❄❄❄❄❄❄❄❄❄❄❄❄❄
مى بتتقلب فالسرير ..وبتبص ناحية الساعة
فوجئت ان الساعة 10 ونص!
مى: اعااااااا (مخضوضة) وسام...ويسووووو
وسام: (بيفوق ) صباح الخير يا مشمشتى
مى: مشمش وبرقوق ايه ، شغلك راح عليك
وسام: (قام اتنفض من مكانه ولبس النضاره بسرعة) ايه!! يانهار ابيض
مى: وبتول اكيد مصحيش هروح اشوفها
نزلت من عالسرير بسرعة ..وراحت لاوضة بتول
فتحت الباب..لاقيتها نايمة فعلا..بس كانت بتتكلم وهى نامية كلام مش مفهوم
زى
"مامى...انا ألعب الاول
دماغى وجعانى يابابى"
قربت مى ناحيتها ببطئ ..: ايه يا بيتى بتتكلمى وانتى نايمة يا حبيبتى
مى مسكت ايدها تصحصحها وفوجئت بسخونة شديدة طالعه من بتول !!
مى: ايه ده ! (جست حرارتها) يالهووووووى
وساااااااام الحقنى !
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
"كلاس الانسة نهال هيبدآ بعد 5 دقايق"
خرج العامل من صالة التدريب، شريف بيتلفت حواليه ع الناس الى بتحضر وبتهتم بحاجة زى كده
اصل هو مش زيهم ..هو جاى لهدف تانى خالص
بس كعادته حب يغلس ع حد من الناس الى بتدرب
شريف: انت بتدرب هنا كتير ؟
الشاب: اه
شريف: ليه يعنى ؟
الشاب: زى م انت بتيجى بالظبط، ليه يعنى
شريف:انا (ارتبك واتكسف) انا جاى عشان قالولى محتاج اخس..وانت؟
الشاب: انا بقى موديل اعلان ، وبعمل اعلانات عن منتجات كتير
وطبعآ اى اعلان او فيديو كليب مش بيخلى من الرقص عشان كده باجى هنا
وده بيدى مرونة لجسمى اكتر
شريف: مممم تمام
دخلت نهال..كلها حماس..شريف بيبص عليها ببطئ
وهى بتبتدى تحضر الاغانى الى هيتدربو عليها، وبتلم شعرها بتوكه لفوق
كل ده وهو عينه مش متشاله
نهال: هاى صباح الخير...سورى لو كنت بدلت الكلاس بتاعى وخليته الصبح
ده لاسباب خاصة بيا ، وميرسى كتير انكم جيتو
مين جديد معانا ؟
شريف: (بعلو صوته) انا!!
نهال: (بصت ناحيته الشبه مش غريب) اوك ممكن تقولها بصوت واطى انا سمعاك ع فكرة
اوك ف حد تانى ياشباب
محدش رد
نهال: طيب ممكن تستنونى 10 دقايق تدربو عاللى فات فالكلاس الى جمبى لغاية م نشوف الضيف الجديد ونرجع نبتدى الكلاس بتاعنا
خرجو المتدربين ومبقاش ف غير شريف ونهال فقاعة التدريب
نهال: اول مرة ليك هنا
شريف: اه بصراحه (كاتم الضحكة)
نهال: ممكن افهم بتضحك ليه ؟؟ وبعدين انا حاسة انى شوفتك قبل كده
شريف: ايوة احنا اتقابلنا بس انتى شكلك مش فاكرانى ، انا شريف صاحب وسام ومى
وشوفتك فالحفلة لما غنيتى لانغام وجلجلتى الحفلة !
