~~~ أمــل بـــكــرة!! ~~~ الحـــلقـة الاولـــى

أمل....

الحكاية دى عن بنوتة جميلة اسمها "أمل" ،ودى حكايتها من 10 سنين امل بنت عادية جدآ ع قدر من الجمال..شاطرة طول عمرها فدراستها،عيونها جميلة وملامحها ملامح البنت العربية يعنى بشرة قمحاوية والتفاصيل الهادية الى فالوجه.

أمل بنت وحيدة وليها 3 اخوات شباب...أكبرهم ابراهيم اللى من صغره مكانش بيحب التعليم ولا الدراسه خالص كان بيحب شغل ايده ومن صغره اخد ع كده ده غير تحمله لمسئوليه بيتهم من زمان بما انه الكبير. ويدوب اخد الدبلوم وبدأ يشق طريقه بطريقته بالتجارة فخردة العربيات ولوزمها لحد مابقت عنده ورشة وبعد فترة ربنا فتح عليه من تعبه من غير م يعتمد ع حد وبقى معاه معرض سيارات تأجير واستبدال وشراء المستعمل وبعدها ع طول اختار بنت الحلال "هبة" الى كان عايزها من زمان الى فنفس الوقت بنت خالته واتجوزها .

ابراهيم كان حنين اوى ع امل بحكم انه من زمان بعيد عن البيت وملهى فشغله وفالسوق ومش بيشوفها كتير. بيجى بقى للى بعده "امجد" .. امجد ع قدر من الوسامة، وكمان هو غير ابراهيم خالص هو بيحب الدراسه اوى ومن زمان كان راسم لنفسه حلم وفعلا حققه وهو انه يبقى مهندس وهو دلوقت فأخر سنه ليه فالهندسة الى وصلها بعد تعب جامد. بس امجد ف خصلة مش حلوة وهى الغرور ع طول مناخيره فالسما ده غير انه مش حنين ع امل زى ابراهيم ودايمأ واقفلها ع الواحدة

.. ده غير انه علاقته ببقية اخواتة زى العسكرى شخط ونتر واوامر ووالدة ووالدتة تعبه كتير من اسلوبة وتصرفاته. امل بقى تيجى بعد امجد الى احنا هنبتدى حكايتها من وهى فثانوى وكان عندها 16 سنة.

وآخر العنقود "أيمن" الى هو اصغر من امل ب5 سنين ،هو ف2 اعدادى والدلوع بتاع امل وسرها معاه وبيحبها اوى ومش بيحب تصرفات امجد معاها وهى كمان بتفضله فاخواتها وساعات بتدارى عليه لما بينزل يلعب كورة بعد الدرس وبتقولهم فالبيت انه بيذاكر مع اصحابه والد أمل عم" عبدالباقى " ده راجل كوبارة وكلمته مسموعه فشارعهم للكبير قبل الصغير وحتى رجالة العيلة كلهم بيعملوله حساب. عم عبدالباقى عنده محل عطارة كبير والحمدلله مخليهم مش محتاجين حاجة هو كل امله فالدنيا يشوف ولادة مبسوطين واحسن ناس فالدنيا. بس عم عبدالباقى بيقسى حبتين ع أمل عشان هى بنت وحيدة بيخاف عليها م الى بيحصل فالدنيا .

..رغم انه مربيها نفس تربيته للولاد لكن جوة امل اكيد بنوتة عايزة تحب وتتحب وتفرح وتحس انها بنت.

بس ياخسارة امل عمرها م حصلها كده.

..ولاد خلاتها واعمامها وقرايبهم بيشوفها فالافراح بالعافيه ،والشباك مش بتفتحه خالص ولا بتقف فالبلكونة .

