رواية ..
=======================
"بـ 1500 جنية ! كتير اوى
يوسف: اعمل ايه دى الى لاقيتها دلوقت ، كل يوم انزل من الصبح الف وملاقيش سكن
ثم دى قريبة من الجامعه مش محتاجه مواصلة ولا حاجه
و3 اوض وشيك جدآ وكلها مفروشة فرش كامل وفعمارة شيك
مش احسن من السكنات المعفنه دى ..ولا شقه عم خلف
عبدالرحمن: بس انا مش هعرف ادفع 500 جنية ايجار كل شهر يا يوسف معاكم
انا ظروفى مش زيكم يااخى
وهما بيتكلمو كان محمود جه من الجامعه ودخل الاوضة الى بيباتو فيها ..
يوسف: يعنى عاجبك قعادنا هنا..كلنا فوق بعض وبعدين هما استحملونا جامد
وشوية والترم يخلص ومنعرفش لا نتنيل نذاكر ولا نيلة
محمود: ايه فيه ايه ؟
عبده: ياعم يوسف لقى شقه كويسة جدآ نأجرها جمب الجامعة
محمود: طب حلو ايه المشكلة ..احنا بقالنا فترة دايخين
عبده: المشكلة ان ايجارها عالى
محمود: كام يعنى
عبده: 1500 جنية!! يعنى كل واحد فينا يدفع 500
محمود: (سكت شوية) مافيش مشكلة متفرقش
انت هتلاقى الزيادة اد مصاريف المواصلات للجامعه كل يوم
عبده: مافيش مشكلة ازاى ! انا مش زيكم يا محمود
ظروفى ع ادها وانتو عارفين
500 جنية كتير
ولسه مصاريف كتب ومذكرات واكل وشرب وسفر
يوسف: خلاص خلاص احنا نشيلك ..ايه رأيك يا محمود
يدفع هو زى م كان بيدفع عند عم خلف وانا وانت نكمل
محمود: (سمع يوسف وساكت عشان لسه مخاصمة)
عبده: تدفعولى ايه منك ليه ؟؟ شايفينى سميحة قدامكم
يوسف: طب نحلها ازاى ؟ مافيش وقت
وبصراحة صعب نلاقى غيرها دلوقت
اول السنة معلش
عبده: خلاص خلاص ناخدها وامرى لله ..وانا ابقى اشوف اى شغل بعد الضهر فاى مكان ولا سايبر ولا مكتبة
اعوض الفلوس دى
محمود: لو شايف ان الموضوع هيخنقك بلاش منه
يوسف: بلاش منه ازاى يا حج انت
محمود: (بعصبية ومش باصصله) اومال يعنى نورطه معانا بيقولك ظروفه مش سامحه
يوسف: ف ايه يا محمود بتتكلم كده ليه ؟ من ساعه الموضوع اياه وانت كارفنى
ف ايه ياجدع
محمود: ماانت عارف كويس ف ايه
يوسف: لا ماهو اسمع ..مش بت يعنى
هتخلينا نخسر بعض
محمود: اولا بطل تحتقر من الناس كده فاسلوبك
ولما هى حتة بت يا سى كازانوفا
كنت صاحبتها ليه
وبتكلمها ليه
وخدتها بيتكم وعرفتها ع اهلك ليه
يوسف: (ارتبك) عادى ... هى جت كده
والموضوع خلاص خلص
انا وانت بقى هنفضل كده كتير
محمود: ياايوسف انت كويس جدآ بس للاسف بتوحش نفسك بحاجة بسيطة جدآ ودى مشكلتك مع الناس
واحدة زى ريهام دى كانت شايفاك بصورة كويسة عشان كده امنت ليك
يوسف: يووووه فضوها سيرة بقى ، خلاص ريهام كارت واتحرق
وانا مبقفش ع بت لعلمك
وهى تلاقيها عايشة حياتها وزى الفل .. سيبكم من ريهام وبتاع
ها
ننقل عالشقه ؟؟
=====================
البوم صور ..كتب كتاب هايدى وعمر
والبنات فاتحين يتفرجو فالسكن بتاعها
..
