♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
مى : وسام انا خدت قرارى
وسام: ف ايه يا روحى ؟
مى: انا موافقة انك تسافر
وسام انتبه لكلام مى وطفى التى فى ولف قعد فوشها ..
وسام: ب تتكلمى جد! يعنى موافقة ازاى وخدتى قرارك بناء ع ايه
مى: ليه كنت متوقع انى ارفض
وسام: بصراحه اه ..متوقع ومتأكد
مى: عشان حبيت افكر شوية بعيد عن نفسى وانانيتى ..وافتكر انى ام وفيه حد له حق يعيش احلى عيشة فالدنيا
وهى بنتى
انت عارف ان حصل مع بتول انهاردة موقف خلانى اتراجع عن اى تفكير ف انك لازم تفضل هنا جمبى واننا نفضل ع نفس المستوى
وابص لقدام شوية
وسام: حصل ايه مع بتول
مى: انهاردة احرجت وسط اصحابها بسبب الهدية الى انت اختارتها ليها توديها لصاحبتها
وسام: (سرح واتدايق) بس يامى بتول شاورت ع لعبة تمنها ...
مى: متكملش انا عارفة ، ومش زعلانة منك ولا جايبة الحق عليك
كل الحكاية اننا لازم نفكر شوية فيها
انت هتتغرب عشان تعيشنا فمستوى احسن وتشتركلها فنادى نفسها فيه
وانا هضحى بقربى جمبك وراحة بالى وانت هنا وادوس ع نفسى انك هتسافر مع بنى ادمه انا اطيق العمى ومش اطيقها عشان خاطر بتول
وسام: يعنى خلاص...اقولها نمشى فالاجراءات ؟!
مى: زى م ربنا عايز هيحصل..ومحدش بياخد غير الى مكتوب له
مش كده ولا ايه
مش ده كلامك
وسام: (ضم دماغها ليه وباسها ) الله المستعان
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
"السلام عليكم ورحمة الله"
امنية بترفع عنيها عن المكتب وكانت بتقفل حسابات الاتيليه،ولاقت الاستاذ عمران قدامها ...
عمران:انا مش هقولك زى. كل. مرة انى جيت عشان اوردر فساتين او حاجه بصراحة انا جاى عشان اشوفك
امنية:حضرتك تيجى فاى وقت. يااستاذ عمران المكان مكانك
عمران:انا بجد بنبسط اوى لما اشوفك ولما كمان بتضحكى من قلبك بتبقى ضحكة صافية دليل ع انك انسانة طيبة وعذبة اوى من جواكى
امنية:ربنا يخليك ده من ذوق حضرتك والله
عمران:هو احنا ممكن نفرد المساحه بينا اكتر وتبقى امنية وعمران من غير استاذ ومدام
امنية:(اتكسفت وحست بتلميح غريب) احم احم ...حضرتك برضو ليك احترامك وقدرك. ولازم تاخده
عمران:انا ياستى الى طلبت ومش شايف ان الطلب ده ف شئ من تقليل التقدير
امنية:اوك يا ....
عمران:هاه!
امنية:عمران (ابتسمت)
عمران: انا من اول مرة شوفتك وحاسس انى شوفتك قبل كده او اعرفك..متقوليش كلام وخلاص لان بجد ده الى بحس بيه
امنية:فعلا حتى انا
عمران:انا هستاذن عشان بلاش اعطلك اكتر من كده
امنية:بس حضرتك مشربتش حاجه طيب
عمران:مرة تانية ان شاء الله. بس ياريت المرة دى حضرتك تنورينى. واشوفك عندى فالشركة او فاى مكان حضرتك تحدديه
امنية:ان شاء الله ...ربنا يسهل
شرفتنى بجد
عمران :الشرف ليا انا ياامنية
مشى وع وشه البشاشة كالعادة ،وامنية مش مستغربة ابدا طريقته دى وتلميحاته
بس. كانت خايفه ومش عارفه ليه
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
الفراق ..
ساعات بيبقى وقعه ع النفس وحش اوى ..وسعات بيكون اريح لو اتفارقنا عن حاجه كانت سبب فتعبنا
بس لو فارقنا شخص من اقرب الاقربين فجأة
بتبقى صدمة احيانآ
لكن شريف اتغلب عالصدمة دى بمرونة المعهودة الى بياخد بيها الامور ، انهاردة باباه توفى بعد الزامه سريره فترة كبيرة
يصارع المرض
وفالاخر ربنا ريحه ..