.اما التليفون فلو جاتلها مكالمة من صاحبة عمرها "ياسمين" لازم تكون قدامهم المكالمة او ع الاقل يكون ف غفير عليها..

الى هو فالاغلب بيكون امجد وبعد الساعة 10 مافيش تليفونات. والدة امل ربة منزل عادية استسلمت لشخصية والد امل القوية ولسيطرته عليها ومالهاش كلمة اوى فالبيت ..بس بردو هى مامتهم الى بيحبوها وبيحترموها ..لكن ممكن بكون اقرب حد ليها فأولادها هو ابراهيم..

أمل.. بنت منطوية الى حد ما مالهاش صحاب كتير ...مافيش غير انتيمتها ياسمين الى ساكنه فالشارع الى وراهم ومعاها من وهما فالابتدائى . ياسمين دى بقى حكايتها حكاية بتحب ولد فالمدرسة الثانوى الى جنب منهم واسمه علاء بس فصمت وكل بنات فصلهم عارفين وكل يوم الصبح ليها حكاية جديدة بتحكيهالهم وفيوم ليهم فالمدرسة فالفاصل بين الحصة الاولى والتانيه قبل م اييجى المدرس تبدأ الفقرة بتاعة ياسمين وهى بتحكيلهم الى حصل انهاردة بينها وبين علاء وكلهم آذان صاغيه..

. حنان: والان مع الفقرة اليومية الصباحية للانسه ياسمين وسوف تعرض لكم موجز الاخبار بينها وبين الاستاذ علاء ههههههههه المايك معاكى

ياسمين: بطلى غلاسة يارخمة ياحنان...اقفلو الباب يابنات هوريكم واحنا جايين الصبح انا والبت امل من البيت وشوفنا علاء عملى ازاى؟ شيماء: قولى يانحنوحة قولى

ياسمين : هو كان جى كدة ورايح مدرستهم بص ولاقانى وابتسملى ابتسامة جميلة اوى وراح رمالى الكارت ده علارض ومشى

حنان: كارت ايه ده ورينى؟

شيماء: وانتى ياعينى ياأمل يابنتى سنيدة البطله الكومبارس الصامت فالمشهد هههههههه

أمل: يعنى هعمل ايه مانتى عارفة ياسمين ماشية ساكتة ومهما قولتلها بلاش الى بتعملوه ده مش بتسمع كلامى

ياسمين: اكمل ولا هتنصبولى محكمة كل يوم

حنان: لا كملى يافالحة الله معاكى

ياسمين: ورحت قريت الكارت بصو كاتبلى ايه..

" وحشتينى اوى ونفسى اسمع صوتك بقى...مش ناوية تسمعهولى واركب الصوت عالصورة حرام عليكى"

شيماء: ياعينى الحب يعمل اكتر من كده ياولاد

حنان: انا عن نفسى ابن عمى حمادة آخرنا ازيك واهلا وعايز اكلم عمى...هو ده الحب الى بينا ياختى

شيماء: لا خير ...انا بقى شغالة احب فممثلين السينما يوم السقا ويوم احمد عز كل يوم احلم بحد منهم بيحبنى وهيتجوزنى هههههههه ياسمين: عشان هتفضلى طول عمرك هبلة أمل بتسمع لحكاياتهم وبتقول لنفسها هو انا ليه البنت الوحيدة الى معنديش حكاية احكيها او احس ان عندى حد بيحبنى زى ياسمين او حنان .

...لكن بترجع تفتكر انها حتى لو فكرت تعمل كده ممكن تتدبح من اهلها او علاقل تتحبس ومتشوفش الشارع تانى ...تضحك وهى بتسمعلهم وتحط ايدها ع خدها وتسكت يتبع غدآ

====================

