❄❄❄❄❄❄❄❄❄❄❄❄❄
ورقة وقلم ..
وشريف بيكتب كل حاجة عرفها عن نهال ..عندها كام سنة
بتشتغل ايه وفين
ساكنة فين
معقول فكام ساعة بس جمع كل المعلومات دى !! الى بيعوز حاجة بيوصلها
قاعد فالشغل وسرحان ..لان من ضمن المعلومات انها ع علاقة حب بحد من زمايلها بتوع الفرقة وتقريبآ هما اصحاب فكرة الفرقة دى
وخمن شريف انه يكون الولد الى كانت واقفه معاه فالحفلة ..بس طبعآ
كان لايص كالعادة وكان عايز استشارة قاضى الغرام "وسام"
بس هو فين وسام دلوقتى ؟؟! هو فاكر انه بيجدد شهر عسل
ومش كان عارف انه بيقضى يوم بصل ...
" يافندم حضرتك ممكن تبعت اى حد للاوتيل يقول للسيرفيس يطلع للاوضة هيلاقى البطايق وكل حاجة تثبت ان الست دى مراتى "
الظابط: (بيفطر وعامل نفسه انه مش سامعهم)
مى: انا بجد مش فاهمة ! احنا هنا ليه اساسا..احنا متجوزين
هو حرام راجل يبوس مراته فالشارع؟!
الظابط: (بياكل وبيتكلم ببرود) واعرف منين انكم متجوزين .. الوضع الى شوفته ده ميقولش ان حضرته جوزك ولا انتى مراته
واقعدولنا شويه ع جنب انتو صدعتونا من ساعة م جيتو
وسام: ايوة وبعدين يعنى ..بقول لحضرتك ف اثبات انها مراتى بس للاسف البطايق مش معانا
الظابط: ونازل من غير بطاقتك ليه ؟؟ هتعوم
مى: حضرتك ايه الظرف ده لو سمحت متتريقش ع جوزى حبيبى
وسام: (قرصها فكتفها بغيظ) اسكتى !! مش كفاية الى ودتينا ليه بسبب جنانك حرام عليكى ياشيخه
الظابط: اااااه مش عاجبك كلامى يا مدام ..خلاص ممكن منتكلمش ويبقى فعل .. يا صول اسماعيل!!
وسام: لا والنبى خلاص هى اسفه .. (ميل ع ودانها) اتخرسى شويه هيظبط امى الصول ده اسكتى شوية
مى: لو سمحت احنا من حقنا ان حد فينا يروح مع عسكرى من بتوعك ، للاوتيل ونوريك البطايق كمان
بدل م انت من ساعة م قبضت علينا وانت مذنبنا كده
وسام: ارجوك يا فندم خلينى اروح اجيبهم..والله م ينفع كده انا راجل محترم وعندى بنت وهى والله العظيم مراتى
الظابط: طب لو هى مراتك يا راجل يا محترم ..ازاى تعملو كده فالشارع ..خليتو ايه للناس الزبالة
وسام بص ع مى بصة باستياء ورجع بص للظابط...
وسام: معلش احنا عارفين اننا غلطانين..ممكن ارجوك بقى نروح للاوتيل وعادى لو عاوز تخلى 15 عسكرى معايا انا موافق
مى: وافق بقى ..اليوم باظ ياناس اوووف ..
♡♡♡♡♡♡♡♡♡♡♡♡♡♡♡♡♡
"قولى ياسامح ..هو جوازنا جه غلطة..ولا احنا الى اتسرعنا نركب 2 مش ممكن يكونو سوا "
سامح: (بيغير للبيبى ) ايه الى بتقوليه ده يا منة ؟ مالك من ساعة م رجعتى من حفلة مى من يومين وانتى متغيرة
حصل حاجة هناك
منة : (بتحضر الببرونة لابنها وسرحانة فأفكارها) لا ابدآ..بس مى مش ناسية الحكاية القديمة
سامح: حكاية ايه
منة: حكاية انى ..(بتتهرب) فكك من انها حكاية ايه بس انا عايزة اقولها انى فاقسة حركاتها، والحفلة ياسيدى الى كانت عاملاها دى عاملاها مخصوص عشان تغيظنى..لان مافيش اى مناسبة ليها
قال ايه اول مرة يقولها بحبك..ايه الهبل ده
طبعآ هى حابة تفكرنى انى فاليوم ده وقعت واغمى عليا علشان ....
