سامعين !
اغنية بارك الله لهما لماهر زين شغاله .
بارك الله لكما وبارك عليكما وجمع بينكما فالخير ... مش هو بيقول كده!
وانهاردة كتب كتاب ويسو وميوش.. وبعد م بيخلص المأذون كتب الكتاب بيفول الجمله دى .
اليخت بيتجهز بأحلى التجهيزات والاشراف عليه مريم ، اقولكم ع سر ؟!
مافيش كوشة للعرسان
هيقعدو ع تربيزة وسط المدعووين عادى .. ده ان قعدوا.
مافيش اضاءة لان نور ربنا طالع .. مانتو عارفين الفرح بالنهار ... محطوط بانر كبيييييييير اوى ع باب اليخت لصورة لمى ووسام معموله بالكارتون .. وجمبها صورهم بجد، مرصوصة بشكل شيك ورومانسية اتصوروها قبل الفرح زى ما قالت مريم
وفأول الصف وحدهم صورتين فقلب احمر لوسام وهو صغير ومى وهى صغيرة كأنهم بيبصو ع بعض ..
الانسة ميوش العروسه بتجهز وبتلبس الفستان وهتعمل الميكاب .. فالوقت الى كان وسام مستنى حد مهم جدآ هيحضر ومش عارف يوصل ازاى ومستنيه بنفسه !
عايزين تعرفو مين ؟
طب تعالو نروح لترتيبات مريم ونرجع لوسام يكون الضيف جه ،
مريم بتشرف عالبوفيه المفتوح ومعاها سهر اخت العروسة وماما وسام .
ومن فوق لتحت بتبص ع ميكاب العروسة وطريقه لف الطرحه زى ماهى رتبت بالظبط .
بابا وسام مش سيعاه الفرحة والناس الى جت من طرفهم اذا كان قرايب او معارف ، وزمايل الشغل شركة فودافون كلهم حاضرين ..
والصاروخ شيرين افندى جت قبلهم .
نرجع للعريس الى جاى ومبسوط انه ضيفه وصل بالسلامة ...جه الوقت تعرفو مين الضيف.
مدام منى !!
وجوزها انور .. ههه مفجأة مش كده .. العشرة مش بتهون طبعآ اول واحدة عزمها ويسو هى وجوزها عشان تحضر كتب كتابه ..
رغم ان المدام حامل فشهورها الاولى ، الا انها اصرت تحضر ..
وسام: تعالى اطلعى يا منى .. اهلا وسهلا نورتونى
انور: مبروك يااستاذ وسام ، والله من امبارح مش سيعاها الفرحة وعاوزة تيجى بفارغ الصبر
وسام: انا مكنتش هعرف افرح الا بيكم .. انتو اخواتى
انور: الله يعزك يارب
منى : دى هدية بسيطة يا وسام من حجات كتير انت عملتهالى
وسام: طب اسكتى متقوليش الكلام ده ، وايه الى انتى جايباه ده
منى كانت جايبه علبة شيكولاته غاليه معاها ردآ لجمايل وسام وعشان تهاديه كمان .
منى : ده ولا حاجة .. فين العروسه ؟
وسام: بتجهز تحت .. انا هكمل تظبيط لانى والله قطعت كل حاجة عشان اعرف استقبلكم
قعدوا منى وجوزها ورحبو ب بابا وسام ومامته والناس وباركت لها مامت وسام عالبيبى .
الD j بيستعد
مى قربت تخلص ووسام كمان ..
وهتبدى الحفلة ..
الكل حاضر ومستنى لحظة طلوعهم من تحت لان الفرح ع سطح اليخت ..
شريف واقف ع راس وسام بيصوره..
شريف: قولى يا وسام ايه احساسك فتلك اللحظة ؟!
وسام: بتصور فيديو؟
شريف: اه ، اخلص
وسام: ههههه مبسوط جدآ طبعآ
زميله من الشغل: طب قول حاجة للعروسه؟
وسام: بحبك حب عايز قلب تانى معايا عشان اكفيكى
شريف: ههع ياسيدى
شريف اخد بعضه وراح لمى فأودتها ..
