ايام الضحك والدموع... ج2 . الحلقة الرابعه...

 "قرار صعب "

 بالفعل ذهبت سالى الى منزل كريم حيث يعيش بمفرده فيه، تطرق الباب فتجده بحالة اعياء شديدة جدآ...يفاجئ كريم بحقيبتها التى بحوزتها فيسألها عن سبب احضارها ويفاجئ بالرد!!

كريم: ازاى تقعدى معايا هنا انا لوحدى مينفعش

 سالى" ماهو انت تعبان وانا لازم اخد بالى منك عشان انت وحدك

كريم: يابنت الحلال انا تعبان خلقة بالله عليكى مش هينفع تقعدى معايا فمكان واحد...اقول للناس دى مين

 سالى: يووووووووه الناس الناس...طز بقى فكك المهم صحتك انا ميهمنيش حد

 كريم: ميهمكيش سمعتك وانتى عايشة مع واحد عازب مالكيش قرابة ليه!!

 سالى: اولا انا فنانة والناس بتحبنى لو عملت ايه...وبعدين انا مش عيلة بضفيرتين عشان اخاف من الهبل الى بتقوله ده وغير كده يكفى صداقتنا القوية تكون قرابة كريم: سيفا انتى بتستهبلى والله، مينفعش يابنتى واسمعى الكلام انا يكفينى سوالك عليا

 سالى: يعنى بتطردنى ؟

 كريم: يالهوووووووى مش كده بس العادات والتقاليد بتحتم الى بقوله ده ان الى انت هتعمليه عيب، ده انا الراجل وخايف من كلام الناس

سالى: خلصت كلامك؟!، انا بقى مش منقولة من هنا ويلا اتفضل انت عالسرير عشان انت تعبان اوى والدكتور قال انك متتحركش مفهوم

كريم: على النعمة انتى واحدة مجنونة وهتودينى فداهية معاكى

 يدخل كريم الى سريره بعد اصرار سالى الشديد ع البقاء معه .. تمر الايام وسالى برفقة كريم، تتابعة بالدواء وتحضر له الاكل الصحى وقد اجلت كل مواعيدها لحين اطمأنانها عليه، وذات يوم تأتى اليه ومعها خبر مفرح..

 سالى: عندى ليك خبر حلو اوى

 كريم: ايه خير

 سالى: الاستاذ ممدوح السعيد مخرج الكليب بتاعنا ظبط الكليب والمشاهد الى صورناها ونزل الكليب فعلا واتعرض فالتيلفزيون.

. كريم: بجد!! طب ازاى ف حاجات مصورتهاش؟

 سالى: هو اكتفى ان يظبط حاجات بمعرفته عشان انت عارف هو ملتزم بمعاد ينزله ف، وع فكرة بقى مكسر الدنيا

 كريم: بجد..الحمدلله..كده بقى الناس هتعرفنى وتسمع كريم عثمان(

يدور بمخيلته رجاء ان تشاهده ندى وتتذكر امنيتها معه عندما ترى الاغنية)

 ***************************

 ذات يوم...مريم قررت الرجوع من عملها ع ندى لتجلس معها بعض الوقت بمنزلها..

 ندى: منورانى يامريوم وحياة ربنا...كلى الكيك ده خفيف مش بيتخن دايت يعنى ههههههه

 مريم: اه انتى عارفة بحافظ اوى ع وزنى عشان متخنش ههههه، ايه اخبار يومك ياندى بتعملى ايه ندى: هكون بعمل ايه...بشتغل فالبيت واخلص شغل اقعد اتفرج عالتيلفزيون او اشتغل تريكو كده اليوم بيعدى لحد م ييجى على

 مريم: اها...ملل بصراحة(ثم تنظر الى التلفزيون فتجد كليب كريم الجديد) ايه ده كريــــــــم يانهار ابيض!!

 ندى:(تنظر بلهفة) اه بجد وسالى الى معاه موديل

 مريم:طب استنى نسمع الاغنية...شكلهم ال2 تحففة يخربيييت جمالهم

 يستمعا الى الاغنية معآ، وتلاحظ ندى ان كريم قد صورها تحت الامطار مثما كانت امنيتها معه...ان يغنى لها تحت الامطار ولكن لم تتحقق هذه الامنيةمعها...بل تحققت مع سالى!

 ندى: شايفة سالى لازقه فيه ازاى، لاء وبصاتها مش طبيعية مش تحسيها تمثيل تحسيها حقيقة

 مريم: هههههههههه اه فعلا مانتى عارفة...سالى هتفضل تنطله زى القرد لحد م يحبها ويتجوزها بالعافية وابقى شوفى

 ندى: يتجوزها!! لا طبعآ كريم طول عمره مش بيحب دماغ سالى بيحها مجنونة وطقة

 مريم: واحنا مالنا يتجوزها ولالا دول ياماما بقو فنانين دلوقت يعنى عشان تشوفى حد منهم لازم تاخدى معاد هههههه(ثم تلاحظ شرود ندى) ف حاجة ياندى...انتى اتدايقتى لما شوفتى الكليب ع فكرة

 ندى: انا !! لا خااااالص اطلاقآ....كلى انتى بس وخليكى فالكيكة هههههههه لم تقتنع مريم بردها...ولكنها تصمت...