نهال: (بتشرب العصير وبتبصله باستغراب) ممم وجاى هنا بقى تكمل كورس اللطافة الى كان هناك ؟
شريف: لالالا..مش كده خالص
بصراحة انا عملت حجات كتير عشان اجى هنا، اولهم انى من يومها وانا متابعك وعايز بس لو تاخدى بالك منى
وجبت فونك..وانا الى كل يوم بتصل بسمعك تقولى الو واقفل
وانا الى جيت انهاردة مش فنيتى الرقص خالص...انا جاى عشان اشوفك
نهال سمعت شريف للاخر وبعدين اتكلمت وهى مستغربه طريقته واسلوبه
نهال: وجاى عشان تشوفنى ليه ؟
شريف:عايزة الحق ولا ابن عمه
نهال: هههههههههه كلامك غريب جدآ..الحق قول
شريف: من يوم الحفلة وانا معجب بيكى وكنت عايز نتكلم فمش لاقى طريقة غير انى اجى هنا
واسيب شغلى انهاردة واخد اجازة عشان احضر الكلاس بتاعك
واشوفك
نهال: وايه الى شدك فيا يعنى انا مش فاهمة..انت حتى متعرفنيش
شريف من جواه قرر يغير طريقة معرفته بكل بنت وحب يلقط كلمة او 2 من وسام رغم انه بيستتقل اسلوبة وقال يمكن تجيب المرة دى
لان شكل سكتها مش سهلة
شريف: (استحضر وسام فدماغه) عشان لما غنيتى فالحفلة ..صوتك لمس كل حتة فكيانى
وفضل شغال فودانى لحد انهاردة..ومن ساعتها وانا شايفك قدامى
ومش عايز يوقف معرفتى بيكى عاليوم ده وبس
نهال ابتسمت واستغرب انه غير طريقته فثوان عن اول م بدء كلام..بس مننكرش ان الكلام عجبها
وشكل المرة دى نحجت ياشريف!
شريف: (شاف ابتسامتها ..فرح) بركاتك ياابوالوييييييس
نهال: افندم!
شريف: لا مافيش..
نهال: اوك انا هناديهم عشان نبدء الكلاس..هتكمل معاهم ولا خلاص عملت الى عليك
شريف: لا طبعآ معاهم، هو انا اقدر تبقى قدامى ساعة الا ربع
وامشى
ده يبقى غباء منى..حتى لو هعجن عجين الفلاحة مش ارقص
نهال: هههههههههههه اوك
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
الدكتور كشف ع بتول ..وطالع من اوضتها ووسام معاه
لكن مى جمب بتول حضناها وبتبوس كف ايدها بحنية..
الدكتور: تقريبآ واخدة ضربه شمس،زائد انى شاكك فحاجة كدا
وسام: ايه هى يا دكتور؟
الدكتور: بص..انت تعملها التحاليل دى انهاردة
وان شاء الله خير
وسام: طب فهمنى حضرتك شاكك ف ايه ؟ ارجوك
الدكتور: طيب نعمل التحاليل وهى الى هتبين..يمكن استنتاج خاطئ وتقلق عالفاضى
وسام: ارجوك يا دكتور انا اعصابى مش مستحملة!
الدكتور: متخافش كده ..الاطفال دايمآ بيتعبو كده ..امسك نفسك شوية
هو انا شاكك ف اصابة بنزلة معوية
ممكن تكون اكلت حاجة منتهية الصلاحية.. او حاجة ملوثة او معرضة للجو فباظت
التحاليل هنعرف منها وان شاء الله خير
وسام: جزاك الله كل خير يا دكتور..اسفين لتعب حضرتك
صاحيتك من النوم ونزلتك
الدكتور: يااستاذ وسام احنا جيران والجار للجار، الف سلامة عليها..تعملها التحاليل انهاردة ومتكسلش
وسام: حاضر
وسام وصل الدكتور ورجع لبتول ومى فالاوضة.
وسام:(مسك ايديها وبيبوسهم بحرقه) توتا..توتا حبيبة بابى
بتول: (بصوت عيان وجسمها سخن ووشها محمر من السخونة) نعم يابابى
وسام: سلامتك يا روح قلب بابى من جوه ..(باس دماغها)
مى..هنزل اجيب الدوا وراجع ماشى..
مى: طيب متتأخرش انا مش هقوم من جمبها لحد م تيجى ..عايزة اعملها شوربة تاكلها
لحد دلوقتى مكلتش حاجة
بتول: لا يا مامى انا مش كعانة، بطنى وكعانى خالث
وسام: لا يا توتا كده مامى وبابى يزعلو وييجى البوبى الشرير يقول فين توتا الى مش بتسمع الكلام
ويعضك
بتول: تيب خلاث بث حبة ثوغنين
مى: حاضر يا نورعنيا..يلا انت يا وسام
وسام: حاضر ..
بتول: بث انا سحلانة يا مامى اووى
مى: ليه بس يابيتى
بتول: عثان انهاردة كنت هقعد كمب صهيب فالباص وزمانه اثتنانى ومث لاقانى بئى
مى: متزعليش يا حبيبتى، بكرة تخفى وتروحى المدرسة وتقعدى معاه براحتك
بتول: يلا يا بكرة تعالى بئى ..يارب اخف
مى: يارب يا بيتى
(فونها رن)
الو..