الصوان اتنصب .. والمعزيين جم
وواقف ع باب الصوان شريف واخواته وقرايبه ووسام يستقبلو العزا
انتهز وسام وقت مافيش ناس يستقبلوهم فالصوان ، وكانت دى كلماته لشريف
وسام: البقاء لله وربنا يجعلها اخر الاحزان..ربنا مش بياخد الا علشان يعطى
شريف: الله يرحمه يا وسام ..تعب اوى الفترة الاخيرة وتعبنا كلنا حواليه
وسام: ربنا رحمته واسعه ..انت بقى تقعد ال 3
ايام العزا دول اجازة من الشغل
شريف: مش هينفع ..ده عامل وصية بيقول فيها بلاش حداد ولا عزا ولا لبس اسود
وان العزا يقتصر ع الغسل والدفن بس
وسام: يعنى افهم من كده انك هتروح بكرة الشغل
شريف: اه ..اصل لا قعادى هيرجعه ولا هيرضيه اصلا وهو فقبره
وسام: طيب خلاص الى يريحك
شريف: طب عارف ياض انا الى صعبان عليا بجد هو ايه
وسام: ايه؟
شريف: سفرك انت .. بجد مش مصدق انك خلاص اول م اجرائتك تخلص هتكت من البلد واشوفك اجازات ياض
وسام: والله انا نفسى لما بفتكر انى اول مرة امشى واسيب كل حاجه حلوة حواليا ..بيتى ومراتى وبنتى
واصحابى
وشغلى الى حبيته واتعودت عليه سنين
والناس والعشرة والصحوبية والزمالة
وهروح بلد لا اعرف حد ولا حد يعرفنى ..ابقى عامل زى الطور فالساقية مافيش قدامى غير الشغل
لا سهرة حلوة مع حد ..ولا قاعدة جميلة مع مى وبتول
ياااااااااااه ..معلش كله يهون عشانهم
انا اصلا ربنا خلقنى مييسر ليهم هما
شريف: والله ياض يا ويس حاسس انك يوم م تسافر هبكى عليك الى انا مبكتش ع ابويا لما مات
وسام ابتسم وطبطب ع كتفه ..كان داخل اكرم وصلاح يعزو شريف
اكرم: البقاء لله ياشريف
شريف: سبحان من له الدوام..نورت يااكرم اتفضل
صلاح: البقاء لله يا شريف
شريف: سبحان من له الدوام يا ابوالصلح
صلاح: قولى انتو هتدفنوه ؟
شريف: هو مين ؟
صلاح: الحج والدك
شريف: لا هنحنطه زى الفراعنه ونحطه فالنيش (زقه فكتفه دخله الصوان) ياعم ادخل
ادخل ناقصة غباء ام الى جابتك فعزا ابويا
وسام مش ماسك نفسه من الضحك
شريف: جاى عزا ابويا يستظرف هو انا ناقص !
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
غادة..
موجودة فشقتها بقالها فوق الاسبوع ، وممدوح مجاش مرة للشقه ولا شافها
وهى عايشة حياتها عادى جدآ
كانت بس مشكلتها الوحيدة فالمصاريف
باعت غويشة دهب واديها بتصرف منها ...والذل الى وصلتله خلاها تمسك نفسها شوية فالمصروفات
وتعيش زى اى حد بأعتدال
وفيوم كانت قاعده قدام التلفزيون ونيمت ابنها ..فوجئت بالباب بيتفتح
والاتنين اتفاجئو ببعض فوش بعض
ممدوح: ايه ده ! انتى بتعملى ايه هنا؟
غادة: (بصتله ببرود ورجعت بصت للتى فى ) بعمل ايه فبيتى ؟؟ حاجة غريبة والله
ممدوح: بيتك ده ايه يا ست انتى ..م تفوقى انا طلقتك
هو بالعافيه !