بنت1: الله عالقمر خطيبك موووز اوى
هايدى: طبعآ يابنتى (بثقه)
بنت2: لا وبصى واضح انهم ولاد ناس اوى ،شايفه مامته لابسه ايه فالصور
هايدى: يا بنتى عيلة عمر خطيبى عيلة كبيرة اوى فبلدنا
صديقة 3: بس الشبكة شكلها غالى اوى .. اه منك انتى مش ساهلة
هايدة: هههههههههه (بتبص ع شبكتها) عمر بيحبنى اوى ومش بيرفضلى طلب
وبعدين لو شوفتو الشقه بتاعتى
ولا الشاليه الى اخده وكاتبه باسمى
هو اصلا مش عارف يعمل ايه ولا ايه عشانى
بالصدفه كانت واقفه بنت من البنات وبتتفرج معاهم ، وبعدين لمحت حاجه غيرت ملامح وشها تمامآ
اصل البنت دى مع هايدى من اول سنة اولى فكل سكن تروحه ..وعارفه بالقصة القديمة !
وفاء: هايدى مش ده ؟!
هايدى : (قاطعتها وخدتها بعيد) فيه ايه يا وفاء
وفاء: مش محمود الى فالصور مع خطيبك ده ..ولا انا شايفه غلط
لا بس هو انا عارفه محمود كويس
هايدى: (ارتبكت وبتبص حواليها) ايوة هو ..فيه ايه
وفاء: هو قريب خطيبك ولا ايه ؟ ولا انتى اتجننتى وعزمتيه ع خطوبتك يا مجنونة
هايدى: (متدايقه وبتدارى وبتوطى صوتها) انا معزمتوش
وفاء: اومال ايه
هايدى: بقولك ايه ..تعالى فقاعة الاستذكار احسن
ثوانى وجاية يابنات
وفاء: ف ايه م تفهمينى ؟
========================
فالوقت ده كانت نازلة زوزو من عربية فيها اكتر من 3 شباب وفيه ريحه وحشة طالعه من العربية
ونازلة بتضحك
والبجاحة وصلوها تحت السكن بالظبط !
الشباب مع بعض: باى باى يا مرمر
جهاد: (كانت داخلة من برة ) مرمر ؟! بت يا زوزو
مين دول يابت
زوزو: بااااااااااااى باى امووووووووه
صاحبة السكن كانت واقفه فبلكونتها ، لفت بسرعه عالسلم وقابلت زوزو وهى طالعة
وكانت طالعة وراها جهاد
ام عادل: زوزو !