امنية: ايه يابنتى كل ده ومش سامعة الفون ..نايمة فمية
مى: معلش يا مونى كان بعيد عنى (بترد عادى مش بفرفشة)
امنية: طبعآ ليكى حق تبعدى الفون عنك، الليلة كانت ليلتك يا جميل
مى: والله مش فايقة لهزارك يا امنية
امنية: ايه مالك يابنتى ؟ فيه ايه
اوعى تقولى اتخانقتو
مى: بتول عيانة خالص يا امنية..صحيت لاقتها بتخترف وهى نايمة ومولعة نار
امنية: ليه بس كدا! الف سلامة عليها
مى: معرفش اصلا الدكتور قال ايه لوسام
الحمدلله انها غابت من المدرسة بالصدفة والا كانت تعبت زيادة
امنية: طب خلاص خليكى انتى جمبها وانا سادة هنا متقلقيش، وبليل هاجى اشوفها
مى: تسلمسلى يا مونى ربنا ميحرمنيش منك
امنية: يابنتى احنا اخوات، انا هكلمك كل فترة تطمنينى عليها..سلام
مى: سلام يا مونى
امنية قفلت مع مى ودخلو زباين ، راجل مش كبير فالسن اوى
ووقوروشكله كان وسيم وهو صغير
شعره مش كله ابيض ولابس بدلة شيك ومعاه بنوتة صغيرة يمكن 20 سنة!
امنية: اؤمر يافندم
الراجل: حضرتك احنا عايزين نشوف احدث فساتين السهرة والسواريه الى الجديدة ، بنتى حفلة تخرجها قربت
امنية: اه الف مبروك..اتفضل استريح حضرتك
والقمر تتفضل معايا هفرجها ع اجمل حجات نزلت لنا حالا
(رفعت الفون واتصلت بالكافيه) تشرب ايه حضرتك
الراجل: لالا مش لازم
امنية: لا بجد..عشان تبقو زبايننا بقى، مينفعش لازم تشرب حاجة
الراجل: خلاص يبقى قهوة زيادة
امنية: اوك ..قهوة زيادة هنا اتيليه فرح
اوك
اتفضلى معايا ياقمر
دخلت البنت مع امنية تنقى ، بس الراجل كان بيبص ناحية امنية كتير
وهى بتفرج بنته عالفساتين
ولما استقرت ع واحد ودخلت قاسته
جت وقعدت امنية عالمكتب..وقدامها الراجل بيشرب قهوته
الراجل: ايه اختارت حاجة ؟
امنية: اه هى عجبها كام واحد ان شاء الله تاخد حاجة منهم
الراجل: ياستى ولا تاخدهم كلهم..انا معنديش غيرها
وعايز افرحها بأى شكل
امنية: ربنا يخليهالك يافندم..وتفرح بيها انت ومامتها ان شاء الله
الراجل: مامتها متوفيه ..الله يرحمها من كام سنة يعنى
امنية: الله يرحمها..البركة فحضرتك
خرجت البنت وبتوريهم الفستان لباباها وامنية
عجبهم ودخلت تقيس التانى
الراجل:لو عجبوها كلهم هاخدهم ..