(سكتت عن الكلام وافتكرت ان اصلا سامح لحد دلوقتى ميعرفش ايه سبب اغمائها اليوم ده !)
سامح: كملى عشان ايه ؟
منة: لا مش مهم ..المهم انى فاهمة مى بتعمل ليه كده كويس اوى ..هى عايزة تغيظنا كلنا انها مبسوطة وسعيدة فجوازها
وبيعملو حفلات وبيطلعو رحلات واحنا بقى الجوازات السكة !
سامح: سكة!! (كشر) طيب يا منة شكلك بتهرتلى عالصبح وانا مش فاضى ..انا غيرت للولد ونازل
ولما تجمعى كده وتعرفى تقولى كلام عدل زى الناس..ابقى احكى معايا
سابها ونزل ..
منة: مالو ده !! هى ناقصة (شالت ابنها) تعالى نشوف ورانا ايه انت كمان
♡♡♡♡♡♡♡♡♡♡♡♡♡♡♡♡♡
شريف واقف فعز الشمس..قدام المكان الى بتدى فيه دروس رقص تانجو
هى مين
"نهال طبعآ" ومستنيها تطلع
وشغال يبص فساعته، هو عرف عنها انها بتطلع دلوقتى تروح وتنزل بليل للاستديو الصغير الى بيروحوه كلهم يسجلو اغانى فرقتهم
فضل واقف متسمر ..لحد م جه حد رزل يقطع انتظاره ليها
"يابيه يابيه ..حاجة لله والنبى "
شريف: حاجة لله ايه يابنى هنا (بيضحك) هههههه ف حد بيشحت فالمكان الراقى ده
الشحات: يابيه انت بتضحك ..يارب يخليك اى فكة ربنا يسترها معاك
شريف مش عارف يخلص من غتاتة الواد .. وطلعت نهال ومعاها نادر! الحد المرتبطة بيه
شريف: يابنى اوعى هتبوظ عليا الشغل
الشحات: يارب تتجوزها يابيه لتجيب اى حاجة
شريف: اتجوزها !! (وطقت فدماغه فكرة مجنونة ) طب اسمع هديك 50 جنية مقفولة وتعمل الى اقولك عليه
الشحات : طب هات ال 50 شمعة الاول
شريف: 50 شمعة !! احنا واقفين فسبوع (حط ايده فجيبه) خد
اسمع بقى شايف البنت والولد الى هناك دول
الشحات: ايوة يابيه
شريف: هتروح تعمل كالاتى
والشحات بيسمع من شريف كانت نهال واقفة مع نادر وبيتكلمو شوية
نهال: هتعمل ايه بليل؟
نادر: مش عارف ...ايه رأيك لو نخرج سوا بليل
نهال: اوك هشوف الدنيا عندى واكلمك
نادر: تمام
الشحات قرب عليهم ...
الشحات: يابيه يابيه حاجة لله
نادر: مافيش فكة الله يسهلك
الشحات: يارب تتجوز البت الى كنت بتبوسها امبارح
نهال: بتبوسها ؟ (بصت بصة وحشة لنادر)
نادر: ببوس مين ياض غور من هنا
الشحات: يابيه البت الحلوة الى كنت بتبوسها هنا امبارح وبلامارة كنتو ورا الشجرة دى ..