زوزو: (كانت بتضحك متعرفش ع ايه وبصت لام عادل وهى بتنادى ) ايوة ياام عادل
ام عادل: مين الشباب الى وصلتك لهنا دول ياعزيزة
زوزو: اوووووووف بقى قولتلكم 100 مرة زوزو، دول قرايبى
ام عادل: (بحدة وعنف ) اسمعى يابت
انتى تطلعى من دور احفادى
يعنى كلامك ده ميخلش عليا
قلة ادب ومسخرة عندى هنا فالسكن مااسمحش
جهاد: (فسرها وواقفه تتفرج) ايوة اديها فوق دماغها قال قرايبى !! جاكى تمساح)
زوزو: قلة ادب ايه ! انا هنا زيى زى اى بنت وبدفع الايجار بتاعك كل شهر ومالكيش حاجة عندى اكتر من كده
وقولتلك انهم قرايبى ولو سمحت محدش يتدخل فالى مالوش فيه
ام عادل: انا هتصل باهلك يشوفو حل .. كويس انى واخدة رقم كل واحدة منكم فالبيت
عشان المعووجة اهلها يعدلوها
زوزو: (اتخضت) لالا استنى .. بصى ده ده واحد منهم خطيب صاحبتى وكنت بصالحه هو وهى والباقى
الباقى اخواته
وهى كانت معاهم
ام عادل: (بصالها ومش مصدقاها)
زوزو: مش مصدقانى .؟ طب انا هتصلك بيها واساليها
ده ده حتى انا جبتهم لحد السكن هنا لانى قولت ان الموضوع عادى يعنى
مش فاكرة انك هتزعلى يا طنط (باستها)
ام عادل: (مش مصدقاها وبتبص لها بصة وحشة) اسمعى يا عزيزة .. تمشى كويس اهلا وسهلا
هتتعوجى مافيش اسهل عندى من الطرد وابعت لحد من اهلك ييجى ياخدك واخلص، انا مش عايزة مشاكل
زوزو: م خلاص بقى يا طنط يا جميلة ياقمر (باستها تانى ) خلاص معودتش اجيبهم تانى ولا ادايقك
تصبحى ع خير
جريت زوزو عالسلم وطلعت فوق ، انما جهاد بعد م خلصت المشكلة دخلت الشقة وهى بتبرطم :/
جهاد: قال ده خطيب امى باين .. ومعاه اخواته
وخالتى كانت راكبة معانا
معجونة بمية كدب
يعنى ممكن تموت وتكدب فالقبر ع ناكر ونكير.. قال وتقولهم اسمها مرمر قال
شالله المر الى تشربيه ع عمرك يا زوزو
ريهام كانت نايمة ع سريرها وسرحانه وفيه دمعه ع خدها وحاضنة صبرى العروسة بتاعتها ..ومشغلة اغنية لجسار
خلينا بعيد
جهاد: وانتى كمان مالك يا ابلة ! عتبكى ليه
ريهام: (انتبهت ومسحت دموعها) لا مافيش
جهاد: توب عليا يارب من سكن المخاليل ديتى
ريهام: ياستى ربنا ياخدنى عشان ترتاحى خالص ياجهاد (طلعت برة)
جهاد: وتفتكرى كده هفرح .. مانا هبكى عليكى بقليله 3 سعات
فيه عيش وملح واكلينه سوا اومال
=D
=====================
هايدى: محمود يبقى اخو عمر
وفاء: (اتخضت) ايه !!ازاى
وانتى كنتى عارفه ؟ ولا صدفة
هايدى: بس بصى محدش هنا يعرف الحكاية دى..اصلا انتى بس الى عارفه الموضوع بتاعى انا ومحمود عشان معايا من زمان
وفاء: انا مش هقول لحد حاجة .. بس لازم تفهمينى جت ازاى دى
هايدى: مافيش انتى عارفه ان فيه فترة انا ومحمود كنا بنتخانق كتير بسبب ان ماما عرفت ان بكلم شاب فالفون وحذرتنى تقول لبابا
وفاء: تمام..
هايدى: انا سمعت الكلام واتفقت معاه نسيب بعض.. ولو لينا نصيب فبعض هنكون ولو بعد 100 سنة
وفاء: اه
هايدى: طبعآ تعبت ونفسيتى انهارت ..انتى عارفة انا بحب محمود اد ايه
وفاء: انتى هتقوليلى ..كفاية الى كان بيحصل م بينكم والى كنتى بتحكيه
ده ولا الافلام يابنتى
هايدى: بس.. حالتى النفسية اثرت ع شعرى بقى يوقع كتير اوى لدرجه انه خف، ووشى كله بقى عبارة عن حبوب
وفاء: ممممممممم
هايدى: ماما حجزتلى عند احسن دكتور جلدية فبلدنا ..وروحت
وفاء: طبعآ ده عمر
هايدى: انا مكنتش اعرف انه اخوه .. وعادى كنت بروح الجلسات بتاعتى بانتظام
بس هو كان بيرتاح معايا فالكلام اوى
وبعدين بدآ يلمح بارتباط
انا مكنتش هوافق
برغم مركزه الحلو ..بس انا كنت لسه منستش محمود
وفاء: وبعدين
هايدى: وبعدين ..فمرة كنت عنده وجت الممرضة قالتله البشمهندس اخو حضرتك برة
راح قالها دخليه بعد حالة انسة هايدى اوك
وقالى انا هعرفك ع اخويا عشان تعرفينى اكتر
واشتغل شعر فمحمود ده حبيبى واخويا الى ماليش غيره وكده
وفاء: وفاللحظة دى شوفتيهم !
