شيزوفرينيا ح (5)

شــيــزوفــريـنـيـاツ
ح(5)

♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

"قولتيلو؟"
ضحى رجعت لتوترها العادى والى بيبان ف حركة ايديها..

ضحى: يعنى مش بالظبط

حسن: يعنى ايه مش بالظبط؟

ضحى: لمحت من بعيد

حسن: وازاى كان التلميح؟

ضحى: (ارتبكت) هو مفهمش ومهتمش اصلا يا دكتور بغض النظر عن ازاى كان التلميح

حسن: انتى غلط يا ضحى...مينفعش تلميح
مينفعش من بعيد لبعيد
ده واحد انتى موقفه كل حاجة حلوة فحياتك عليه
انتى بلسانك بتقولى حياته كبيرة وكتيرة..تلميحك هيضيع وسط يومه
قوليلو انا بحبك
انا
ب
ح
ب
ك!!

ضحى: (تنحت لشفايف حسن وهو بينطق بحبك وعيونها اتملت بالدموع) مش هقدر

حسن: ليه واحد وهتقوليله انا بحبك، هيقوم ضاربك مثلا!
هيبقى فيه اكيد رد فعل
هيفرحك هيزعلك
المهم هنقطع مشوار علاج مالوش لازمة يا ضحى

ضحى: يا دكتور علاجى حروف اسمه ..نظرة عنيه الجميلة الدافيه
ضحكته
مش عايزة منه حاجة غير انى افضل اشوفه

حسن: ويمكن لما تبوحى بمشاعرك ليه يبقى جنبك ومعاكى واحلى من الى انتى فيه دلوقتى ده

ضحى: حضؤتك بتقول يمكن!
يمكن اه ويمكن لا

حسن: ضحى انا آسف..متجيش الجلسة الجاية غير وانتى عاملة نقطة ايجابية
فعلاجك
(بيكتب فروشته بعصبيه)
الدوا ده هتاخدى حباية الصبح وبليل

ضحى: يعنى مجيش تانى غير لو قولتله ؟ طب مش هقدر

حسن: هتقدرى عشان تساعدى نفسك
الحب مش حاجة تخجلى منها ولا عيب
دى حاجة تخليكى توقفى قدام العالم كله فاردة دراعاتك وتقولى هاتى الى عندك
واحدة زيك عندها 27 سنة
لسه فبدايات عمرها
وعايزة تنطفى بالشكل ده

ضحى: طيب لو مقدرتش اقول وفضلت زى مانا؟

حسن: يبقى آسف ليكى..مكانك مش عندى
حبك ليه ياضحى زى مرض الرطان والعياذ بالله
ي تقاوميه وتوقفى قصاده
يا تستلمى لحد م تموتى
تختارى ايه ؟

ضحى: هقاوم واقوله ..

حسن: هتقولى ايه ؟؟عودى نفسك ع نطقها
طلعيها من قلبك لودنه
ضحى: انا..
انا..
انا بح..بحبك!

حسن: ساهلة اهيه (ابتسم)
ضحى: (ابتسمت) خايفة اقوله قلبى يوجعنى من رد الفعل

حسن: صدقينى هتتحسنى عن دلوقتى..اختارى الوقت المناسب واول م تشوفيه
خديه من وسط دنيته الى هو فيها دى
بكلمتك
انا بحبك ومتستنيش رد
كفايه انك قولتيها

ضحى: اوك

حسن: الدوا معادة ميفوتش...هتيجى المرة الجاية وعندك قصة جديدة
مع الحبيب المجهول
هسمعها واغير منك عشان هبقى هموت وابقى فقصة حب زيك

ضحى: ازاى يا دكتور! ده يا بختها الى انت مرتبط بيها دى
هتلاقى حل لكل مشاكلها
وهتبقى ع طول بتضحك ومبسوطة
حسن: انا مش مرتبط يا ضحى ...غير بشغلى بحبه وبيحبنى جدآ
وبس

ضحى ابتسمت وخرجت وكلها حيوية من اوضة الدكتور حسن...كانت داخله منهارة
جيلان!

♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

تقى عند سلمى فالبيت ..بتقضى معاها يوم زى م عزمتها

سلمى: اه يا قردة يابختك،قضيتى يوم كامل معاه؟

تقى: بس جه فالاخر وغلس عليا..روحنى بقوله خدنى معاك
قالى لا
هو انتى مراتى

سلمى: انتى عارفه يا تقى..كده حسن مخلى ليكى معزة خاصه
استحالة حد يروح معاه شغله
وده مش بس شغله ده كمان المستشفى

تقى: طيب ماهو بعد كده مشانى ونزل...هيروح فين الساعه 12 بليل!

سلمى: اكيد النايت كلوب

تقى: ايه!!!!!! بتاع الرقصات والخمرا وكده زى الافلام

سلمى: هههههههه ايوة
تقى: ازاى حسن يروح الاماكن دى

سلمى: لا ده ضيف مستديم هناك
ف بنت بيحب يسمع صوتها بتغنى هناك
وفمرة فحفلة من حفلاته الى بيعملها مع اصحابه دى كل فين وفين
خدها وغنت معاه

تقى: (كشرت ومدت شفايفها لقدام) وبعدين ياختى

سلمى: وتقريبآ مصاحب رقاصة برضو ههههههههه

تقى: انا كرهته كرهته (بتضرب دبدوب قدامها)

سلمى: طب وانتى مالك بيه..هو ليه حياته وانتى ليكى حياتك
كل واحد وكيفه
انتى لسه مصدقه انه حسن الى كان بيشيلك ع كتفه وهو بيسوق العجلة
وبينيمك فحضنه فسريره

تقى: انا ولا يوم من الايام دى نسيته..كل حاجة عيشتها معاكم كانت من احلى ايام حياتى
اكلنا وشربنا ولعبنا سوا
لما بابا خدنى ومشينا...سألته يابابا هنرجع تانى
قالى اه
بس كان بيضحك عليا وعايز يبعدنى عن هنا

لما كبرت حاولت ادور عليكو فاى حته عشان ارجع اتكلم معاكم..ماما الى قالتلى ان طنط وعمو اتوفو فحادثة وهما بيحجو
لكن مكانتش عارفة ليكم تليفون
ولا اى حاجة

سلمى: انتى عارفه ان كل حاجة ليكى فالبيت عندنا زى م هى
كان ليكى طبق ومج بتوعك
وبيجامة نسيتيها هههه بتاعتك وانتى بنت 6 سنين
وكام حاجة كده

تقى: دول فأوضتك؟

سلمى: لا عند حسن فدولابه،  عايزاهم
قوليلى

تقى: نعم
سلمى: هتمشى تانى ؟

تقى: لا..مش هرجع تانى (وشها اتغير)

سلمى: وباباكى يعرف انك قاعدة فالشقه وحدك

تقى: لا ميعرفش..هو مش فاضيلى اصلا
هو فاكر انى مع ماما

سلمى: ورضى تقعدى مع جوز مامتك ؟

تقى: لا ..دى حكاية انا الفتها عليه
هحكيهالك بعدين
المهم كملى
حسن بيعمل ايه تانى فالنايت ده

سلمى:ههههههههههههه

♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

جيلان: (بتشعل سيجارة) شكرآ

حسن: طيب اهدى عشان مش فاهم منك اى حاجة

جيلان: هتجنن..عايزين منى ايه تانى
انا نفيت شبابى
والى باقى من عمرى
عشانهم
يسيبونى فحالى بقى

حسن: دلوقتى الى فهمته..اختك ماجى اخدت كل ميراثك
وغطت ديونكم
وخلاص عملت الى كانت عايزاه من جوازتك دى

مالها بقى ..مش عايزاكى تتجوزى تانى ليه ؟

جيلان: ماجى طول عمرها كده، لازم تخطط واحنا ننفذ
عشان انا اجمل منها
لما جت فرصة الجواز دى والراجل انا عجبته
اضطريت اتجوز لان خلاص كنا هنعلن افلاسنا
واحنا من عيلة كبيرة
هنبقى لبانة فبُق الناس
ضحيت واتجوزته..اكبر منى ب اكتر من 25 سنة مش مهم
المهم عنده فلوس
عنده ولد من مراته يا ماجى؟
تقولى مش مهم ده الجوكر الى هتئوشى بيه