شريف: ايه احساسك ياعروسه؟
مى: فاضللى جناحات واطييييييييير
شريف: طب طيرى ياختى ، ربنا معاكى
خلصت مى وطلعت وكان مستنيها وسام برة واول م شافها فرح اوووى وجه ناحيتها وهمس . " مبروك يا مراتى ياحبيبتى " وباس دماغها راحت امنية مصفرة والبنات فرحو
وكانت لاول مرة فالتااااااااريخ مى تتكسف وتحمر زى البنات العاديين ,
دخلو اودة للتصوير فاليخت ومعاهم الكاميرا مان وكل م يقلهم ع حركة يعملوها سوا متعجبش مى وتقوله عايزة حاجة مطرقعه ووسام يسكتها بالعافيه لحد م طلعت عيون المصورالى هو اصلا كان اتخنق من العروسة وبردو مشى الى فدماغه وعملو البروفايلات الى هو عاوزها.
عملو كام صورة تحفه عشان الالبوم .
نزلت مريم بصت ع الشكل الاخير وقالت يستعدوا يطلعو ..
وسام طلع من ناحية وبتزفه بنات صغيره لابسين ابيض زى الملايكة ع موسيقى كمانجا تحفه ومى من الناحية التانيه وبرضو نفس الزفه ..
الكل اول م طلعو سقفو وانبسطو عشان شافوهم قمامير كده ،
وقف هو ووقفت هى قصاد بعض وجاى ياخدها من ايدها راحو اصحابها وقفو مرة واحدة !
وربطت ليلى عنيه بشريط خفيف ... وجريو كلهم حواليها وقالو بصوت عالى
"لو بتحبها .. قلبك هيعرفها مش عنيك "!
الحركة دى كانت فحفلة امريكيه وعجبت مريم ودى من الحجات الى دربتهم عليها قبل الفرح .. كانت حركة غريبة عالكل ومستنين وسام هيعرف يجيب مى من بينهم ولا لاء!
مشى وسام ناحية البنات ومى كانت فوسطهم واول م مد ايده مسكته امنيه شال ايده وضحكو الناس عرف يعنى انها مش عروسته وبعدها غادة وبردو لا وهو لوحده مسك ايد مى راح اصحابه صفروا وقالو مع بعض مع انهم مش متدربين ولا حاجة " ههههه ياجااااااااااامد! "
واول م لقاها شال الشريط من ع عنيه ومسك ايدها باسهم وخدها وقعدها ع كرسى وقعد هو قدام المأذون وباباها من الناحية التانيه .وهيبتدو يكتبو الكتاب .
تعرفو ان فاللحظة دى قلب مى كان بيرقص من الفرحة ، لدرجه ان عيونها دمعت بس مريم ضحكت وقالتاها تمسك نفسها عشان الميكاب مش يبوظ .
شايفه وسام وهو حاطط ايده ف ايد باباها وبيردد ورا المأذون ..
سهر: (فودان مى ) الف مبروك يا حبيبتى
مى : قلبى بيدق لدرجة رهيبة ياسهر
سهر: ادعى ربنا دلوقت دعائك مستجاب .. وادعى لاصحابك متنسيش.. ربنا يفرح كل الناس يارب
المأذون بيقول والناس بتصور ، محدش كان سايب من ايده كاميرا فون او تاب كلهم بيصورو وشريف لازق لوسام وشغال يطبطب ع كتفه .. وبابا وسام بيمسح دموعه من الفرحة ومامته مستنيه يشيلو المنديل عشان تزغرد بقى ..
اما منة وامنيه وغادة جريو يقرصو مى فركبتها وهى تصرخ وتضربهم والكل يضحك ..
ووصل المأذون لكلمة والصلاة والسلام ع اشرف المرسلين .. وراح شريف شايل المنديل مرة واحدة وكلهم هاصو وقالو هيييييييه الشباب اصحاب وسام والبنات زغارييييييييييد ورا بعض ورا بعض وكذا حد طلع العب ناريه وبدأ يضرب فالهوا ورا بعض تعمل شكل جميل فالسما ..