هايدى: لا .. خرج عمر يناديه
كنت انا بجهز البس طرحتى بعد الكشف بس سمعت صوت محمود!
انا عمرى م اتوه عنه
خرجت ابص من ورا الحيطة من غير م حد يحس
لاقيته محمود واقف مع عمر وبيتكلمو !!
وفاء: وبعدين
هايدى: وبعدين خرجت بسرعه من غير م حد ياخد باله من برة برة ... ومرة ومرة وعمر يلح عليا انه ييجى يتقدم ويتعرف ع عيلتى
بس انا مكنتش عارفه اعمل ايه ؟
وفاء: طبعآ ترفضى ، انتىبتستهبلى
ده اخو حبيبك الاولانى
يعنى ممكن انتى تبقى السبب انهم يخسرو بعض
وعمر مش اول ولا اخر عريس يجيلك
هايدى : (بزعيق) ماهو عشان مش اول ولا اخر عريس انا فكرت صح ..لو متخطبتش لعمر هتخطب لاى حد ييجى بعده مناسب
وانتى عارفه عريسانى كتير
وكده هروح من محمود للابد
لانه لسه قدامه كتير
قولت اضرب عصفورين بحجر واحد .. اتخطب واتجوز عمر
وبكده افضل طول عمرى جمب محمود
وفاء: انتى اتهبلتى !! طالما بقيتى مرات واحد مالكيش دعوة بالتانى
هايدى: ياسلام ! وفيها ايه
عمر زوج كويس وممتاز وجاهز.. وانا لو مفكرتش كده كانو الاتنين هيروحو من ايدى
كده انا ضمنت جوازة ستايل ومستوى زى مانا عاوزه .وفنفس الوقت معايا محمود الى انا ضامنه انه لسه بيحبنى لحد دلوقت
وع فكرة ..هو م ارتبطش لحد ناو عشان بيحبنى ، هو بس قلبه واجعه شوية بسبب خطوبتى لاخوه لانه اتفاجئ ومكانش يعرف
بس انا مع الوقت
هعرف ارجعه حبيبى زى زمان ..
وفاء: (بصتلها بصة وحشة فعيونها) اول مرة اعرف انك واقحة !!
