روايــة.. ღويسو ღميوش ღتوتة ...وخلصت الحدوتة ღƒc ح(21)

♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
"بص يابنى هالله هالله عالجد ..والجد هالله هالله عليه، انا وانت لازم نقعد ونتفق"

شريف: ع ايه هنتفق..م احنا اتفقنا وكل حاجة فيه ايه تانى

خال بشرى: لا انا مش بقصد المهر والمؤخر والشبكة والذى منه دى حجات كان لازم نتفق عليها
مش جواز

شريف: اومال ايه م تقول ع طول

خال بشرى: بص ، من اول م جيت وطلبت ايدها وانا عارف انت جاى ليه وعايز ايه بالظبط

شريف: هكون جاى ليه يعنى ؟! جاى اتجوزها

خال بشرى: هتتجوزها عشان ايه يااستاذ شريف ! متأخذنيش احنا ناس ع اد حالنا
وبشرى خلقتها مش ولابد وكل الناس عارفة
وطباعها وحشه
وانت ابن ناس وراجل ملو هدومك
اقولك انا الخلاصة قبل م تدخل عليا بكلام الشباب بتوع مصر والى بيتعملوه من الافلام
انت جاى وعايز تاخد الهبرة كلها لوحدك!

شريف: (ارتبك) هبرة ايه انت بتتكلم عن ايه؟

خال بشرى: بص يااستاذ شريف، اصل انت مش هتقنعنى انك جاى عشان بتحبها مثلا
انا شعرى شاب فالدنيا دى
والى زيك افهمه من نظرة عنيه

شريف معرفش يرد

خال بشرى:بقولك ايه انا مش هقفلك فيها ..متخافش
مع ان البت بشرى دى بتسمع كلامى ولو قولتلها انك مش ولابد هترفضك نهائى

شريف: طب نهاية الكلام بالصلاة عالنبى كده ..مدام وضحنا قدام بعض

خال بشرى: انا هسيبك تتجوزها، بس لازم يطلعلى نصيب
لازم ينوبنى من الحب جانب..اومال هتكوش انت ع كل حاجه
وانا الى تعبان فتربيتها كل السنين دى اطلع من المولد بلا حمص

شريف: ممممممممممم طلباتك (متدايق)

خال بشرى: (طلع كمبياله من جيبه) انا مش عايز غير المبلغ ده
تمضى عليه
والصرف لما اتأكد ان الفلوس بقت معاك وتحت امرك..قولت ايه

شريف: (بيبص فالورقة والمبلغ المكتوب) بس ده كتير اوى يعنى

خال بشرى: ده يدوب نقطة فبحر من الى انت هتاخده ..وبعدين نص العما ولا العما كله!
قلت ايييييييييييه ؟؟!
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
شريف بيفكر فالعرض الى قدمه خال بشرى عليه قصاد م يسيبه يتجوز بشرى

كان سامح داخل شقته بليل بعد يوم شغل ..بس كان البيت ساكت
والانوار مطفيه!

سامح: منة !! يا منة

دخل يشوفها فكل الاوض ومش لاقيها ، ولا المطبخ ولا فأى حتة فالشقه
حتى مافيش صوت لابنهم !

وهو بيدور عنيه وقعت ع ورقة ع تربيزة الى فالمطبخ مكتوب فيها

" انا تعبت.وزهقت
استحملت كتير وجيت ع نفسى يا سامح ،عايشة ف اهمال ومستحمله
بس عند ان يجيلنا طفل ويبقى ده رد فعلك..يبقى لازم اسيبك واسيب البيت
لان الى بيحب مراته بيحب يخلف منها
وانا كده وصلنى ردك
لاول مرة هقولها يا سامح

طلقنى!! ومش هتعرف مكانى لحد م تطلقنى
..منة"

سامح قرا الكلام واتنرفز جدآ واتعصب لدرجه انه كرمش الورقة بغل ورماها عالارض، فتح فونه وحاول يتصل بيها مرة و2
فونها مقفول

