❄❄❄❄❄❄❄❄❄❄❄❄❄
وسام: عارف لما تتفاجئ تشوف حد بعد يمكن 16 سنة صدفة غريبة جدآ ..
شريف: انطق ياض شوفت مين ..السرحان ده اكيد موزة
اصل الواحد مش هيسرح فسحنة من سحن الرجاله يعنى دول شبه القرود
وسام: هو انا حكيتلك ع اول حب فحياتى قبل كده ؟؟!
شريف: نعم ياخويا ؟! (قرب الكرسى ليه) لا انت تبصلى وتصحصح وتجيب الشريط من اوله
من الاول خااااااااااالص
وسام: شريط ايه بس الى اجيبه من الاول خالص ياض
شريف: بص اصل انا حاسس بمفجأة هسمعها فاتفضل حضرتك مخمخ وشوف هتبتدى منين ورجع فوشى ، ولايهمك اخوك واستحملك
وسام: الله يقرفك ويقرف شكلك.تصدق فصلتنى !
شريف: طب بص احنا نخلص ام الكام ساعة دول وبعد الشغل نطلع ع صالة بازوكا..نلعب جيم بلياردو
وتحكى وتبععععع
♡♡♡♡♡♡♡♡♡♡♡♡♡♡♡♡♡
مى داخلة من برة وبتفتح الباب ..
مى: بيتى! بيتى انا جيييييييت
بتول: مامى (خرجت من الاوضة بتاعتها) اسيك وحستينى
مى: انتى وحستينى اكتر يابنوتة ، بابى اتصل وقال هيتأخر شوية بعد الشغل..اكلتى السندوتشات الى سبتهالك عالسفرا وشربتى العصير؟
بتول: لا يا مامى كنت بعمل هوم ورك الرسم الى طلبته المس ونسيت
مى: لالالا كده انا ازعل منك..يعنى من ساعة م جيتى من الحضانة يا بتول مكلتيش.كده البوبى الوحش هيعضك عشان انتى كده بتزعلى مامى وبتعملى حجات نوتى
بتول: لا خلاث يا مامى هبقى اكلهم بعد كده ومث هعمل حاكة نوتى تانى (بتبوس مامتها)
مى: طيب ايه رأيك ففوكيرة !!
بتول: ايه هى ؟
مى:تيجى بدل م نتغدى هنا ... نروح نتغدى مع خالتو سهر وولادها!
بتول: الله (سقفت ببراءة ومبتسمة) ماثى انا هروح اغير هدومى يا مامى وانتى سرحيلى شعرى يا مامى
مى: طب يلا وانا مش هغير ..
♡♡♡♡♡♡♡♡♡♡♡♡♡♡♡♡♡
الصولو بتنزل البوكيت...وبتقفل الجيم لصالح وسام.
وسام: كنت فالجامعة ،من اول سنة ليا ولمحتها
وع فكرة انا كانت سخصيتى غير كده تمامآ
شريف: ازاى يعنى ..يعنى نمت بطنك وجعاك صحيت لنا كده
وسام: هنتكلم بجد ولا هتهزر وتألش زى عادتك ومش هتخلينى اكمل
شريف: لا ياعم اهو مش حهزر..بس انت فهمنى برضو
وسام: يعنى ..كنت مطقطق وروش..اكلم البنات زمايلى عادى بس فالحدود برضو
كانت عندى شلة كبيرة ولاد وبنات
وكاميليا كانت من ضمن
كانت اجمل بنت فالدفعة وأأدبهم
شريف: كاميليا الى هى موزتك الاولى ..
