❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
امنية بتقعد مرة واحدة من الخضة !
امنية: يا نهار اسود ومنيل ومطين انتى بتقولى ايه يا منة
منة: والله زى مابقولك كده وقاعد ومنشكح اوى ياختى وجمبه العروسة فلقه قمر
امنية: هو مش كان عامل نفسه مش لاقى ياكل وبالعافيه بيصرف ع بيته ..الفلوس جات مسافة شهرين يعنى
منة: انا معرفش بقى ..بس لما شوفته اتحنطت مكانى لدرجه سامح ضحك عليا برغم انه اتفاجئ
امنية: سامح اصلا مش بيهضم غادة ، تلاقيه فرحان فيها
منة: لا والله بالعكس زعل ان الحال وصل لكده بينهم
امنية: تفتكرى غادة عرفت ؟
منة: معرفش..بس كل يوم بكلمها بتتخانق كتير مع اهلها ، مصاريفها ومصاريف ابنها كترت عليهم
وهى طنااااش طناااااش
امنية: يارب تعرف بقى عشان تعرف اخرة الى هى ف ده
منة:انا مش عارفة لو غادة عرفت هتعمل ايه ..اسيبك بقى هروح اكل كريم عشان بيعيط
امنية: لا ماشى باى
قفلت امنية وسرحانة خالص ..كانت مى جاية من جوة فالاتيليه وماسكه فايديها مج نسكافيه
مى: مونى ...انا مخنوقة اوى انهاردة ينفع اسيبك واستندل معاكى واروح لسهر حابه اعدى عليها واشوفها
امنية مش بترد
مى: مونىىى انتى يا حجة!!
امنية: كلهم اندال وزبالة
مى: مين دول
امنية: ممدوح اتجوز يا مى !
مى: ممدوح !! ممدوح بتاعنا
ممدوح غادة
امنية: ايوة هو ممدوح زفت
مى: ياااااااادى النيلة ام جلاجل يادى المصيبة ام حناااااجل
امنية: غادة ممكن تموت فيها
مى: ههههههه وحياتك ولا هتتأثر ..ممدوح اتجوز
ووسام بيشتكى منى فالمصاريف المصيبة ليكون بيفكر زيه
امنية: يا شيخه هو اى حد لازم يعمل زى التانى ..وبعدين وسام بيشتكى من بيت هيفتح بيتين
مى: يعملها ..اذا كان ممدوح الى شبه ربطة الفجل عملها وكان بيشتكى الفقر طول الوقت وكان مجمع حق القاعة بتاعة فرحهم تبرعات!
مش هيعملها وسام ابو العيون الجريئة الى مدوب البنات ..خصوصآ بعد م طلعتلى ست كامنجا فالمقدر جديد
امنية: عشان كده انا ريحت نفسى ..ابنى عندى بالدنيا ولا جواز ولا زفت
مى: اعااااااااااا مصيبة لا تعملها يا ويسو
والله م يكفينى ادخل فيك السجن وانطس اعدام ساعتها
امنية: برضو مش عارفة اقرر ممكن يكون رد فعل غادة ايه ؟؟
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
" ولا اى حاجه ... اصلا ممدوح مش فدماغى نهائى"
اخو غادة: لا ياستى حطيه بقى فدماغك ..
