¸.•'´¯`*•.¸¸.¸.• قـصـاقـيـص ورقــ .¸.•'´¯`*•.¸¸.¸.•'´ حلقة 1.......

=============================

قصاقيص ورق!

يعنى ايه قصاقيص ورق؟

اختيارى لقصاقيص ورق معناه جوه الرواية ، لما اكون بتكلم عن فئة معينة من المجتمع واكيد من الشباب

بالذات الطلاب الجامعيين المغتربين ..

كل واحد فيهم عبارة عن قصقوصة ورق ... ضعيفه وتطير من اقل ريح هوا تطيرها ..

لكن جواها حكايات كتييييييييييييييير رغم انها قصقوصة بسيطه

ريهام

رُقية

جهاد

فاطمة

خلود

كتير؟

اسماء كتير صح ؟

هتحفظوهم ازاى بقى ؟

طب ولو قلت كمان

محمود

يوسف

عبدالرحمن

هشام وغيرهم هيظهر فالاحداث

هتقولو ايييييييييه ؟؟

معلش هما مش هيلخبطكو كتير ، لان كل حد فيهم ليه شخصيته المميزة عن التانى الى تخليه يتميز ويتحفر فبالكم فكل حلقه تقروها

الحياة الى هتكلم عنها فالرواية دى انا عشتها ومعظم الشباب عاشتها ..

حبيت اسلط الضوء ع مرحلة معينة من مراحل حياتى وهى السبب فانى ابقى كده

وبناء معظم شخصيتى الحاليه ..

عفوآ

القصة دى مش لاشخاص حقيقية ، ولكن اشخاص استدعاهم الخيال ونسجها ع هيئة رواية ممكن تكون حاصلة جوه كل سكن للطلبه المغتربين فاى محافظة فمصر ..

الغرض منها اتمام رسالة معينة ..

ونبدء نسمى بالله ...

(1)

فيوم من الايام الدراسية ... فاول السنة عادى يعنى ..

كان ف سكن مغتربات لست عجوزة ..

جوزها متوفى

واولادها متجوزين وعايشة لوحدها ..

قررت انها تسكن بيتها للمغتربات .. هى قاعده فشقه

و3 شقق للطالبات

وف سيكيورتى تحت للحراسه

وفنفس الوقت تتونس بيهم بدل وحدتها .. لانها خايفه تموت محدش يحس بيها ..

الست دى اسمها ام عادل ..

فسكن ام عادل هنخص شقه واحدة من الشقق ال 3 والى هتدور على الطالبات المغتربات الى فيها القصة ..

قصقوصة 1◘◘◘ رُقية او روكا

ف3 كلية الطب جامعة القاهرة (طب القصر العينى ) بنوتة هادية اوووووى

قليل تسمع صوتها

غامضة جدآ ومش بتحكى بسهوله

اهم حاجة دراستها واهلها وبس ... ومعندهاش حاجة تانية تخاف عليها

ع قدر من التدين ... بتلبس حجاب طويل (طرحة طويله ) ولبس واسع وعالموضه

رُقيه من الاسماعيليه وساكنة فالشقه دى من اولى طب .. مع ريهام!

قصقوصة 2◘◘◘ ريهام ..

ف3 اعلام

بنوتة جدعة وجميلة ... كل حاجة عندها ليها مبرر وبتتمتع بلباقه عاليه

ثورية نوعآ ما

انتيمة رُقية من ساعة سكنهم سوا .. لبسها محجبات وكل حاجة

بس النص كم

حاجة سبب فخلافها مع رقية وهنشوف بعدين

ريهام من المحله

شاطرة جدآ ف كليتها ، خدومة وتقف جمب اى حد بس فيها شوية حجات كده هنعرفها بعدين

قصقوصة 3 جهاد ...