شيرين بتبص عاملة نفسها مبسوطة ومبتسمة وهى هتطق ، سيبكم منها دلوقت خلينا فالفرح
بصمت مى عالقسيمة وبصم وسام وكانوبيصورهم البنات .. والفيديو مان
وبعد كده قامو ووقفو فوسط اليخت قصاد بعض ومى سألته والكل ساكت لان لسه مش اشتغلت الاغانى ..
مى : اول مرة شوفتنى ؟!
وسام: اتخانقنا (مبتسم )
مى : احلى حاجة فيا ؟!
وسام: جنانك ... مين قال بحبك الاول ؟
مى : انا
وسام: امتى ؟
مى: لما اتقفل باب الشقه
وهما بيتكلمو والكل معاهم ومستغربين ايه ده .. سألت منى مامت وسام ..
منى: هما بيعملو كده ليه
مامت وسام مش عارفه تجاوب راحت جاوبت ليلى ..
ليلى: دى حجات اتدربو عليها يا منى عشان الفرح من تصميم مريم الى واقفه هناك دى ، مى طلبت فرح متعملش
منى: هو هههههه من ناحية انه غريب ومحصلش فأنا ماشوفتش زى كده قبل كده
ليلى : (بتبص عليهم بفرحة ) بس حلو اوى انا عجبانى الافكار دى
بعد م خلصو كلامهم الصواريخ انطلقت فالجو وبصو لفوق وهما شابكين ايديهم ..وبدأت كل م تنضرب واحدة منهم يتعمل حرف من حروف العريس او العروسه ..
وجه معاد تلبيس الدبل ، واشتغلت اغنية الله الله لسامو زين وقعدت مى فوسط المدعوين وجالها وسام وركع ع ركبة ونص وفتح علبه صغيرة فيها الدبله ولبسها وهى عملت مخضوضه وباس كف ايدها من جوه وهى لبسته دبلته وبعدين هو لف ولبسها النيكليس وخد ايدها لنص اليخت وبدأو الرقصة السلو ..
بيرقصو ع قلبى يدق لكارمن سليمان وهيمانين .. كان شريف رجع لعند شيرين ورا ..
شيرين: غريب اوى فرحهم
شريف: اه فرح مجنون .. العروسه عايزة كده
شيرين: مممممم هى شكلها كده اصلا
شريف:ربنا يعينه، عقبالك
شيريم : ههههه عقبالى ! لا عقبالك انت الاول
امنية بتبص عليهم وسرحانه وفجأة بتبص جمبها ملاقتش شريف غمزتها منة انه واقف ورا مع بنت راحت جابته وجت ..
امنية: مين دى ؟
شريف: دى زميلة لينا ف ايه ؟
امنية: طب اتفضل متتحركش من جمبى
شريف: ليه يعنى هتوه
امنية: نعم!
شريف: حاضر يا ماما ادينى وقفت (بيبص عليهم ) شايفه الحب يا نكد !
امنية: ايه ياخويا
شريف: بقولك شايفه الحب ياحبى (وعمل بايده عايز يخنفها من وراها خلى شيرين تضحك بصوت عالى )
مى ووسام وهما بيرقصو ..
مى : (بهمس خاالص) شايف كلهم هيطقو منى !
وسام: عشان زى القمر طلعآ
مى: لا مش عشان كده وبس ، معظم البنات الى حاضرة دى عيونهم عليك
بس انا الى فزت نياهاهاهاها
وسام: ومين فيهم هتكون نص مى عشان يتملى عيونى بيهم
مى : انا مبسوطة عشان بغيظهم
وسام: عايزة تغيظيهم اكتر ؟
مى : ايوة
وسام: امسكينى اوى ومتسيبينش وانا هلف ايدى اكتر حواليكى وبصى فعيونى كده
مى: يالهووووووووووى عليك يا ويسو .. قلبى هيقف
وسام: بحبك اوى والله
مى : طب بقولك ايه
وسام: نعم ياروحى
مى: انا بقيت مراتك خلاص صح
وسام: صح
مى : يلا اعمل حركة متهورة مرة واحدة زى الافلام الاجنبى وانا هعمل نفسى مش واخدة بالى !