نهال: ايه ده يا نادر ؟؟
نادر: الواد ده كداب ..غور ياض من هنا (مد ايده عليه وزقه وشتمه)
الواد جرى وغمز لشريف الى بيراقب الاحداث من بعيد لبعيد ..
نهال: ايه السخافة الى سمعتها دى ؟ مين الى كانت معاك يااستاذ ؟
نادر: وحياة ربنا مكنتش مع حد ده عيل متخلف
نهال: وهو هيتبلى عليك ليه هو يعرفك منين اصلا
نادر: والله م اعرفه ولا حصل الكلام ده وبراحتك يا نهال انتى شكلك عايزة تتخانقى معايا وخلاص
نهال: اتخانق ! اوك يا نادر انا ماشية
مشيت وسابته وهو وقف زى الصنم ومتحركش .. ابتسم شريف ابتسامة شر من بعيد وكأنه كسب اول جولة!
♡♡♡♡♡♡♡♡♡♡♡♡♡♡♡♡♡
مى :ها صدقت بقى اننا متجوزين وانكم بوظتو علينا الويك اند عالفاضى
الظابط: (بيبص فالبطايق) ولما انتو متجوزين ..وحضراتكم ناس محترمة كده بتنزلو من غير اثبات شخصية وبتقعدو فحتة مقطوعه بطريقة مُخله وكمان نازلين فبعض بوس فقلب الشارع العام!
من التاريخ المكتوب فالبطايق حتى مكتوب انكم متجوزين من زمان..مش عرايس جداد ومجانين بشهر العسل
وسام: (متدايق عالمحاضرات الى خدها ) معلش يافندم حصل خير واحنا متأسفين
الظابط: احنا هنسيبكم تمشو بس عشان شكلك محترم
مى: وانا الى مش محترمة يعنى ؟؟!
الظابط: (معبرش مى اصلا) اتفضلو بطايقكم وحجاتكم ..بس ياريت بعدين متتكررش لانها هترسى ع 9 شهور وضع مخل بالاداب فالشارع العام..اظن مفهوم
خرجو ووسام مش طايق يسمع كلمة من مى نهااائى ..
مى: ويسو ..استنى (لحقته) مالك بتمشى كأنك مش سامعنى كده ليه
وسام: يلا عشان مش طايق اسمع حاجة منك..
مى: ياسلاام!! وانا مالى هو انا اعرف ان البوليس هيعدى فالوقت ده ويقفشنا
وبعدين الحق عليا عايزة اخرجك من الموود بأى شكل
وسام: مود وزفت ايه ..انتى عارفة كويس انها رسيت ع كلمتين ماسخين من الظابط
ده لو ظابط رزل كان سيادتك رماكى فالحجز مع البنات الحرامية والنشاله والمشبوهه وانا خدتلى طريحة حلوة من المخبرين
مى: يوووه وخلاص وطلعنا ، هنقضيها كان وكان م خلاص ايه الدراما دى
وسام: عندك حق ..واحدة عندها برود بكل حاجة زيك تقول كده ، احنا ممسوكين اشتباه اداب ياهانم واحنا متجوزين، كله بسبب عمايلك السودا وانا ماشى وراكى زى الاهبل
مى: ياسلاام..دلوقت بقت عمايل سودا..م كانت عجباك امبارح
ومبسوط لحد م اتعكشنا
وسام: اتعكشنا !! طب يلا اخلصى قدامى عشان نعمل تشيك اوت ونرجع القاهرة
مى: خلاص حقك عليا ياستاذ وسام انا غلطانة انى عايزة افرحك واكونلك زوجه شقية وحبوبة ومرحه ومش خنيقه
ومللة زى كل الزوجات ..اوووف دى عيشة بقت تزهق
سابته ومشيت قدامة وهى بوزها شبرين ..وهو وراها بيخبط كف ع كف ومخنوق
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
الباب اتفتح ..واتقفل مرة واحدة
كانت غادة قاعدة قدام التى فى بتشوف فيلم وعاملة طبق فشار كبيييييير وبتاكل ..