جهاد من اسيوط

ف 2 اداب قسم الفلسفه .. هى وانتيمة عمرها فاطمه من نفس البلد وفنفس المدارس من الابتدائى

واراد ربنا يكونو نفس الكليه والقسم

جهاد بنوتة دمها خفيف .. ده غير لهجتها الصعيدية والطابع الصعيدى الى مش عايزة تتخلى عنه

لبسها محترم جدآ

جهاد حد مش بيعجبه العجب وكثيرة النقار مع الى حواليها .. بس عسولة ومحبوبة

هتتعبنى انا عارفه فطريقه كلامها الصعيدى عشان خيالكم يوسع معايا وتشوفو بتتكلم ازاى

قصقوصة 4.. فاطمة

فاطمة احلى من جهاد ... وبيضا عنها

بس بروطة

تعشق النوم جدآ

مبتحبش الخروج .. بيتوتية اوى وست بيت محترمة

كسولة حتى فدراستها كانت الى بتغششها جهاد!

هى و جهاد انتيييييييييم اوى وبيحبو بعض جدآ وبينهم ارتباط غير عادى .

ال 4 دول مع بعض من سنين الى بقالهم سنتين سوا والى 3.. وكل مرة ييجى حد فاودة ريهام وتمشى ويتبدلو لكن هما .. مع بعض

رقية واخدة اوضة لوحدها عشان مذاكرتها وهى بتحب الاستمخاخ .. دكتورة بقى

======================

نروح بقى للقصاقيص الشباب ...

دول واخدين شقه بتاعت راجل هو نفسه صاحب العمارة وبيخلى الشقه دى للطلبه كل سنة .

كل سنة الشقه بتبدل طلابها .. والسنة دى بقى كان فيها ..

قصقوصة 5... محمود

محمود ف 4 كلية هندسة ... من بنى سويف

عاقل اووووى .. هادى زيادة عن اللزوم

بس ساعات بيتجنن زى اى ولد فسنه لما تكون طالبه

بيعشق لعب الكورة

محمود ف فحياته حكايات كتييير .. بتخليه يخاف من التعامل مع اى حد

وبالذات البنات!

قصقوصة 6... يوسف

يوسف القنااااااااااااااوى .. من نجع حمادى بالتحديد

ف 4 تربية رياضيه

بيعشق السجاير ... ادماااااان

دمه خفيف واى حد بياخد عليه بسرعة وحبوب جدآآآ ... بس لما بيحب يغلس بيغلس

بيعشق المشاكل زى عنيه

اهم حاجة فحياته ينزل كل يوم الجامعة بانتظام .. مش عشان المحاضرات !

تؤتؤتؤتؤ

فهمتونى غلط

عشان البناااااااااااااات

قصقوصة 7... عبدالرحمن

من المنيا

ف اداب E

هو كويس وتمام وكل حاجة .. بس شخصيته ضعيفه نوعآ ما

يروح مع الرايحين وييجى مع الجايين ..

مش بتاع مشاكل وطيب جدآآ ..

قصقوصة 8... هشام

ف كلية الاعلام برضو ..

ف مميزات انه مختصر ومش بيختلط كتير بحد واودته مقفولة عليه

... بس ياخسارة ف شوية خصال وحشة كده هتعرفوها فالاحداث

هو الوحيد الى بيجدد فالشقه .. والباقيين بييجو عليه جديد يسكنو ..

ملحوظة ..

الشقتين قصاد بعض

===================================

الاسبوع الاول من الدراسة ..

ريهام نايمة فاودة رقيه ... وسايبه فونها عالشاحن برة عشان لما ترن تسمعه!

اصل رقيه شاغله كل فيشه كهربا فاودتها (لاب وفون وخلافه )

رقيه خارجه من المطبخ كانت بتعمل شاى .. المذاكرة ياعينى من اول السنه كده عالحامى

سمعت فون ريهام بيرن ... خدته ودخلت الاوضه ..

رقية: ريهام..... ياريهام اصحى

ريهام:(حاطه ع وشها مخده) ايييييييه !