=====================
محمود ويوسف وعبدالرحمن ، راحو الشقه خلاص ونقلو
فعلا موقعها حلو ومريحة ..وكل واحد ليه اوضه بالفرش الكامل بتاعها
وتكييف للجو الحار
وتلفزيون
وتشطيبها حلو برضو
ادو فلوس للبواب نضفها .. وده اول يوم ليهم فيها
محمود: ياااااااااااه كده الواحد يروق، فسكن وليد كنا عاملين زى الصين الشعبية من البشر
عبده: لا و فسكن عم خلف هههههههه الحمام ضيق والمراوح تعبانة
والارض بلاط عادى
يوسف: عارف احلى حاجة ان هنا مافيش خلقه هشام وقرف ، كل واحد اوضته
عشان محمود ميقعدش يزعق عالصوت وهو بيذاكر
وحضرتك تفتح الشباك براحتك
وانا اناااااااااام من غير ازعاج
عبده: ايوة ياعم ..هى صحيح غالية بس حلوة ومريحة
يوسف: هنقضى فيها احلى ترم
والله لنكيف ههههههع
اصلا ده اخر ترم ليا
عبده: وانا ..وبعدها بقى نطلق التعليم ده بالتلاته
محمود: اه يابختكو لسه قدامى سنة يا كلاب
يوسف: ياعم تتقضى بالطول ولا بالعرض..بقولك ياض يا محمود هو اخوك متجوزش الحيزبونة ليه لحد دلوقت
هو مش قال فنص السنة
محمود: والنبى متفكرنيش ..انا لسه كنت هفكر فناس بيروق بالى لما بفتكرهم فكرتنى انت بالعكننة دى
عبده: والبنى بلاش سيرة البت دى عشان سيرة نحس
وكل مرة تحصل كارثة
يوسف: ياعم عبده اصلك مش فاهم .. هناك فيه هشام
ده لوحده غراب قاعد معانا لازم تحصلنا كوارث ..دى بقى شقة جديدة وشها حلو ان شاء الله
محمود: هههههه انتو عارفين فكرتونى بحاجه بمناسبة البت دى واخويا
لما كنت مع عمر ايام كتب الكتاب
بيقولى احلى كلمة بتقولهالى يامحمود .. انتى حبى الاول والاخير
هاااااااار اسود يا جدعان
بينا البدع
وتقول ليه اكمنه طيب ..انت حبى الاول والاخير
يوسف: ايه البدع والنبى والنبى ها ها
محمود: ياعم هو ده الى خدت بالك منه
عبده: ع فكرة ،البنت دى مش كويسة
واخوك غلبان
وانت كده هتاخد ذنبه لو الجوازه دى حصل فيها حاجة
وشكلك هيبقى وحش
لازم تقول الحقيقة والى يحصل يحصل
محمود: اقول ايه بس ياعبده ، اقوله انا كنت مصاحب مراتك
وبخرج معاها
وبمسك ايديها
وبكلمها كل يوم كام ساعه
وسكتت كل ده وانتو هتتجوزو وجاى اقولك دلوقت .كأنى بقوله مبروك انت المغفل الى فينا
!! لا طبعآ مينفعش
يوسف: لالالالالا بص انت تدخل عليه وتقوله بص يابرنس
الفردة الى معاك لامؤاخذة شمال وحصل بينى وبينها 1 2 3
ومينفعش تتجوزها واقلبها يلا ومتوجعش دماغك
محمود: (بيضحك) انا اروح اقول لاخويا الدكتور عمر ، بص يابرنس
مراتك شمال
انت عبيط يابنى
يوسف: خلاص ياعم متأسفين للسيادة .. انت روح حط فوطة برتقانى ع كتفك زى بتوع التكاسيات
وادخل بوس رجلة الاول
وقوله سعادتك يا وزير يا قبطان يا خديوى عمر
مرتبط بانسانة
left
وميل وانكسر فكلامك وامسحله جزمته بالفوطة ..وابقى استنى يلبسهالك فوشك !
عبده: هههههههههههههههههههه يخربيتك
محمود: (بيخبط ع رجله من الضحك) الله يقطعك ياشيخ
يوسف: اصلى بقوله يقولى اخويا الدكتور نشأت ولا مش عارف مين اقوله يابرنس
لا ياعم احنا كلاب وغلطانين فسعادته
عبده: هتموتنى والله ههههههههههههه
محمود: عارف ياض يا يوسف تنفع فالسيرك .. تشتغل مكان القرود كده هايل
يوسف: الخطة الجاية متخافش حاطط فدماغى
وكملت كريزة الضحك بكلمة يوسف حتى يوسف فصل من الضحك وبعدين مرة واحدة !!
=====================
وتانى يوم .. كانت رقية معدية فالكوريدور بتاع الكلية .. ولمحت من بعيد يوسف ومحمود نازلين
محمود وهو نازل اخد باله منها ورجعلها .