غادة: ايه ده انت جيت
ممدوح: ايه مستغربة انى آجى بيتى يعنى
غادة: لا ابدآ اهلا بيك ياخويا
ممدوح: بقالى 10 ايام عند امى ولا تتصلى ولا تسألى ، للدرجة دى انا مش فارق معاكى ياغادة
غادة: (بتاكل وباصة للتى فى ) والله يا ممدوح انا مش ببص للتفاهات دى ، محدش قالك امشى ومحدش قالك اقعد 10 ايام عند امك
متعملهاش ليلة بقى
ممدوح: حاضر ياستى .. (قام ودخل اوضته وغير وطلع)
عملتى اكل انهاردة ؟
غادة : احم .. اكل !!(اتعدلت فقاعدتها)
ممدوح: اه ..انا واقع من الجوع، وبعدين انا قبل م امشى الفريزر كان ف فراخ ولحمة تقريبآ
وسايبلك فلوس
غادة: هو انت مكلتش عند امك؟؟
ممدوح: لا .. كانت تعبانة انهاردة ومعملتش اكل..فين الاكل ياغادة
غادة : مممم (سكتت شوية وبعدين رفعت صوتها) اكل ايه الى هعمله
ده ده ..الفريزر يدوب كان ف 3 فرخات وكيلو ونص لحمة وانت مش سايب غير 700 جنية
ممدوح: يعنى انتى تعبانة ومقدرتيش تعملى اكل ..خلاص هقوم اجهز انا
(داخل المطبخ)
غادة: مافيش اكل عندك ..
ممدوح: مافيش ازاى ؟
غادة: يعنى مافيش حاجة فالفريزر ولافالتلاجه
ممدوح: ليه والاكل راح فين ؟؟
غادة: الله انت مش سايبنى 10 ايام.عايزهم يبقو موجودين يعنى مستنين تشريف جنابك
ممدوح: كلتى الاكل كله يا غادة ! (برء عنيه)
غادة: يووووه بقى مش حامل وفشهورى الاخيرة ومحتاجه تغذيه
ممدوح: طب والفلوس؟
غادة: صرفتها لان الفريزر خلص 3 يوم تقريبآ
ممدوح: (ماسك نفسه ووشه احمر واتعصب) طيب ياغادة ..بالهنا والشفا ياستى
فتح ادرف المطبخ وكأنة بيدور ع حاجة
غادة: بتدور ع ايه عندك ؟
ممدوح: كيلو الحلاوة بالبندق ..هعملى سندوتش
غادة: (دخلت المطبخ) لا بح ..كل سنة وانت طيب
ممدوح: خلصتيه ؟!!
غادة: من زمااااااااااان ..كنت بحلى بيه اساسآ
ممدوح : ااااااااااااااااااااااه (بيخبط دماغه فالحيطة وبيصرخ)
غادة: مالك يا ممدوح.. ! وانا مالى
سابته ودخلت بمنتهى البرود وهى بيخبط فدماغه ومش مبطل وبيصرخ وع كلمة واحدة
"ياااااااارب خدنى ..خدنى خدنى"
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
اليوم عدى ...
وسام ومى رجعو القاهرة ، وراحو اخدوا بتول من عند سهر ..بس شبه متخاصمين ومش بيتكلمو سوا
مى مقموصة من وسام عشان رد فعله بعد الى حصلهم ، وهو متدايق منها برغم انه عارف انها متقصدش الفصل البايخ الى حصلهم
عدى يومين وهما ع نفس الحال ..ممكن كلام ع الاد عشان قدام بتول ومتحسش بحاجة
بس لسه متخاصمين ومى مقموصة اوووى لانها عملت كل حاجة تفرحه وفالنهاية نكد عليها
وفنهاية اليومين وبعد يوم شغل طويل لوسام ولمى كانت هى رجعت وواقفة فالمطبخ وبتعمل اكل
عشان العشا ..وبتتكلم فون
مى: هو خلاص اتعود ع انى اصالحه الاول ، ايه الى غلطت ف انا يعنى ..الموضوع من الاول كان هزار
سهر: بس يا مى يعتبر الظابط بهدله عشانك ..والرحلة قلبت بغم
مى: قلبت بغم عليا وعليه مش لوحده ..وخلاص
سهر: طب ابتدى انتى بالصلح
مى: (دخلت اوضتها وبتبرد ضوافرها) والله لو اتنطط مش دى كلمته ..مووش هصالحك يا وسام
بتول جاية بتجرى من اوضتها ..