اتصل بأهلها الى اتخضو من اتصاله ، وبرضو مش موجودة!
وهما كمان قلقو جدآ عليها ..ياترى هتكون راحت فين؟
جه فباله كل البنات
مى وغادة وامنية
واتصل بيهم كلهم..وبرضو مافيش جديد
محدش شافها
محدش يعرف هى فين

سامح بص ع هدومها لاقاها وخداهم وواخده هدوم وكل حجات كريم ابنهم
طيب هتروح فين؟!
ومش معاها فلوس كفاية تقعد ف اوتيل او حتى لوكاندة صغيرة

القلق اكل دماغ سامح ..مش مبطل تفكير، ده غير القلق الى سببه لكل الى اتصل بيهم
كلهم ع كلمة واحدة
منة راحت فين؟
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

"كل سنة وانتم طيبين يا جماعة ، الاجواء برة فمنتهى الجمال "

طارق: بس اكيد مش زى مصر،اموت واشوفها دلوقتى عاملة ازاى

فادى: انتو عارفين ..احنا بنستنى رمضان زيكم
والقطايف والكنافة وقمر الدين بنشتريهم زيينا زيكم بالظبط
وبنتفرج عالمسلسلات وزمان الفوازير

جمال: ياعم رمضان بتاعنا كلنا وعمر م كان فيه فرق بينا

طارق: ساكت ليه يا وسام؟مالك سرحان فحاجه

وسام: اول رمضان يعدى عليا من 6 سنين من غير مى وبتول
مش عارف مخنوق

طارق: ياعم بكرة تتعود، ماهى دى بقى ضريبة الغربة
لازم حجات تيجى ع نفسك فيها
اومال انت فاكر ايه
انا ده تانى رمضان ليا مقضيهوش مع اخواتى والحج والحجة
بس هعمل ايه لازم اشتغل واحوش اجازتى لعل وعسى انزل الاقى الحجة جايبالى عروسة ولا حاجه
اتجوز
الامر ميسلمش

جمال: ياعم..انا عمرى ماشوفت حد بيحب مراته بعد الجواز
قال اول رمضان ومش عارف مين
ده انت اترحمت من هات وهات وهات وخراب البيت والميزانية فالشهر ده
والبوز الى بيضرب شبرين عشان الكونتيسة طول اليوم فالمطبخ
وتتفرج ع برامج الاكل وفالاخر هما هما وهى هى الاصناف
ياعم دماااااااغك

وسام: جمال مع احترامى ليك..احتمال انت تكون بانى فجوة بينك وبين مراتك وبيتك بمزاجك ومش عايز تصلح علاقتك بيها
بس انا بحب بيتى جدآ واول مرة ابعد عنهم
فمناسبة زى دى

فادى: انت عارف ..ممكن تكلم كاميليا تكلمهم ينزلوك حتى لو يومين
اهو اسمك مسبتهمش اوى يعنى
ومأخدتش اجازة طويلة

جمال: انت عبيط يلا، اولا وسام ماسك جزء مهم فالشركة ومينفعش يتعطل كل شوية
وبعدين هو لسه كان هناك من فترة
محدش ف اول سنة ليه بينزل كتير كده
م كلنا ع يدك قعدنا سنتين لولا م خدنا اجازة عدله

طارق: ممممم فعلا فكرة ان وسام ينزل حتى لو كام يوم فكسانة
مش هتنفع

وسام: ماناعارف، عشان كده مخنوق

جمال: ياعمنا والله هتقضى احلى رمضان وعيد كمان معانا، بلا ستات بلا قلبه نفوخ يا راجل

طارق: طب بذمتك خلقنا دى ..ولا مراته
والاكل الى يفتح النفس
والصلاة كلهم سوا والفرجه عالتلفزيون
وبنته وتنطيطها فالبيت
مع انى مش متجوز بس مقدر الى هو فيه بصراحه

جمال:طب مانا متجوز وعادى

فادى: يا جيمى انت لو طولت تبعتلهم صفيحه جاز احمر وكبريت هتعملها وتبتدى حياتك من جديد