غادة: ده الى هو بتطردنى من بيت ابويا ولا قصدك ايه
اخوها: بصراحه بقى انتى بقيتى حمل عليا انا وامك..وحمل تقيل كمان
وجوزك كان عنده حق فكل الى عمله معاكى
انا هدوس ع كرامتى واروح لغايه عنده واحاول اصالحكم واخليه يردك قبل العدة م تخلص
غادة: يا سلاام بالبساطة دى عايزينى ارجع وابوس القدم وافدى الندم للاستاذ ممدوح
اومال لو كان راجل عدل زى الرجالة الحلوة كان عمل فيا ايه
اخوها: وانتى كمان مش احسن ست فالدنيا برضو ..استهدى بالله عشان ابنك واخزى الشيطان وهترجعى لجوزك عشان ابنك
غادة: وان قولت لا ..ولازم هو ييجى يعتذرلى ويبوس دماغى واقوله ع شروطى كمان
اخوها: يبقى هاخدك انا من ايدك ورجلك متكتفه واوديكى غصب عنك .. (سابها وخرج وهو بيتكلم) ايه محدش مالى عينك
طالعالى فيها ع ايه
احمدى ربنا ان ادالك زوج غلبان زى ممدوح ..ده انتى لا تطاقى يا شيخه
غادة : (ماسكه طبق بتاكل منه) كده يااخويا يابن امى وابويا !! طب اما نشوف كلام مين الى هيمشى
ابنها عيط وبصتله وهى بتكلم نفسها
غادة: اتسد!! هطفح عشان اطفحك جاتك نيلة شبه ابوك
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
"صباح الخير ...النسكافيه "
شريف اخد النسكافيه من ايد بشرى وهو بيبصلها باستياء وبياخد اول شفطة
وراح بخها قدامه بسرعة
شريف: صباح الزفت عليكى يا شيخه !! ايه القرف ده
انتى ايه بهيمة مبتفهميش
بشرى: اتلم ياجدع انت لحسن المرة الجاية متكونش فتحه فدماغك، هخليها عاهه مستديمة ورحمة الميتين
شريف: طب ورحمة ميتينك ع ميتينى يا شيخه لو كترتى ف ام الكلام وانتى شبه واحدة كانت بتبيع بلالين للعيال تحت بيتنا وفنفس الوقت بتخوفهم
ماعلينا
لاكون ممسمر بيكى المكتب وقافل بوقك الى بينزل هباب ع رساك ده بحتة لوح خشب
بشرى: اخر تحذير منى وبعدين انت عارف (عامله بايدها بوكس فوشه)
شريف: هتضربى ولا ايه
جه وسام من بعيد وصلاح واكرم وكام زميل
وسام: مش معقول يا شريف ..ع طول خناق يااخى م تسيبها فحالها
شريف: ياعم وسام عملالى نسكافيه عامل زى شوربة البتنجان
بشرى: والله يااستاذ وشام عملاه كويس وهو الى بيتلكك وقعد يشتم زى كل مرة
صلاح: مش عجباك فايه بشرى ..ع طول مشاكل معاها من ساعة م اتعينت
شريف: ياعم بذمتك دى خلقة تشوفها نص يومك يعنى ! انا نسيت اننا بنتعامل مع بشر
دى تتحط فتقفيصة حيوانات
وسام: شريف انا بعد كده لا هعمل حساب زمالة ولا بتاع ...ارجوك تلتزم حدود شغلك عشان مخدش اجراء معاك بحكم شغلى هنا
اكرم: بصراحه بقى وسام عنده حق انت مزودها اوى يا شريف مع البت
اشمعنا انت الى مش طايقها يااخى
شريف: كده وش امها مش عاجبنى
بشرى: بكرة نعملك عمليه تجميل ونعجبوك ياشى شريف
شريف: شى شريف!! لدغة وشكل حيوان السلبندر وايام مايعلم بيها الا ربنا
وسام: طب خلاص ياجماعة كل واحد يروح ع شغله ..بشرى لما الاستاذ شريف يطلب حاجة من البوفيه
خلى اى حد يعملها ويجيبها بلاش انتى
بشرى : يكون احسن (خمست فوش شريف) ياباى!