رقيه: خدى الرنة ال 7 تقريبآ شوفى مين ؟

ريهام: يوووه (بتقوم وعين مقفولة وعين مفتوحة ) الو ..

مين..

ايوا ... لا بس جاييلى نمبر غريب

ازيك

تمام

مممممممممم

اوك اوك

قفلت ونامت تانى..

رقية: يابنتى بقينا المغرب قومى .. نوم المغارب مكروه

ريهام: يووووووه يا روكا ، قمت اتزفت اهو هعمل ايه يعنى

رقية: قومى بيضى محاضرة اعملى اى حاجة

ريهام: طيب ربنا يسهل ..

سمعو جوه جهاد صوتها عالى وبتشتم ...

رقيه: ههههه ايه ده جهاد صحيت

ريهام: ياترى بتشتمى فمين ياجهاد؟ (مبتسمة ورايحين لاودة جهاد)

جهاد كانت بتفتح الشباك لاقت واحد من الشباب واقف فالبلكونة بتى شرت كت!

اتكسفت وقعدت تشتم ..(ع فكرة ده مش عيب املائى لكن توضيح لطريقه نطق جهاد الصعيدى للناس الى منزلوش الصعيد)

جهاد: ايا دى .. جاك وجع مصارينك واجف كأنه بيصور فيلم العشق الممنوع (راحت ناحية سرير فاطمه)

جومى يافاطمة

جومى يافاطمة اخلصى هتنامى لميتى

فاطمة: سيبنى كمانى امانة ياشيخة ؟

جهاد: جومى ياشيخة ... بلا جرف مش كفايه الجرف الى لسه شايفاه

ريهام ورقية جايين من جوه ..

رقية: ف ايه ياجوجو مالك

جهاد: ياشيخة بلا جوجو بلا فوشو .. حاجة تجرف ومرار طافح بالشقه الى فيها عيال معفنه السنة دى كل م نفيتح الشباك نكفلوه عشان طلعتهم البهية

ريهام: ههههههههههه خلاص هدى اخلاقك شوية ويدخل وافتحية

خبطت صاحبة السكن وفتحت ريهام ودخلت عليهم..

الست: ازيكم يابنات

البنات: اهلا يا طنط عاملة ايه

الست: كويسين شادين حيلكو السنة دى كده .؟

البنات : اه الحمدلله

ادعيلنا

الست: ربنا معاكم .. ف بنت هتسكن فاوتك ياريهام فالسرير الى جنبك

ريهام: مين دى ؟

دخلت البنت .... قصقوصة 9... خلود

خلود من اسوان

فكلية اداب علم نفس ...

خلود خلقة ربنا شريفه .. عندها برص !

وغير كده ف وحمة كبيرة سودا ماليه خدها الشمال ..

دى حاجة مخليه كل الناس بعيدة عنها .. الى بيقرف والى بيخاف منها

ومالهاش ولا صاحبة واحدة!

حتى فبيتها منبوذة ومصدقو مجموعها جاب جامعه القاهرة وودوها ..

دخلت خلود عليهم ... بعيونها الواسعه المخيفه وبصه وساكته ..

جهاد:(بتهمس فودن فاطمه) ايا الفقر الى دخل علينا فاول السنة ديتى

فاطمة بصت والبنات ... استغربو شكلها ..

ريهام: هتقعد معايا فالاودة ياحجة ؟ (بصة باستغراب لخلود)

الست: ايوة .. اتعرفو ع بعض وعايزاكم تبقو حبايب ...

مشيت الست ودخلت خلود شنطتها للاودة جوه ـ البنات متابعين مشيتها البطيئة الهادية

وعيونها الى لفت الشقه كلها ..

