❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
مسك ايدها بحب وهو مميل فالكتاب ورفع عنيه
وسام: عارفة انتى دخلتى فسطر جميل اوى كنت بقراه
مى: (مكشرة) بيقول ايه ؟
وسام: والنظرة منها بألف عام ...
مى بصاله وبصت بعيد ، قام من عالكرسى وشد وشها ناحيته
وسام: بصيلى بقى خلينى اعيش..هو الف سنة عليا شوية ♥
مى: لا طبعآ مش شوية عليك يا حبيبى
وسام: طب مكشرة ليه ومش بتبصيلى ولا بتتكلمى معايا
مى: عادى ..مخنوقة شوية
وسام: (بيلعب فصوابعها بحب) ليه مخنوقة؟
مى: صليت انت استخارة
وسام هز دماغة يعنى اه
مى: وايه النتيجة ؟
وسام: مهما كانت النتيجة .. انا مستنى رأيك انتى
والى هتقولى عليه هعمله من غير تردد
مى سكتت واتنهدت وفكت ايدها من ايده
مى: الى ربنا رايده هيكون ان شاء الله ، هسيبك اروح احضر العشا
وسام: (شدها تانى ناحيته) بس انا مش عايزك تحضرى العشا وانتى مكشرة كده
مى: ليه بيطلع وحش
وسام: بصراحه لما بتحضريه وانتى زعلانة بيبقى ...
مى: هاه !
وسام: بيبقى حلو اوى لكن لما بتحضريه وانتى مبسوطة وفاكه التكشيرة ...
مى: (ابتسمت شوية) بيبقى ايه؟
وسام: بيبقى اجمل اكل اكلته فحياتى (ضمها لحضنه ) انتى احلى بنوتة خطفتنى من 6 سنين
ومبحبش اشوفها مكشرة
عشان ضحكتك وجنانك هما السبب فحبى ليكى الى مالوش حدود
مى ...انا عمرى م هعمل حاجة تدايقكم ولا تبعدنى عنكم
ولو يوم حصل منى حاجة وحشة .. ابقى قررى ساعتها انك تسيبينى
عشان فعلا مش هبقى جدير بيكى وببنتى
وافتكرى الكلام ده كويس
مى: (بصتله بحنان شديد) انا عمرى م اقرر ابعد عنك يا وسام ..مش كلام اغانى
صدقنى محدش بيقدر يبعد عن عنيه ويقرر يعيش اعمى!
وسام ابتسم جامد ع طريقة كلامها
مى: متستغربش انى بقيت شبهك حتى فالكلام..دى عشرة 6 سنين للاحسن
لازم ولو عالاقل ابقى جزء منك فحاجة ..ربنا يخيلك ليا
وسام: ربنا يخليكى ليا ولبيتنا ولحياتى ..عشان انتى اغلى مافيها (رفع كف ايدها وباسه من جوه وهو عينه فعنيها)
مى: (ابتسمت اوى ) اسيبك تكمل الرواية بقى
وسام: رواية ايه ؟؟
مى: الى انت بتقراها
وسام: لا دى خلصت من زمان ...بس فاضل مشهد اخير بس
مى: طب خلاص هروح احضر العشا وانت تكون قريته وخلصته
وسام: لا ماهو مش هينفع تحضرى انتى وانا اكمله لازم تكونى موجودة
مى: ليه بقى ؟
وسام: عشان انتى بطلة احداثة
وقفل الباب برجله وشدها عليه وهى بتضحك وهو بيبص برة بخبث وحذر بطريقه تضحك ..خلت ضحكتها عليت
وشاور هووووووووووس!!
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
" ايه مش هتطلبى ولا ايه ؟"
نهال: (ماسكة المنيو وبتختار تتعشا ايه) ممممم طب خليها عصير برتقان فريش الاول وبعدين نشوف ايه العشا
شريف: اوك (حط المنيو ع جنب) قوليلى بقى يا ستى ايه اخبارك
نهال: تمام .. وانت
شريف: انا كويس، بس مش عارف يانهال حاسس انك مش مقربة منى
او مش عايزة تقربى
نهال: ليه بتقول كده ..عادى يعنى
احنا مش بقالنا 3 شهور مخطوبين
شريف: بس تصرفاتك كده ...
