ღ•انــا ابقـى مرات حضرته !•ღ الحلقة الثانية ( الجزء الثانى من لسه اجمل يوم مجاش )

كانت مى جت وغيرت وقاعده بتتشات فالصالة عالاب وسمعت الصوت .

ايه ده !
ده صوت وسام .. وبيضحك مع واحدة ست ..

قامت جرى وبصت من العين السحرية لاقته فعلا بيحطلها الشنط وعم سليمان مطلع الباقى وهى بتضحك مع وسام وبتضرب كف ع كف ..

خرجت مى زى المجنونة ومنكوشة وبفردة شبشب واحدة !!

مى : الله الله ... يعنى انت تحلم بفرحنا امبارح ، وجايبلى العروسة عالجاهز انهاردة !!!
وانا اعمل ايه ؟ اقوم ازغرد ... مبعرفش للاسف 

ليلى :(بتبص باستغراب لمى ومستحقرة منظرها  ) ايه ده ! ف ايه يا وسام ؟!

مى: ف ان حضرتك ده يبقى خطيبى الى انتى شغاله ضحك وكركرة معاه كده وكف ع كف ايه !مولد هو 

ليلى : دى خطيبتك يا وسام ؟(بتبصلها من فوق لتحت ) بعد الادب والرقه والاخلاق .. ها الاخلاق بعد خطوبتك لدنيا تخطب دى !

مى : دى ! (بتتريق ع طريقه كلامها ) الادب والرقه والاخلاق !يا ماما الى مش عجباكى دى ...

وسام: ايــــــــه !! المفروض انى افضل واقف ساكت لحد م وصله الردح لبعض دى تخلص والسبب فيها مين ؟!
قدرى الاسود (مسك مى من ايدها وشدها جامد ) انتى فكل حاجة تدخلى زى الغبية كده من غير ماتفهمى 

مى : ايه يعنى مين دى ؟ مش العروسة زى الافلام العربى وانا اخد صدمتى واموت 

وسام: دى ليلى بنت عمتى يا مى ولسه جاية من السفر ، عروسة ايه وبتاع ايه ياشيخة انتى بتفكرى ازاى بس هتشلينى 

مى : (اتكسفت بس لسه واقفه زى ماهى ) وازاى يعنى تهيينى وتقول الادب دنيا والاخلاق دنيا يعنى انا الى من الشارع ياانسة انتى !

وسام: يوووووووووووه ادخلى يا مى شقتك دلوقت 

ليلى : طب انا هدخل يا وسام لان بجد اتخنقت من المقابله دى .. (بتبص لمى ) ميرسى ع مقابلة حضرتك 

مى : العفو (بتبص بقرف ) تعالى هنا كل يوم 

وسام : طب ايه رائيك مش هتدخلى الا لما تعتذرى ل ليلى ع الموقف السخيف ده 

مى : اعتذر (عيونها بتطق شرار ) 

وسام: ايوة ودلوقت حالا ، ومش هكرر كلامى انا 

مى : انا الى اعتذر يا وسام ؟!

وسام: اومال هى ؟ مش انتى الى دخلتى دخلة غلط فيها 

ليلى : خلاص يا وسام مش عايزة اعتذار ولا حاجة ( دخلت الشقه)

مى : وانا مش هعتذر يا وسام (بتبص بتحدى )

وسام: مش هتعتذرى يعنى ؟

مى : ايوة 

وسام:كده ! اوك يا مى (دخل وهو زعلان ) عن اذنك (قفل الباب )

مى وقفت اتنططت بغيظ واتدايقت وراحت داخله ورازعه الباب وراها ...

جوة بقى عند وسام ..