وسام: ههههه تانى حركة متهورة ؟ كش عارف ايه اخرتها معاكى انتى !
مى : ايوة وفيها ايه مش بقيت مراتك
وسام: لما نتجوز
مى: م احنا متجوزين .. المأذون لسه موجود اسئله
وسام: طب والناس يا مجنونة ؟
مى: انساهم
وسام: واهلك واهلى
مى: انساهم
وسام: مصممة يعنى ؟!
مى: جدآآآآآآ (غمضت عنيها )
غادة ومنة واقفين .. جمب ممدوح وسامح
منة: اموت واعرف بيقولو ايه ؟
غادة: ياستى وانتى مالك .. بكرة تتخطبى ويتعملك كده ..
منة بصت لغادة ولاوت شفايفها ورجعت بصت عليهم ..
ومامت وسام بترقيه فسرها وبتقرا المعوذات ليتحسدوا من جمالهم انهاردة
اما منى فمش كانت عارفه تبص عليهم كويس...شريف واقف قصادها!
منى: اوعى ياشريف.. مش شايفه
شريف: ايه عايزة ايه؟
منى: مش عارفه اتفرج منك
شريف: هو سيرك ! انا عارف ايه الى جابك (بص لجوزها) منور ياانور
منى: يابابا اصلا وسام مينفعش يعمل فرحه من غيرى
شريف: ايوة مينفعش صحيح .. مين الى هيلم اطباق البوفيه بعد الفرح (بص لجوزها ) منور ياانور
انور: هههه بنورك يااستاذ شريف
منى: طب غور بقى
شريف: جاكى غورة! 3
والاغنية خلصت راحو هاصو الشباب وشدو وسام من مى والبنات شدو مى وهاتك يارقص بقى ، والدنيا ولعــــــــــــت
شريف: ايوا بقى هو ده الفرح ع حق مش تقولى امريكى واسرائيلى ياشيخ بلا كلام فاضى
وسام الاول اتسف وبعدين اتشجع ورقص وسط اصحابه ومى كانت بترقص بلدى والبنات عاملين حواليها دايرة وبيرقصو برضو
نحدش كان قاعد فالفرح .. كلهم واقفين بيتنططوا .. مافيش غير الناس الكبيرة فالسن هما الى قاعدين.. ومنى وجوزها .
ووسط م هما بيرقصو شريف جاب شيرين ودخلها فدايره البنات وهى بتقوله مبعرفش ارقص .. راحت بردو خدت بالها امنية وجريت عليه بسرعه
امنية: وبعديييييييين معاك ؟ عدى يومك ع خير يا شريف واقعد فحتة بدل م انت عامل زى الدبانة الدكر كل شويه ماطط فحتة عالزبالة دى (بتبص ع شيرين)
شريف: ايه عدى يومك دى .. هتدبحينى بعد الفرح ولا ايه
امنية: اوف ! انا مش عايزة اتخنق انهاردة انت فاهم
شريف: اوف ! بتنفخى يا امنية .. ماشى ماشى
امنية سابته ورجعت لهيصة مى ورقصت معاها والبنات كلهم وشيرين لاحظت غيرة خطيبه شريف عليه بس محطش فبالها ..
اغنية حبيبى مالى عنيا اشتغلت وراح شريف قال بعلو حسه :
شريف: سمع هـــــــــــس!
زميل ليهم فالشغل : ايه ياشريف هتنقط ولا ايه
المعازيم : هههههههههههه
شريف راح عند تربيزة بابا وسام وخد ايده
شريف: عم عاصم قال هيرقص ففرح ابنه سمعنى الهضبه بصوت عالى يابنى !