نهال: (قاطعته) غريبة عليك مش كده ... اصل انت اتعودت ع اسلوب معين من كل بنت عرفتها
فلما جيت انا بشخصيتى واسلوب حياتى
مستغرب ومش مبسوط
شريف: (كان بيشرب بطل يشرب وساب الميه ) كل بنت !! انتى بتعرفى امتى
نهال: اسفه انى بقطعك للمرة التانية ..قولتلك قبل كده لما بحب اعرف حاجة بعرفها
ولما بحب اطنش بطنش
شريف: يعنى انتى عرفتى انى عرفت بنات كتير وكنت خاطب امنية ،، وعرفتى ايه تانى بقى ؟
نهال: ممممم مش مهم ، هو ف حاجة مهمة تانى فحياتك مخبيها
شريف: حاجه مهمة ازاى
نهال: انا الى بسألك
وهما بيتكلمو جت بنوتة صاحبت نهال وسلمت عليها جامد
صديقتها: نهال!! واااااو بتعملى ايه هنا
نهال:يارا ازيك.. ابدآ بتعشى مع خطيبى
اعرفكم ببعض شريف
دى يارا
شريف: اه اهلا وسهلا
يارا: طب امشى لاكون معطلاكم عن جو رومانسى جميل ولا حاجه
نهال: انتى بتهزرى ..لا طبعآ هتقعدى وتتعشى معانا ..مش كده ولا ايه ياشريف؟
شريف: ها! اه طبعا اتفضلى يا انسة زمارة ! قصدى يارا اتفضلى
نهال سابت شريف وابتدت تحكى مع صاحبتها ...شوية وجت واحدة تانية
صديقة 2: نهال ..ازيك ايه المفجأة الحلوة دى
شريف: هو انهاردة يوم المفاجئات ولا ايه انا مش فاهم !
نهال:(بصتله من فوق لتحت يعنى اسكت وقامت سلمت ع صاحبتها) اهلا يا جميلة تعالى يلا اقعدى معانا شريف هيعزمنا كلنا
مش كده يا شيرو !
شريف: شيرو !! امرى لله
اه طبعآ اهلا وسهلا
لسه مقعدتش دى وجم 2 كمان !
نهال: (بتنادى للويتر) لو سمحت!
الويتر جه
نهال: عايزين تربيزة اكبر وعايزين 8 اسكالوب ..وسلطات خضرا وطحينة
وبابا غنوج
صديقه 3: بليز يا نهال انا كنت حابة اطلب حاجة تانية ممكن !
نهال: اه طبعآ شيرو حبيبى فييس اوى ومش بخيل خالص مش كده يا روحى !
شريف: (متنح لهم) هاه ! اه انا مش بخيل ايوة
صديقة 3: لو سمحت عايزة نص فرخه مشوية ..ورز بسماتيو
وكول سلو
نهال: وانت ياشريف ؟ (لسه هيتكلم مش استنت وقاطعته) استنى استنى هطلبلك انا
هاتله كفته ضانى ..مش انت بتحبها بردو
وسلطاتها ورز بليز
الويتر: تحت امرك يا فندم اى طلبات تانية
نهال: متنساش الكوكا بس كلنا دايت اوك
صديقة 2: نهال بليز هطلب حاجة غير الاسكالوب.. كنت عايزة سوشى
نهال: اه براحتك ..والاسكالوب موجود برضو يعنى
طلبو الطلبات وشريف بيخبط ع راسه بايده وبيبص بعيد وهى بتتكلم مع صحباتها بعد م اتنقلو ع تربيزة اكبر
جت الاوردرات ... وابتدوا يتعشو
كانو البنات بياكلو ..وكل م شريف يمد ايده ع اكله واحدة تخطف من قدامه حاجة
من الاوردر بتاعه
يبص لها ويحاول ياكل شوكة غيرها يلاقى غيرها خطفها
ونهال هاتك ياضحك معاهم ولا هى معاه من الاساس
العشا خلص وشريف مأكلش ولا فتفوتة من الاكل .. البنات بعد العشا
قامو بقى
اتيكيت !