~~~امل دلوقت مشغولة اوى بمذاكراتها لانها فأمتحانات اخر السنة للسنة الاخيرة فالثانوية العامة بعد م جابت السنة الى فاتت 75%

وده خلاها تشد ع نفسها عشان تدخل كليه الحقوق زى م هى عاوزة وتجيب مجموع كويس السنة دى . أمل طول الوقت فأوضتها مابين الكتب حتى الاكل والنوم بقى قليل اوى مافيش غير انها بتنزل للدروس بتاعتها وبس حتى انها تكلم ياسمين فالتليفون مبقتش فاضية حتى ترد عليها . وانهاردة بعد آخر امتحان ليها وخلاص خلصت الهم الى كانت شايلاه ،بيخرجو زميلاتها حنان وشيماء من اللجان عشان يقعدو شوية سوا قبل م كل واحدة تروح وياعالم هيشوفو بعض امتى الا لو الظروف كانت فصالحهم ودخلو كليه واحدة! .

ياسمين: كان امتحان رائع..فعلا ختامه مسك زى م بيقولو

أمل: انا كنت متوقعة 90% منه لان المستر كان قايلنا ع حاجات كتير ف فالمراجعة النهائية

ياسمين: لا وانتى دحيحة بشكل...جبتى كل المراجعات النهائية الى فالمكتبات ونزلتى فيهم حرت ههههههههه

أمل: ههههههههه ياناس ياشر كفاية قر..آدى البنات طلعو اهم حنان: امتحان كويس...عملتو ايه يابنات

شيماء: انا ف كام نقطة نسيتهم بس قشطة انا عايزة انجح بس أمل: تنحجى بس! مش مهم تدخلى كليه كويسة يابنتى

شيماء: كليه ايه يا أمل ..انا بالحل بتاعى ده ده لو اتكرمو عليا بمعهد بلاستيك تبقى فل هههههههه

ياسمين: طب تعالو انا عازماكو ناكل فالمطعم الى جنبنا ده وبعدين نروح

أمل: مطعم!! لا مش هينفع ياياسمين ...لازم اروح فالبيت عارفين معاد مرواحى ولو اتاخرت هيتعملى مشكلة

ياسمين: ع فكرة بقى احنا مش هنتأخر وبعدين ياعالم هنشوف بعض تانى امتى...صحيح بالنسبة لى انا وانتى احنا ع طول سوا لكن البنات يمكن يجيلهم تنسيق بعيد عننا ومنشوفش بعض تانى ،تعالى ياشيخة

شيماء: ع فكرة يا أمل انتى بتخافى اوى ..ايه وشك اصفر كده ليه هما هيدبحوكى لو كلتى برة يعنى

أمل: مش يدبحونى بس هما بيخافو عليا اوى ومعندهمش حتة اخرج مع اصحابى والجو ده ...ياسمين عارفة اسلوبهم اسألوها حنان: صحيح ياياسمين؟ ياسمين: هو اه بصراحة عندها ارهابى فالبيت اسمه امجد ...حتة مووز هههههه يخربيته بس عليه دم يلطش لما بيرد عليا فالتليفون بحس انه شوية ويدينى بالجزمة من كتر التناكة شيماء: طب خلاص مدام هيعملولها مشاكل بلاش منها الخروجة دى

ياسمين: لالالالا انا هخرجهالكو سيبوها عليا الحكايه دى.

. ياسمين حطت تخطيط فدماغها انهم هيتأخرو شوية عشان ف بنت صاحبتهم تعبت وهيوصلوها للبيت واتصلت بأهل امل فالبيت من السنترال وقالتلهم الحكاية دى وصدقوها بس نبهو عليها متتأخرش عشان هما بيثقو فياسمين جدآ وقدروا يروحو المطعم مع بعض كلهم. وفى المطعم وهما بياكلو وبيحكو حاجات كتير مابينهم وبيضحكو، بيدخل عليهم علاء ومعاه 2 صحابه وبيقعدوا ع تربيزة قصادهم.

بصراحة ياسمين مكانتش تعرف ،بس اول م شافت علاء ارتبكت ومعرفتش تكمل اكل من الكسوف عشان علاء مشالش عنيه من عليها.

شيماء: يابنتى كلى عادى مالك...اعتبريه واحد عادى من زباين المحل

ياسمين: والنبى ياشيماء ياختى مش عارفة اتلم ع نفسى

حنان: لا جمدى قلبك وكلى وخلصينا عشان نروح.

أمل: ايوة يا ياسمين خلصى عشان نروح احنا كلنا أكلنا يلا بقى انا خايفة اوى ياسمين: طب خلاص انا خلصت اهو فعلا قامو ودفعو الحساب وهما ماشيين البنات...بياخد باله علاء بيسيب صحابة وبيقوم بسرعة وراهم وبينده ع ياسمين.

. علاء: ياآنسة لو سمحتى !!

أمل: (باصة للارض وخايفة خالص) يالهوى ده بينده عليكى

شيماء: ردى عليه بدل الوقفة دى فالشارع وخلصينا

ياسمين: طب حد ييجى معايا طيب

حنان: اخلصى هى حقنة...روحى معاها ياامل

علاء: ياانسة ياسمين

ياسمين :(وشها محمر جدآ وصوتها واطى اوى وماسكة فدراع امل) نعم ..افندم

علاء: انا مش بعاكس...انا حابب اعرفك بشكل محترم ياريت...بقالى 3 سنين معجب بيكى ومش عارف اوصلك..وحابب نعرف بعض لو ميدايقكيش .انهاردة اخر يوم امتحانات ...وخايف مش اشوفك تانى..ده رقمى لانى حابب اتطمن عليكى بجد

ياسمين:(بتزعق ف وهى جواها مليون احساس فرحة ع خضة ع خوف)

رقم ايه ده عن اذنك انا مش م البنات دول بترمى ياسمين الورقة ع الارض وبيمشو كلهم بتاخد بالها شيماء من شكل الورقة وبتستنى علاء يدخل المطعم والبنات يقدمو عنها وبتاخد الورقة وتمشى ....