محمود: (شكله متدايق) ازيك يارقية
رقية: ازيك يا محمود..انتو كنتو عند دكتور سليم ؟
محمود: اه
رقية: ليه فيه حاجه ؟ وبعدين مالك شكل فيه حاجة مديقاك
هو يوسف الى كان معاك ده
محمود: اه هو .. اصل يوسف تعبان اوى يارقية
بقاله فترة قلبه بيوجعه
امبارح واحنا قاعدين وبنتكلم عادى .. مسك قلبة واغمى عليه
ومنطقش لغاية م فاق بالعافية
انا قولتله لازم نكشف عند خالو
بس جيت طبعآ لان خالو بيكشف بحجز قبلها بشهر، وانا عايز اتطمن عليه
فخالو قالى نروحله بكرة كشف مستعجل عشان خاطرى وطلب منه تحاليل ورسم قلب
رقية : (اتدايقت) لاحول ولاقوة الا بالله
تلاقيها من السجاير.. لازم يبطلها عشان مضره ليه
محمود: مش عارف بقى ..ربنا يجيب العواقب سليمه
رقية: متخافش وحاول تبان عادى قدامه
وان شاء الله مافيش حاجه ..ممكن يكون اجهاد ولا حاجه
محمود: (اتنهد) المهم انتو عاملين ايه
انتى وريهام
رقية: الحمدلله تمام
محمود: ريهام بقت احسن دلوقتى صح ..
رقية: (غارت) اه ..عادى
بس غريبة تسأل ع ريهام كده
محمود: يعنى عشان موضوعها هى ويوسف وكده ..اصلى مبحبش بنت لما بتتجرح
رقية: (اتدايقت) لا متخافش كويسة الحمدلله
محمود: (لاحظها) وانتى مالك شكلك اتغير كده ليه لما سالت ع ريهام؟
رقية: لا عادى ..انا
لا عادى
فين ده
محمود: (ابتسم) ع فكرة شكلك حلو وانتى غيرانه :)
رقية: أ ..أ انا بغير
محمود: ايوة .. وع فكرة دى حاجة مفرحانى
اصل طالما غيرتى عليا من اقرب صحابك
يبقى انتى بتحبينى
رقية: محمود!
محمود: قلب محمود
رقية: بص مش كل مرة هتقعد تقول كده .. انا ممكن المرة دى ادخل فغيبوبة واقع هنا (داخت وارتبكت اوى )
محمود: هسندك واشيلك ياروحى
رقية: يووووووه ..انت مستفز
سابته وشيت بسرعه والكتب وقعت من ايدها ولمتهم فساعه وهو بيراقبها وبيضحك وبعدين بعتلها بوسة فالهوا
ومشى ..
==================
عند الدكتور سليم حسانين..
محمود بيبص للدكتور وهو بيتفحص الاشعات ورسم القلب
وعبده واقف ويوسف قاعد مستنى يعرف نتيجة الكشف
الدكتور سليم: الكشف المبدئى والاشعات ورسم القلب بيقولو انك عندك صمام مرتخى فالبطين الايمن بالقلب
محمود: (كشر وبص ليوسف)
يوسف: يعنى عيان بقلبى يا دكتور مش كده (بيتكل عادى)
الدكتور سليم: بالظبط .. عندك ارتخاء وتهتك فالعضلة
انت يابنى بتنتحر
ازاى مكشفتش من زمان
والسجاير .. ايه ده الى بتعمله فنفسك ده
سنك صغير حتى مش 21 سنة تقريبآ
يوسف: 22
محمود: (متدايق اوى ) يعنى نعمل ايه ياخالو دلوقت ؟
الدكتور سليم: هو فدراسة ؟
يوسف: اه اخر سنة
الدكتور سليم: لازم عملية ..بس عشان الدراسة هتتأجل للاجازة
عشان المجهود
هى عملية مش صعبة بس مطلوبه