امنية: ياسلاام! المكان كله تحت امرك يافندم
الراجل: انتى صاحبة الاتيليه بقى ؟
امنية: اه بس معايا شريكة واحدة صاحبتى من زمان
الراجل: اكيد بتقضى اليوم كله هنا ..مافيش وقت تقعدى مع جوزك
امنية: (استغربت ورجعت خصلة من شعرها لورا ودنها) انا مش متجوزة
الراجل: انا اسف ..فعلا شكل حضرتك صغير عالجواز
اسف مرة تانية
امنية: لا بالعكس انا مش صغيرة ولا حاجة
الراجل: لا ازاى العمر ليكى ان شاء الله ..(بيبص ع كل حتة فالاتيليه فلقى صورة كبيرة لبتول متعلقه..وجمبها صورة مدثر)
اكيد دول ولاد شريكتك
امنية: اه البنوتة بنتها .. لكن الودل ابنى مدثر
الراجل: ابنك! انتى هتلخبطينى ليه
خرجت البنت من البروفا
البنت: ايه رأيك يابابى ده احلى من التانى صح؟
الراجل: اه اجمل..ولا ايه رأى حضرتك
امنية: بصراحه كلهم منورين عليها..قيستى الاخضر قرمزى ده لون السنة
البنت: لا لسه ه قيسه حالا
دخلت البنت ورجع الراجل يحكى مع امنية
امنية: انا مش بلخبط حضرتك ولا حاجة..انا كنت متجوزة وانفصلت عن بابا ابنى
وخلاص
الراجل: ربنا اكيد مقدر ليكى الخير قريب..تعرفى
امنية: نعم
الراجل: انا كان عندى 25 سنة لما اتجوزت مامت رنا ..عشنا 17 سنة عالحلوة والمرة
كانت كل حاجة فحياتنا..بس لما ربنا اخترها حسيت ان الدنيا وقفت بعدها
ومش عارف لا انا ولا رنا نعيش..بس مافيش حاجة بتدوم
والدنيا بتستمر
امنية بتسمعه وعجبها كلامه اوى
الراجل: الى عايز اوصله ليكى ان ساعات الواحد بيبقى فاكر ان الحياة وقفت عند شخص معين، بس هو قدر من ربنا عشان يقابل شخص تانى
يكمل معاه..فهمتينى
امنية: (ابتسمت) فهمت حضرتك
الراجل: متعرفتش ع حضرتك..انا اسمى عمران السيد
صاحب شركة عمران للتسليح لو سمعت ى عنها
امنية: اه طبعآ اهلا بحضرتك..انا امنية
عمران: تشر فت بحضرتك وصدعتك الحبة دول معلش يا ..مدام امنية
امنية: لا بالعكس انتو منورين المحل..اهلا بيك
البنت شافت كل الفساتين ..وفعلا اشتروها كلها ودفع التمن
بس وهو خارج قال لامنية
عمران: ياريت تخلى فحياتك نصيب من اسمك..وتبقالك امنية حلوة تحققيها
مشى وساب امنية فحيرتها..اول مرة حد تشوفه لاول مرة يحكى معاها وترتاح كده
خدت نفس طويييييييل ورجعت لشغلها
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
ابرة كانيولا صغيرة ..بتدخل وريد بتول
وسام مستحملش وجعها وعيونه دمعت..
وسام: معلش يا بيبى عشان تخفى
بتول: بتوكع اوى يابابى
مى: معلش يابيتى ..عشان تخفى وترجعى تقومى وتلعبى براحتك
وبعدين احنا مش بنشرب لبن واقويا
بتول: ايوة
مى: يبقى مافيش حاجة هتوجعنا بقى
وسام قاعد جمبها عالسرير وبيحسس ع شعرها بالراحة..خرجت مى وندهت عليه
مى: قالو ايه فالتحاليل ..عملتها فورى عشان نعرف بسرعة صح
وسام: (بيرد الباب عشان بتول متسمعش) قالو نزلة معوية فعلا بس خفيفة..مش عارف هى كلت ايه
مى: بتول بتاكل حجات بحضرها ليها بتكون كويسة ومش منتهية الصلاحية
وسام: يمكن فالحضانة!
مى: اه بمناسبة الحضانة..فانيليا دى هى وابنها اتصلو وعرفو ان بتول عيانة عشان كده مجاتش
فقال ايه هييجو يشوفوها
وسام: اتصلو بيكى ع فونك؟
مى: اه يمكن خدوه من الحضانة ..ليه هى معاها فونك ولا ايه ؟
وسام: لا وربنا بسأل عادى كلموكى ازاى..طيب فيهم الخير
صهيب اصله متعلق ببنتك اوى
مى: لا وامه متعلقه بأبوها اوى
وسام: تانى يامى!انا هدخل اقعد جمب البنت
شوية والباب خبط.. كانو كاميليا وصهيب
كاميليا: الف سلامة ع بتول ..