====================== ...

عدى شهر ونص من الاجازة وامل لابتخرج ولا بتدخل ،مافيش غير مكالمات مع ياسمين وبس ونوم وشغل فالبيت . وكل يوم تتكلم مع ياسمين يقعدو يحكو عن الى حصل مع ياسمين اخر يوم امتحانات ..وان كمان شيماء ادت الرقم لياسمين قبل م يروحو ..وكل يوم ياسمين تحكى لامل انها بتقعد باصة للرقم بالساعات ونفسها تكلمه بس خايفة تروح مطبقاها وشيلاها وتنام وهى مبسوطة وبتفكر فعلاء .. لحد م جه فرح اخت ياسمين وطبعآ ياسمين عزمت أمل وبقية صحابها وكلهم هييجو

...ما عدا امل الى خايفة من رفض اهلها ،واستنت يوم يكونو اخواتها كلهم رايقين وابراهيم ومراته موجودين وباباها عشان تاخد الاذن.

أمل: بابا لو سمحت ممكن استأذنك فحاجة الاب: خير أمل: انهاردة حنة ولاء اخت ياسمين صاحبتى وكنت عايزة اروح امجد: امشى يابت غورى..مافيش مرواح لحتة الاب: امجد!! لما اكون موجود صوتك ميتسمعش...عايزة تروحى ليه ياامل ..الافراح بتلم وانا بخاف عليكى أمل: بابا انا مش هروح الفرح انا بس هروح الحنة عشان اشوف البنات صحابى...هى بس ساعة واحد وارجع والله م هتأخر الاب: امممم ... امل: عشان خاطرى يابابا وافق انا مبخرجش خالص ابراهيم: خلاص ياحج مدام ساعة واحدة سيبها تروح امجد: بس متروحش وحدها...خدى معاكى ايمن اخوكى يوديكى ويجيبك ياحلاوتهم

ايمن: يووووووووه انا عايز العب كورة مع اصحابى الاب: ايمن...خلاص هتروح مع اختك وبعدين لما ترجع انزل لاصحابك ميصحش تنزل وحدها

امل: هيييييييييه شكرآ يا احلى اب فالدنيا

بتجرى تلبس امل وبتاخد ايمن معاها...ولازم طبعآ قبل م تنزل امجد يعمل عليها معاينة اذا كانت لابسه كويس والطرحة مظبوطة ولالاء.. بتروح الحنة وبتفرح اوى ياسمين واصحابها لما بيشوفوها..وطبعآ زغاريد وطبل ورقص بس طبعآ أمل قاعدة تسقف وبس لان حتى فرحة البنات وسط بعض مش عارفة تفرحها دايمآ فرحتها نص فرحة وخايفة من حاجة. ياسمين بتاخد ايدها وبتشدها ناحية الشباك توريها الحنة تحت عند الشباب شكلها ازاى . امل بتتفرج وهى مستخبيه ومبتسمة ومبسوطة وشغالة تشوف الشباب وهى بترقص وفجآة بتلاقى ف شاب وسيم وواقف ع جنب بيسقف والشباب بيشدوه عشان يرقص وهو بيضحك ومش عاوز..فبتسأل امل ياسمين عليه..

. أمل: هو مين الى بيتحايلو عليه ده

ياسمين: ده مصطفى ابن خالتى..

. امل: وهو مش عايز يرقص معاهم ليه

ياسمين: عشان هو بيتكسف خالص وطيب ومالوش فالحركات دى بس كل الناس بتحبه...انتى عارفة ده كان فثانوى وجاب مجموع طب بس ياخسارة مدخلش طب امل: ليه كده؟ ياسمين: اصل جوز خالتى كان أتوفا وكان لازم يشيل هو ورشة النجارة بتاعة ابوه عشان اخواته صغيرين ويسيب حلم طب الى كان نفسه ف ويقف جنب خالتى عشان هو الكبير أمل: يااااااااااه..

ياسمين بتزغرد زغرودة لما شدوه مصطفى وعمل حركتين كده عشان يرضى الشباب يقوم مصطفى يبص عالزغاريد لفوق فيلمح امل جنب ياسمين يفضل متنح لفوق ويبتسم ، أمل بتدخل بسرعة وتاخد شنطتها وتنزل تنادى ع ايمن من وسط الشباب وتروح ...كل ده ومصطفى شايفها من بعيد..

#أمل_بكرة

#نوراسماعيل .. =============