بتول: مامى ..مامى ف ريحة حاجة بتتحرق
مى: يالهوى!! البيتزا
جريت مى ورمت الفون وفتحت الفرن لاقت البيتزا الى كانت عاملاها للعشا متفحمة عالاخر!!
مى: اعاااااااا ...ياساتر يارب دى مش بيتزا دى فطيرة فحم
بتول: مامى ارميها دى بقت وحسة موت
مى: طبعآ هرميها يا بيتى اومال هناكلها يعنى ...احضر عشا ايه لابوكى الشملول دلوقتى
كان دخل وسام من الباب وماشى ع طراطيف صوابعه وسامعها
وسام: (دخل وباسها فودنها بحب) متعمليش حاجة للشملول..احنا هنلبس كلنا ونخرج نتعشى برة ، ولايهمك يا مشمشتى
مى: (زودت فالقمص بس بدلع ومشيت ودخلت اوضتها وسابته )
بتول: بابى ..مامى هتلبس فساعتين وكتا مس هيبقا عسا ..لما تخلصو قولولى وانا كاهزة
(مشيت وراحت اوضتها)
وسام ابتسم من كلام بتول ..وفتح الباب ع مى وقفل وراه وهو بيقول
" هو شكله هيبقى سحوووور ..قال الجميل زعلان منى قال"
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
" يا مى يا حبيبتى لسه هاخد العربية واطلع اجيبها واروحها وارجع تانى ، م تجيبيها انتى"
مى: اولا انا بجهز لفساتين طالعه ناو من الاتيليه ، وامنية مش قاعدة
ولازم اكون موجودة
ثانيآ بقى انا لسه هاخد تاكس واروح لمدرسة بنتك ..وارجع فتاكس وارف وانت معاك العربية
وسام: طب خلاص خلاص بطلى لوك لوك كتير ..سلام
قام وسام واخد حجاته ..وراح ناحية مكتب شريف
وسام: شيرو لو المدير عدى وسأل قوله راح مشوار وراجع
شريف: رايح فين؟
وسام: بتول الباص عطلان وهروح اروحها من المدرسة ..مش هتأخر ماشى
شريف: عيش ولا يهمك..قال وعايزينى اتجوز ..هيهيهى
(رجع يتكلم اسكايب)
قوليلى بقى يعنى بعد م بتصحى من النوم بتعملى ايه ...لا انا مش بصحى من النوم نهاااائى"
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
صهيب: مامى هتيجى تاخدنى دلوقتى ..
بتول: وانا كمان ..بث هى اتأخرت اوى
صهيب: دلوقتى تيجى ..انا نفثى اثوف مامتك اوى
بتول: اوك هى اول م تيجى هخليها تثلم عليك
صهيب: ماثى
دخلت مامت صهيب..
صهيب: مامى جت ..مامى جت
كاميليا: بوبى حبيب مامى ... يلا هات حجاتك وتعالى
صهيب: مامى عايز اعرفك ع بنوتة عثولة معايا فالكلاس
كاميليا: اوك يا حبيبى
صهيب شد مامته ناحية بتول الى كانت واقفة ع جنب ومستنيه مامتها.