غادة: انا الى افوق يا سبع البرومبا يالى رايح تتجوز
لا يا حبيبى انت الى تفوق..ده بيتى والشقه من حقى وانا حاضنه
ممدوح: ده مين بقى ياختى الى قالك كده
غادة: القانون ولو مش عاجبك اتفضل ارفع مليون قضية واشتكى وانا مش طالعة من هنا
ممدوح:القانون ! طيييييييب انا بقى مكنتش عايز اجيب مراتى الجديدة الامورة السمبتيك
هنا
وقاعد عند امى
لكن والله لاجيبها..ماهو بيتى يعنى بيتها
وهنشوف ياغادة
وعند بعند
سابها وخرج ورزع الباب وراه
غادة: ههئ هاتها يا سبع الرجال وانا بقى هوريك شغل الازرق ع اصوله
ده ربنا قالها
كيدنا عظييييييييم !
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
فشغل وسام ..
بعد م شريف نزل عادى الشغل بعد وفاة باباه ، كان يوم عادى جدآ
بيتكلم ويضحك ..كل حد وشخصيته بقى
مش معنى ان باباه مش يهمه ..بس شريف مش بيحب يوقف ع حاجة تزعله
ومن بعيد كانت بشرى واقفة فالكوريدور وكان وسام معدى
بشرى: اشتاذ وشام ..ازيك
وسام: ازيك يابشرى
بشرى: شحيح مشافر وهتشيبنا ؟
وسام: ادعيلى بالتساهيل يابشرى
بشرى: والله يااشتاذ وشام انا مبقاليش هنا غير كام شهر بش والله انت راجل محترم ويتزعل عليك
وسام: ربنا يخيلكى يا بشرى ده من ذوقك
بشرى: بقولك يااشتاذ وشام عايزة اشألك ع حاجه
وسام: اتفضلى
بشرى: حضرتك نازل تشلى فالجامع العشر مش كده
وسام: ان شاء الله
بشرى: طب بش يااشتاذ وشام انا بشلى برضو بش مش بركز خالش دايمآ افكر فحاجه او انشى الالايات
واتاوب كتير
وبحش ان شلاتى مش مقبولة اعمل ايه
بشراحه بحش انك منك لربنا كده وفاتح عليك ربنا يعنى ماشاء الله
وسام: بصى يا بشرى انا هفهمك ببساطة اوى الى انتى فيه وتعملى ايه
بقصة صغننه كده
بشرى: اتفضل
وسام: تخيلى انك بتقدمى فشغل مهم وقاعده فالانترفيو
واول م جه النترفيور يسألك
انتى شغاله تبصى عالمكتب وتتفرجى عالديكورات
ومش معاه خالص
ومش لابسه كويس
ومش مهيأة نفسك لمقابلة ولا حاجه
وبعد م ييأس منك الانترفيور يقولك انتى مقدمة عالوظيفه دى ليه
تقوليله
عشان تعينونى ب 5000 جنية فالشهر
وتدونى كل الاجازات الرسمية وليا يومين فالاسبوع راحه بالمرتب
وعربية تودينى وتجيبنى وانا قصاد كده مش هشتغل وهنام هنا فالمكتب طول فترة العمل
بشرى: ايه هو ده ! لا طبعآ ده اشتهبال
وسام: لا وكمان بتنزلى من الانترفيو وانت متأكده انك اتقبلتى ..
هو ده الى انتى بتعمليه
ولله المثل الاعلى
انا ضربت مثل بقصة عشان تفهمى
انتى بقى بتروحى لربنا 5 مرات فاليوم
مش مظبطة لبسك الكويس لملاقاه الله
ولا داخل جواكى شعور انك بعد شوية هتكونى فحضرة الله عز وجل
وطول الصلاة دماغك تروح لحاجات وتودى فحاجت وتنسى السور وتعيدى قراءة وتصلى هرولة
وفالاخر تسلمى
وانتى فاكرة ان صلاتك مقبولة والعلم عند الله طبعآ
بشرى: ايوة شح!