وسام: اه
شريف: اه يا نمس..طلعت مش سهل، قال وانا الى كنت فاكر ان دنيا اول واحدة
وسام: لا بص انا هفهمك ..انا حبيت دنيا برضو
او تقدر تقول اتعلقت بيها
شريف: طب وقلبك ده رمانه يعنى ؟؟ يساع من الحبايب الف
وسام: افهم يا حمار...انا حبيت ال 3
كاميليا ودنيا ..ومى طبعآ
كل واحدة فيهم جت فوقت بعد التانية بسنين..وكمان جت فوقت كنت محتاج فيه لحد
بس لو سألتنى مين الى بعشقها وبموت فيها وفعلا هى حبى الحقيقى وعشت معاها اجمل ايام حياتى
شريف: كاميليا ..صح؟
وسام: لا طبعآ مى ... مى الوحيدة فيهم الى عرفت تملك كل حتة فيا مش عشان مراتى وام بنتى
اه منكرش انى كنت مبسوط مع كل واحدة فيهم
وشوفت ايام جميلة ..بس كاميليا ودنيا برغم ان ف فرق فالشخصيات
وانهم ميعرفوش بعض اصلا والعامل المشترك بينهم انا
بس كانو اغبيا
شريف: ليه بقى؟
وسام: معرفتش واحدة فيهم تحتوينى برغم الحب الكبير الى ادتهولى
لكن مى
مش احتوتنى ..مى شربتنى
مى حفظتنى
مى شقلبتنى كده .. عرفت تقدر تخلى حياتى متمشيش من غيرها ثانية
لكن هما بغبائهم
عرفو يخلونى اعيش بعدهم ...والاقى حب جديد
شريف: طب سيبك من حكاية دنيا لان سيرتها وحياة خالى جرجس بتغوم نفسى وبتخلينى ارجع
خلينا فكاميليا دلوقت..احكيلى واحكيلى الطقطقة الى انت كنت فيها
وازاى بقيت فلحظة هذا الكائن الخنيق الى قاعد قدامى وصاحبى من سنين
وسام: خلاص دنيا راحت لحالها واتجوزت ربنا يسهلها..وكاميليا كمان بردو بالنسبة لى مش اكتر من معرفة قديمة
انا بس استغربت الصدفة ..لتكون فاكر انها صحت حب قديم ولا حاجة! انا مش عيل يعنى
شريف: اه بحسب اصل سرحت وبتاع قولت لا يا ويسو ده انا بمثل دايمآ جزء الشيطان وانت الملاك..المهم كمل حكايتك مع الاخت دى ايه ؟؟
وسام:هقولك ياسيدى ..عارف لما يبقو ف 2 فالجامعة مثلا مرتبطين والشلة كلها عارفة
انا وكاميليا كنا كده
هى مغتربة كانت ..مش من هنا
من الصعيد
وكانت ساكنه فسكن للطالبات ...ع ايامنا مافيش طبعآ ولا موبايل ولا اى حاجة
بس تعرف
الحجات دى خلت معنى الحب رخم وغلس وبقى طعمة وحش..مجرد بوست تكتبه عن حبيبك كده انت بتموت ف
لكن ع ايامى كانت ف حجات اجمل واصدق ..بتخلي حبيبك يعرف بجد انك بتحبه
ويفتخر انكم سوا
شريف: طب قول شوقتنى ازاى ..صحيح احنا بينا سنتين فرق سن مش كتير
بس انا كنت فالجامعة رحلات واخرج واتفسح وكده ومكالمات ع التليفون الارضى لما اخرب بيت ابويا
وسام: لالالالالا انا مكنتش كده ..الاول احنا كشلة كنا نذاكر سوا فالجامعة بقى فأى حتة فالشارع
ده سعات كنا نفرش فجنينة وحد من البنات يجيب ملايه ونعمل ترمس شاى ونجيب حجات ناكلها ونقعد كلنا نذاكر فالشارع فجنينة عمومية وكل خلق الله تتفرج علينا
شريف: ياسيدى عالطقطقة!! كمل اشجينى
وسام: انا الاول كنت بحس ان كامايليا مميزة عن البنات الى فالشلة