شريف: شوف القرد المنحوس دى بتعمل ازاى فوشى
وسام: هههههههه طب خلاص بقى يلا ع شغلك مش عايزين كلام من حد
شريف: طب والله اتصل بجماعة تربية الحيوانات المنقرضة اخليهم ييجو ياخدوها متكتفه ايد و رجل و ع افريقيا ينشفوها فالصحرا لغاية م تعرف ان الله حق
وسام: والله لسانك ده هيجيبلك الكافيه ..راعى اكل عيشك بقى
شريف: اراعى اكل عيشى ! ايه يا وسام مصطلحات مبيضين المحارة دى
حاضر ياعم هنراعى
يارب نخلص
وسام: ههههه ربنا يهديك (فونه رن وبيطلعه من جيبه) ايه ده كاميليا
الو
كاميليا: بعد الشغل عايزة اقابلك ضرووورى ف اخبار حلوة
وسام: ممممم طيب اوك
كاميليا: اوك هستناك ، باى
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
سهر ومى قاعدين سوا وبيدردشو
وطبعآ الحكايات كلها بتدور عن وسام وحوارات وسام الجديدة مع مى
سهر: بصى هو اه مزودها شوية لان كل المتجوزين بيصرفو يعنى وكده
مش هو بس
لكن انتى برضو خفى عنه شوية
مى: اخف ايه .. انا تقريبآ معظم طلباتى بجيبها من شغلى
يعنى هو مش وراه غير بتول
سهر: طيب هو مش اترقى ، المفروض تتحسن مش تسوء
مى: تقولى ايه بقى ، والى طالع عليه جديد
بقى يجيب نوت بوك صغيرة ويكتب هيجيب ايه ويفضل ايه وحاجة من الاخر اووووووووووف
سهر: بصى لازم تستحملى ، كل ست بتستحمل جوزها فظروفه
وبعدين بيتى طالبه تشتركو فنادى وتتعلم السباحه
دى حاجه لوحدها تشيل الهم
انت عارفة اشتراك النادى بقى بكام دلوقتى
مى: عارفة بس دى بنته الوحيدة يعنى ..اذا مش كان يدلع بنوتته هيدلع مين
سهر: طيب م حضرتك ناوية عالتانى .. تفتكرى بقى ده ينفع فالظروف دى ولا نستنى شوية
مى: انا استنيت 5 سنين افتكر انه فرق سن كفايه
سهر: مم عنيدة طول عمرك يامى
مى: يوووه برضو هتجيبى الحق عليا
سهر: لا ياستى بس عايزاكى تفكرى بعقل شوية ..وربنا يهدى سرك
مى: حاضر وبعدين انا بطلت حتى خروجاتى الى اتعودت عليها زمان والشوبينج فالضرورات
اعمل ايه تانى
سهر: معروف ان حياة البت غير حياتها وهى متجوزة
مى: ماشى ياسهر .. (بتنادى ع بتول) بيتى يلا ماشيين
بتول: حاضر يا مامى
مشيت مى ورجعت البيت
شوية ووسام وصل وراها مبسوط وعلامات الفرحة باينة ع وشه ..
وسام: السلام عليكم ورحمة الله وبركاته
بتول: بابى (بتجرى عليه وبتبوسه) ايه ده يابابى
وسام: مش دى باربى والتسريحه بتاعتها الى كنتى عايزاهم
بتول: ايوة الله (بتبوسه) انت حلو ايه يا بابى انا بحبك خالث
وسام: وعندى مين اغلى منك يا بتولتى ، يلا خديها واتفرجى ع حاجاتها بقى معاها سيشوار وحجات ميكاب
يلا بوظتك اهو
مى: واقفه عند باب الاوضة) ومافيش حاجة لمامة بتول يعنى ..ولا خلاص راحت علينا (بدلع)
وسام: ياسلام! وانا لولا مامت بتول انها نورت حياتى وقلبى وعمرى كله
كنت هبقى اسعد واحد زى دلوقتى
(بيبوسها فخدها)
مى: ايوة كل بعقلى حلاوة ياخويا
وسام: لا والله مش بحبها اصل بتتخن (بيتكلم وهو مبتسم)
مى: اومال الغزالة رايقه يعنى حاسة ان وراك حاجة
وسام: حبيبة قلبى وبتفهمينى طول عمرك ...طب تعالى الاوضة نتكلم ونسيب بيتى تلعب
واقولك
دخلو الاوضة بتاعتهم ..