جمال: ههههههههههه طب والله فكرة

وهما بيتكلمو وبيهزرو..سابهم ودخل الفراندا وسام وهو سرحان ومتدايق
واتنهد تنهيدة جامدة
وقال : لا اله الا انت سبحانك انى كنت من الظالمين
عشان الضيقه والخنقة منه تروح وربنا يخلق له فقضاه رحمه
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

اما بقى كان حديث الساعة ..
اختفاء منة
غادة ومى عالفون سوا وغادة بتتكلم بغيظ ودفاع عن منة ومش طايقة سامح اطلاااااااقآ

وقدامها لؤى بتحاول تخليه يقعد وبتدلعه ..

غادة: هو اصلا بقاله فترة معيشها فجحيم ..وهى بتشكيلى
وساكته البت وبترضى بقليلها
ايه يعنى حامل
هيعترض
طب شوفى انتى لما عرفتى انك مش هتبقى حامل تانى ولا هتخلفى من وسام المناحه الى عملتيها اد ايه

مى: هتفضلى طول عمرك دبش..بس عندك حق
انا كنت هموت ع بيبى تانى من وسام..بيبى تانى ايه!
وحياتك دستة

غادة: لكن ازاى واضح انه اتعلم من صاحبه(بتبص برة بتقصد ممدوح) النتانة والبخل
يعنى هو العيل الى هتخلفه منة هو الى هيخرب البيت

مى:لا فعلا انا ملاحظة ان سامح مبقاش سامح بتاع زمان ، هادى وطيوب وغلبان كده
بقى عصبى كتير وخناق
واهى اتنهت بأن البت طفشت ومحدش عارف هى فين

غادة: منة ع اد ماهى مش مجنونة، بس اتوقع انها حاجة من الاتنين
ي انتحرت من فوق الكوبرى
ي مستخبية فحته الجن الازرق ميعرفهاش

مى: ههههههههه جبتى الديب من ديله يا زفته انتى كمان، لا فعلا هى راحت فين
انا سمعت ان اهلها مش هيسكتو
انا ومونى اتصلنا بيهم لاقتهم مولعين ، عارفة لو شافو سامح هيموتوه

غادة: والنبى انا قبلهم ..دى حكيالى حجات الله يكون فعونها فيها
الاكل فالبيت عالاد عشان الظروف
اللبس مجبلهاش طقم يا ولداه من سنة
الخروج متخرجش ولا يخرجها هو
سايبها ليل ونهار تكلم الحيطان
وكمان لما ربنا يرزقهم يحسسها انه طفل الخطيئة..لاااااااا سامح عايز له شده كده ويعرف ان الله حق

مى: عندك حق..ايه رأيك نتجمع كلنا ونقوله الكلام ده
لازم يعرف انه غلطان فحقها ويصلح غلطه

غادة: وهو هيصلح غلطه مع اللهو الخفى ..هى فين منه اصلا
انتى فين يا منة!!

♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

شريف وامنية اتقابلو صدفة..وقرروا يروحو يشربو حاجه فمكان

امنية: اعتقد ميهمكش فحاجة ..اتجوز
افسخ
انا حرة ..زى م انت بالظبط هتتجوز جوازة بتبيع نفسك فيها

شريف:  انا مبعتش نفسى..يعنى هى بشرى دى كلبة مش انسانة يعنى
ينفع تتجوز ويكون لها بيت وزوج وحياة

امنية: والله ينفع طبعآ واحنا مش احسن منها ، انا معرفهاش بس سمعت من كلام وسام عنها لمى
انها بنت طيبة وغلبانة اوى
بس قولى يا شريف لو مكانتش معاها فلوس
كنت هتقرر تتجوزها؟

شريف: (سكت ثوانى) بقولك ايه ياامنية..كل واحد يعمل الى يريحه
انتى قررتى فجأة تتجوزى وقررتى فجأة تسيبى
وانا برضو قررت اتجوز الانسانة دى