وعن بنات الدفعة فالعموم ..حد كده شخصيته قوية
تقدر تعتمد عليها فأى حاجة .. طيبة وعسولة
شريف: طب كفاية الله يرضى عليك عشان مروحش بكرة لحضانة بنتك واطلب رقمها
وسام: هههههه بس ياسيدى اتشديتلها بس فنفسى
وبعد كده ف واحدة من البنات وصلت لحد من زمايلنا انها هى كمان معجبة بيا
وبعدين بقى جه وقت انى اصرحلها الاول..كنت شاب وفبداية حياتى واول مرة احب
وعايز بقى ابقى حبيب وجنتل وليا قصة واخد بالك
شريف: ايوة ايام من الواحد كان عايز يثبت نفسه انه كبر بقى وراجل وبيحب وبيشرب سجاير وهو شبه صبى الحانوتى ولسه حمار اصلا
وسام: وبعدين حبيت اقولها انى بحبها ...عملت ايه
شريف: اه .. وواحدة واحدة وحياة ابوك عشان اعصابى مش بتحتمل هذة المشاعر
وسام: كانت ف محاضرات لمادة سخيفة انا مش بحب احضرها ولا بحبها ..هى كانت منتظمة الحضور فيها الوحيدة فينا كلنا كشلة
شريف: كنت بتزوغ يا ويس هههههههه وانا الى كنت فاكرك امك جابتك تقى كده اتاريك عيل تيت زيينا اهو
وسام: ايوة طبعآ كنت بزوغ وكنت بقعد فالكافيتريا وممكن انزل يوم كامل محضرش ولا محاضرة واقعد اتسنكح مع اصحابى والف لف فالجامعة
شريف: وبعدين
وسام: اخدت الكشكول بحجة انى عايز اصور المحاضرات .. وجبت كارت كده مرسوم عليه قلوب وحجات وكان ف من الناحية التانية اغنية فيروز
يا أنا
شريف: فيروز (عوج بوقه) اهى دى زتونة فصلان ...فيروز مين ياعم
وسام: هتسمع ولا اديك بالكانز فوشك
شريف: لا كمل ..
وسام: كتبتلها .. ياغادة الكاميليا
يااجمل من رات عينى
هل تقبلين قلبى مكانآ تسكنيه ... فأذا كان جوابك نعم
فأنا احبك♡
شريف: ياخى ياغادة الكاميليا ايه ويا بياعة الفراولة ايه ...ايه الكلام المجعلص ده ..م انت لسه فيك فصلان وقفلان اهو من زمان
اكتبلها انا بحبك يابت وش..ايه ردك ؟
ايه الكلام جاتك داهية فشكلك
كده
وسام: طب م اجيب مطوة واعلمها فوشها احسن .. واحد يروح يقول لواحدة انا بحبك
يقولها الكلام؟جاتك داهية!
انت عبيط ياض
شريف: كمل ياعم ..طلعت حكاية فصيلة كنت فاكر انى هقول عليك شقشقى فالصياعة الجامعية
اتارى الى فيك فيك
وسام: يابنى افهم..انا بحب الشعر اصلا ودى طريقتى فالتعبير عن مشاعرى
شريف: طب بعبر عن مشاعرك ياخويا بعبر..المهم قالت ايه غادة الفاصوليا ؟؟
وسام: ههههههه جت تانى يوم ووشها احمر وقالتلى وسام انا عايزاك
خدتنى ع جنب وقالتلى ايه ده
انا بصراحة خوفت ليكون ده دايقها ..فمعرفتش ارد
ولسه هقولها خلاص متأسف
راحت ابتسمت
فبقولها مش زعلانة ؟
قالتلى انا معرفتش انام من امبارح بسببك..الله يسامحك
فروحت قولتلها يعنى موافقة عالسؤال الى سألتهولك
بص يا شريف قالت ايه (مبتسم وهو بيحكى )
شريف: (لاوى وشه وحاطط ايده ع خده) قالت ايه ؟؟
وسام: قالتلى وان كان الجواب بنعم ؟؟
من غير تردد قولتلها فأنا احبك