وسام: (ماسك ايديها الاتنين بحنية) صل عالنبى
مى: عليه الصلاة والسلام ..ها
وسام: ياستى انا حاسس انى مقصر ناحيتكم ..وعايز اعوضكم
مى: لا يا ويسو انت مش مقصر ومعلش انا الغلطانة اصلا بقعد اطلب حجات وو
وسام: (حط ايده ع بوقها ) ده حقك يا روحى
اذا مكنتيش تطلبى منى انتى وبتول
هتطلبو من مين
وانا معنديش اغلى منكم دلوقت
فكرت كتير ..قولت لازم م احرمكمش من حاجة
مى: مش فاهمة
وسام: بصى ياستى .. انا قابلت كامليا فحفلة بتول
واتكلمنا
مى: نعم!!! (قامت من مكانها منفوضه)
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
فالوقت ده ...
كانت نهال رجعت تدى الكلاس بتاعها مسائى ومع نادر
كان شريف بيكلمها كتير عالفون وهى بتكنسله ..او مش بترد
وبتقفل الفون خالص احيانا
بعد م خد سهرته مع اصحابة ، قرر قبل م يروح يعدى عليها فمكان شغلها
وكان معاد خروجها
التاكس بينزله وهو واقف قدامها كانت هى عالباب مع نادر وشلتها وبتضحك وبتهزر وبصت فالفون وكنسلت
لان هو الى كان بيرن
قرب وكله غيظ
شريف: (مسكها من ايدها) مبترديش ع امى ليه !
نهال: ايه ده ايه الاسلوب الهمجى ده ..مالك بتتكلم كده ليه
شلتها احرجو من الموقف واستأذنو ومشيو حتى نادر بصله من فوق لتحت ومشى
شريف: ايه واقفه شغاله تضحكى وانا سايبانى ارن ..وعايز اعرف انتى بتكلمى الواد ده ليه
مش مالى عينك انا
نهال: اولا نادر حد كان عايز يرتبط بيا ومحصلش نصيب..محصلش حاجة يعنى
متهدتش الدنيا
احنا فالاخر زمايل واصحاب
شريف: لا ده عند ام كوكو يا عمتى ..اصحاب ده ايه ان شاء الله
ورجعتى تدى الكلاس بليل معاه
بقولك ايه الاسلوب بتاعك ده مش عاجبنى
واتصرفى باحترام
ومالكيش دعوة بالواد ده تانى
نهال: والله ! خلصت كلامك
لا مش هقطع علاقتى بيه لان مافيش مبرر لكده
وبعدين ي اخى مش عيب تنصح الناس تبطل حاجه وانت بتعملها
شريف: قصدك ايه ؟؟
نهال: يعنى امنية دى مش خطيبتك السابقه من كام سنة !! وكانت حبيبتك قبلها وسيبتو بعض
ومع ذلك انتو لسه اصحاب وبتروح معاها لابنها فالنادى
ولسه بتتقابلو وبتخرجو سوا
يبقى نكبر الموضوع ليه يا شيرو بس!
شريف: شيرو!! وانتى عارفة ده كله امتى ؟
نهال: مكنتش عايزنى اعرف ولا ايه
(مسكت دقنه ولعبت بصوابعها زى م تكون بتلاعب بيبى ) ع فكرة انا لو عايزة اعرف حاجة بعرفها
ولو عايزة اعدى واطنش بطنش
اصلى مبحبش اتعب نفسى
شريف: يعنى شوفتينى برقص معاها فخطوبتنا وعديتيها
نهال: عادى يا شيرو .. انتو اصحاب فالنهاية
مش انت بردو خطبتنى عشان بتحبنى ومش شايف غيرى وبتموت فيا وكل الحجات الحلوة دى
خلاص هتدايق ليه
يلا عشان عايزة اروح..ولا مش هتروحنى
مشيت نهال وسبقت شريف وشريف كأن اتصعق بكهربا مرة واحدة وواقف متخشب مكانه
اول مرة يحصل معاه كده من بنت
ياترى مخبية ايه يا نهال ؟؟!