البنات: طيب يانهال نسيبك انتى وخطيبك تستمتعو بوقتكم سوا ..واضح اننا قطعنا عليكم جو جميل
شريف: لا وليه استنو لما اجيبلكم تاكسيات توصلكم وكروت شحن لكل واحدة
نهال: (بعصبية) شريف!!
شريف: بهزر (بصوت متأثر عالاكل والفاتورة الى لسه مش شافها) بهزر يا حبيبة شيرووو
صديقة منهم: طب اوك خلاص فكرة لان البيت عندى بعيد وساكنة قرب نهال ابقى اركب معاكم بقى
شريف باصص وحاسس انه هيقوم ينفجر فيهم ..الويتر جه بال حساب
شريف بيقرا
شريف: ايه ده!!
الويتر: التشيك يا فندم .. حساب العشا 542 جنية
زائد 10% خدمة
و 10% نضافه
يبقى الحساب فالنهاية كده ...
شريف: (مسك بطنه) وربنا انا م كلت حاجة !
نهال: جرى ايه يا شريف م تدفع الله!
شريف: طب ادينى ال 10% نضافه اكلهم طيب
الويتر: يافندم الحساب من فضلك
شريف: حافظ رقم البوليس ولا ؟؟
الويتر: افندم
نهال: يوووووه بطل هزار ي اخى (قامت وجت ناحيته وطلعت المحفظة ومنها الكريديت كارد وادتهاله)
اتفضل ياسيدى
مشى الويتر
شريف: ايه المشهد الى عدى خطف ده !
نهال: مشهد ايه ؟
شريف: جيتى وسحبتى الفلوس ولا كأنى انا واحد ميت مثلا
نهال: بس بس .. ايه ده!
اول مرة اعرف انك بخيل ..انا شكلى هغير فكرتى عنك
جه الويتر ومعاه الكريدت كارد ..خدتهم نهال وحطت ايدها فجيب شريف وهو بيبصلها ومافيش اى ريأكشن كأنه بيتفرج عليها
لاقت 50 جنية فكة ادتهم للويتر
نهال: خد دول عشانك..ميرسى..يلا ياشيرو
شريف: لا شيرو هاتيله كرسى بعجل عشان تقريبا اتشل
نهال: مممممممم تعبان يعنى ..طب خلاص خليك
يلا يا يارا
مشيت خطوتين ورجعت حطت ايدها فجيبه خدت فكه تانى ومشيت
نهال: عشان التاكس..ثانكس ياشيؤرو عالعشا كان تحفه
(بعتتله بوسة فالهوا وهو متنح ليها
مش مصدق ده بجد ولا حقيقة !
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
سامح وممدوح قاعدين سوا فشغل ممدوح ..