امنية: قولى ياشريف ..طول الوقت فارتباطاتك كنت بتدور ع ايه

شريف: مش فاهم

امنية: يعنى لما اختارتنى كنت عايز ايه ، ولما خونتينى مع شيرين
كنت عايز منها ايه
ونهال
ودلوقتى بشرى

شريف: انا مش عايز حاجه.انا عايز بس تسيبونى فحالى ممكن!
(قام وقف وهو متنرفز وطلع الحساب)
وع فكرة كتب كتابى انا قولتلك ع معاده
ومش هعمل فرح
اصلا الجوازة جاية فرمضان بوش امها
عايزة تيجى..هتنورينى
مش عايزة..براحتك

سابها ومشى وهى كانت مستاءة جدآ من قراره الى ل 4 مرة هييجى ع دماغه وهى متأكدة!
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
غادة: طب يا ميوش ..اكلمك بعدين هغير ل لؤى بس

مى: اوك باى

غادة ماسكة لؤى وبتلاعبه .." يوغتى حبيب ماما ، كوكو يا كوكو
هتطلعى سنة ولا ايه"

ممدوح بيبص عليها من بعيد ..وبعدين خبط الباب
ممدوح: ممكن ادخل اقعد معاكم شوية

غادة: اتفضل

ممدوح: هاتيه (فاتح ايده ليه) الله اكبر
طالع متختخ لامه

غادة: الله اكبر فعينك هتحسدلى الواد ولا ايه

ممدوح: ع فكرة ده ابنى برضو، ايه ياغادة مصممة منرجعش برضو

غادة: والله انت عارف شرطى ..تطلق ايد المقشة دى
نرجع وابقى ع ذمتك وبيتنا يرجع
مش هتطلق
معلش..انا مش زوجه تانية

ممدوح: طب بس هى هتروح فين ؟
غادة: تغور فداهية ميخصنيش..انا مالى
ترجع مطرح م جت

ممدوح: بس انا مش عارف اعيش من غيركم

غادة : (خدت من ايده الولد) والله بقى ده كلامى ..وعن اذنك هغير للولد عشان خارجه

ممدوح: رايحه فين؟

غادة: ولو ان مش من حقك بس هقولك..رايحين نقعد مع الزفت الى اسمه سامح

ممدوح: ليه

غادة: انت معرفتش !! مش منة طفشت من عمايله
اصل انتو متتوصوش فالندالة مع مراتتكم

ممدوح: طفشت!
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

اهل منة وغادة وامنية ومى وممدوح كمان
كلهم متجمعين فشقة سامح
بيحاولو يشوفو حل..بس اولهم يلاقو منه
وكان الكلام نازل ع دماغ سامح زى الرصاص ورا بعض..محدش مديله فرصة
كله المرة دى بيدينه
من كل شئ معاملة واهمال ..وخصوصآ رد فعله الاخير ع الحمل الى هى حكته لاصحابها قبل م تمشى وتقفل فونها

طبعآ اهلها مش سكتو ومحملينه الذنب انه يدور عليها ويرجعها ضرورى
يا اما هيرفعو ضده قضية

سامح حس نفسه محاصر وانهم عندهم حق..خصوصآ ان رمضان عالابواب وان مينفعش هى تبقى بعيد عن بيتها
وخصوصآ لانها حامل ومعاها الولد

كل حد قال الى نفسه فيه لسامح عشان يعيد حساباته ..وسابوه ومشيو كلهم
يفكر هيرجعها ازاى ؟
كل حد رجع لقواعده ولحياته ..وكل حد كانت دماغه مليانة بالدوشة
الكفاية
مى بتفكر فبعد وسام عنهم لاول مرة فرمضان..وهيقضوه هى وبتول ازاى لوحدهم!
غادة بتفكر فرجوعها لممدوح عشان خاطر لؤى يبقى بينهم
بس امنية كانت مخنوقه من الى هيعمله شريف فنفسه .. كل مرة بيزيد البعد بينهم اكتر
بيزيدها حب ليه اكتر
كانت راجعه البيت بنص دماغ
يدوب وصلت وهاتك ياعياط ..ع اد ماهى كانت عايزة تعيط عشان الى هى حساه حمل كبييييييير اوى عليها
ومصيبتها انها مش بتتكلم

♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

مى بتعلق زينة رمضان فالفراندا ..وبتول بتساعدها

بتول: مامى علقيها فوق شوية (نفخت) اووف برضو مث عارفة تعمليها زى بابى

مى: يوووووه يابتول كده حلوة طيب

بتول: مممممم مث اوى، يلا انزلى عسان تعلقى البتيخه الكبيرة

مى: حاضر

بتول: مامى وهو احنا مينفعش نروح لبابى دبدوبة دى فمرضان!

مى: ههههههههه اولا يابيتى اسمها دبى مش دبدوبة ومينفعش نروحله فمرضان يا حبيبتى عشان بابى بيشتغل عشانك وعشانى وكده هنعطله

بتول: بث هو وحشنى اوى..ده حتى انتى يامامى نثيتى تكيبيلى الفانوس الى بيكيبهولى كل ثنة بابى
مى: حاضر يابيتى ..بكرة ان شاء الله هنجيب فانوس والحجات بتاعت رمضان والياميش
والاكل بابى باعت فلوس كتييييييير وقالى هاتى لبيتى كــــــل الى نفسها فيه

بتول: بث انا عايساه مع الحجات دى يامامى (بتنطط بدلع)

مى: يوووه يابتول اسكتى بقى انا ماسكة نفسى بالعافيه
بعد م زينت البيت كله مى وقعدت هى وبتول فالليفنج..كانت بتتفرج مع بتول ع التى فى بس دماغها مع وسام

افتكرت صلاة التراويح سوا كلهم فالمسجد لما ينزل بيهم وهى تروح لمسجد السيدات وهو الرجال ويتقابلو بعدها
ممكن يتسحروا برة وممكن فالبيت
ويقرا قرآن لحد الفجر..وصلا ة الفجر
والصحيان الصبح بدرى فتجهيز البيت والفطار..هو يروح شغله
وهى تبتدى تشوف الى وراها
ومساعدته ليها اول م ييجى فتحضير الخشاف الى من اختصاصه
وصنية الحلو اى ان كانت الى بيعملها بجدارة متعلم عمايلها من مامته الله يرحمها
وانتظارهم للمغرب وهما بيسمعو التواشيح بصوت محمد رفعت ف اذاعة القرآن الكريم

واول م يقول الله اكبر..يكسر تمرة ببقه ياكل نصها ويدى نصها بايده لمى فبوقها
وينزل يصلى
ويرجع يفطروا ويتفرجو عالمسلسلات كلهم سوا
وتخصيص معاد لقراءة ورد يومى قرأن والمنافسة بينهم كل حد منهم هيختم القرآن كام مرة

..لحد معاد صلاة العشا والتراويح وهكذا
لما افتكرت كل ده مى عيونها دمعو من غير قصد وفاقت من سرحانها ع كلام بتول ليها

بتول: يامامى فيه صلاة ارواح الثنة دى تحت فالكامع؟

مى: (ابتسمت وباستها) ههههههه اسمها تراويح، ايوة يا بيتى لازم فرمضان يبقى فيه صلاة تراويح

بتول: بث يا خثارة بابى مش معانا عثان يلبسنى الايدال بتاعى والطرحه ويشلنى وننزل كلنا
بيتى سحلانة (كتفت ايدها قدام صدرها)

مى: والله بيتى وميوش زعلانين ، ربنا يخليه لينا يارب

♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

وتانى يوم...

كان سامح فشغله وجت طلبيه ليه كبيرة كسب فيها مبلغ هايل واتعاقدت معاه شركة كبيرة ينفذ كل شغل الديزاين بتاعها
المكتب بتاعه
والتصميمات والدعاية واخد عربون كبير.
الحكاية دى فرحت سامح اوى وحس بجد..انه وش البيبى الجديد
الى هو استغفر الله ! اعترض ع وجوده
وحس انه ظلم منة..بس هو تعب من التدوير عليها
ومش عارف يوصلها عشان يفرحها ، خلاص رمضان فاضل عليه يومين
وعايز انه ميجيش عليهم غير وهما سوا
خرج سامح واشترى الطقم الجديد ع مزاجه لمنة الى كانت طلبته قبل كده..وجاب طقم لكريم
وطقم ولعبة للبيبى الجديد

وهو ماشى وبيفكر فمنة..جاله فون من اختها الصغيرة!