الادوية دى يمشى عليها بانتظام (بيكتب الروشته)
المجهود ممنوع ..شرب السجاير ممنوع
الاكل التقيل ممنوع
يوسف: طب مم اموت احسن يا دكتور فاضل ايه تانى (بتريقه)
محمود: بس يايوسف ! انت مش مقدر حالتك لحد دلوقت
يوسف: ياعم قول ياباسط
الدكتور سليم : (بصله باستهزاء ورجع كتب) لو اى تدهور حصل لحالتك انت المسؤل الوحيد .. اشوفك بعد اسبوعين
طلعو من عند الدكتور ويوسف بيغنى وبيولع سيجارة
عبده: ياعم م كفاية شرب زفت (خدها من بوقه)
يوسف: ياعم عبده ..يعنى السيجارة هتقصر عمرى كام يوم يعنى
الى مكتوبله هشوفه
بس ياعم بلا كلام فاضى
محمود: (بص لعبده ورجع بص ليوسف) لو انت مش خايف ع نفسك احنا خايفين عليك
يوسف: والله مش هيحصل غير المكتوب
وبصو بقى وش الكلب الى لبسهولى كل واحد منكم ده من بعد الكشف مش عايزه
مافيش حاجة اتغيرت
خلينا نتعامل عادى، هتعاملونى عيان هسيبكم وامشى
لانى بصراحة بتخنق من الجو ده
محمود وعبده سكتو .. هيقولو ايه
يوسف محدش عارف زعلان ولا لا ع نفسه
بس هما متدايقين جدآ عليه ..خصوصآ لما عرفو ان حالته متدهورة وهو مهمل فنفسه.
يمكن مش بنحس بقيمة الحاجة غير لما نحس انها هتروح ، عشان كده فاللحظة دى حاسوه انهم بيحبوه اوى <3
=============
ريهام فالجريدة .. بس مش بتهزر زى العادى بتاعها
عادى بتشوف شغلها وخلاص وكانت طالعه من مكتب رئيس التحرير بتكلم حد جوه ..
ريهام: يابنى لون وبعدين اطبع ..هنعلمكم لحد امتى
(بتدور لقت يوسف مستنيها برة فقاعة الزوار)
يوسف!!
يوسف: (عض ع شفته واتهز كتير لانه متوتر وبعدين بدآ كلامه) بصى بقى
انا لا هقعد احلى الكلام ولا بتاع
انا عارف انى غلطان وزفت ونيلة وبهدلت الدنيا عالاخر معاكى
وانك بنت كويسة جدآ ومحترمة جدآ.. وانا الى فهمت غلط
بس انتى عارفه انى كنت شارب وبهرتل
ريهام سمعته ورفعت حاجب واستهزئت بكلامه بحركة من راسها وخدت بعضها ومشيت وهو واقف
يوسف: ع فكرة يابت انتى ..انا عمرى م اتأسفت لحد
لان ببساطة محدش بيهمنى
بس امبارح بس
حسيت ان ممكن حجات كتير تحصل الواحد مش عامل حسابها عشانها
عشان الدنيا مش مضمونة لحد
وانا اكتر واحد مش ضامن هيعيش الساعة الى جاية ولالا!
ريهام وقفت وسمعت كل كلامه وهى مدياه ضهرها ، واخر كلمة نزلت دمعه من عيونها من غير قصد و....
========================
استنونا بعد بكرة
ع فكرة فيه ناس توقعاتها جامدة جدآ ورائها بحبها اوى .. والى بيضحك عالمواقف فالحلقه بيفرحنى لانى بدخل فرحه ع قلبه
#بقلمى_نوراسماعيل
#قصاقيص_ورق
لاااااااااااااااااا هموت ناقص عمر ومشلول وربنا منك ما تكملي بتقفي فحتت صعبه لسه هستني لبعد بكره بس بجد تحفه وبتعرفي تقفي فين لجذب القرآء
ردحذف