وسام: الى عايز اقولهولك انك تحاولى تكونى فمعيه الله وتتهيأى انك هتقابلى حبيبك
ربنا سبحانه وتعالى
وتجعلى ال 5 دقايق دول من امتع الاوقات فيومك
وتركزى فكل حرف وكل كلمة مش تسميع وبس
انا عايز المرة الجاية تقوليلى بزعل لما يفوتنى فرض
او لما بخلص صلاتى وبقوم! ماشى
بشرى: الله اكبر عليك ربنا يحرشك من العين يارب
طب طلب تانى معلش
وسام: قولى
بشرى:انا عايزة اعزى الاشتاذ شريف اقول ايه، اصلى مبعرفش بيقولو ايه فالحجات دى
وعمرى م عزيت حد
وسام: قوليله البقاء لله ..
بشرى: بش!
وسام: لو عايزة تذكرى حاجة من القرآن يعنى كأنك بتواسيه يعنى ع فراق باباه وكده ممكن
بشرى: ماشى يااشتاذ وشام..كتر خيرك تعبت حضرتك
وسام: لا تحت امرك
مشى وسام وقربت بشرى ناحية شريف وعايزة تعزيه
وشغاله تجمع فأى آية قرآنية مناسبة تقولهاله ..
بشرى: البقاء لله يااشتاذ شريف
شريف: (شال الهيد فون وبصلها برخامه ورجع بص للجهاز) سبحان من له الدوام ياست بشرى
بشرى: يعنى متزعلش ومعلش يعنى وربنا يرحمه ده ربنا قال
وجعلنا من الماء كل شئ حى
شريف: (بص ع فجأة وشال الهيد فون) وجعلنا من الماء كل شئ حى !!
جاية تعزينى تقوليلى فعزا ابويا وجعلنا من الماء كل شئ حى
بتعزينى فكولدير!!
بشرى: (بعصبيه) الله!! مش جاية اعزيك وبقولك من القرآن وبواسيك هو انت فيشى حاجه عجباك ابدآ
شريف: فيشي!! فيشي ايه وكوبس ايه يا شيخه
تصدقى انا كرهت عزا ابويا عشان ييجى عليا يوم وواحدة زيك لا تفقه شئيآ فى هذة الحياة تعزينى
بشرى: تشدق انى غلطانة انت ليك الى يديك ضهره (خمست فوشه) ياباى
شريف: يابت بطلى الحركة دى بدل م افتحلك عينك حرف أكس!
جه وسام من بعيد
وسام: يوووووووه يا شريف البنت جاية تعزيك فيه ايه
شريف: ياعم بتقولى معلش وجعلنا من الماء كل شئ حى .. بتعزينى فشجرة دى ولا ايه
وسام: ههههههههههههههه طب خلاص خلاص خانها التعبير
روحى انتى يا بشرى ع شغلك
بشرى: وانا الى هديت من ناحيتك وقلبى انفتحلك ياباى عليك (مشيت )
شريف: قلبى انفتحلك ..جاتك البلا فيكى وفشكلك العكر
بت شبه الصندل
وسام: بقولك ايه متبقاش ع طول هاجم عليها كده فالفاضية والمليانة يا شريف
شريف: ياعم دى حسستنى اننا رابطين الكوباية فقلب النعش بتاع ابويا
وجعلنا من الماء كل شئ حى قال
جاتك داء المية يا بعيده!
هلاقيها منك ولا من الطوبة الى شنكلت نفسى بيها الى اسمها نهال
ولا سفر وسام
صبرنى يااااااااااارب
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
عدت الايام وجريت ..