اختها: الو..ابيه سامح

سامح: ايوة ازيك يا هدير

هدير: ابيه سامح انا عرفت منة اخت ى فين ..بس بابا وماما مش عايزنى اقولك عشان انت تجيها بنفسك عشان هما زعلانين منك

سامح: لا يا حبيبتى قوليلى وانا مش هقول انك قولتيلى بس طمنينى يا هدير هى فين

هدير: ابلة منة عند جدو فالعباسية..العنوان هبعتهولك فمسج
متقولش بقى انا الى قولتلك
سلام

سامح: سلام يا هدير

فرح سامح واستنى المسج وطيران ع بيت جدها..واول م فتحت الباب ولاقته

منة:سامح! انت عرفت منين انى هنا
سامح: كل سنة وانتى طيبة يا منة ..عايزة رمضان ييجى واحنا مش مع بعض

منة: ايوة وعايزة تطلقنى كمان (سابته ودخلت)

سامح: (دخل وراها) انا اسف ياستى / اقعدى كده (مسك ايدها)
انا غلطان فحقك
وراجعت نفسى
معلش اذا مكنتيش انتى تستحملينى مين هيستحمل

منة: والله! وزعلك عشان انا حامل
ع فكرة انا فكرت انى اروح للدكتور وانزله

سامح: لا اوعى تعملى كده ! انا كنت اعمى ساعتها ، الظروف كانت وحشة والشيطان سيطر عليا
معلش بقى خلاص

منة: وايه الى جد يعنى

سامح: ربنا بعت رزق من وسع وجبتلك كل الى انتى عايزاه وجبت لكريم وجبت للمفعوص ولا المفعوصة الجديدة كمان
وحسيت انه رزقه وان ربنا بيعملنى درس ان ربنا هو الى بيدبر لينا امورنا من فوق سابع سما
ومش اعتراضنا عليها هو الى هيحلها

جدها دخل بهدوء عليهم

جدها: ازيك ياسامح يابنى
سامح: (قام باس دماغه)  ازيك ياجدى انا اسف مقصر معاك والله معرفش ان حضرتك جيت من عند حمايا
يعنى

جدها: ولا يهمك..يلا خد مراتك وروح بيتك وهدو سركم
احنا فايام مفترجه

سامح: حاضر يا جدى (باس ايده) يلا يا منة

منة مسحت دموعها عشان صعبان عليها نفسها، ابتسمت وقامت تغير هدومها وتروح معاه

واتصالحو منة وسامح ع خير والحمدلله
اما مى بقى
فكانت فالهايبر ماركت ..بتجيب حجات رمضان
شغاله تحط فالعربية وهى سرحانه ومن غير نفس ..
بتول: مامى مامى هاتى دى

مى: حاضر

بتول: انا بحب النوتلا اوى ..بابى بيحبها برضو

وهى بتشترى جت واحدة ست ووقفتها

الست: مدام مى..

مى: ايوة

الست: ممكن تروحى لكوريدور الى فيه الجبن

مى: ليه؟

الست: تقريبآ فيه واحدة عايزاكى..وقالتلى انادى لحضرتك

مى: واحدة!! اوك شكرآ

مشست مى لكوريدور الجبن وبتبص حواليها جات بنت لها من بعيد فالعشرينات كده

البنت: هاى مى مش كده!