شريف: (سقف ع ايده وخلى كل الى فالصالة ياخدو بالهم) هيييييييييه براااااااافو...تصدق ياض انت مش بتاع حب
وخسارة فيك مى عشان مش شبهك
انت اخرك فاصوليا ودنيا فنيك ..بنات رخمة واكل حمضان اصلا
وسام: انت بتتريق ياض يابن اللذين (بيضحك)
شريف: قال هل تقبلين قلبى بعلا لكى وهى ردت اه اقبل يابو سوسن وكل ده فطرقة حمام الكلية ورحة تقرف
ايه قصة الحب المعفنه دى
وسام: طب غور جاتك نيلة ..والله م هحكيلك حاجة تانى
شريف: احسن بركة ياجامع هتعتقنى من المغص ..لولولولولولى
وسام: (خبطه ع دماغه) طب يلا عشان نروح
شريف: يلا وتصدق بالله ..لو قولتلك احكيلى ع حاجة تانى اقلع شوزك وادينى ع دماغى
انا اصلا الى غبى
واحد وهيسمع حكاية من وسام .. لازم يحس بالاكتئاب زى المسلسلات الكورى
يلا ياعم الله يستر ع ولاياك
وسام: ههههههههههه تصدق انك جزمة فعلا ..انا غلطان
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
وبعد كام يوم ...
كانت مى وامنية فالاتيليه المشروع الى فتحوه سوا
وبيتغدوا وبيتكلمو
امنية: مش فكرة انى لسه بحبه ولالا يا مى، شريف عمره م هيتغير
طب عارفة دلوقتى هو عينه هتطلع ع مين ؟
مى: ع مين
امنية: ع نهال جارتكم الى غنت فالحفلة ..شغال يحوم حواليها
وانا حسيت بس مطنشه
شوفتى بقى
مى: ههههههه يبقى هتسكه ع دماغه متقلقيش نهال قوية والى زى شريف ميعجبهاش
امنية: يا مى مش بتكلم فكده ...انا فعلا بحب اكون وياه
ومدثر بيموت ف
وتقريبآ انا محبتش غير شريف..بس هو مش بيتغير ولا عايز يتغير
عنده فوق ال 35 سنة ولسه عيل ولا عارف يبقى مسؤل ولا عارف هو عايز ايه
مى: ايوة عندك حق..طب عارفة مثلا انا محبتش فحياتى ولا فتحت قلبى غير لويسو ليه ؟
عشان هو بالظبط الى عوضنى كل الى كنت محتاجاله..هو بجد الى كان كل الناس فواحد بس
اخ وصديق وحبيب وام غايبة عنى
واب يحتوينى
حنين وبيخاف عليا طول عمره ..انتى عارفة لما بيبقى نايم وانا جمبه واتقلب مثلا وممكن هبقى خلاص هقع من عالسرير واصلا رايحه فسابع نومة
يصحى هو من النوم يشدنى لجوه ويغطينى زى م يكون بيغطى بتول..بفوق انا فالوقت ده
مش زوج وبس يا مونى...بحبه اووووووى
امنية: وسام! هو ف زيه الله اكبر عليه
الغريب ان شريف يعرفه من سنين ونفسى ياخد حاجة منه عالاقل
مى: بت يا مونى..متخافيش هيلف يلف زى الدبانة الدكر ويرجعلك ومش هيلاقى غيرك
طب ياريت يشبك مع نهال
ونهال دى هتعلم ع امه..عشان يعرف قيمتك ساعتها
امنية: تفتكرى ...
مى: خليه يعنى هيوصل معاها لفين ؟ ادينا وراه
فالوقت ده كان شريف معاه فون مهم جدآآآ
شريف: ايه ؟ هيروح يتقدم لها ؟اتصالحو واتفقو انه يروح يخطبها ؟!
ايه شغل الحلاقين ده ...لا انت لازم تتصرفلى متخليش الواد الملزق ده يخطبها
طب خلاص خلاص
اقابلك بعد ساعة كده فالكافيه ونشوف هنعمل ايه ..