فوجئت بكمية الشر الى هى فيها ..لما عرفت  انها هى الى قتلت جوزى
عشان اورث
وانه مماتش بسكته زى م كل الناس عارفين

كان يوم عيد عندها لما ورثت مبلغ كبييير جدآ مكناش نحلم بيه
وحتى ورث ابنه
بقيت وصية عليه

حسن: ودلوقتى مش عايزة انك تتجوزى عشان ورث ابن جوزك ميروحش منك
وتتهنى هى بيه

جيلان: اهل الولد من ناحية جوزى عايزينه..وطبعا لو اتجوزت من حقهم جدآ
ياخدو الورث ويبقو هما اوصياء عليه
مش كفاية دفنتنى اول مرة بجوازة مش عايزاها وضحيت عشان اسم العيلة
وقتلت جوزى
كمان عايزيانى اقفل حياتى ع طفل مش ابنى ومتجوزش
عشان هى تعيش ومش مكفيها الى خدته!

سمر خبطت وجابت عصير ليمون ..

حسن: شكرآ ياسمر.. اشربى الليمون طيب يهديكى

جيلان: انا مش حهدى غير لو لاقيت حل
فرحت انى لاقيتك قولت هيحل كل مشاكلى الى بعانى منها بقالى اكتر من 7 شهور
 حسيت انك الملاك الى ربنا باعته يصبرنى ع الى انا فيه

حسن: الشخص الى متقدم لك ده بتحبيه؟

جيلان: هو بيحبنى
حسن: سؤالى ليكى انتى

جيلان: انا عايزة اعيش حياتى ..اتجوز حد من سنى
ابدآ حياة جديدة
اتجوز واخلف ويبقى عندى اولاد
مخافش من حياتى من حاجة جديدة تحصل فيها
ولا مؤمرات ولا خطط
تمشى زى كل الناس

حسن: ياريتنى كنت من ديانتك كنت اتجوزتك وخلعنا من البلد دى وتضربي صرمة لاى حد يضايقك!

جيلان برغم دموعها الى خدها ضحكت ..

حسن: ايوة كده اضحى..حد بالجمال ده ويعيط
وبعدين اختك ماجى ربنا هيوقعا فشر اعمالها قريب
الجلسة دى استماع فقط
هنمشى عالدوا ده مع تمرين كل يوم تجرى الصبح نص ساعه
وتتمشى نص ساعه
وبعدهم تعملى اكتر حاجة تخليكى تنفصلى عن الدنيا

جيلان: اكتر حاجة بتخلينى انفصل عن الدنيا!! كل حاجة حوابا بتفكرنى باللى انا فيه
الا لما بروح اعترف فالكنيسة
او اقعد شوية فيها واصلى

حسن: تمام اشطة! يبقى هنمشى عالجدول ده
هنلعب رياضة كتير
مع الدوا..زائد زيارة الكنيسة
اشوفك الاسبوع الجاى

جيلان: اوك..انا حاسة انى بقيت اهدى عن م جيت

حسن: انتى لما كنتى داخله حسيت انك هتضربينى بالنار من عصبيتك

جيلان: معلش بقى مانا حكيتلك..كنت لسه متخانقه معاها ومعصبانى

حسن: بس دلوقتى انتى احسن
مش كده

جيلان: ميرسى ليك يا حسن انك فحياتى..حتى لو مش بصفتك الدكتور بتاعى

حسن: احنا اصحاب يا جىجى
جيلان ابتسمت وعملت بأيدها باى وخرجت...
دقيقة ودخلت سمر..

سمر: مافيش جلسات تانى حضرتك انهاردة؟

حسن: اوك ياسمر روحى انتى ..انا قاعد شوية

سمر: اوك يا دكتور ..سلام

حسن: اقفلى الباب وراكى يا سمر

قفلت سمر الباب..وحسن مدد ع الشيزلونج الى فأوضته
ومع نفسه دندن..