والاجراءات انتهت خلاص ..وعقد وسام جه
وهو عمل حفظ لوظيفته فالشركة .. وبدء فالتحضير للسفر
منقدرش نوصف حالة مى عاملة ازاى ، عياط وعدم نوم
والبسمة الحلوة والشقاوة راحو
بس بتحاول تضغط ع نفسها وتبين عكس كده قدامه
حتى هو مكانش مبسوط اوى ..بس كان كل م يبص لبتول ده فحد ذاته بيديه دفعه يكمل الخطوة الى خد قرارها وييجى ع نفسه
ومى بتحضر شنطه وحاجته ... قرب ناحيتها وباس دماغها
وسام: هاتى عنك انتى تعبتى كتير انهاردة
مى: لا يا حبيبى مافيش تعب ولا حاجة
وسام: طب انا عايزك تسيبى الى فايدك دقيقة
سابت الهدوم وقعدت
وسام: عايز امشى وانتى مبسوطة وبتضحكى وبتتنططى حواليا وكأن مافيش جديد فحياتنا
مى: تعرف انى انا الى عايزاك تمشى وانت شايفنى كده بس مش قادرة
وسام: لا هتقدرى ..عشان حبيبك بيحب ضحكتك وشقاوتك وجنانك يا مجنونة
متحرمهوش منها
مى: وسام انا قلبى مقبوض وخايفه من السفرية دى
وسام: ده عشان بس اول مرة ابعد عنك ..لكن ان شاء الله الايام هتعدى بسرعة وانزل اجازة
وبعدها اجى اخدكم
مى: انا مبسوطة عشان مش هتمشى مع فانيليا الحمدلله
وسام: هههههههه يعنى هى هتسندنى .. هى سافرت قبلى عشان تظبط الدنيا قبل م انا اروح
وبعدين انا مش كنت هبقى حابب نسافر سوا والجو ده
هى واحدة الى بحب اسافر معاها
مى: مين هى (ضحكة حلوة)
وسام: واحدة طلعت عينى زمان مقالب وسحالى
مى: هههههههههههههه
وسام: وتخبط عربيتى مرة وتحرق بيتنا مرة وكانت هتجيب لامى وابويا سكته قلبيه
مى: ههههههههههههههههه
وسام: وتعضنى فالاسانسير عشان مسكتها من الكدش بتاعها ..وفالاخر تجرى الايام
وربنا يقولى خد ياوسام
ادى اخره اعمالك الطيبة فالدنيا
هجعلهالك حبيبة وزوجة وام ...مبسوط
مى: وانت مبسوط بقى (بدلع)
وسام: هو انا مش مبسوط اوى
مى: (ضربته فكتفه) يا جزمة !
وسام: جزمة !! ست تقول لجوزها يا جزمة
لالالالا انا شكلى هتجوز واحدة امارتية من هناك تعاملنى بأدب عنك (طلع لها لسانه)
مى: عشان كنت سافرت ماسكالك سكينه من هنا واقطعك حتت واعمل عليكم خلطة وافرق
وسام: تقطعنى حتت واهون
مى: ايوة مش هتتجوز عليا ياخويا
وسام: وبعد م تقطعينى مين هيقولك يا مشمش ..ويا حب
ويا مناخوليا
وهاتى أطة
ومتفكون ! هاه
قوليلى كده
مى: (عيونها دمعت ومسحتها) بس بقى واسكت ...انا مش عارفة هعمل ايه من دلوقتى
وسام: كل خير يا روحى ...مش هسيبك ولا ساعة
مى: ولا دقيقة ولا ثانية ع طول تبقى معايا
واتس سكايب لاين
اى حاجه
وسام: ولو اخترعو حاجة تخلينى اعرف المس وشك وشعرك الحلو ده من بعيد لبعيد
هجيبها عشان متحرمش من لمستك
مى ابتسمت وحضنته
وسام: يلا بقى مش هننام عشان الرحلة بكرة الصبح
مى: ايوة يا حبيبى طبعآ ...
قامت هدت الانوار وجت جمبه وطبعت بوسه ع خدوده وهو باس كف ايدها ...والليلة عدت
وكل واحد مفتح عينه بيتخيل لحظة الفراق
وعامل نفسه نايم
وجت فعلا اللحظة..وبعد م ختم الاوراق وعمل الاجراءات وقالو ان خلاص الرحلة هتطلع
ومشى وسام ناحية دخول الركاب
كان شريف ومى وبتول واقفين ومى بتعيط ومش ماسكه نفسها
وقبل م يدخا وسام البوابة سمع صوت بتول
" بااااااااابى ..متمشيش!!"
رجع وسام جرى وهما جريو عليه جامد ..كان منظر زى الافلام بالظبط
وال 3 بيعيطو
فحضن بعض
مى: اوعى تنسانا هناك (بتمسح دموعها فيه وهى فحضنه)
وسام: صعب... صعب انسى الحلم
الى مغمضتش عينى علشان اشوفه
مى وبتول ♥♥
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
ونكمل بكرة
استنوها يوميآ
#ويسو_وميوش_وتوتا_وخلصت_الحدوتة
#لنورإسماعيل
ليست هناك تعليقات:
إرسال تعليق