وكانت زيارة مهمة جدآ من سامح
سامح: انا مش فاهم لحد دلوقتى الى انت عملته ده
ممدوح: عادى اولا الشرع محللى اربعة ..وبعدين انا طلقت غادة ومن حقى اتجوز تانى
سامح: طيب ماانت طلقت غادة بسبب مصاريفها الكتير عليك ..والجواز الجديد اكيد عايز مصاريف برضو
ومتنساش ان عندك ابن
ممدوح: انت عارف الجوازه مكلفتنيش ولا مليم
سامح: ازاى ؟؟
ممدوح: دى واحدة من الاجئين من سوريا .. امى شافتها لانها كانت بتيجى تخدم مقابل الاكل والشرب
عرضت عليا اننا نتجوز بشرط ان الوقت الى بلدها فيها هتحرر اطلقها واسيبها ترجع
وانا كمان لا ف مؤخر ولا مهر ولا قايمه ولا حاجه من دى وتعيش فبيت امى عادى
قصاد هتلاقى بيت هى تقعد ف وانا اتجوز
سامح: ااااااااه جواز مصالح يعنى
ممدوح: مش مصالح ، بصراحه انا تعبت من غادة
هى ليه مرة واحدة تحولت كده
كنا كويسين وكنا بنحب بعض
ليه مرة واحدة حسيت انها بتنتقم منى ..لا وكمان شايفه نفسها عليا
و يا اسكت واحط زلط فبوقى يا اما اعمل الى انا عملته ده
سامح: بس ف تفاهم ف حاجه اسمها مودة
انت بطلاقك ليها ممكن تكون علمتها الادب وربتها
بس كان المفروض ترجعها عشان ابنكم يتربى وسطكم
ممدوح: طب والله ياسامح ياخويا كانت هترجع اسخم من الاول ، غادة لا بتتعظ
ولا بتقول الله حق
وهما بيتناقشو .. اخو غادة دخل عليهم
اخو غادة: سلامو عليكم
سامح قام وسلم لكن ممدوح سلم برخامة
اخو غادة : كويس ان الاستاذ سامح موجود ..وبعدين يا ممدوح يعنى فرمية اختى وابنك عندنا
ده
ماتلمو الدور يااخى وتعالى رد مراتك
ممدوح: كلمتين احسن من 10..اختك مبقتش تلزمنى
والولد لو عبئ عليكم هاته وانا ملزم بيه وبمصاريفه
اظن عدانى العيب
اخو غادة : (بيدوس ع نفسه) ماهو مينفعش انت فحتة وهى فحته ، احنا عارفين انها غلطانة
خلاص يا ممدوح بقى
ممدوح: انت ليه ياعم مش عايز تفهمنى ..طب قسمآ بالله اختك مش عاوزها
والولد هاته وانا ملزم بكل حاجة ليه بس لو اتمسكت بيه محدش يطالبنى بجنس مليم
اخو غادة : الله! هو انت هتتنك اكمن جيت ع نفسى وجايلك وبتصل بيك كمان ومش بترد
سامح: صلوا عالنبى يا جماعة متخلوش الشيطان يدخل ما بينكم
ممدوح: انا قولت الى عندى .. وانى ارجعها مش بالعافية ده بمزاجى
وبصراحه بقى وع بلاطة
انا اتجوزت !
اخو غادة : اتجوزت!
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
خبطة ع مكتب بكل قوة !
غادة: ايه!!! اتجوز يعنى ايه
ده كداب
ده محيلتوش الا قضا
هيتجوز بايه ... بدعا الوالدين يعنى
وازاى
وهتعيش فشقتى ولا فين
م حد يرد عليا
الام: قعدت اقولك يابنتى متخربيش ع نفسك .. يابت اهدى وهدى سرك
متوقفيش له راس براس
متعنديش فيه ، الراجل ميحبش مراته تمشى كلمتها عليه
اخوها: هو كده وبس ..وخاربة بيته بتاكل اكل يكفى 6 افراد
وشغاله صرف صرف كأنه ع بنك
ومبترحمش
له حق الراجل يكلمنى من مناخيره من عمايلك
غادة : خلاص! خلصتو الى عندكم
دلوقتى انا الوحشة وكل حاجة زفت بقت فيا ؟! وهو بقى العسل بينقط منه
لا بقى ممدوح مينطاقش
ده استنصح ع كبر
الله يرحم كانت موسختنا فالجامعة كلنا ..دلوقتى هيعمل عليا راجل!!
اخوها: اذا كنتى قدامنا بتتكلمى عنه كده اومال معاه بتعملى فيه ايه
غادة: خلاصته ...انا ايه وضعى!!
الام: ده الى همك ..خلاص بقيتى مطلقه وابنك ع كتفك
ليه يابنتى عملتى فنفسك وفينا كده
غادة: يووووه م خلاص بقى ، يعنى هى الحياة مش بتمشى غير بيهم
قوله الواد مش هيشوفه بقى
واعلى م فخيله يركبه
وانا هشوف شغلى وحياتى هتمشى زى الفل
وهو هطلع عين اهله فالمحاكم وهجيب حقى منه
والشقه من حقى انا حاضنه
رايحه ناحية اوضتها ..