شريف قابل صاحبه المسئول الاول عن اخبار نهال لشريف خطوة بخطوة
صاحبه: هتعمل ايه ؟
شريف: والله لاخربهاله ...بس دماغى عطلانة
قال يخطبها قال..ناصع البياض بروح امه
ده مش راجل اصلا ده شبه ابوقردان ابيض وغتت
صاحبه: بص وانا بتكتك ور الواد ده عرفت حاجة..انه كان خاطب قبل كده وفركش
وواضح ان موزتك متعرفش
شريف: يعنى يابن المفلطحة عندك المعلومة دى وساكت من الصبح .. طب دى اول الخيط
صاحبه: هتعمل ايه ياريس؟؟
شريف: سيبنى افكر بس واقولك
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
"انتى مث هتركبى الباص؟"
بتول: لا هثتنى معاك تنت لما تيكى وبعدين اركب،واثلا لثة مث كل العيال ركبو
صهيب: (ابتسم) انتى عثولة اوى يا بتولا
بتول: ههههههه انت بتقولى بتولا مث بتول؟
صهيب:ايوا عشان انت ىامورة واانا عايس اقولك كتا
بتول:مامى بتقولى يابيتى ..وبابى بيقولى يا توتا
بث انت قولى بتولا..حلوة خالث
وهما واقفين قدام المدرسة والباص واقف ...صهيب طلع وردة يديها لبتول
صهيب: خدى دى انا كبتها من الكنينة
بتول هتاخدها طارت فالهوا جريت وراها وبتاخدها من عالارض كان ف تاكس هيعدى وهى مميلة فنفس الحتة
شواق الباص نزل وصرخ بعلو حسه
"يابتووووووووول "
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
مى: يالهوى يابنتى ...يا بتول
امنية: قايمة معاها متقلقيش وسام بيقولك محصلهاش حاجة بس هى مخضوضة
مى: وانا لسه هستنى وسام يقول وميقولش انا رايحالها
وسام ومى اتجمعو عند المدرسة .. وبتول كانت فأوضة العيادة بتاعت دكتورة المدرسة
نايمة عالسرير ..وصهيب جمبها
وكاميليا !!
وسام: انا مش عارف اشكرك ولا اقولك انا اسف مش عارف اقول حاجة بصراحة يا كاميليا
كاميليا: تشكرنى ع ايه ..هى مش زى صهيب وهو لو انت كنت مكانى مش كنت عملت كده
وسام: بس شكل دراعك اتخبط جامد لازم تروحى تكشفى لانه ورم
دخلت مى بسرعة ومن غير سابق انذار مسكت بتول فحضنها وبتبوس فيها
كاميليا: بالراحة متخافيش عليها هى كويسة
بتول: انا كويثة يا مامى دى تنت كاميليا هى الى اتخبتت
مى: (حاضنه بتول) حضرتك مين ؟
وسام: دى مدام كاميليا يا مى مامت صهيب زميل بتول، بتول لما التاكس جه عليها ومعرفش يفرمل كانت هى نازلة من عربيته فخدت بتول من قدامه فاتخبطت جامد فدارعها
لان سواق الباص كمان نزلها بس ملحقهاش قبل كاميليا
مى: (بدأت تغير) مممم متأسفين لحضرتك تعبناكى معانا بجد..وسام ممكن تيجى مدام كاميليا معانا فالعربية وتروح لاى دكتور نتطمن عليها
كاميليا: مدام مى مش ضرورى هو مجرد جزع بس انا بحرك دراعى عادى ..حمدلله ع سلامة بتول
الدكتورة: حمدلله عالسلامة ..وبعدين يابتول متعديش الشارع تانى لوحدك لاى ظرف
وسام: لا ازاى يا كاميليا لازم نعمل زى م قالت مى ..يعنى مش حلوة ابدآ نسيبك كده
كاميليا: صدقنى يا وسام انا كويسة..