ريهام:(بصوت واطى) لا انا مش هعرف اقعد معاه دى ؟

رقية: وفيها ايه يا ريهام وبعدين يعنى مش انسانة زيينا

جهاد: لا مش انسانة ! ده شئ غريب هياكلنا جريب

فاطمة: ههههههههههه

رقية: حرام ياجماعة المفروض متسخروش من حد .. انا هقوم ارحب بيها

جهاد: البسى ياريهام ... كائن غريب معاكى فالاوضه هههههه

ريهام: غورى يابت .. لا والله همشى من هناك واجى عندكم

وهما بيتكلمو الكهربا قطعت ..

جهاد: هلت البشاير ... جدمك اخضر يالى جيتى

فاطمة: انا خايفه(ماسكة فجهاد)

ريهام: متخافوش هنور بموبايلى .. (رايحة تنور بموبايلها ) سمعو مشية غريبة واتفتح باب اودتهم بهدووووووء

ال 3 مع بعض : ميييييييين !!!!

الدنيا ضلمة ومحدش شايف حاجة .. نورت ريهام بفونها واتجهت ناحية الباب ..

ريهام:(بخوف) مين

خلود:(بصوت هادى) انا

جهاد: مين .. اتسكنت الشقه ! اتسكنت الشقه

رقيه جابت شمعه من اودتها وجت ...

رقية: ادخلى يا خلود ..

جهاد:(بتبرطم) مش كفايه الضلمة كمان خلود

ريهام: ههههههههههههههه

خلود: اصلى بخاف من الضلمة والقعاد وحدى

فاطمة: تعالى اجعدى

قعدت خلود ورقيه حطت الشمعه ع المكتب ...وريهام رايحة تفتح الشباك ..

جهاد: تفتحيشى الشباك .. ف عزت ابو عوف واقف بضلوعه

ريهام: هو حد شايف حد الشارع كله ضلمه ، وبعدين الدنيا حر

رقيه: ياريهام انتى لابسه كت مينفعش تقعدى ناحية الشباك كده

ريهام: لما ييجى النور هقوم بسرعة .. بس هموت من الحر والله

جه النور !!

جهاد: اللهم صلى ع كامل النور .. يلا يا ابلوات ع اودكم

ريهام: لا خلينا .. قاعدين هنعمل ايه يعنى

خلود: انتى اسمك ايه (لجهاد)

جهاد: اشمعنا انى الى سالتينى

خلود: بتتكلمى صعيدى افتكرك من عندينا

جهاد: لا من دوكاهيتى

فاطمة: احنا من اسيوط .. وانتى ؟

خلودد: من اسوان

فاطمة احسن ناس .. انا هنام شوية يا جهاد

جهاد: لااااااااااا جومى بلا تنامى حياتك نوم ده انا نسيت ملامحك

ريهام دخلت اودتها جابت لاب رقية وجت ..

ريهام: تعالو نرقص ياعيال

جهاد: ركص ايه يابت رقصو ع قبرك م تتهدى يابعيدة

ريهام: مخنوقه هموووووووت من الملل (فونها رن)

جهاد: روحى شوفى السنترال فتح

ريهام : ده زميلى يامتخلفه ههههههههه (اخدت الفون وطلعت برة)

جهاد: ايوة زاميلك ! مصر كلها زملاتك

اقول ايه شالله توقع شبكتكم يا جزمة منك ليه

(بتبص لخلود) منورنا

خلود: بنورك

خلود قاعده تتفرج عليهم مكلبشة فالكرسى ومش بتتحرك ومش بتنطق كتير ..

========================

يوسف واقف فالبلكونة لقى ف حد جه تحت ومنزل شنط ، خمن ان ده الحد الرابع معاهم فالشقه ..

دخل بسرعة وطفى السيجارة ..