الاب: لالالالا بس ياشريف
شريف: لا هتقوم ياعم عاصم ده فرح ابنك الوحيد وسام السنكرى
الاب: يابنى ابعد عنى متشبطهمش فيا
البنات اتلمو وخدو وهو يقول لا
البنات: والنبى ياعمو والنبى
مامت وسام: يابنات عمكم تعبان
مى جريت من وسطهم وراحتله وشدته ..
مى: لو مش هترقص يوم فرح ابنك يبقى ترقص عشان بنتك
بابا وسام اتحرج من مى وفنفس الوقت وسام واقف باصصله .
ومن الفرحة لقى نفسه مسك ايد وسام ومى ولف بيهم كده وهو بيهز راسه عالاغنيه مبروك لفارس كرم
والشباب فرحو خالص
شريف: ياعم عاصم ياسكره ايه الحلاوة دى
وسام بعدها باس راسه وايده وطبطب عليه باباه ورجع قعد مكانه جمب مامته
وبعد رقص وفرحة حلوة وصور ضمت كل الحاضرين مع العرسان وكتابه اهدائات ف تشست بيعدى ع الحضور كلهم .
خلص الفرح الساعة 4 بعد العصر ..
شريف: هههههه عمرى م شوفت فحياتى احضر فرح وبعد م يخلص ابتدى يومى
اما عجايب يا جدعان
امنية: طب والله فرح تحفه
ليلى : فعلا جميل اوى
خلص الفرح وبدأو الحضور يمشو بعد م اتملت عربية مى وعربية وسام علب الهدايا من اصحابهم من الطرفين خصوصآ اصحاب وسام ..
ونزلو بلبسهم والميكاب والدنيا دى اتغدو اهل العروسين مع العرايس فالمطعم الى بيحبه وسام .. فاكرينه ؟
بتاع اليوم الوسامى
اهو هو ده
وشريف مش قاعد ع بعضه شغال تصوير فيهم ويغلس ع وسام ومى ..
وبعد الغدا وهما مروحين ..
مى: انت يدوب تنام ساعتين كده وتصحى للشغل التقيل
وسام: شغل تقيل ايه بس هو لسه ف حاجة تانى .. انا اتهديت انهاردة
مى: انت لسه شوفت حاجة
وسام: انا الى جبته لنفسى هههههههه
روحو كلهم وشريف بيسلم ع وسام .
شريف: الف مبروك يااخويا
وسام: عقبال فرحك يا حبيبى ..
شريف: ربنا ما يحرمنا من بعض ابدآآ اهم حاجة انك رجعت تضحك
افرح يا وسام
الدنيا مش مستاهلة والله ، اديها بالشوز وامشى محظوظ
وسام: ع رائيك .. اهم حاجة الفرحة وسط حبايبك
امنية : طيب بالمناسبه دى يلا بسرعه ع باب العمارة كلنا كده جمب بعض صورة سيلفى هنزلها حااااااالا عالفيس عشان اكتب ان الفرح شطب
شريف: الفرح شطب .. انتى بتقفلى دكانه !
امنية : مش بكلمك ع فكرة
شريف: طيب احسن
امنية: احسنين!
عم سليمان : استاذ وسام استاذ وسام حمدلله عالسلامة والف مبروك يا زين م اختارت الست مى
وسام: الله يبارك فيك ياعم سليمان
مى: تعالى معانا ياعم سليمان اتصور بردو ههههه
عم سليمان:.. اتصور معاكم!
شريف: تعالى يا سليمان اتصور ماهى زاطت
امنية: يلا سميل بلييييييز
1
2
اتاخدت الصورة وكلهم بيضحكو فمكان مش بتاع صور اصلا وقدام الناس .. ماهو ان كان ع وسام فهو اتجنن زي مى وبقو وجهين لعمله واحدة
وابتدى المشوااار ..واهى بقت مرات حضرته.. بس لسه يدوب احنا بنقول ياهادى
وماخفى كان اعظم!
ليست هناك تعليقات:
إرسال تعليق