مى: ايوة حضرتك تعرفينى ؟

البنت: لا انا مش اعرفك..بس فيه واحدة عايزاكى فوق فالدور بتاع المكياج وقالتلى اناديلك
باااااااااى

مى: واحدة مين دى

بتول: فيه ايه يامامى

مى: انا عارفة يا بيتى ..مقلب ده ولا ايه
ولا الى بنعمله فالناس هيطلع علينا ..بلا الدور الى فوق بلا بتاع
مشيت ع طول وجاية تنزل جه الى بيوقف ناحية السلم وشاورلها ع فوق

مى: الله!! هو فيه ايه

بتول: تعالى نثوف يامامى يلا

مى طلعت فوق ..لاقت شاب مستنيها

الشاب: حضرتك مدام مى فهمى!

مى: ايوة انا والله انا (بنفاذ صبر) ممكن افهم فيه ايه

الشاب: حضرتك احنا عاملين هدية لكل حد يشترى انهاردة باكتر من 2000 جنية
وحضرتك كسبتى

مى: بس انا لسه محاسبتش انتو عرفتو منين ان مشترياتى بأكتر من 2000 جنية!

الشاب: لا احنا متابعينك..اتفضلى معايا

خدها ووداها قدام علبه كبيرة مربوطة بشريط احمر
اتفضلى هديتك

مى وقفت قدامها مستغربة
مى: دى يعنى تلاجه ولا ايه دى ! ايه ياجماعة انتو بتهرجو ولا ده برنامج ولا ايه
الناس واقفه بتبص عليها وشاشات العرض فالهايبر كلهم جايبها..

الشاب: افتحيها

مى: افتح ايه..دى قنبلة ولا انتو بتعملو مقلب ياعم اوعى

بتول: انا هفتحها يامامى

مى: لا يابتول

بتول شدت الشريط السوليفان واتفكت البوكس من بعض واتفاجئو بوسام جواها!!

مى: لا ..لا لالالالالالالالالا
ويسووووووووو (حضنته جاااااااااااامد وهو حضنها)

بتول: ههههههههه بابى طلع هدية بابى جوه الهدية هههههه

وسام: ايه رأيك انتى كسبتى الهدية دى انهاردة بقى

مى: اغلى هدية واجمل هدية..ايه الجنان ده يخربيتك

وسام: مين عاشر القوم 40 يوم..ودول 6 سنين
فكرت ونفذت والنس هنا كانت مرحبه اوى والفكرة طلعت حلوة ولانى عارف انك هتيجى الهايبر ده مخصوص، واتأكدت من مسج الواتس انك هتكونى امتى هناك

مى: (بتبص حواليها بكسوف) يخربيت عقلك انت بقيت مجنون زيي..الناس بتصورنا
زى زمان لما عملتلى هدية عيد ميلادى ..بحبك يا ويسووووووو

بتول: بابى انت عثول خالث وانا فرحانة عثان انت هنا

وسام:انا عملت المستحيل عشان ابقى اول ايام من رمضان معاكم
مكنتش هعرف اقضيه من غيركم

مى: (مسكت ايده وباستها) ربنا ميحرمنيش منك

بتول: تب يلا بينا بابى

وسام: حاضر يا توتا ثوانى ..

راح شكر الناس الى ساعدوه فالهايبر والناس لسه بتتفرج وبتتغمز عليهم ونزلو سوا وهما عند الكاشير كانت فيه بنتبن بيتهمسو ومى سمعتهم

البنت 1: هو ده ال عمل مفجأة لحبيبته وكان جوه البوكس

البنت2: ده جوزها يا هبلة ..ودى بنتهم

مى رجعتلهم ورا ووسام بيحاسب

مى: ايوة جوزى وحبيبى ومستحيل فالدنيا يكون فيه زيينا
عارفين احنا ليه كده

البنات متنحين ليها!!!!

مى: عشان مى ووسام كابل لن يتكرر (باستهم فالهوا )..امووووووووه ♥♥
وراحت انكشت وسام وهو شال بتول ع كتفه زى العادة
ونزلو سوا وهما فمنتهى الشعادة..وكانت اجمل مفجأة

 ♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

ونكمل بكرة

استنوها يوميآ

#ويسو_وميوش_وتوتا_وخلصت_الحدوتة