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
دموع ...وسكوت
ووسام بيتأمل مى ومستنى اى رد
وسام: حبيبى انا محبتش اعمل اى حاجة من غير م تعرفيها
ومع انى مش بحب احلف لكن يعلم الله انى فكل مرة قابلتها كان عشان الموضوع ده
ومخبتش عنك اى مقابله ولا ايه الى دار بينا
مى: (دموعها نازله ومناخيرها حمرا) انت عايز تسافر وتسيبى انا وبيتى !
ده احنا منبقاش حاجة من غيرك
ولا حاجه
انا اه بعمل نفسى ب 100 راجل..بس انا منفعش ريشه من غيرك
وسام: والله صعب عليا زيك (بيمسح دموعها بايده) يعلم الله انى ع اد مانا نفسى محرمكمش من حاجة
ع اد مانا متدايق وحاسس انى مش هعرف اعيش يوم من غيركم لوحدى
اذا كنتى لما مرة اتجننتى وسبتى البيت انتى وبتول
انا معرفتش اقعد هنا واحنا فنفس البلد
اومال لما اروح بلد تانية خالص هعمل ايه
مى: وسام .. وسام انا مبعرفش انام غير وانت جمبى
مش بطمن غير لما تدخل البيت
مش بحس بالامان غير فوجودك
بدوش دماغك بأى حاجة تافهه بس عشان نتكلم واخد اكبر قدر من وقتك معايا ..
عشان اسمع صوتك
عشان تقولى يا مناخوليا ..وتختم كلامك ب والله المستعان
انا مش هعرف بين يوم وليلة تسافر وتغيب واقدر اكمل عادى
وسام: عشان بتول تشترك فالنادى زى ماهى عايزة ..وانتى تعملى شوبنج وتسافرى وتغيرى جو براحتك
وتجيبو كل الى نفسكو ف
وبيتنا يبقى احلى واحسن وف كل حاجة ومش ناقصه حاجة
وبأذن الله ربنا يكرمنا بعاصم وعائشة ونملى البيت عيال وتكبر عيلتنا
مى: مش عايزة كل ده (انهارت فالعياط) انا عايزاك انت
مش هخلى بتول تقولك ع حاجة فوق طاقتك تانى ..مش هقولك عايزة وعايزة وهرضى باللى معاك وفمقدرتك
وسام انت لو سافرت حته من روحى هتروح (عيطت كتير وحضنها ودمع هو كمان)
انت فاكر لما تيجى وتقولى ان ربنا سهل لك يجيلك عقد عمل فشركة ومرتبابتها عاليه هفرح!