****************************

كريم يلقى نجاح كبير من الجماهير التى بدأت تعرفه بعد هذا الكليب، وقد استضاف بأحد البرامج للنجوم الشباب وزادت شعبيته اكثر وفى كل لقاء له كانت ترافقه سيفا!

 ذات مرة...يكون بالاستديو اثناء محادثة بينه وبين مخرج الكليب الذى هو ايضآ شقيق المنتج الفنى له ولاعماله.

. ممدوح السعيد: ايوة كده يانجم ...صيتك بدأ يلمع

 كريم: كله بفضل الاستاذ اشرف وحضرتك

 ممدوح السعيد: طبعآ احنا الى قدمناك للناس اوعى تنسى بدايتك فين، وعشان كده بقى فالالبوم الجاى عايزين حركة اكتر عن ده

كريم: ازاى مش فاهم؟؟

 ممدوح السعيد: يعنى عملنا كليب رومانسى اوولى عشان حضرتك اصريت عليه ومطر ، المرة الجاية بقى عايزين حركة واثارة اكتر...حاجات من الى بتشد المشاهد اليومين دول

 كريم:(بلهجة غاضبة) قصدك ايه يعنى؟؟؟

 ممدوح السعيد: قصدى انت فاهمه كويس...وبعدين احنا مش هنستغنى عن سيفا بردو مش انتو متصاحبين!! يعنى مافيش مشاكل ههههههههه

كريم(يشتاط غيظآ ويلكمة لكمة قوية) انت راجل مش محترم

 ممدوح السعيد: بغضب شديد اصر وقوعة عالارض....انت بتضربنى يافلانتنو مالناس كلها عارفة انها قاعدة عندك فشقتك ياروميو يتجمع كل شخص بالاستديو ويقوموا بابعاد كريم عن المخرج الذى يصر ع ضربه مرة اخرى

 كريم: اقسم بالله لندمك ع الى انت بتقوله ده عشان انت راجل مهزق اساسآ

ممدوح السعيد: انا هرجعك للصفر تانى ...انا الى عملتك ياحيوان( يخرج العقد الذى بينهم من حقيبته)

 كريم:(يأخذ منه العقد بقوة) آدى العقد اهو(يقوم بتقطيعه امام الجميع) ورينى هتعمل ايه بقى

 وليد يقوم بتهدئته فيزيح وليد من طريقه ويخرج وهو متعصب تمامآ مماحدث معه ومما قيل عنه وعن سيفا...

 "دائمآ بعد الليل....فجر! "

 كريم بحالة نفسية سيئة مماحدث له فهو قرر عدم الخروج من المنزل لايام طويلة رغم محايلات سالى عليه الطويلة ان يخرج من حالته هذه ولكن بلا جدوى. وليد يزور كريم بمنزله ليعلمه اخر الاخبار ويطمئن عليه ايضآ، فيبلغه بميعاد قدومه وينتهز فرصة عدم وجود سالى بالمنزل

. وليد: طيب وبعدين، هتفضل كده لابس وش الكآبة ده ومش عايز تخرج ولا تكلم حد

 كريم: المشكله مش فخناقتى مع ممدوح الحيوان ده، المشكله فوجود سالى معايا فالبيت ،دى مبتروحش لداليا صاحبتها غير مرة او مرتين والاقامة الدائمة عندى وبرغم الى حصل بسببها ده والناس بتتكلم عننا وهى ولا هى هنا

وليد: ع فكرة بقى البت سيفا دى شكلها سيكو م الاخر ، اصل بصراحة محدش فالدنيا يعمل الى هى بتعمله ده هى ماعندهاش حد يسأل ولا يرزعها قلمين ع اللى بتعمله ده؟

 كريم: ظروفها وحشة جدآ ، انا عارفها من زمان واشبه بأن مافيش حد يسأل عليها ولا فاكرها

 وليد: بس انت ازاى ممنعتهاش تيجى تعيش عندك...كده ف خطر عليك وعليها وجود راجل وبنت تحت سقف بيت واحد من غير قرابة ده ف حد ذاته يعمللك اشاعات وانت مش ناقص...ده انت ف اول طريقك

 كريم:طب هعمل ايه...قولتلها انا اتخانقت مع المخرج ليه وبسبب مين وهى لا حياة لمن تنادى...هى غلبانة وبتصعب عليا هى من زمان كده بتحاول ترضى الناس ع حساب نفسها ....اعمل ايه بس

 وليد: المهم يامعلم دلوقت ، عندى ليك خبر مش ظريف؟

 كريم: قول ياوليد...معادش يهمنى، انا شفت الاصعب من موضوعى مع ممدوح السعيد ده..