وطريقنا رايح جاى وعكسى ومكسى حرير والام
والناس بتجرى عشان احلامها ياعينى ورا الاوهام
وفوسط زيف الناس فى كتاب وحساب عمره ما يتزور

وهو بيدندن نزلت دمعه من عيونه ..مسحها بهدوء وهوبيبص للسقف
وكمل
بقيت ده يقطع فحتة منى
وده نآمله ويصحى قالب
وخلق منى متشلش عنى
وده بمخالب ودول تعالب
حتى الى طيب وزمانه هده..الشر شده حالف بشرفه

ليبقى غالب !
وسكت دقيقة وقام قعد وسرح شوية وهو مكشر وحط كانز العصير جنبه..
وقال لنفسه كلمتين
"وايه الى فكرك يا حسن بس...يلا تعيش وتاخد غيرها"

♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

فالاوضه والنور هادى...مفيش غير الشمس وهى بتبدى تطلع
اشعه خفيفة منها بتدخل

كانت تقى قاعدة ع سريرها ، جايبة ع فيديوهات حسن
عاليوتيوب
وهو بيغنى مع فرقته
زى م سلمى عرفتها تجيبهم ازاى ...
مبتسمه وبتحاول تهدى ع صوته عشان تروح فالنوم ، ونسيت اللاب مفتوح
ونامت وبدآ حلم غريب
................................

كان فالوقت ده حسن خلصت سهرته مع بنت من بنات النايت
ونازل ..

فتاة الليل: هشوفك تانى؟

حسن: معرفش..ع حسب

فتاة الليل: لا اوعدنى اشوفك تانى

حسن: اوعدك الوقت الى انا فيه ابقى منهار كده
ومخنوق
وبعيد عن ربنا ومش بقرب ناحية سجادة الصلاة
هتشوفينى

فتاة الليل: قصدك ان احنا الشياطين بقى الى بتبعدك عن ربنا

حسن: انتى قولتليلى اسمك ايه؟

فتاة الليل: لولا

حسن: بصى يا لولا..انا شخصية ملهاش ملامح
 بعمل كل حاجة وعكسها
بكره نفسى..وبحب حياتى
بصلى لربنا وانا بغضبه فكل خطوة
وكل دقيقة
فأحسنلك متزوديش معايا
لان مش هتوصلى لنتيجه غير ان دماغك هتلف

فتاة الليل: (عوجت بُقها وبصت للمبلغ الى سابه )

وفطريقه حسن بيكلم نفسه برضو..
حسن: (بيسوق العربية) بتعمل كده ليه ، و لا مبسوط ولا حاجة
وبترجع تقابل ربنا ازاى  فصلاتك
انت متخلف ياض!
اهى حاجة زودتك قرف وخلاص
ولا انبسطت ولا بطيخ
داهية فمنظرك... الهى تتقلب بالعربية دلوقتى وانتى ماشى خلى البشرية ترتاح منك يا مفكوك يابن المفكوكة
ولا عارف انا عايز ايه..ولا انا مين
انا مش عارفنى
(بدأ يغنى)
انا مش عارفنى ...انا تهت منى
انا مش انا
لا دى ملامحى ولا الشكل شكلى ولا ده انا
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦

ركن عربيته وطالع ، كان خلاص النهار طلع
وهو عالسلم سمع صرخه جامدة!!!
طلع جرى عالسلم فخطوتين

وعرف انه جاى من شقه تقى، لانك مافيش حد ساكن قدامها
رن الجرس مرة و2
وفالتالتة
خبط الباب اكتر من مرة بعنف
وفتح
جرى عليها...
لاقاها بتعيط وحضنه مخدتها زى الطفل

حسن: كنتى بتحلمى !
تقى بتعيط وماسكة فيه
حسن: كابوس يعنى ؟

تقى: (بتهز راسها اه)

حسن: (خدها فحضنه) طب خلاص اهدى... اهدى
انا معاكى اهو انتى مش لوحدك

تقى: (فحضنه وبتعيط) وقعت فشوك
حد وقعنى فشوك
وكنت بمد ايدى ليك
بس انت كنت بعيد

حسن: طيب خلاص متتكلميش تانى...اهدى خالص
حسن قام جابلها مية وشربت

حسن: نامى..وانا مش هسيبك

تقى: هتقعد يعنى لحد م نام؟

حسن: ايوة

تقى: (فرحت) ربنا يخيلك يا حسن

حسن: يلا بقى .. استريحى (بينيمها) وانا هريح عالفوتيه ده قدامك ومش هسيبك
هاتى بوسه يلا

تقى: باسته فخده..) انا بحبك اوى

حسن: وانتى اغلى بنوتة عندى انا مخلفتهاش..يابنت قلبى
يلا نامى
 نامت تقى بهدوء وبراحة ولاول مرة من ساعة م جت تنام عادى ومن غير صعوبة وخوف

وحسن فضل قدامها لحد م راحت فالنوم...وريح عالفوتيه ونام هو كمان.

♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
ساعات..
وقام ع فون سمر تفكره بالمستشفى...قام وخد حاجته بهدوء
وباس تقى فدماغها.
وفتح الباب وطلع بالراحه وقفله وراه.
نزل اخد دوش وغير وطلع عالمستشفى، طالع ببهجة واحد غير بتاع امبارح
وبيغنى طول الطريقوكأنه ر ايح معاد لحبيبته
مش المستشفى الى بيكره مشوارها، وصل وسلم عالكل..ودخل للحالة بتاعته الى مابعها من الاول...لقاها استقرت اذن بالخروج ليها

ودلوقتى معاد ..حبيبة !

دخل عليها وهو متوجس منها..

حسن: معاكى امشاط ولا مرايات ولا اى حاجة المرة دى
حبيبة: (مبتسمة) حسن!
اتفضل
شوفت ازاى انا فاكراك من المرة الى فاتت

حسن: ايه الوداعه دى؟طب تمام بداية مبشرة بالتفاؤل

حبيبة: عامل ايه؟

حسن: انتى الى عاملة ايه ياستى وسيبك منى انا

حبيبة: انا حلوة..وع طول حلوة
حتى انت برضو هتتهوس بجمالى زيهم كلهم

حسن: مين كلهم ؟
حبيبة: (بعصبيه) وانت مالك!!
المهم
ايه رأيك فيا انهاردة؟

حسن: قمر ماشاء الله

حبيبة: انت متجوز يا حسن؟

حسن: لا

حبيبة: طب ايه رأيك لو نتجوز؟

حسن: نتجوز مين (رفع حواجبه) اه انا وانتى
اوك بس خليها غير انهاردة
عشان انا مش فاضى عندى التزامات

حبيبة: يعنى موافق!! طيب يلا نشرب عصير الخطوبة بقى

قامت جابت علبتين عصير مقفولين وخدت واحدة وادتله واحدة
حبيبة: يلا اشرب..عصير قراية الفاتحه

حسن: بس احنا مقريناش حاجة

حبيبة: وماله نقرا!

حسن: طب خليها بعد العصير

حبيبة: اوك

ابتدوا يشربو الاتنين وحسن بيراقب ردود افعالها..

حبيبة: انت عارف..تلاجتى دى مش بتفضى
طبعآ
بفلوسى
ايه رأيك فالعصير

حسن: جميل..مش هنتكلم بقى

حبيبة: هنتكلم انت مستعجل ليه

حسن: العصير ده منتهى الصلاحية ولا ايه ؟

حبيبة: لا مش منتهى الصلاحية ولا حاجة
ده انا حاطه فيه سم

حسن: (بطل يشرب ) ايه؟

حبيبة: ايوة، انا سهيت الممرضة واخدت شريطين برشام المهدئ الى بتديهولى من جيبها
وهى واقفه
وطحنته كله
وخلطته بمية
وحقنته بسرنجه برضو سرقتها منها
فالعصير

حسن باصصلها وهو مبرئ!!!

حبيبة: شوفت انا حبيتك ع طول ازاى اختارت
(ابتدت تدوخ)
انا
و
ا..انت
(ابتدت تغمض عنيها)
نتخطب وبعدها نتجوز فالجنة ..

حسن داخ وهى بتتكلم وراسه لفت،
وهو بيقول بلسان تقيل
" الله يحرقك يا بعيدة!"حد يل
يلحقنا
وهوبا!!
وقع عالسرير قصادها.....!

♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
استنونا يوم الاحد ان شاء الله
 شــيــزوفــريـنـيـا#
لــــ #نورإسماعيل