مى: اهلا يا مدام كاميليا اتفضلى
دخلت قعدت فالصالون وخرج لها وسام
وسام: اهلا اهلا ازيك يا صهيب..ازيك يا مدام كاميليا
نورتونا وتعبتو نفسكم
كاميليا: انا عرفت من صهيب انها مجاتش وكان جاى متدايق اوى والله كلمت مدام مى قالت انها فعلا عيانة
معلش بقى جينا فوقت مش مناسب وانتو اكدي قاعدين جمبها
صهيب: انا عاوز اثوفها ياعمو وسام
مى: لا بلاش عشان متتعديش يا صهيب..هى هتنزل الحضانة وتبقى كويسة
كاميليا لاحظت لتانى مرة شكل مى مش راغبة فوجودهم
كاميليا: تعالى يا صهيب هنا..زمانها نايمة متتعبهاش اسمع كلام طنط
مى: تشربى ايه حضرتك؟
كاميليا: لا متتعبيش نفسك احنا والله جايين نتطمن ع بتول وهنمشى ع طول
وسام: مينفعش يا مدام كاميليا ..زى م قولتى عندك انه واجب عشان اول مرة تدخلى البيت
واحنا مش بخلا يعنى
كاميليا: ههههههه لا بصراحة عمرك م كنت بخيل يا وسام
خلاص ممكن شاى اخضر لو فى
مى:(بتبرطم ..عمرك م كنت بخيل يا وسام! ربنا يصبرنى ومخرطكيش حتت انهاردة) اه موجود..ثوانى
دخلت مى المطبخ تحضر ووسام قاعد مع كاميليا وصهيب وبيرد ع سؤال كاميليا بتول عندها ايه والدكتور قال ايه
وسام: الحمدلله ..انا مقدرتش اشوف الكانيولا فوريدها
مى عرفت تحطها لكن مش بستحمل
كاميليا: ان شاء الله هتخف وتبقى زى الفل..متقلقش انت بس
وانت عامل ايه فشغلك، تصدق انا معرفش بتشتغل فين
وايه
وسام: انا فخدمة عملاء فودافون بقالى فوق ال 10 سنين
وع درجه سوبر فايزر
كاميليا: ماشاء الله من زمان وانت طموح ..فاكر فادى كان بيقول عليك ايه
مى جاية بالمشروبات والصوت ابتدى يوضح
وسام: فادى مين .؟ ااااه فادى موريس
ماله
كاميليا: كان بيقول عليك دودة كتاب ودودة قرايه وكل حاجة بتعملها بضمير ههههه
عشان كده ماشاء الله كنت متأكدة انك مرتاح فحياتك وناجح كمان
مى وقفت ورا الحيطة تسمع
وسام: ههههههه الله يخربيته فادى موريس اكتر حد وحشنى فالشلة كلها تخيلى!
كاميليا: بيشتغل معايا يابنى ..انا بشتغل فشركة للمناقصات والمحاسبات وكده
وهو معايا هناك فالامارات
وسام: ااااااااه طب تمام ..بس بتسيبى صهيب كتير كده
صهيب: ايوة بتثبنى وانا بزعل منها
كاميليا: صهيب قولت ايه ؟؟ لما مامى تتكلم مع حد كبير متتكلمش ولا تدخل
صهيب: اوك مامى سورى
كاميليا: والله ظروف الشغل يا وسام ..اصل هعمل ايه
باباه الله يسامحه مش بيبعت له اى حاجة قصاد حضانتى له..وكل حاجة ع دماغى
وسام: معلش ربنا يعينك
مى الغيظ اكلها وملكت نفسها ودخلت بصنية المشروب ..
مى: اتفضلى
كاميليا: تعبتى نفسك يا مدام مى
مى: لا ازاى تعبك راحة..ده حتى حضرتك بتيجى تنورى المكان (بتبص لوسام وانتهزت فرصة كاميليا بتشرب وعملت له حركة استنى عليا وهى ماسكىة دقنها)
وسام اتنحنح وبربش كالعادة وقلع النضارة ومسح عنيه ولبسها ودخل لبتول وسابهم لوحدهم
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
امنية فالنادى فتدريب الكاراتيه بتاع مدثر..وقاعدة مستنياه
وجمبها شريف.
شريف: ايوة يعنى بيلطف بروح امه يعنى؟
امنية: روح امه دى..عادى انا شايفة انه عادى
شريف: ده ايه هو الى عادى..واحد زفت زبون وجاى ياخد فساتين للمزغودة بنته
ناخدهم ويغور فداهية
انما انتى متجوزة .. طب فين الدبلة
المأذون الى كتب الكتاب سنه كام سنة..ده كان فاضلله شوية ويقولك لون السيراميك الى فحمام بيتكم ايه !
امنية: ع فكرة يا شريف انا شايفه ان الراجل بيتكلم بمنتهى الذوق
وعادى الكلا جاب بعضه
شريف: (بعصبيه) يعنى انتى عاجبك التسبيل والنحنه فأم كلامه ليكى ياست امنية صح!