الام: طب هتعملى ايه يابنتى الساعة دى ؟
غادة: هروح اطبق ع مرواحه هو والعروسة واقعد واحط رجل ع رجل دى شقتى ومن حقى
وهما ضيوف فيها
اخوها: ياغادة متتسرعيش انا هروحله تانى
غادة: هى خلصت بقى وخلاص.. وع فكرة انا بقى مش زعلانة
فردة وقلعتها من رجلى !!
وخليه يشبع بالمدام الجديدة !
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
فون مى بيرن ...
وكانت كاميليا الى بتتصل
كاميليا: الو
مى: الو اهلا
كاميليا: اسفه لو كان ف ازعاج ولا حاجة
مى: لا ابدآ
كاميليا: ازيك انتى يا مدام مى وعاملة ايه بتول
مى: كويسين ..ميرسى لسؤالك
كاميليا قالت تقصر لان واضح ان مى مش قابله تكلمها
كاميليا: طيب صهيب كان عايز يكلم بتول ممكن ؟
مى: مممم ثانية واحدة!
يابيتى !
بتول: ايوة يا مامى
مى: تعالى كلمي صهيب
بتول: حاضر (سابت اقلام الالوان والرسم وقامت ) الو
اسيك يا صهيب
صهيب: ازيك يا بتولا ..انا خليت ماما تكلمك
عسان وحستينى
بتول: (ضحكت واحمرت) المدرسة لما تيكى هنرجع نسوف بعض تانى
صهيب: لا م احنا ممكن نسوف بعض بكرة عاتى ..بكرة عيد ميلاد دانا ساحبتنا
وهى عزمانا
بتول: تيب اثتنى اكلم مامى واقولها
صهيب: ماثى
بتول: مامى ...
مى: نعم (بتقرا فمجلة)
بتول: بكرة عيد ميلاد دانا ساحبتنا فالحضانة ممكن اروح مع صهيب
مى: لما ييجى بابى قوليله
بتول: والنبى يا مامى اروح مع صهيب
مى: طيب خلاص خلاص بلاش وش.. روحى
بس هنقول لبابا برضو
بتول: هيييييييييه مثى
الو يا صهيب
مامى وافقت
صهيب: خلاث خلى بابكى يكيبك عندنا بكرة ونروح ثوا عشان هى ساكنة عندنا
بتول: ماثى ..باى باى
بتول كانت فرحانة اوى ودخلت تطلع كل لبسها وتشوف هتلبس ايه ومن ساعة م صهيب قال عالحفلة وهى مبطلتش كلام عنها
لغاية م صدعت مى خالص
ولما جه وسام مى قالتله ووافق
بتول: بث يابابى انا عايسة اكيب لدانا هدية حوووة
وسام: حاضر ياعيون بابى ..بكرة لما اوديكى هنجيب هديسة حلوة اوى
بتول: هيييييييه انا بحبك اوى خالث جدآ يابابى
وسام: انتى قلب بابى اصلا (بيبوسها)
وتانى يوم ...
مى لبست بتول فستان شيك..وعملتلها شعرها
وكانت زى القمر ونزلت مع باباها
راحو محل لعب عشان تختار الهدية ...
شاورت بتول ع لعبة كانت عبارة عن بيت كبير وجواه اوض باربى مجهزة وعربية وكل حاجة وحمام سباحه
بس كانت غالية جدآ
وسام مقدرش يشتريها ..فقرر يختار دبدوب حلو واقنع بتول ان ده هيعجبها اكتر
خدها ووداها لكاميليا ..وقالها لما الحفلة تخلص
تبقى تتصل بيه هييجى ياخدها ع بال م يروح مشوار
بتول وصلت الحفلة فايد صهيب وكانو زى القمر واتلمو كل اصحابهم عليهم
بنوتة صاحبتهم: ايه ده! الله يابتول انتى حووة خالث
بتول: مامى الى كابتلى الفثتان ده وثرحت ثعرى كتا
صهيب: كل سنة وانتى طيبة (مادد ايده بهدية لدانا)
دانا: ثانكس يا صهيب ..