..(يتنهد ثم يعاود حديثه) انا اتضربت بالنار وكنت هبقى قاتل واتعرضت للموت مرتين وشفته بعينى وخسرت حاجات كتييييييييييير غالية عليا...خلاص مبقتش تفرق قول اللى عندك

 وليد:(يندهش من كلمات كريم هذه ولكن لا يأخذه الفضول لمعرفتها فعاود حديثه الاصلى) بص ياسيدى الاستاذ ممدوح رافع عليك قضية رد شرف وكمان بيطالبك بالشرط الجزائى الموجود فالعقد اللى انت فسخته...انا جيت اقولك عشان تاخد احتياطك وتعرف هتعمل ايه

 كريم: (باستهزاء) هه رد شرف...هو الى عايز يعمل رد شرف...واطى صحيح كنت عارف انه هيعمل كده

 وليد: المهم دلوقت هتعمل ايه كريم: العمل عمل ربنا ...كله ع الله انا ممعيش الشرط الجزائى اصلا دلوقت...بس اقولك انا هسيبها ع الله وزى ماتيجى تيجى ربنا عمره ماخذلنى فأى وقت وليد: ونعم بالله...ربنا معاك ياصاحبى

 *****************************

 شهد ويحيي بمكتبهم ويتحدثا سويآ..

. شهد: حبيبى انهاردة مش بيفكرك بحاجة؟

 يحيي: لا بصراحة ايه؟

 شهد: ياوحش...زعلانة منك، انهاردة بقالنا شهرين مخطوبين

 يحيي:(بضحك) والله كل شهر وانتى طيبة

 شهد: لا متنفعش كده

 يحيي: اومال اقولها ازاى

 شهد: لازم معاها كادوهدية حلوة كده لشهد حبيبتك تعبر لها ع حبك

يحيي:هههههههههه هو احنا كل شهرين هنحتفل ونجيب هدية، ده كدة هيتخرب بيتى من قبل م اتجوزك!!

 شهد: كده، يبقى انت مش بتحبنى ومش عايز يسعدنى بقى

 يحيي: ياشهد مقصدش بس

 شهد: مش بس ولا حاجة قوم بينا ع محلات الهدايا يلا يلا

 يحيي: امرى لله

 ***********************

 عالصعيد الاخر.. كريم يجلس وحيدآ، يفكر فى محنته هذه كيف يحلها وهو ليس لديه المبلغ الكافى...فهو يفكر ليلا ونهارآ ولا ينام او يأكل او يخرج فهو منعزل تمامآ . وذات يوم يفاجئ بأتصال هاتفى من هنا.

. كريم: الووو...ايوة يانونو اخبارك ياحبيبتى

هنا: الحمدلله كويس مغيرتش رقمك وبقيت مشهور من المشاهير واتغريت علينا هههههههه

 كريم: عمرى م اتغر عليكى ابدأ،ده انتى اختى ياعبيطة

 هنا: ع فكرة زى القمر والكليب تحفة وكلماته كلها احساس وادائك انت وسالى يجنن كريم: تسلميلى يارب ...كويس انك شوفتيه

 هنا: طبعآ يابنى...بس مالك ياكوكو حاسة صوتك مش طبيعى!

! كريم:(يتنهد بضيق) لا متاخديش فبالك المهم ياندله انتى من شهرين قولتى جاية ومجتيش فينك

 هنا: ماهو ده الى خلانى اكلمك ، انا جاية بكرة معلش سامحنى مقدرتش انزل من ساعتها ...اصل كان ف حاجات مع حسن بيخلصها وورق وكده

كريم: اها ...تيجى بالسلامة هستناكى فالمطار جايه فرحلة كام هنا: جاية فرحلة واحدة الضهر يعنى عندكو 3 اوك

 كريم: اوك يانونو تيجى بالسلامة خدى بالك من كريم الصغير

 هنا: متخافش...هههه سلام ياجميل كريم يضع الهاتف ويبتسم..

.اخيرآ اتى من يسمعه ويقف بجانبه فى محنته بعد شعوره بالوحدة الذى يحيطة دائمآ..

. *****************************

 فى مساء يوم...

.مريم رجعت من عملها وقامت بتحضير كوب من الكاكاو الدافئ وذاهبة للنوم فأذ بهاتفها يرن، من ياترى...انه يحيي!!

 مريم: الو ...ازيك يايحيي

 يحيي: اوعى تكونى نايمة او حاجة؟

 مريم: لا صاحية...عامل ايه انت؟

 يحيي: انا تمام...معلش ازعجتك انتى عارفة انى ماليش صديقات بنات ولا اخوات، وندى دلوقت بيرجع على وهتبقى قلة ذوق لو كلمتها دلوقت فقلت اكلمك انتى

 مريم: انت متستأذنش يايحيي احنا اخوات...اتكلم فاى وقت

 يحيي: حيث كده يبقى كويس...انا كنت عايز اكلمك فحاجة خاصة بيا انا وشهد ممكن؟

 مريم:(تردد بمخيلتها) ملاقتش غيرى الى تحكيله!! (ثم تعاود الانتباه له وتجيب) اتفضل يايحيي سمعاك...

#ايام_الضحك_والدموع_ج2

#بقلم_نوراسماعيل