امنية: فين التسبيل ده الله!
شريف: لا فعلا فين التسبيل ..الراجل محترم وانا الى ابن كلب
امنية: وبتشتم نفسك ليه بس دلوقت
شريف: يعنى راجل عنده 81 سنة وداخل محل يتهبب يشترى منه ولقى بنت صغيره قال م اعيش فدور احمد مظهر واطلع المنديل واحطلها وردة حمرا
امنية: (مبتسمة) ده عنده 45 سنة بس!
شريف: والله!! يا صلاة النبى كمان عرفتى سنه كام الاستاذ كرافته
طيب ياستى اشربيه
امنية: اشربه ده ايه ، وبعدين فيه ايه ياشريف انت بتغير عليا لسه؟
شريف: (بصلها فعنيها وكان بجد..هو فعلا بيحبها ) بغير ايه ؟ انتى بتحكى موقف مستفز
واستفزنى خلصنا
ويلا بينا عشان اروحك انتى ومدثر..خلص تمرين اهو
امنية: لا تعالى نعدى ع وسام ومى الاول..بتول تعبانة
شريف: بجد ! طب يلا بينا
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
وصلو لشقه وسام ومى وهما طالعين عالسلم ..
امنية: انت متعرفش انه مراحش الشغل انهاردة عشان بتول
شريف: لا..اصل انا كمان مروحتش
امنية: ليه مالك فيه ايه
شريف: لا ده حوار هحكيلك عليه بعدين
وصلو عند باب الشقه وكان صوت مى عااااااااالى جدآآ لدرجه كانو سامعينه من برة
مى: وقال ايه..فاكر فادى طب فاكر مش عارف مين
وطول عمرك مش بخيل..عرفت منين طول عمرك
وشغاله هيهيهيئ معاك وواحدة قليلة الادب عارفة ان البيت فيه مريضة وبردو جاية تتسهوك ع جوزى
وسام: انتى اكيد اتجننتى ، مخك ساااح خلاص بقى عجين
انتى مش لازم تعيشى هنا مكانك سرايا المجانين
مى: اه طبعآ عشان يخلالك الجو مع الست فانيليا لكن ده بعدك
وسام: لاخر مرة بقولك بنتك نايمة وعيانة وطى صوووووووتك
امنية وشريف عالباب من برة!
امنية: يالهوى! دول بيتخانقو
شريف: مى مش هتجيبها لبر ابدآ بجنانها ده
خبطو وفتحلهم وسام ..
امنية: فيه ايه بس حصل ايه ؟؟
وسام: الهانم دماغها ضربت ولسعت وانا مبقتش مستحمل خلاص
مى: خلاص يا سيدى كل واحد يروح لحاله ..واهو احسن من الكدب والخداع الى عايشه فيهم طول الوقت!
وسام:كدب وخداع! (متفاجئ بكلامها)
شريف:(شد وسام يقعد)طب صلو عالنبو ووحدو الله طيب فيه ايه؟
وسام: لا اله الا الله ..مافيش ياسيدى مدام كاميليا مامت صهيب جت تشوف بتول عشان عاينة ومراحتش المدرسة
وقامت الحريقة
مى: ااااااااه اصلى مجنونة مش كده بعمل مشكلة من الهوا،طب اشهدى انتى يا امنية..شغاله تقوله طول عمرك مش بخيل
وبتعمل الحاجة بضمير
وفاكر ومش فاكر يبقى يعرفها ولا ميعرفهاش
امنية: طب اقعدى بس واشربى ميه واهدى
شريف: مش ياعم كاميليا دى بتاعت قصة الحب الكلابى بتاعتك!
دى ولية بومة
مى كانت بتشرب ميه وفجأة وقفت وعنيها برئت..ومسكت بهدوء الفازة الى جمبها
وجت فوق راس وسام
مى: حكاية حب ايه يا استاذ وسااااااام (وعنيها بتطق شرار)
وسام: سلام قول من رب رحيم..مين دى (بيرجع براسه لورا)
مى: اتشاهد كده بهدوء !!و قول ع نفسك يا رحمن يا رحيييييييم
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
ونكمل بكرة
استنوها يوميآ
#ويسو_وميوش_وتوتا_وخلصت_الحدوتة
#لنورإسماعيل
ليست هناك تعليقات:
إرسال تعليق