انت كأنك بتقولى ف حد غالى تانى من حياتك هيمشى .. انا زمان قدرت اتحمل فراق ماما
دلوقت مش هتحمل
وسام: (دموعه ع وشه) يا حبيبى انا كلها سنة وارجع اخدكم ونعيش سوا كلنا فمكان احسن ومستوى احسن
مى: (بتهز راسها لا وهى بتعيط وماسكه ايده بتبوسها)
وسام: طب سيبيها عالله ..انا هصلى استخارة وهسيبك تفكرى ماشى
(سكت ثوان ورجع كمل كلامه) مشمش
انا مش هعمل اى حاجة انتى مش عايزاها...انتى روحى ومحدش يقدر يزعل روحه ابدآ
مى: (قامت حضنته مرة واحدة) احضنى اوى يا وسام..خللى بحضنك انسى كل الخوف
واحس انى عمرى م هنحرم منك ابدآ
وسام حضنها وهو كمان بيحاول يتماسك قدامها ، رغم انه جواه اضعاف حزنها ع الفراق والبعد الى ممكن يتحكم عليهم بيه
هو سابها عالله ..والى هيعمله ربنا هو الاحسن ليهم
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
مى قاعده فالشغل بعدها بكام يوم
ومش ناسيه الحوار ابدآ الى بينها وبين وسام ..هو قال هيصلى استخارة
والقرار فايدها
دموع ومناديل ... وسبت فراغ كبير تخلص وتعيدها تانى
وايدها ع خدها ومش هنا خااااااالص
امنية: وبعدين بقى يا ميوش .. هتفضلى كده كتير
فين ضحكتك وهزارك ونقارك بقى
مى: امنية انا بجد حاسة ان ماما ماتت تانى من يوم م قالى وسام انه هيمشى ويبعد عننا
امنية: ليه بس كده يا حووبى ،ف ستات كتير ازواجها مسافرين ومش بيعملو كده يا ميوش
ده هيسافر مش هيروح عمليه فدائية ..سنة وراجع ياخدكم
هتنقضى بالطول ولا بالعرض يابنتى
مى: سنة!! سنة وهو مع كاميليا
تبقى هى بتشوفه كل يوم
وانا مش قادرة اشوفه لحظة...بذمتك ده عدل
امنية: مش عشانكم يا قلبى بيعمل كل ده .. وبعدين هو اكيد هييجى اجازات يعنى متخافيش بقى
مى: مش هعرف اعيش كده يا امنية...صدقينى مش هعرف
محدش فالدنيا زيي انا ووسام
روحى متعلقه بروحه
انا قعدت عمرى كله محبش ولا اتهز من حد
اول يوم شوفته فيه هزنى وحبيته .. قررت ان الراجل ده عايزة اكمل معاه
طب انتى عارفه انى فكل مرة كنت بعمل ف مقلب زمان ..كنت بتلكك عشان اشوفه
ازاى بعد م حبينا بعض كل ده
واتخطبنا
واتجوزنا
وجبنا بتول ...كل ده وهو جمبى
مرة واحدة يسافر ويبعد ومعرفش اشوفه غير باوامر من شغله
ومعرفش اشبع منه
ويبقى مع ست غيرى
والست دى كان له علاقة قديمة بيها
تفتكرى كل ده سهل
امنية: بصى يا ميوشة .. مدام هو قالك هيسيب القرار ليكى
خلاص متوافقيش وهو هيحترم ده
بس بعد كده تحاولو تدبرو اموركم سوا بقى وميبقاش ف مشاكل ع المعيشة والبيت تمام
مى بصت لامنية ومردتش ... الكورة فملعبها دلوقتى
ولازم تشوطها صح
بس بليل بقى كان وسام قاعد فاوضة المكتب بيقرا كتاب كالعادة .. وطلب من مى اى حاجه يشربها
دخلت وحطت المشروب وخارجه
مسك ايدها بحب وهو مميل فالكتاب ورفع عنيه
وسام: عارفة انتى دخلتى فسطر جميل اوى كنت بقراه
مى: (مكشرة) بيقول ايه ؟
وسام: والنظرة منها بألف عام ...
مى بصاله وبصت بعيد ، قام من عالكرسى وشد وشها ناحيته
وسام: بصيلى بقى خلينى اعيش..هو الف سنة عليا شوية ♥
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
استنونا
ويسو وميوش وتوتا وخلصت الحدوتة
#نوراسماعيل
هييييييييييييح آخر جزء حلو بس انت عندك قفلات كده حرااااااام
ردحذفانا مش قادرة ابطل قراءة من حلاوة الكلام
ردحذفانا مش قادرة ابطل قراءة من حلاوة الكلام
ردحذف