الام:حمدلله ع سلامتك ياليلى (بتحضنها ) ايه يابنى ايه الزعيق الى برة دى 

وسام: مافيش يا ماما (بضيق)

ليلى : ابدآ .. خطيبة وسام استقبلتنى استقبال حافل بصراحة 

الاب: هههههههه معلش هى طيبة بس تقعد تبع بع كده وتنزل ع مافيش 

ليلى : عالعموم عادى حصل خير (بتبص لوسام وبتكلمه بهدوء ) انت تمام ؟

وسام: اه .. حمدلله ع سلامتك يا ليلى 

الام: انا بقى يالولا عملالك الاكل الى انتى بتحبيه كله ، يدوب تغيرى هدومك وتحطى شنطك والاكل هيجهز 

ليلى : والله يا طنط انا مش جعانة 

الاب: ازاى يعنى .. هو اكل الطيارة ده اكل .. انتى هتاخدى اوضة وسام ..

ليلى : انا اسفه لقطع كلامك يا خالو .. انا مش عايزة اعملكم قلق ، انا هاخد الليفنج روم لانى بجد بحب الجو بتاعها وان لازم تلفزيون يدش جمبى وانا بذاكر 
وخلى وسام زى ماهو ف اوضته 

وسام: يا بنتى اسمعى الكلام

ليلى : اسمع الكلام انت ، انا هبقى مرتاحة كده 

الاب: خلاص سيبوها زى ماتحب ..

============•••===========

مى قعدت متدايقه ، قامت لبست ونزلت تتمشى شويه بالعربية ، كل لما بتزعل مع وسام بتتخنق اوى لا بتعرف تاكل ولا تنام لحد م يتصالحو 
بس كرامتها وجعاها ان تعتذر ل ليلى بعد م هى اتريقت عليها .. ولسه كلمتها ان دنيا احسن منها خنقاها اوى 

المهم ..

لفلفت شوية .. وعدت ع سهر قعدت معاها شويه ، وبعدين روحت .. 

جواها مليون سؤال .. مين ليلى 
وجاية ليه
وليه وسام مش قال لها 

وهتطلع من المطب الى حطها لسانها ف ده ازاى ؟؟!

عدت الليلة دى بصعوبة من غير مكالمة من ويسو ولا حاجة .. ولا حتى تشات ع فيس او الواتس 


وتانى يوم فالشغل داخلة ومتعكننه ...

منة : ايه ده مافيش صباح الخير 

مى : لا مافيش  

امنية : ايه مالك مقفلة ليه عالصبح يا بت انتى 

مى : ع ليلى وشكل ليلى القرف ده 

منة : ليلى مين ؟

وكانت لسه هتبتدى تحكى دخلت غادة ، 

غادة : ممدوح خنقتنى .. بقى والله 
يارب خدنى وارتاااااااح

ممدوح: قولتلك مليون مرة متتكلميش معايا كده (سابها وخرج من اوضتهم )

امنية : ايه يا جدعان الاصطباحة الى زى وشكم دى .. كلها خناقات خناقات .. وانت يا حجة مى 
مين ليلى دى ؟

مى : دى واحدة قريبة وسام ... اتخانقنا انا وهو امبارح عشان الهانم كانت شغاله ههيهئ ومهييهئ معاه عالسلم ولا كأنه خاطب وفالاخر يقولى اعتذريلها قال 

منة : واعتذرتى !

مى : انتى غبية يا منة ؟! لو اعتذرت مكنتش زمانى بقولكم مش بنكلم بعض
وبعدين مش انا الى اعتذر طبعآ

غادة : يا سلاااااااام .. ده حتى ويسو يعنى 

مى : ولا ويسو ولا بتاع .. كرامتى اولا 

امنية: لا مى عندها حق ، تعتذر ليه هى بتتكلم فالصح 

منة : خلاص خليكو متخاصمين .. 

غادة : منة حقنه ... هدى متولعيش 

مى : لا منة عندها حق ... والله لو 100 سنة مش هعتذر برضو 

غادة : خلاص يلا .. خليكو متخانقين 
وامنية وشريف قافشين ع بعض لسه
وانا وممدوح ماسكين فشعور بعض 

ويلا خليها خراب بالمرة هيهيهيهيهي

منة : احسن حاجة انى سنجل ,, لا شايله هم خناقه ولا صلح 

قامو غادة وامنية عليها .. 