كاميليا : ازيك يا بتول ياقمر
بتول: اسيك يا تنت
كاميليا: هى لسه مامى مجاتش ؟؟
بتول:(بتبص بعيد) ايه ده !! بابى الى جاى ياخدنى (جريت عليه بفرحة ) باااابى
وقفت كاميليا واتدورت ناحية بتول وهى بتجرى ، وابتسمت
وسام: حبيبة قلب بابى ..انا جيتلك عشان مامى مشغولة يلا عشان نروح سوا
بتول: يلا بابى حبيبى ..بث تعالى نكيب الشنتة وتثلم ع تنت مامة صهيب
وسام: مش بسلم ع طنطات يا بتول متحرجنيش(فودنها)
بتول: يابابى اهيه دى تنت امروة خالث مالث جدآ
وسام راح يجيب الشنطة مع بتول ..وقربته بتول لكاميليا مامت صهيب
كاميليا: يا نهار ابيض!! بجد مش مصدقة واستنين لحد م تقرب
ازيك يا وسام
وسام: (وقف مستغرب لدقيقة) الشكل مش غريب بس ...
كاميليا: مش وسام عاصم بردو!! كاميليا حسن يا وسام
كاميليا دفعتك
وسام: كاميلياااااا (ابتسم) ازيك شكلك اتغير اوى وربنا معرفتكيش
كاميليا: مش اوى يعنى ... وانت كمان اتغيرت شوية
ايه اخبارك ، بنوتك عسولة اوى ربنا يخليهالك
وسام: تسلمى يا كاميليا عاملة انتى ايه ..صهيب ابنك صديق صدوق لبتول بتحكيلى عنه كتير
كاميليا: اه وهو كمان بيعزها اوى..(مدت ايده لصهيب) مش يلا بقى يا بوبى
وسام: (ابتسم ولعب فشعر صهيب وهى ماشيه)
كاميلياه: خلينا نشوفك..فرصة سعيدة ومفجأة اجمل
مشيت كاميليا هى وصهيب..وسام وقف شوية وباصص ناحيتها
بتول: يابابى ..باااااااااابى يلا بقى الشمس وجعتنى
وسام: اه يا حبيبة بابى يلا ..
مشيو ورح بتول للبيت ..ومشى رجع للشغل تانى ..بس تقريبآ كان سرحان شوية
ومكانش مركز
وفالبريك ..
شريف: بس ياعم وهفضل وراها لحد م تسلم..عيييييييب ده انا الباشا
وسام: (سرحان) ممممم
شريف: ايه ياعم عبدالسميع انت سامعنى !!
وسام: هه!
شريف: هه.. انا بتكلم من اول امبارح العصر وانت الى طالع عليك مممم ممممم بقولك عالبت نهال جارتكم دى وانت مش معايا
وسام: مممم تمام
شريف: ايه هو الى تمام انت من ساعة م جبت بنتك وجيت وانت متغير..ف حاجة حصلت معاك ولا ايه
وسام: حاجة حصلت؟
شريف: متقلقنيش عليك ياصاحبى..اينعم الشمس حامية برة بس دى مش اعراض ضربة شمس
وسام: عارف لما تتفاجئ تشوف حد بعد يمكن 16 سنة صدفة غريبة جدآ ..
شريف: انطق ياض شوفت مين ..السرحان ده اكيد موزة
اصل الواحد مش هيسرح فسحنة من سحن الرجاله يعنى دول شبه القرود
وسام: هو انا حكيتلك ع اول حب فحياتى قبل كده ؟؟!
شريف: نعم ياخويا ؟! (قرب الكرسى ليه) لا انت تبصلى وتصحصح وتجيب الشريط من اوله
من الاول خااااااااااالص
♡♡♡♡♡♡♡♡♡♡♡♡♡♡♡♡♡
استنوها يوميآ
#ويسو_وميوش_وتوتا_وخلصت_الحدوتة
#لنورإسماعيل
ليست هناك تعليقات:
إرسال تعليق