بيحبنى زى م بحبه ،هو مقالش
اى حاجه
ده لما رمى الورقة دى تحت رجلى واحنا واقفين
فالمكتبة ساعة تصوير الورق
مقالش فيها اى حاجه
قال كلمينى
مش حتى بحبك او اى حاجه
رباب: ويعنى بحبك دى مش هتتقال ؟ هتتقال بس
لما تكلموا بعض وتتعرفوا اكتر من كده
الى فات كله كنا عيال فيه
دلوقتى احنا كبرنا
وخلاص شهور وندخل الكليه ، بطلى خوف بقا
رضوىساكته وبتبص للرقم اوى
رباب: خدى كلميه من تليفونى طيب
لو خايفه
رضوى بتبص ل رباب وحاسه بحيره ومش حاسمه قرار
رباب: متضيعيش الفرصة يا رضوى بقا
ده حسين ( غمزتلها) يعنى الحب كله !
رضوى مسكت فون رباب وبصت فيه وبعدين سابته مرة واحدة
رضوى : لا ! مش هعمل كده
#بقلمى_نوراسماعيل
ღღღღღღღღღღღღღღღღღღღღღღღღღღღ
" رمل البحر"2012_الاسكندرية
محمد جهاد
"عاوزة اكل جعااااانه "
الاء: بذمتك ليكى نفس تاكلى واحنا مش عارفين ايه الى هببناه
فالامتحان
زميلة : الامتحان غار خلاص فداهيه ،دلوقتى انا معدتى تشكو وجعانه
اوى بصراحه
زميلة ٢: لا انا مش جعانه انا هروح ،بليل رايحين لخالتى عاملة
عمليه
وعاوزة اروح انام شوية
الاء: طب استنى نروح نشرب حاجه ،والست هانم دى تاكل وبعدين
نروح
لسه هنشوف بعض الاسبوع الجاى
المادة الجايه علينا وعليكى بخير
زميلة١: اخلصوا نروح اى زفت بس اكل لانى قربت اتحول لاكله لحوم
البشر
زميلة ٢: خلاص تعالو المطعم ده ندخله وخلاص عشان الحق اروح
الاء: ( بخضه ) لا !
تعالو نروح الكافيه الى اسمه let,s go
بيقدموا اكلات برضو هناك جميله
زميلة ١:( غمزتلها) ايشمعنا يا موزتى الكافيه ده
الاء( اتلخبطت) هاه ،لا عادى
زميلة ٢: لابجد ليه يا الاء ايشمعنا ( بابتسامة خبث)
الاء: عادى يابنات فيه ايه بيقدم اكل حلو
وبيعجبنى
ومشروباتهم حلوة ورخيصة
زميلة : طب يلا ع هناك خلصونى
اى حته ان شالله مطعم كلاب
خدوا بعضهم وراحو للكافيه ، وقعدوا سوا
طلبت زميلة الاء اكل
وهما طلبوا مشروبات وكملوا نم ع دفعتهم وحكايات
وربع ساعة ، ودخل شاب
طول بعرض ،واضح انه رياضى
دخل جوة عند الادارة ووقف يتكلم معاهم وهو باصص
ناحية تربيزة الاء ومبتسم
زميلة ٢:) بتميل ع ودن الاء) الواد المز ده من السنة الى فاتت
والسنة دى كل م نيجى هنا
ي يكون موجود
يا ييجى بعدنا
ويفضل مبتسملك ومتنح كده ،هو ايه الموضوع
الاء( بارتباك) معرفش والله بجد ، عادى انا حتى ملاحظتش
الى بتقوليه ده
زميلة ٢: مممم لاياشيخه اومال كنتى مصممه نيجى ليه
هنا بالذاتk
الاء: بصى هقولك بس متسيحيش ، انا ملاحظاه من السنة الى فاتت برضو انه بيتنح
لى كده
فالاول كنت فاكره انه عادى ،بس فالاجازة كان عندى مشوار مع بنت صاحبه ماما نجيبلها
فستان خطوبتها وقابلته صدفه فالشارع
وكان معاه واحد صاحبه
قالى استنى استنى وانا قولت ده عاوز ايه
وقالى عاوز اتعرف عليكى بطريقة محترمه والله وسالت عنك قالولى اسمك الاء
وانا محمد روحت انا سيبته ومشيت
زميلتها( بشغف) ها وبعدين
الاء: بس من اول السنة رايحه جايه ع هنا يمكن اشوفه مشوفتوش الا انهاردة
عاوزة اعرف ايه حكايته ده
زميلتها١: اه يا سوهنه كل ده وراكى ومخبيه
زميلة ١: ( بتاكل) بتقولوا ايه انتى وهى وبتتوشوشوا
الاء: ولا حاجه انتى كمان خلصى اكلك
الاء بصت ناحيته وهى مبتسمه بس بتحاول تبص بعيد
وكل مرة بتبص بكسوف وهو كمان باصص ناحيتها
وبقا ملحوظ اوى
زميلة : انا خلصت يلا بينا
الاء( بزعل) طيب م تشربي حاجه اهضمى،اطلبلك كوكا؟
زميلتها٢: يلا يا امى عاوزة انام مش وقت كوكا تشربها
فبيتهم
قامواالتلاته وخرجوا من الكافيه ، وطلع وراهم جرى
الشاب ده
الشاب: يا ...لو سمحتى
لو سمحتى
الاء وقفت هى وزميلاتها
زميلة ٢: حضرتك بتنادى علينا
زميلة١: احنا نسينا حاجه جوة ولا ايه ؟
الشاب: لا انا بنادى عليكى انتى ...يا الاء !
زميلتها: الاء ! ( بتبص ناحيتها ) هو عارفك ؟
وراح مقرب ناحية الاء ،والاء جسمها كله بيتنفض
من الارتباك والكسوف
الاء: انت عاوز منى ايه
محمد جهاد: فيه انى عاوز اتعرف عليكى
زميلة١: عاوز تعرفها ليه ؟ انت من المباحث
يلا يابنتى بلاقلبه دماغ
خدوا الاء ومشيوا وهى بتحاول تبص وراها
محمد جهاد :عاوز اعرفك وعاوز احبك وعاوز اتجوزك
وقفوا البنات !
الاء: انت بتقول ايه
محمد جهاد ( مبتسم) عاوز اتجوزك ..قصدى شريف
وكتاب الله ...❤
ღღღღღღღღღღღღღღღღღღღღღღღ
استنوا الفصل الثانى يوم الخميس ان شاء الله
#صكوك_الغفران
روايتى رقم ٢١
#بقلمى_نوراسماعيل