خدتها وحطتها ع مكتب الهدايا وكمان بتول قدمت هديتها
لعبو وغنو وهزروا وطفو الشمع واكلو التورتة ..وغنو تانى مع فرقة العرايس الى جاية الحفلة وكان وقت ممتع
وجه وقت فتح الهدايا ..
مامت دانا كانت بتفتح الهدية وتقول اسم الى جايبها
وكل مرة يفرحو ويتفرجو عليها ودانا تفرح بيها ..وجه الدور ع هدية بتول
فتحت مامت دانا وقالت دبدوووب من بيتى ! بطريقة مفرحه
الاطفال هيصت
الا دانا صاحبة الحفلة !!
قالت بقرف وهى ماسكة الدبدوب
دانا: بيتى الهدية دى وحسة ..انا عنتى دباديب كتير خالث واحلى منها
انتى وحثة وهديتك وحثة
الاطفال بحكم برائتهم ضحكو وجريو لكن وقفت بتول مكانها وعيطت وصهيب حضنها وطبطب عليها وكان زعلان عشانها
حتى للاسف مامت دانا مخدتش بالها من الموقف عشان الهدايا الكتير الى كانت بتفتحها وتفرجها للحضور
بتول قعدت ع جنب ومشاركتش فباقى الحفلة وعيطت كتير
وصهيب بيطبطب عليها
وببراءة طفوليه بحته!
جرى ومسك هدية من المفتوحين ومن غير م حد م ياخد باله رماها عالارض وكسرها برجله عشان بتول متزعلش
شوية وكاميليا جت وسلمت عليهم واخدت الاطفال وروحت واتصلت بوسام
وسام جه وخد بتول وطول الطريق بتول مكشرة وعاقدة حواجبها
ومكتفه ايديها قدام صدرها ومش بتتكلم
مهما وسام سألها الحفلة عاملة ازى ؟ انبسطت ولالالا
طب غنيتى مع صحابك ولالا
مافيش رد
لاول مرة مياخدش باله انها زعلانة .. كان فاكر انها تعبت من مجهود الحفلة ولا حاجة
وصلو البيت
طلعها ونزل
دخلت اوضتها وانهارت فالعياط...وجريت وراها مى
مى: ايه يا بيتى فيه ايه ؟؟
بتول: (بتعيط جامد ودافنه نفسها فعروستها)
مى: حد دايقك ؟ حد كلمك
كامنجا دى قالتلك حاجة
صهيب عملك حاجة
طب ردى عليا!!
بتول: مامى انتو حثين ومث هكلمهم تانى ومث بحبكم ولا بحب بابى
مى: طب ليه بس يا بيتى حصل ايه
بتول: دانا قالت ع هديتى وحشة قدامهم كلهم وانا عيتت عثان بابى مرضيش اجيب البيت بتاع باربى وجابلى دبدوب وحث خالث
ودانا قالتلى انتى وحثة والهدية وحثة !!
دفنت نفسها فحضن مى ومى معرفتش ترد ولا تنطق عالموقف ده
رغم انها طفلة فهمت يعنى ايه احراج وكسوف وسط اصحابها
والحكاية دى ممكن تعملها عقدة فيوم من الايام
مى كانت عارفة ان وسام مش غلطان لما جاب هدية بسيطة وخمنت اكيد الهدية الى شاورت عليها بتول كانت اغلى
لانها عارفة الى فيها
المهم هدتها وحضنتها وحاولت تقنعها انه عادى ومتزعلش والمرة الجاية هتجيبلها احلى هدية
وهتبقى احلى بنوتة جابت هدية
ونيمتها بهدوووووووء واستنت رجوع وسام
رجع واستقبلته كويس واتعشو سوا
واول م قعدوا سوا فالليفنج روم:..
مى: وسام...انا خدت قرارى خلاص
وسام: قرارك فايه يا روحى ؟!
مى: انا موافقه انك تسافر ....
❄❄❄❄❄❄❄❄❄❄❄❄❄ ❄❄❄❄❄❄❄❄❄❄❄❄❄
استنونا
ويسو وميوش وتوتا وخلصت الحدوتة
#نوراسماعيل
ليست هناك تعليقات:
إرسال تعليق