مى: (لاحظت انهم بيتكلمو ورافعين الالقاب وده خلاها تغلى ) لا ازاى لازم نتطمن عليكى ...اتفضلى حضرتك
طلعو كلهم سوا ..وفعلا كشفو ع كاميليا وطلع دراعها اتجزع وتم تجبيسه عشان يترد لانه اتلوى
وخدت ادوية ومشيو كلهم
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
"ايوة يافندم ..انا واحدة كان يعرفها العريس الى متقدم لنهال بنتكم "
والد نهال: اهلا يابنتى ..ف حاجة
البنت: انا اسفه انى بتصل من غير سابق معاد ولا عرفتك بنفسى ، بس حابة انبهكم قبل م توقعو فالفخ الى هيتعمل لبنتكم
والد نهال : (وشه اتغير ووقفت جمبه مامتها) فخ ايه يابنتى خير
البنت: الاستاذ نادر المحترم كان خاطبنى ..ممكن تقول ده مش عيب
الواحد ممكن يخطب كذا مرة لحد م يلاقى الحد المناسب
بس الى عيب بقى لما يبقى خاطب بنت واهلها مأمنين عليها معاه ويحاول ...يحاول (بتمثل العياط)
والد نهال: يابنتى انا مش فاهم حاجة
البنت: نادر يافندم غلط معايا وضحك عليا ولما طلبت نتجوز اتحجج وسابنى ...ودلوقتى بيتقدم لبنتكم
اعتقد جه الوقت تفضو حد ممكن يلوث سمعة وشرف بنتكم..وللاسف نهال متعرفش حاجة من ده كله
الراجل قفل المكالمة ووشه جايب الوان ومامتها شغاله تسأله .." فيه ايه "
عالناحية التانية بقى ..
شريف: (بيسلم كف ع ايد البنت ) حلاوتك يابت اللعيبة
البنت: هههههههه عيب يا شيرو احنا فالخدمة
شريف: تفتكرى صدقك وهتجيب نتيجة؟
البنت: ياعم الراجل محطش منطق وقفل فوشى هههه
شريف: كده تمام..ويبقى يورينى هياخدها منى ازاى
عند نهال ..
الاب: نهاااااااااال(بغضب)
نهال: خير يابابا ف ايه (جاية من اوضتها مخضوضة)
الاب: الى اسمه نادر ده تبلغيه انه ميجيش البيت ولا يتقدم ولا اشوف خلقته لا هو ولا اهله ي اما هطرده قدام الناس كلها
نهال: ليه بس يابابا م احنا اتفقنا امبارح..ف حاجة حصلت زعلتك؟
الاب: البيه مستغفلك كان خاطب قبلك وضحك ع خطيبته وبعد م شبع سابها
وكان عايز يعمل كده معاكى
قسمآ عظمآ لو شوفت خلقته او انتى فتحتى سيرة عنه بعد كده مش هتعرفى اعمل ايه
مامتها: روحى بلغيه يانهال بالى باباكى قاله ..وياريت تسيبى الفرقة الى انتو فيها سوا
وميجلكيش تانى شغلك ..مفهوم
نهال: (دموع محبوسة جريت ع فونها واتصلت بيه)
الو ... بقى كنت خاطب يانادر هه!
نادر: انا ...انا كنت هقولك فالوقت المناسب(مرتبك)
نهال: انت جزمة وقليل الادب وزبالة ..ومش عايزة اشوفك وبابا حالف انك لو جيت هنا هيقطع رجلك يالى معندكش ضمير
صرخت فوشه ...وقفلت المكالمة.