يوسف: تعالى الرابع وصل تعالى نساعده معاه شنط كتير

عبدالرحمن: وعرفته منين انه الساكن الرابع

يوسف: عم خلف الصبح قالى انه جاى انهاردة ، وبعدين ده واحد معاه شنط كتير وطالع هنا وبص فوق عالبلكونة

اكيد مش من الاهالى يعنى

عبدالرحمن: صح

نزلو عالسلم واتقابلو مع محمود وهو شايل الشنط وف تانى فالمدخل ـ

يوسف اتناول منه واحده ونزل عبدالرحمن ياخد الباقى

يوسف: حمدلله عالسلامة

محمود: الله يسلمك

يوسف: اتفضل .. دخلو الشقه وحطو الشنط ونزلو يساعدو عبدالرحمن ..

كل ده وهشام معدى بيعمل لنفسه عصير وبيبص عليهم بصة غريبه كده

..

جابو الشنط ودخلو وقفلو الباب ...

يوسف: حمدلله عالسلامة ، جاى متأخر كده ليه ؟

محمود:متأخر فالوقت ولا الاسبوع الدراسى

يوسف: (بيمسح عرقه وبينهد) الاتنين

محمود: لا انا جيت واخدت العملى من بدرى وروحت وجيت تانى

يوسف: انت ف ايه ؟

محمود: هندسة مدنى ، وانت ؟

يوسف: تربية رياضيه .. وده عبده ف اداب انجليزى ومعانا برضو فالشقه

محمود: نسيت اسالك ع اسمك ؟

يوسف: يوسف من قنا

محمود: اجدع ناس .. محمود من بنى سويف

عبدالرحمن :(بيمد ايده) عبدالرحمن من المنيا

محمود: اهلا وسهلا .. اودتى انهى فدول بقى ؟

يوسف: انت هتنام فاودتى وعبده مع الاخ(بيشاور ع هشام الى باصصلهم بقرف وبيقلب فالكوباية)

هشام:(بيقلب بالمعلقه) اخ مين ؟

يوسف: بتقلب ايه جبتلى صداع (بيبص ع ايده ماسك كيس فروتى ) ايه ده فروتى بنص جنية !

ياعم انت موضه سنة كام

هشام: ايه ياكبير السنة فاولها متدخلش حامى كده

يوسف:(اتنرفز) ماهو عشان كده بقولك يعنى ياريت تخف معايا عشان انا الغتاتة فيا طبع

شغال تقليب تقليب قلبتلى دماغى

محمود: خلاص يا جماعة صلو عالنبى .. احنا كلنا هنا حالنا من بعضه مش طلبه خناق

هشام: طيب يا صعيدى انت كمان ماهو انتو صعايدة كلكم فبعض وهتحامو لبعض

يوسف:(زق هشام فدقنه) اقسم بالله م هعدى سنتك .. مالهم الصعايدة ياض؟

محمود: يوووه خلاص ياجماعة مش معقول كده

من اول يوم خناق ياساتر

عبدالرحمن: ايوة صح انت بتغلط ليه

هشام: م خلاص ياشديد خلاص ياحامى ياخط .. حلو كده

خفت انا (باستفزاز)

يوسف: ده بينلها سنة طين(قالها بالصعيدى وبيشد تى شرته)

هشام: متتعصبش اعصابك ... انا هدخل ياعمااهو ـ بالراحة ع نفسك

يوسف بصله وعمل ع سنانه وعض شفته التحتانية حركة احمد السقا دى ( ع فكرة دى حركته لما بيتعصب خليكو فاكرين )

دخلو يوسف ومحمود وعبدالرحمن سوا ...

محمود: ابقى هدى نفسك ياما هتقابل هتعمل كل مرة كده (بيفتح شنطة وبيحط فالدولاب)

يوسف: ياعم ماشى هى دى اول مرة نسكن ؟ بس مش ناقصة قرف هى

محمود: ابقى وسع صدرك بعد كده (بيبص ناحية الشباك لقى ريهام بترقص)

ايه ده ؟

هو ده سكن بنات ؟ولا سكن اهالى عادى ؟

يوسف:(بيوعاه ويبص هو) هيهيهيهيهي شكلها سنه لووووز

عبدالرحمن: عم خلف حذر ياجماعة ان ده سكن بنات ومالناش دعوة بيه

يوسف: ايوة حاضر مش هيبقى لينا انشالله (بيبص بردو)

يا عثل حبيب عمو

محمود:(قفل الشباك) شكلك مصيبة ـ ممكن تساعدنى وتعدى سكنتك ع خير

يوسف: ليه كده يا حودة بس .. حاضر ياعم

عند البنات بقى ...