طب يلا يابت امشى من هنا 

منة : هههههههههههههههه

=============•••==========

خلص يوم الشغل .. ومروحة مى ولسه بتدخل العمارة ، رجعت لعم سليمان ..

مى : عم سليمان .. وسام لسه مجاش من الصبح صح ؟

عم سليمان: ايوة ماهى عربيته مش قاعده .. لسه مجاش حضرتك

مى : طب بص ياعم سليمان .. هات فونك 

عم سليمان: عايزاه ليه يا ست مى ؟

مى : اكيد مش هسرقك ياعم سليمان بفونك الانتيكة ده .. !
انا هكتبلك رقمى ولما ييجى ترنلى ع طول .. ها
انا رايحة اشترى حجات من الهايبر وجاية ماشى 

عم سليمان : يعنى اول م اشوفه ارن ولا لما ييجى ؟!

مى : ايه الذكاء ده ياعم سليمان .. اقولك اول م رجليه تخطى العمارة 
حلو كده ؟
فهمتنى ؟

عم سليمان: واقوله انك عايزاه ؟

مى : يااااااااااااااارب (متغاظة وباصة للسما) ياعم سليمان رن ومتقولش ليه رن وبس
دوس ع الزرار الاخضر ده ومتعملش اى حاجة تانى 

عم سليمان: طب اوعى تفتحى عليا عشان رصيدى خلاص 

مى : ياااااااااارب هتجيلى جلطة ! 

مشيت مى وراحت فعلا الهايبر تجيب اى حاجة لحد م وسام م ييجى ..

عم سليمان رن ! 

جريت مى دفعت عند الكاشير واخدت اكياسها ، وجريت لاقته لسه بيكلم عم سليمان ع مواعيد اجتماع الملاك الاسبوعى عند مين ... بعد م كانت بتجرى بطئت مشيتها عشان يشوفها ويدخل معاها الاسانسير ..

وفعلا خلص كلام وهى بتمشى زى السحلفه .. وركبت الاسانسير ودخل وراها وداس عالزرار ..

وهما جوه ..

مى وقعت كيس من الاكياس بالقرب من رجله !

وسام:اى ! خدى بالك (بتكشيرة)

مى : طا ه

وسام: طاه ! (ضحك ضحكة خفيفة وهز راسه)

مى : لو سمحت متضحكش .. احنا متخاصمين 

الاسانسير وصل 

وسام: طب اوعى يا هبلة .. (خرج )

مى خرجت وراه وهى متنرفزة اكتر من الاول ..

مى : ع فكرة مش من الذوق تشوفنى شايله حجات كتيرة كده ومش تساعدنى 

وسام : (خلاص كان بيفتح الباب) اهو ياستى 
شال منها الاكياس 

افتحى الباب اخلصى 

مى : (بتبصله بصة حب بعتاب ) اهو بفتح 

اتفتح الباب ... حطهم لجوه ومشى ..

مى رزعت الباب وهو دخل البيت ...

سلم ع مامته وباباه .. وخبط ع ليلى يسلم عليها من برة كانت فاوضتها مشغله اليسا وفاتحة كتب ...

وسام: ازيك يا لول 

ليلى : اهلا يا ويس ... تعالى 

وسام : اغير واجيلك 

ليلى : وسام صحيح .. عندى سؤال قبل م تغير ... مُلح عليا من امبارح 

وسام: لازم لازم دلوقت ؟
ليلى : ايوة 

وسام: اتفضلى 

ليلى : ليه خطبت مى دى ؟ واشمعنا هى 

وسام : (بص حواليه وقلع النضارة وحطها فجيبه) عشان ف حاجة بتقول 
لما بتحب حد اووى... اتأكد انك وقعت فمصيبة كبيرة اوووووووى 
ومى مصيبتى الى مقدرش اطلع منها !