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
علبة شيكولا ... وزيارة عائليه من مى ووسام وبتول عند كاميليا فالبيت
بس الغريب ان مى مفتحتش كلام خالص لما رجعو ببتول وكان كل اهتمامها ببتول وبصحتها بقت كويسة ولالا ومحسستش وسام انها اتدايقت من طريقة كلامه مع كاميليا الى اول مرة تشوفها دى
كاميليا: انا مش عارفة انتو ليه تعبتو نفسكم ، والله مش كان ليه لازمة كل ده
وسام: ازاى كفايه انك عرضتى نفسك لحادثة عشان بتول
مى: ده اقل حاجة ممكن نشكرك بيها (ابتسامة مصطنعه)
كاميليا: طيب تشربو ايه ؟
وسام: متتعبيش نفسك احنا مش ضيوف
مى: (بتبص ع طريقة جوزها معاها باستغراب)
كاميليا: لا والله لازم تشربو حاجة ، انتو اول مرة تشرفونى فالبيت
وسام: طيب خلاص ممكن قهوة
مى: انا ميرسى مش بشرب دلوقتى حاجة
دخلت كاميليا وعملت القهوة وجت
كاميليا: موضوع جزعة دراعى دى خلتنى مسافرش لشغلى ، صهيب فرحان من ساعتها
ميعرفش ان المم عايز كده
مى: (بتضحك ببرود) ههههه اه ربنا يخليهولك..اومال باباه فين ؟
كاميليا: لا بابا صهيب ..انا وهو منفصلين من زمان
صهيب دخل جاب صورة لراجل فبرواز وجه
صهيب: بصى يا تنت ..ده بابا وجيه
كاميليا: بس ياصهيب عيب روح رجع الصورة مكانها
وسام: ده بابا صهيب ؟
كاميليا: لا ده جوزى التانى الى اتجوزته بعد بابا صهيب..ربى صهيب وخده وهو فاللفه ..بس للاسف اتوفى السنة الى فاتت
وسام: الله يرحمه
مى: الله يرحمه..متزعليش نفسك الرجاله كتير و ع قفا مين يشيل بس النفس (بتبص ناحية جوزها)
كاميليا حست ان مى بتتريق بس عدت الموضوع
خدو قعدتهم وروحو
ومن اول من دخلو من باب الشقه..
مى: (مغيره صوتها وبتتكلم بتريقه) لا والله متتعبيش نفسك يا كاميليا احنا مش ضيوف
وهى زى العرية
هيهيهي مهيهيهي
وخدتنى معاك ليه ...ده انا شكلى كنت معكرة عليكو الجو
وسام: فيه ايه يا مى ؟ ! (بزعيق)
مى: فيه ايه ..رافع التكلفة بينك وبينها ويا وسام ويا كامنجا عادى كده كأنكو كنتو ولاد خاله قبل الحرب
وانا معرفش
انت تعرف الست دى !!
وسام: شكل الجنونة هبت ..(داخل اوضته) انا هغير وانام لانها مش طالبة
مى: (جريت وسبقته) لا ياحبيبى روح لست كامنجا بتاعتك الى كنت رومانسى وحنون اوى معاها وواسيها عشان ياعينى اتطلقت مرة
واترملت مرة
روح شكلها محتاجة لراجل (بتزوقه فصدرة ورزعت باب الاوضة فوشه وقفلت بالمفتاح)
وسام: تانى رجعنا لرزع الباب!! افتحى يامى وبلاش جنان
مى: نام فأى حتة مش طايقة اشوفك قدامى ولا المحك ..وهعرف حكايتها ايه ست كامنجا دى حااااااااضر
وسام: طب هاتى هدومى ..طب هنام فين
بتول: (بتشده من بنطلونه) بابى ممكن اثمحلك تنام معايا فأوضتى انهاردة..بث اتثالحو بثرعة لانى مش بحب حد يكتحم خصوصبتى ماثى
انهاردة وبث سماح عثان اانت بابى...ورايا
سابته ودخلت .. وسام يبص بصة ع باب الاوضة وع بتول وفالاخر قال
" من مى لبنت مى واخرتك عنبر المختلين يا وسام !"
♡♡♡♡♡♡♡♡♡♡♡♡♡♡♡♡♡
استنوها يوميآ
#ويسو_وميوش_وتوتا_وخلصت_الحدوتة
#لنورإسماعيل
ليست هناك تعليقات:
إرسال تعليق