بعد م تعبت ريهام من الرقص ... قعدت وخدت نفسها ..

وبعدها نادت رقيه عليها ترجع الاب عشان عايزاه جوه عندها ...

وريهام بتدخله ... نسيت اقولكم ان رقيه بتعشق تربية الحيوانات

كانت مربية سحلفتين كبار فالسن !

جايبلهم طشط يباتو ف و ياكلو ف .. اغلب خناق جهاد معاه عالسلاحف دى عشان بتخاف منهم

لكن رقية مأجرة اوضه كاملة وبتدفع اجرة طالبتين فهى حرة فاوضتها تجيب الى تجيبه بقى

وناو السلاحف طالعين بيتمشو فالشقه وجهاد طالعة ورا ريهام ...

جهاد:(واقفة بتحكى مع ريهام فالصالة والسحلفة نامت ع شبشبها وهى واقفه)

اااااااااااااااااااااعااااااااااااااااااااااااا (هزت رجلها ) غوووورى ياابله رقية ياابله زفته

يادكتورة

رقيه: ايه ف ايه

جهاد: لمى جرفك ديتى وزفايتك دول الى طلجاهم علينا ، سنتين اشتكى منك والشكوى لله

منك له

منك له (بهزار)

رقيه: حرام عليكى كده تقلبى رارا (بتميل تجيبها وطبطبت عليها وخدتها جوه)

جهاد: رارا!

رارا وزمارة جاطعة تجطع الى عايزة خلف

ريهام: تعالو الاعيبكم كوتشينة وافتحلكم البخت

جهاد: لا بلاش .. عتعرفيش تقرى صح وبهيمة وتضيعيلنا وكت وخلاص

ريهام: لالالالا والله خالتى علمتنى حجات جديدة

ريهام جابت الكوتشينة واتحايلت ع رقية تقعد بس الحبة دول تلعب دورها وتمشى تكمل مذاكرتها تانى .. وفعلا جت

ريهام:( بتفتح الكوتشينة لرقية) مممممممممم ف حد

ولد

قريب وبعيد

بينكم 3

معرفش 3 ايه بقى اشخاص شهور سنين

رقية:بس ياهبلة انتى متعرفيش حاجة (بتغلوش) انا هقوم

ريهام: تعالى يا جوجو اشوفلك

جهاد: شوفى ياختى لهبابة يارب يطلعلى كيس كارتيه فيها اللعبه

ريهام: اختارى منهم

(اختارت وبدأت تفتحها) بنت ..

وانتى

مع بعض

هيبعد بينك وبينها شايب !

جهاد: بت وشايب!

اكونش مخلفة وانا معرفش

غورى يارهام بلعبتك الفقرية دى غورى

خلود:(دخلت الاودة) ممكن تشوفيلى انا

ريهام:(بصت لجهاد انها خايفه تلمس كوتشينتها لتتعدى وبعدين قالت)

طيب شاوريلى ع 7 ورقات وانا هلمهم

خلود: (شاورت بس اتدايقت لانها عرفت انها قرفانه منها)

ريهام: فتحت الكوتشينة ..

ايه ده!!

جهاد وفاطمة: ف ايه ؟؟

جهاد: ف ايه يافقر

ريهام متسمرة وباصه للورق وسكووووووووووووووت رهيييييب !!

==============================

نتقابل بعد بكرة فنفس المعاد

ارائكم بتحمسنى وبتخلينى ع تواصل بيكم مش تحرمونى منها :*

#قصاقيص ورق <3

لــ #نور_اسماعيل ^_^